U Ka Rẹn Ra?

De iwinna ne ọguọmwadia ghaa ru vbe ẹghẹ nẹdẹ?

VBE ẹghẹ nẹdẹ, te ọguọmwadia gbaroghe igiowa ọghe arowa ẹre kevbe emwi hia ne arowa ẹre mwẹ. Emwi nọ rhiema ighẹ ẹmwẹ Hibru kevbe ẹmwẹ Grik na ke zedu “ọguọmwadia,” ọre ọdia iwinna ra ọgbaroghe ọghe igiowa.

Vbe ẹghẹ ne Josẹf, ne ovbi e Jekọb na gha re ọviẹn vbe Igipt, irẹn ẹre ọ ghaa gbaroghe igiowa ọghe arowa ẹre. E Baibol gi ima rẹn wẹẹ, te arowa ẹre “viọ emwi nọ mwẹ ne Josẹf nọ gha gbaroghe.” (Gẹn 39:2-6) Vbene ẹghẹ ya khian, e Josẹf keghi khian azukpogieva vbe otọ Igipt hia, irẹn tobọ irẹn na vbe zẹ ọguọmwadia ọghẹe ọkpa nọ gha gbaroghe igiowa re.—Gẹn 44:4.

Vbe ẹghẹ ọghe Jesu, avbe ọgbugbo i mobọ dia ehe ne iran na mu ugbo ya. Rhunmwuda ọni, iran ghi wẹẹ ne eguọmwadia iran gha gu iran gbaroghe nene ugbo kevbe iwinna nọ khian vbọ vbe ẹdẹgbegbe.

Vbe ẹghẹ nẹdẹ, de ọguọmwadia ne arowa ẹre gha sẹtin zẹ nọ gha gbaroghe igiowa ẹre? Ovbi e Rom ọkpa na tiẹre Columella nọ ghaa re ọgbenbe vbe orre nokaro keghi kha wẹẹ, ọviẹn nọ khẹke na mu ye ukpo na ọre “ọmwa nọ guẹ iwinna kevbe nọ mwẹ ẹwaẹn.” Ọ ghi vbe “gha re ọmwa nọ sẹtin loo asẹ na rhie nẹẹn vbe odẹ nọ khẹke, ẹi khian vbe gha loo ẹre ya yẹnyẹn emwa ọvbehe mu otọ.” Ọgbenbe nii na vbe kha wẹẹ: “Sẹ ehia, ẹi khian gha re ọmwa nọ tọn egbe mu, nọ roro wẹẹ irẹn wa rẹn emwi hia, ọ ghi gha re ọmwa nọ muegbe nọ ya ruẹ.”

E Baibol keghi loo iwinna ọghe ọguọmwadia nọ gbaroghe igiowa ọghe arowa ẹre ya gie iwinna eso na ru vbe iko ọghe Ivbiotu e Kristi. Vbe igiemwi, ukọ e Pita keghi rhie igiọdu ne Ivbiotu e Kristi ne iran gha loo emwi ne Osanobua ya we iran, “ya ru iyobọ ne egbe zẹvbe ọguọmwadia esi ne Osanobua mwẹ itohan nọ ma te khẹke daa.”—1 Pit 4:10, NW.

Jesu tobọ re vbe zẹ erre ọghe ọguọmwadia ọkpa nọ dia iwinna ọghe arowa ẹre vbe ebe Luk 16:1-8. Vbe ẹmwẹ akhasẹ ne Jesu tae vbekpa urremwẹ ọghe irẹn zẹvbe Ọba, ọ keghi gi erhuanegbe ẹre rẹn wẹẹ, irẹn gha zẹ “ọguọmwadia esi kevbe ne ọ wan,” ra “ọguọmwadia nọ mwẹ ekhọe esi.” Ọguọmwadia na ẹre ọ khian gha kpemehe evbare orhiọn ne erhuanegbe e Kristi vbe ẹghẹ okiekie ẹdẹ. (Mat 24:45-47; Luk 12:42) Ukpamuyọmọ nọkhua nọ ne ima, ne ima na rre usun emwa ni rri evbare orhiọn nọ ke obọ ọguọmwadia esi na rre.