Odibo Ọghe Jehova Keghi Gbogba Ga E Hẹzekaia

Arriọba ọghe Asiria keghi khọn miotọ yan uniẹn igbe ọghe Izrẹl. Nia, te Senakẹrib ne ọba ọghe Asiria ghi vbe hoo nọ khọn miotọ yan uniẹn eva ọghe Juda. Ọ na suẹn gha khọn miotọ yan ẹvbo ni rre Juda ọkpa ọkpa. Sokpan ẹvbo nọ gele gha rre ọre orhiọn nọ khọn mu keghi re Jerusalẹm. Ọ ma gi e Senakẹrib rẹn wẹẹ, e Jehova ẹre ọ ghaa gbogba ga e Jerusalẹm.

Hẹzekaia ne ọba ọghe Juda keghi hae igho ọrhẹnrhẹn ne Senakẹrib, ne ọ mieke na sẹ ẹvbo irẹn rae. Agharhemiẹn wẹẹ e Senakẹrib miẹn ọnrẹn igho nii, ọ na ye gha hoo nọ guọghọ e Jerusalẹm rua. Vbe Ivbi e Jerusalẹm ghi họn wẹẹ Ivbi Asiria sikẹ ẹvbo iran nẹ, orrirri na gbe kue iran. Hẹzekaia keghi tama iran wẹẹ: ‘Wa ghẹ gi ohan mu uwa. Ivbi Asiria wa wegbe, sokpan e Jehova gha ya ima wegbe sẹ iran.’

Senakẹrib keghi gie Rabsakẹ gha rrie Jerusalẹm ne ọ ya ye iran gbogiẹ. E Rabsakẹ keghi mudia ye orere ẹvbo nii gha kha wẹẹ: ‘E Jehova i khian sẹtin miẹn uwa fan. Wa ghẹ gi e Hẹzekaia mu uwa rẹrẹ. Osa ọkpa i rrọọ nọ khian sẹtin miẹn uwa fan vbe obọ ima.’

Hẹzekaia keghi nọ e Jehova emwi nọ khẹke ne irẹn ru. E Jehova keghi tama rẹn wẹẹ: ‘Ghẹ gi ohan mu ruẹ rhunmwuda emwi ne Rabsakẹ khare. Senakẹrib i khian sẹtin khọn miotọ yan e Jerusalẹm.’ Iyeke ọni, e Senakẹrib keghi gbẹn elẹta gie Hẹzekaia. Ọ na kha wẹẹ: ‘Wa fẹko ze egbe obọ ne ima. E Jehova i khian sẹtin miẹn uwa fan.’ Hẹzekaia keghi na erhunmwu gie Jehova wẹẹ: ‘E Jehova lahọ miẹn ima fan, ne emwa hia mieke na rẹn wẹẹ, uwẹ ọkpa ọre Osa ọghe ẹmwata.’ E Jehova keghi tama rẹn wẹẹ: ‘Ọba ọghe Asiria i khian sẹtin la e Jerusalẹm. I gha gbogba ga ẹvbo mwẹ.’

E Senakẹrib na gha roro ẹre wẹẹ, vbene ẹi khian ghi kpẹẹ gbe, e Jerusalẹm gha khian ọghe irẹn. Sokpan vbe asọn ọkpa, e Jehova keghi gie odibo ọghẹe ọkpa gha rrie ehe ne ivbi iyokuo Asiria bu agọ yi. Odibosa nii keghi gbele ivbi iyokuo ọghe Asiria 185,000! Ivbabọ ẹre Ọba e Senakẹrib ghi ya gha rrie owa. E Jehova keghi gbogba ga e Hẹzekaia kevbe Jerusalẹm zẹ vbene ọ ru eyan rẹn. Deghẹ uwẹ nọ, u gha mu ẹtin yan e Jehova ra?