Vbene A Ya Guẹ Sayọ Vbe Iwinna Ikporhu​—Gha Mu Otuẹ Gie Ọmwa Ne U Kporhu Ma

EVBỌZẸE NE Ọ NA RU EKPATAKI: Emwa nibun ni mwẹ ẹkorhiẹnrhiẹnmwẹ daa ikporhu iyẹn nọ maan ọghe Arriọba Osanobua keghi hoo ne iran rẹn ẹmwata vbekpa Osanobua. (Aiz 55:⁠6) Te ima khian gha mu otuẹ gie iran vbe ẹghẹ hia, ne ima mieke na sẹtin gha maa iran emwi vbekpa Osanobua ọkade ọkade. Rhunmwuda ne dọmwande emwa na mwẹ isievẹn ne iran werriẹ aro daa, odẹ ughughan ẹre a khian ya sẹtin sẹ iran ekhọe. Vbọrhirhighayehẹ, deghẹ ima na muegbe yotọ ẹse, ma ke mu otuẹ gie ọmwa ne ima kporhu ma, vbene ima na mwẹ ọnrẹn vbe ekhọe wẹẹ, te ima khian gu ẹre ruẹ e Baibol, iwinna ikporhu iyẹn nọ maan ọghe ima ghi biẹ ọmọ esi.

VBENE A YA RUẸ HẸ:

• Ghẹ gi ẹre kpẹẹ gbe, u ke werriegbe mu otuẹ gie ọmwa ne u kporhu ma.​—⁠Mat 13:⁠19

• Gha mwẹ ọghọ kevbe u vbe gha re ọmwa ne ọ soyaya mu ọmwa. Gi aro ruẹ gha mose vbe uhunmwu

• Ya oyaya tuẹ ọ yan owa. Sunu yi eni ẹnrẹn. Gi ẹre rẹn evbọzẹ ne u na werriegbe mu otuẹ rre​—⁠deghẹ te u do rhie ewanniẹn ye inọta nọ rre otọ, ra te u do rhie ebe iyẹn nọ da ladian nẹ, deghẹ te u do gie websaiti ọghomwa ma rẹn, ra te u do kpee vidio ma rẹn ra deghẹ te u do giẹre ma rẹn vbene ima ya gu ọmwa ruẹ e Baibol hẹ. Adeghẹ ọ yan owa na guan kaan ẹmwẹ ovbehe nọ mwẹ ẹkorhiẹnrhiẹnmwẹ daa, zẹvbe ne uwa ya ziro kugbe, u ghi ya ifuẹro fi ẹmwẹ ne uwa ta dee werriẹ.​—⁠Fil 2:4

• Gha gbe amẹ khakhae ighẹ ikpẹ ọghe ẹmwata ne u kọ ye ekhọe ọ yan owa lekpae ne u gha gu ẹre ziro yan evbagbẹn nọhuanrẹn kevbe ne u gha rhie ebe ọghomwa nẹẹn, ẹghẹ ke ẹghẹ ne u ya sẹ evba. (1 Kọr 3:⁠6) Hia ne u ya ọ yan owa khian ọse ruẹ

• Gbe ẹyotọ khẹ otuẹ ne u khian werriegbe mu rre