IRUẸMWI 30
U Gha Sẹtin Ya Aro Yọ Wẹẹ Emwa Ruẹ Ni Wulo Gha Rhiọ Kpaegbe!
Obalọ kevbe akhiẹ ne uwu si i re nekherhe. Ọna ẹre ọ ya e Baibol tie ẹre eghian. (1 Kọrinti 15:26) Vbe Iruẹmwi 27, ma ruẹ ọre wẹẹ, e Jehova gha wabọ eghian na rua. Sokpan, vbọ khian sunu daa emwa ni wulo nẹ? Vbe iruẹmwi na, u gha ruẹ vbekpa eyan ọvbehe nọ gbe ọmwa otiti ne Jehova yan rẹn, ọni nọ wẹẹ, ọ gha huẹn emwa nibun kpaegbe, iran ghi do gha sọyẹnmwẹ arrọọ vbe etẹbitẹ. Ọni gha gele sẹtin sunu ra? Te ọ khian huẹn iran kpaegbe gha rrie ẹrinmwi ra, ra otagbọn na?
1. De emwi ne Jehova hoo nọ ru ne emwa ima ni wulo nẹ?
E Jehova hoo nọ huẹn emwa ni wulo kpaegbe. E Job wa gha mwẹ amuẹtinyan. Ọ wa yayi wẹẹ, Osanobua i khian mianmian irẹn ye idin. Ọ na tama Osanobua wẹẹ: “U ghi tie, mẹ ghi vbe khuẹnniẹn [vbe uwu Idin].”—Tie Job 14:13-15.
2. Vbe ima ya rẹn hẹ wẹẹ, a gha huẹn emwa ni wulo kpaegbe?
Vbe Jesu rre agbọn na, Osanobua keghi rhie ẹtin nẹẹn, nọ ya huẹn emwa ni wulo kpaegbe. Ọ huẹn ọmokhuo ọkpa nọ ghaa rre ukpo 12 kpaegbe kevbe ọmokpia ọkpa ọghe okhuo ọkpa nọ dẹgbẹe. (Mak 5:41, 42; Luk 7:12-15) Ọ ghi rre ẹdẹ ọkpa, Lazarọs ne ọsie Jesu na wu. Agharhemiẹn wẹẹ, ikpẹdẹ enẹ ẹre Lazarọs gbe vbe idin, Jesu na ye sẹtin huẹn ọnrẹn kpaegbe. Jesu ghi na erhunmwu gie Osanobua nẹ, ọ na ya urhu nọ lae kha wẹẹ: “Lazarọs ladian gha dee!” “Ọmwa nọ wu nii keghi ladian.” (Jọn 11:43, 44) U miẹn ọyẹnmwẹ nọ ghaa sẹ avbe ọsie Lazarọs kevbe ẹgbẹe ọre vbe ẹdẹrriọ!
3. De ayayẹro nọ rrọọ ne emwa ruẹ ni wulo nẹ?
E Baibol wẹẹ: “Arhiọkpaegbe a gha rrọọ.” (Iwinna 24:15, NW) Emwa ne Jesu huẹn kpaegbe vbe ẹghẹ nẹdẹ, ma yo ẹrinmwi. (Jọn 3:13) Te iran wa ghọghọ yọ, vbe Jesu huẹn iran kpaegbe gha die agbọn na. Jesu gha rherhe huẹn emwa nibun kpaegbe, ne iran do sọyẹnmwẹ arrọọ ọghe etẹbitẹ vbe paradais vbe otagbọn na. Jesu wẹẹ, emwa hia ni rre ayere ọghe Osanobua gha rhiọ kpaegbe, ya sẹ egbe emwa na mianmian nẹ.—Jọn 5:28, 29.
GUALỌ OTỌ RE SAYỌ
Gia ziro yan osẹ ni rhie ẹre ma wẹẹ, Jesu mwẹ ẹtin na ya huẹn emwa ni wulo nẹ kpaegbe kevbe wẹẹ, ọ gha ru vberriọ. Ma gha vbe ziro yan odẹ ne arhiọkpaegbe gha ya fu ruẹ ẹko rre, ọ ghi vbe ya ruẹ gha mwẹ ayayẹro.
