Lele Igiemwi Ne Avbe Akhasẹ Rhie Yotọ—Habakọk
1. Vbọzẹ ne ima gha na sẹtin rẹn otọre vbene ọ ghaa ye Habakọk hẹ?
1 Rhunmwuda emwi dan nọ ghi muan yọ muan yọ vbe agbọn ne ima ye na, ima sẹtin gha mwẹ egbe iziro ne Habakọk ghaa mwẹ, ne ọ na nọ e Jehova wẹẹ: ‘Vbua ghi na gu mwẹ miẹn ọlọghọmwa vbenia hẹ yi? Vbe uwẹ ra sẹtin ziengbe gha ghee amaruẹse vberriọ hẹ yi?’ (Hab. 1:3; 2 Tim. 3:1, 13) Adeghẹ ima na gha muẹn roro ẹmwẹ ọghe Habakọk kevbe igiemwi ọghe imudiase nọ rhie yotọ, ọ gha ru iyobọ ne ima ya sẹtin ziengbe zẹvbe ne ima ya khẹ ẹdẹ ibuohiẹn ọghe Jehova.—2 Pit. 3:7.
2. De vbene ima khian ya rhiẹre ma hẹ wẹẹ ima yin zẹvbe emwa ni mwẹ amuẹtinyan vbe ẹdẹnẹrẹ?
2 Gha Yin Zẹvbe Ọmwa Nọ Mwẹ Amuẹtinyan: Na gha te ya miẹn wẹẹ, Habakọk wa do ye fuẹnrẹn rhunmwuda wẹẹ ọ gbe ọ sumẹ segbe, ọ na wa ye rhiegbe ye iwinna ugamwẹ ọghe Osanobua. (Hab. 2:1) E Jehova keghi rhie ilẹkẹtin ne akhasẹ na wẹẹ, ẹi mwẹ ọ ma mwẹ amusẹ vbe ẹghẹ nọ khẹke ighẹ ẹmwẹ ne irẹn tae kevbe wẹẹ, ‘ọmwa imudiase gha yin zẹvbe ọmwa nọ mwẹ amuẹtinyan.’ (Hab. 2:2-4) De emwi ne ọna ghi demu ne Ivbiotu e Kristi ni wa sikẹ ọre nẹ ẹsẹsẹmwẹse, ufomwẹ ọghe ẹdẹ okiekie na? Na gha mwẹ ọnrẹn vbe ilẹkẹtin wẹẹ ufomwẹ gha rre ẹre ọ ru ekpataki sẹ, na rẹn ẹghẹ nọ khian ya rre. Adeghẹ ima na gha mwẹ amuẹtinyan, ọna gha gua ima kpa ne ima ye gha ba odẹ kevbe wẹẹ ne ima gha mu iwinna ikporhu iyẹn nọma ye okaro.—Hib. 10:38, 39.
3. Vbọzẹ nọ na khẹke ne ima gha ya ekhọe ọyẹnmwẹ ga e Jehova vbe ẹghẹ hia?
3 Gha Sọyẹnmwẹ Vbuwe Ugamwẹ Ọghe Jehova: Ẹghẹ ne Gọg ọghe Magọg khian ya werriẹ aro nọ khọ dae emwa ọghe Jehova, ẹre a khian ya rẹn ọmwa nọ mwẹ amuẹtinyan. (Ezik. 38:2, 10-12) Usẹ ẹre okuo si ye emwa egbe, ya sẹ egbe emwa ni khọn muobọ yan ikẹga. Evbare sẹtin do gha vbee, emwi na mwẹ sẹtin wii ọmwa, kevbe ọdafẹn ghi do khian ovbiogue. De emwi ne ima khian ghi ru adeghẹ ọlọghọmwa na rre? Te Habakọk wa rẹn wẹẹ ọlọghọmwa gha rre, rhunmwuda oni, irẹn keghi tamuolọyan rẹn wẹẹ, te irẹn khian ye gha ghọghọ vbuwe ugamwẹ ọghe Jehova. (Hab. 3:16-19) ‘Ọyẹnmwẹ nọ ke obọ e Jehova rre’ gha ru iyobọ ne ima ya sẹtin ziengbe avbe edanmwẹ ne ima khian werriẹ aro daa vbe odaro.—Neh. 8:10; Hib. 12:2.
4. De emwi nọ khian ya ima gha sọyẹnmwẹ vbe ẹghẹ na nia kevbe ẹghẹ nọ dee vbe odaro?
4 Te a khian ye gha ma iran emwi vbekpa odẹ ọghe Osanobua, ighẹ emwa ne Jehova ya ugue gue vbe ẹdẹ ibuohiẹn nọ dee. (Hab. 2:14) Ya sẹ egbe emwa ni rriọkpaegbe, te iran khian ruẹ vbekpae Jehova. Uhiẹn vbe ẹghẹ na nia, gima loo ẹkpotọ ke ẹkpotọ no rhirhi kie ne ima ya gu emwa guan vbekpae Jehova kevbe iwinna ọyunnua ọghẹe!—Psm. 34:1; 71:17.