U GHA KHIAN SUẸN GHA GU EMWA GUAN
IRUẸMWI 4
Gha Mu Egbe Rriotọ
Ilele: “Wa gha mu egbe rriotọ, ne uwa gha ghee emwa ọvbehe wẹẹ, iran sẹ uwa.”—Fil 2:3.
Emwi Ne Pọl Ru
1. Ghee VIDIO na, ra u ghi tie Iwinna 26:2, 3. Iyeke ọni, u ghi mu avbe inọta na roro:
De vbene Pọl ya rhie ẹre ma hẹ wẹẹ, ọmwa imuegberriotọ ẹre irẹn khin, vbe ọ gu Agripa ne Ọba guan?
De vbene Pọl ya gi Agripa rẹn wẹẹ, obọ e Jehova kevbe uwu Ebe Nọhuanrẹn ẹre ẹmwẹ ne irẹn ta ke rre, ighẹ ẹ i re ẹmwẹ obọ irẹn?—Ya ghee Iwinna 26:22.
Vbe Ima Miẹn Ruẹ Vbe Obọ E Pọl?
2. Adeghẹ ima na gha ya ọghọ vbe ute gu emwa guan, ma na vbe gha mu egbe rriotọ vbe ima ghaa gu iran guan, ẹ i mwẹ ne iran ghẹ danmwehọ ima.
Ya Egbe Taa E Pọl
3. Ghẹ mu ọmwa rhọkpa gbe otọ. Ghẹ gha ru vbene a miẹn wẹẹ, u rẹn emwi hia, ra vbene a miẹn wẹẹ, ọmwa ne u gu guan ma rẹn emwi rhọkpa. U ghi ya ọghọ gu ẹre guan.
4. Gi ẹre dewarorua wẹẹ, e Baibol ẹre emwi ne u ma emwa ẹre ke rre. Ẹmwẹ nọ rre Ebe Nọhuanrẹn keghi mu emwa ekhọe, erriọ ẹre ọ vbe ya fi iziro ọghe emwa werriẹ. Ma ghaa ya Ebe Nọhuanrẹn ma emwa emwi, te ima ru iyobọ ne iran ya mu ẹtin yan Osanobua, ne iran gha te ya mu ẹtin yan ima.
5. Gha re ọmwa nọ fu. Adeghẹ ọmwa ma na ya ẹmwẹ ne u ta yi, ghẹ gbagba ẹre ye ọre egbe. Ma ma hoo ne ima gu emwa gha muan ẹmwẹ. Adeghẹ u na gha re ọmwa nọ fu, u na vbe rẹn ẹghẹ nọ khẹke ne u ya fẹko kpa, a te miẹn wẹẹ ẹmwẹ nii khian ọghe ẹzọ, ọni gha rhie ẹre ma wẹẹ ọmwa nọ mu egbe rriotọ ẹre u khin. (Itan 17:14; Tai 3:2) Adeghẹ ima na ya urhu ne khuẹrhẹ khuẹrhẹ guan, ọ sẹtin ya ọmwa nii danmwehọ ima vbe ẹghẹ ọvbehe.