IRUẸMWI 8

Loo Igiemwi Ya Maa Emwa Emwi

Matiu 13:34, 35

UHUNMWU ẸMWẸ: Gha mwẹ alaghodaro vbe odẹ ne u ya maa emwa emwi lekpae ne u gha loo igiemwi ne ẹi lọghọ na rẹn otọre, ne emwa gha mwẹ ẹkorhiẹnrhiẹnmwẹ yi kevbe nọ gha rhie uhunmwu ẹmwẹ nọ rrọọ ladian.

VBENE A YA RU ẸRE HẸ:

Loo igiemwi na rherhe rẹn otọre. Zẹvbe ne Jesu ru ẹre, ru igiemwi ne khuẹrhẹ ya rhan otọ emwi nọ lọghọ. Ghẹ talọ ẹmwẹ nọ bun gbe, na ghẹ do miẹn wẹẹ, ai ghi rẹn eke ne ẹmwẹ nii rrie. Ọ khẹke ne igiemwi ne u ru kevbe emwi ne u maa emwa re gu egbe ro. Ọ ma na gha yerriọ, emwa ni danmwehọ ruẹ ghi baeku ighẹ uhunmwu ẹmwẹ ne u hoo ne u rhie ladian.

Gi aro ruẹ gha sotọ. Ọ khẹke ne u rẹn emwi nọ khian vbe ẹvbo, gha tie ebe ọghe Ivbiotu e Kristi, u vbe gha danmwehọ vbe avbe ọmamwaemwi ni mwẹ irẹnmwi ghaa guan. Zẹvbe ne u ya ru vberriọ, yẹrẹro avbe igiemwi ne u gha loo, nọ gha ya ruẹ guẹ sayọ vbe odẹ ne u ya maa emwa emwi. U ghi gbẹnnẹ avbe igiemwi na yotọ.
Gha muẹn roro emwi nọ gha yẹẹ emwa ni danmwehọ ruẹ. Loo igiemwi ne u rẹnrẹn wẹẹ emwa ni danmwehọ ruẹ gha mwẹ ẹkorhiẹnrhiẹnmwẹ yi. U ke ru igiemwi, u ka roro ẹre nẹ. Ghẹ loo igiemwi nọ gha ya ekhue ra ohu mu emwa ni danmwehọ ruẹ.
Rhie uhunmwu ẹmwẹ nọ rrọọ ladian. Ghẹ wa niania emwi hia, rhie aro tua avbe uhunmwu ẹmwẹ ni rrọọ. Ọ ma khẹke na miẹn wẹẹ igiemwi ne u ru ọkpa ẹre emwa ghi yerre, ọ khẹke ne iran vbe yee ẹre rre uhunmwu ẹmwẹ ne u rhie ladian.