De Emwi Ne Ima Mwẹ Ne Ima Khian Ya Ru Izọhẹ Gie Jehova?

JESU keghi kha wẹẹ: “Ne a gha rhie ne emwa ọvbehe ọre ọghọ ye sẹ ne a gha ghe emwa ọvbehe obọ.” (Iwinna 20:35) Ẹmwẹ ne Jesu tae na keghi dekaẹn asikẹgbe ne ima gu e Jehova mwẹ. De odẹ nọkhin? Ẹse hia ne Jehova he ru ne ima keghi sẹ ima ọyẹnmwẹ, sokpan ọyẹnmwẹ nọ sẹ ima i gia gie vbe ima gha ye emwi ne ima mwẹ ru izọhẹ gie Jehova. De emwi ne ima mwẹ nọ khẹke ne ima ya ru izọhẹ gie Jehova? Ebe Itan 3:9 keghi kha wẹẹ: “Ya ọghọ ne Nọyaẹnmwa vbekpa ne u gha na ya avbe emwi ne ọ maan sẹ . . . zẹ ọhẹ gie ẹre.” Emwi ima “nọ maan sẹ” ne ako na guan kaẹn, ọre ẹghẹ ọghe ima, iwinna obọ kevbe emwi ọhẹ ne Osa ya wee ima, ẹrhiọn ọghomwa kevbe emwi ewe ọghomwa. Ma gha ya ena hia ru iyobọ ye iwinna ugamwẹ, te ima ru izọhẹ gie Jehova. Ọna gha ya ima gha sọyẹnmwẹ.

Ugbẹnso, ma sẹtin rhie aro gberra izọhẹ na ru gie Jehova. De emwi nọ gha ru iyobọ ne ima ya gha tie ẹre ekhuarho? Ukọ Pọl keghi tama Ivbiotu e Kristi vbe Kọrinti ne iran gha “fian igho rhie ye otọ” ya ru izọhẹ. (1 Kọr 16:2) U gha hoo ne u rẹn sayọ vbekpae obẹlẹ na ya ru iyobọ ye iwinna Arriọba nọ khian vbe uhunmwu otagbọn hia, lahọ ghee ẹkpẹti nọ rre ototọ mwa.

Ai sẹtin ya itanẹt ru iyobọ ye iwinna Arriọba vbe otọ ẹvbo hia. Vbọrhirhighayehẹ, u gha miẹn ayahọmwaehọ eso nọ dekaẹn vbene a ya ru ọna hẹ vbe u gha lae donate.jw.org. Vbe ẹvbo eso, ayahọmwaehọ nọ rre ako na vbe wẹbsait ọghomwa keghi zẹ ewanniẹn ye inọta ne emwa he nọ vbekpae iyobọ igho na ru.