E Jehova Kegha Mwẹ Ẹbo Izinegbe Vbe Egbe Jona

Emwa dan ẹre ọ wa gha rre ẹvbo e Nenivẹ nọ rre Asiria. E Jehova keghi tama akhasẹ e Jona nọ gha rrie Nenivẹ, ne ọ ya ye obọ sekhae ma iran wẹẹ, ne iran fi uyinmwẹ iran werriẹ. Sokpan e Jona keghi mu uhunmwu daa ẹvbo ọvbehe ne ọ mieke na lẹẹ fua. Ọ na la okọ nọ rrie Tasis.

Vbe iran ghi rre uwu ẹzẹ, ogbigbi ẹhoho keghi suẹn, ohan na gha mu emwa hia. Iran na suẹn gha na erhunmwu gie dọmwadẹ ẹbọ ne iran ga, iran na gha nọ wẹẹ: ‘Vbe ena ya de?’ Vbe okiekie, e Jona keghi tama iran wẹẹ: ‘Mẹ ẹre ọ si ẹre. Te I lẹẹ re ne uhunmwu ne Jehova gie mwẹ re. Uwa fi mwẹ fi uwu ẹzẹ, ne ogbigbi ẹhoho na, mieke na dobọ yi.’ Iran ma te hoo ne iran fi ẹre fi uwu ẹzẹ, sokpan ọ na ye gha tama iran ne iran ru vberriọ. Vbe iran ghi gele fi ẹre fi uwu ẹzẹ, ehe hia na ye hii.

Emwi ọkpa nọ ghaa rre Jona orhiọn ọre wẹẹ, uwu ẹre irẹn ghi wa miẹn na. Vbene ọ ya gha dinmwi khian vbuwe ẹzẹ nii, erriọ ẹre ọ ya gha na erhunmwu gie Jehova. E Jehova na ghi gie ehẹn nọkhua rre. Ọ keghi mi e Jona re, sokpan ọ ma wu. E Jona na gha na erhunmwu vbuwe ẹko ehẹn, ọ na tama e Jehova wẹẹ: ‘Ẹghẹ hia, ẹre I khian ghi ya gha họn ẹmwẹ nuẹ.’ E Jehova keghi gbaroghe Jona vbuwe ẹko ehẹn vbe ọwara ikpẹdẹ eha, iyeke ọni, e Jehova keghi ruẹ ne ehẹn nii ya kpa e Jona ye otọ nọ kae.

Ugbẹnvbe Jehova ghi miẹn e Jona fan nẹ, ọni ghi rhiema wẹẹ, ẹi khian ghi yo e Nenivẹ ra? Hiehie. E Jehova keghi werriegbe tama e Jona nọ gha rrie evba. Ẹre Jona na gha khian. Ọ ghi sẹ evba, ọ na gha tama emwa dan ni rre ẹvbo nii wẹẹ: ‘Ikpẹdẹ 40 kẹkan ẹre ọ ghi dekẹ na guọghọ e Nenivẹ rua.’ Sokpan, Ivbi e Nenivẹ keghi fiwerriẹ, agharhemiẹn wẹẹ e Jona ma te roro ẹre wẹẹ, ọ gha de vberriọ. Ọba ọghe Nenivẹ keghi tama emwa rẹn wẹẹ: ‘Wa gi ima fiwerriẹ, ne ima rinmwia Osanobua nọ yabọ ima. Egbọre, ọ gha tohan ima.’ Vbe Jehova ghi bẹghe ẹre wẹẹ Ivbi e Nenivẹ fiwerriẹ, ọ ma ghi guọghọ iran rua.

Ohu na gha mu e Jona rhunmwuda ne Osanobua ma na ghi guọghọ ẹvbo nii rua. Muẹn roro: E Jona ma hoo ne ọ mwẹ itohan ghee Ivbi e Nenivẹ, vbene ọ na mianmian wẹẹ e Jehova ka mwẹ itohan ghee irẹn. Ọ na ya tota ye irhu ọghe ọmọ erhan ọkpa, vbene ọ na suku aro ye uhunmwu. Vbe ọmọ erhan nii ghi giẹn, ohu na gha mu e Jona. Ẹre Jehova na tama rẹn wẹẹ: ‘U ma bẹghe vbe ohu muẹn ye ọmọ erhan nọ giẹnrẹn, inu ghi nọ ne Ivbi e Nenivẹ? Mẹ ẹre ọ mwẹ itohan ghee iran, ẹre ọ zẹe ne iran na miẹn fan.’ Te Jehova ru ọna, ne ọ ya gi e Jona rẹn wẹẹ, Ivbi e Nenivẹ ẹre ọ ru ekpataki sẹ emwi okọ nọ rhirhi gha khin.