IRUẸMWI 18

Ọ Khẹke Ne A Miẹn Emwi Ruẹ Vbe Ọta Ruẹ

1 Kọrinti 9:19-23

UHUNMWU ẸMWẸ: Ta ẹmwẹ nọ gha gua iziro ọghe emwa ni danmwehọ ruẹ kpa, ne iran mieke na gha ghọghọ wẹẹ iran miẹn emwi kpataki ruẹ.

Muẹn roro emwi ne emwa ne u gu guan ka rẹn vbekpa re. Na gha te ya miẹn wẹẹ emwi ne iran ka rẹn nẹ, ẹre u werriegbe tama iran, gualọ odẹ ọvbehe mu ẹmwẹ nii la.

Ghẹ si ẹmwẹ taan vbe u ghaa guan kaan emwi ne emwa ka rẹn nẹ, sokpan u ghaa ziro yan ẹmwẹ ọgbọn, u ghi fẹko gha nanaẹn.
Ru erria kevbe ezanzan yan ẹmwẹ ne u khian guan kaan. U ghaa khian rhie olika ẹmwẹ ọghe uhunmwuta ruẹ ladian, u sẹtin ya unu kaan iyẹn eso nọ khian vbe obọ ra ezanzan eso ne u ru, ne iran ma mobọ rẹn vbekpa re. Muẹn roro ẹsẹsẹmwẹse vbene ẹmwẹ ne u guan kaan ya dekaan emwi ne u hoo ne u rhie ladian vbe ezanzan ne u ru.

Zẹvbe ne u ya rhie aro la ọta ruẹ, gha mu avbe inọta na roro: ‘vbe ọna khin, vbọzẹe, de ẹghẹ nọ khin, de ehe nọ khin, de ọmwa nọ khin, kevbe wẹẹ vbe ọ ya de.’ U ghi gha nọ avbe ọta na, vbe u ghaa ya ọta ruẹ guan, u vbe gha rhie ewanniẹn yọ. Ọna gha ya imamwaemwi ọghuẹ gua emwa kpa.
Gi emwa ni danmwehọ ruẹ rẹn vbene ẹmwẹ ne u ta khian ya ru iyobọ ne iran hẹ. Rhan otọre ma emwa ni danmwehọ ruẹ vbene uhunmwu ẹmwẹ ne u rhie ladian vbe uwu Evbagbẹn Nọhuanrẹn khian ya ru iyobọ ne iran hẹ vbe ẹdagbọn iran. Ziro yan emwi eso nọ gha sẹtin de rre, ra uyinmwẹ eso nọ gha sẹtin rhiegbe ma ni dekaan emwa ni danmwehọ ruẹ.