UYINMWẸ ỌGHE IMA NE IVBIOTU E KRISTI
U Gha Sẹtin Rhie Igiọdu Ne Ọtẹn Nọ Worua Vbe Odẹ Ọghe Orhiọn
Vbe ẹdẹ Tiuzde, vbe ikpẹdẹ nogie 11 vbe uki e April, etẹn nibun ni worua vbe odẹ ọghe orhiọn, gha deba ima ru Ayere Ọghe Uwu e Kristi. Iran te suẹn gha rhulẹ ọghe arrọọ nẹ sokpan emwi eso keghi si iran ghee iyeke. Emwi eso nọ gha sẹtin si ọmwa ghee iyeke vbe odẹ ọghe orhiọn keghi re na guan kaan vbe ne ebe ẹmu, Werriegbe Bu e Jehova Gha Dee. (Hib 12:1) Ọrheyerriọ, e Jehova nọ ya esagiẹn Ovbiẹre de iran werriegbe, ye ya aro nọ ghaan ghee iran. (Iwinna 20:28; 1 Pit 1:18, 19) De vbene ima khian ya ru iyobọ ne iran hẹ, ne iran werriegbe suẹn iko na yo?
Vbene ọsuohuan gbarokotọ gualọ ohuan nọ wii ọghẹn, erriọ ediọn ni rre iko gualọ etẹn ni worua vbe odẹ ọghe orhiọn ne iran mieke na ru iyobọ ne iran. (Luk 15:4-7) Ọna keghi gima rẹn vbene Jehova hoẹmwẹ iran hẹ. (Jer 23:3, 4) Ẹi re ediọn ọkpa ẹre ọ khẹke nọ rhie igiọdu ne iran, iwinna ima hia nọ. E Jehova keghi gbọyẹmwẹ ye ekhọe esi kevbe agiẹngiẹn ne ima mwẹ daa iran, ọ gha vbe san ima ẹse yọ. (Itan 19:17; Iwinna 20:35) Rhunmwuda ọni, muẹn roro ọmwa ne u gha sẹtin rhie igiọdu na, u ghi vbe hia ne u ru vberriọ vbobọvbobọ!
VBE A GHA GHI GHEE ẸRE FO NẸ IGHE NE VIDIO RHIE IGIỌDU NE ETẸN NI WORUA VBE ODẸ ỌGHE ORHIỌN, U GHI ZẸ EWANNIẸ YE AVBE INỌTA NA:
De emwi okaro ne Abbey ru vbe ọ miẹn ọtẹn nọ ma rẹn ẹdẹ?
Vbọsiẹ nọ na khẹke ne ima gu ediọn guan, deghẹ ima na gha hoo ne ima ru iyobọ ne ọtẹn nọ worua vbe odẹ ọghe orhiọn?
De emwamwa ne Abbey ru, nọ mieke na dọlegbe mu otuẹ gie Laura?
De vbene Abbey ya rhiẹre ma hẹ wẹẹ irẹn mwẹ iziengbe kevbe ahoẹmwọmwa vbe ẹghẹ nọ ya gha hoo nọ rhie igiọdu ne Laura?
De emwi ne ima miẹn ruẹ vbe erre ne Jesu zẹ vbe ebe Luk 15:8-10?
Vbọ ghi kẹrikian ighẹ ẹrhiọn ne etẹn loo ro ya ru iyobọ ne Laura?