U GHA KHIAN SUẸN GHA GU EMWA GUAN
IRUẸMWI 6
Ghẹ Gi Ohan Mu Ruẹ
Ilele: “Ma keghi ya udinmwẹ bu uwa gha dee do kporhu iyẹn nọ maan . . . ma uwa, rhunmwuda ne Osanobua na rhie ẹtin ne ima.”—1 Tẹs 2:2.
Emwi Ne Jesu Ru
1. Ghee VIDIO na, ra u ghi tie Luk 19:1-7. Iyeke ọni, u ghi mu avbe inọta na roro:
Ọ gha kẹ, emwa ghaa lẹẹ ne Zakiọs. Vbua yayi ighẹ ọ si ẹre?
Vbọzẹ ne Jesu na ye kporhu ma rẹn?
Vbe Ima Miẹn Ruẹ Vbe Obọ E Jesu?
2. Ọ khẹke ne ima gha mwẹ udinmwẹ ne ima mieke na sẹtin kporhu ma emwa ughughan.
Ya Egbe Taa E Jesu
3. Mu ẹtin yan e Jehova. Orhiọn nọhuanrẹn ọghe Osanobua ẹre ọ rhie ẹtin ne Jesu, nọ ya sẹtin gha kporhu; ọ gha vbe rhie ẹtin nuẹn. (Mat 10:19, 20; Luk 4:18) Rinmwian e Jehova nọ ru iyobọ nuẹn ya sẹtin kporhu ma emwa ne ohan iran mu ruẹ.—Iwinna 4:29.
4. Ghẹ roro ẹre wẹẹ, emwa i khian sẹtin fi werriẹ ra iran i khian danmwehọ. Ma sẹtin gha si egbe ne ima ya gu emwa eso guan, rhunmwuda vbene ugbaro iran ye hẹ, ra vbene iran ya mu egbe hẹ, vbene iran mwẹ igho sẹ hẹ ra ukpo ne iran na zẹ vbe ẹvbo, vbene iran ya loo ẹdagbọn iran hẹ, ra ugamwẹ ne iran ye. Sokpan, yerre wẹẹ:
E Jehova vbe Jesu ẹre ọ rẹn ekhọe; ma ma rẹn emwi nọ rre emwa ekhọe.
A i miẹn ọmwa ne Jehova i sẹtin ru iyobọ na ya fi werriẹ.
5. Gha re ọmwa nọ din, sokpan, u ghi gha ya ẹwaẹn guan. (Mat 10:16) Ghẹ gha gu emwa muan ẹmwẹ. Adeghẹ ọmwa ma hoo nọ danmwehọ ruẹ, ra u na bẹghe ẹre wẹẹ, emwi eso sẹtin sunu deghẹ u na ye gha rre evba, u ghi fẹko dobọ ẹmwẹ ne u ta yi, ne u kpa.—Itan 17:14.