4. Jesu keghi rhie ẹre ma wẹẹ, irẹn gha sẹtin huẹn emwa ni wulo nẹ kpaegbe
Gia ziro yan rẹn sayọ, emwi ne Jesu ru ne ọsiọre ighẹ e Lazarọs. Tie Jọn 11:14, 38-44, iyeke ọni, uwa ghi ziro yan avbe inọta na:
Vbe ima ya rẹn hẹ wẹẹ, e Lazarọs gele wu?—Ghee uviẹn 39.
Deghẹ ẹrinmwi ẹre Lazarọs ghaa rrie, uwẹ yayi wẹẹ te Jesu gha te huẹn ọnrẹn kpaegbe gha die agbọn na ra?
5. Emwa nibun gha rhiọ kpaegbe!
Tie Psalm 37:29, NW, iyeke ọni, uwa ghi ziro yan inọta na:
De eke ne emwa ọkhọngborrie ni khian rhiọ kpaegbe khian gha ye?
Ẹi re emwa ni ga e Jehova ọkpa, ẹre Jesu khian huẹn kpaegbe. Tie Iwinna 24:15, NW, iyeke ọni, uwa ghi ziro yan inọta na:
De ọmwa ne u hoo ne u miẹn vbe ọ gha rhiọ kpaegbe?
Muẹn roro: Ẹi lọghọ erha ọmọ vbe ọ gha khian huẹn ovbi ẹre vbe ovbe. Erriọ vbe ye, ẹi lọghọ e Jesu vbe ọ gha khian huẹn emwa ni wulo kpaegbe
6. Emwamwa arhiọkpaegbe gha sẹtin rhie ifuẹko nuẹn, ọ ghi vbe ya ruẹ gha mwẹ ayayẹro
Okha ọghe ovbi e Jairọs nokhuo keghi re okha ọghe ẹmwata, nọ wa rhie ifuẹko ne emwa nibun ni khiẹ. Tie okha na vbe Luk 8:40-42, 49-56.
A te miẹn wẹẹ Jesu huẹn ovbi e Jairọs kpaegbe, ọ keghi tama e Jairọs wẹẹ: “Ghẹ fian afianma, sokpan yayi.” (Ghee uviẹn 50.) De vbene ayayẹro ọghe arhiọkpaegbe khian ya ru iyobọ nuẹn hẹ . . .
vbe ọmwa ne u hoẹmwẹ ọnrẹn gha wu?
vbe arrọọ ruẹ ghaa rre ikpadede?
Kpee VIDIO na, iyeke ọni, uwa ghi ziro yan inọta nọ lelẹe.
De vbene ayayẹro ọghe arhiọkpaegbe ya rhie ifuẹko kevbe igiọdu ne evbibiẹ e Phelicity hẹ?
EMWA ESO KEGHI KHA WẸẸ: “I ma yayi wẹẹ, emwa ni wulo gha gele sẹtin rhiọ kpaegbe.”
Vbua ghee ẹre hẹ?
De ako ọghe evbagbẹn nọhuanrẹn, ne u gha sẹtin loo ya rhie ẹre ma wẹẹ, arhiọkpaegbe gha gele gha rrọọ?
OLIKA ẸMWẸ
E Baibol khare wẹẹ, emwa ọkhọngborrie ni wulo nẹ gha rhiọ kpaegbe. E Jehova hoo ne iran werriegbe gha rrọọ, ọ vbe rhie ẹtin ne Jesu nẹ, nọ ya huẹn iran kpaegbe.
Ogbewerriẹ
Ọ gha de ọghe na huẹn emwa ni wulo kpaegbe, vbọ ye Jehova kevbe Jesu hẹ vbe ekhọe?
De eke ne emwa ọkhọngborrie na khian huẹn kpaegbe khian gha ye? Ẹrinmwi nọ ra, ra agbọn na? Vbua gu kha vberriọ?
Vbọzẹ ne u gha na sẹtin ya aro yọ wẹẹ, emwa ne u hoẹmwẹ ọnrẹn ni wulo gha rhiọ kpaegbe?
RUẸ SAYỌ
Ghee emwi eso ne u gha ru, ni gha ru iyobọ nuẹn vbe u ghaa khiẹ.
Ilele ni rre Baibol gha gele sẹtin ru iyobọ ne ọmwa nọ khiẹ ra?
De vbene ibiẹka gha ya sẹtin zin egbe hẹ vbe ọmwa ne iran hoẹmwẹ ọnrẹn gha wu?
A gha huẹn emwa eso kpaegbe gha rrie ẹrinmwi ra? De emwa nai khian huẹn kpaegbe?