UYINMWẸ ỌGHE IMA NE IVBIOTU E KRISTI
Na Gha Ku Obọ Gbe Ya Kporhu Vbe Ẹdogbo Ne A Na Zẹ Urhuẹvbo Ughughan
Emwa wa mobọ danmwehọ vbe a gha ya urhuẹvbo ọghe iran kporhu ma iran. Egbọre ọni ẹre ọ si ẹre ne Jehova na ru emwamwa vbe Pẹntikọst 33 C.E., ne “avbe Ju . . . ni ke dọmwadẹ ẹvbo vbe otọ agbọn” gha die Jerusalẹm mieke na họn iyẹn nọ maan vbe ‘urhuẹvbo’ ọghe iran, agharhemiẹn wẹẹ iran sẹtin vbe gha họn urhuẹvbo ne emwa mobọ gha zẹ vbe ẹghẹ nii, vbe na ghee Hibru ra e Grik. (Iwinna 2:5, 8) Vbe ako ne emwa na zẹ urhuẹvbo ughughan vbe ẹdẹnẹrẹ, dọmwadẹ iko ni zẹ urhuẹvbo ughughan sẹtin gha kporhu vbe ẹdogbo ọkpa. De emwamwa nọ khẹke ne etẹn ni rre iko vberriọ ru, ne iran ghẹ do gha kpẹkpẹ gbe vbe ako ne iran na kporhu, ne ohu ghẹ mieke na mu emwa ne iran kporhu ma vbe ẹdogbo nii?
Uwa Ziro Kugbe (Itan 15:22): Te ọ khẹke ne ediọn ni siẹnro iwinna ikporhu vbe dọmwadẹ iko na, ziro kugbe, ne iran mieke na rẹn obẹlẹ nọ ghi maan sẹ ne iran khian gha loo ya kporhu vbe ẹdogbo vberriọ. Deghẹ ẹdogbo ne iko nọ zẹ urhuẹvbo ọvbehe na kporhu i na kpọlọ, iran sẹtin kha wẹẹ ne etẹn ni rre iko ruẹ ghẹ kporhu vbe owa ne a na zẹ urhuẹvbo ọghe iran. Vbọrhirhighayehẹ, deghẹ iran i khian sẹtin kporhu la ẹdogbo ọghe iran fo, iran sẹtin tama iko ruẹ ne iran ghẹ sẹ owa rhọkpa rae, sokpan ne uwa tama iran deghẹ uwa na miẹn ọmwa nọ zẹ urhuẹvbo ọghe iran nọ mwẹ ẹkorhiẹnrhiẹnmwẹ. (od-E 93 okhuẹn 37) Iran sẹtin vbe wẹẹ ne etẹn ni rre iko ruẹ gu iran gualọ emwa ni gua zẹ urhuẹvbo ne iran loo vbe iko ọghe iran; adeghẹ uwa na miẹn egbe emwa vberriọ, uwa sẹtin rhie adrrẹsi ọghe iran gie iko nọ zẹ urhuẹvbo ọghe iran, ne iran mieke na do gha kporhu ma iran. (km-E 7/12 5, ẹkpẹti) Ghẹ mianmian wẹẹ, ugbẹnso emwa ni zẹ urhuẹvbo ughughan sẹtin gha rre owa ọkpa. Vbe ima ghaa ru emwamwa ọghe ikporhu vbe ẹdogbo ne ima ye, ọ khẹke ne ima gha begbe, ne ima ghẹ ya rra uhi arriọba nọ dekaan odẹ na ya loo ayahọmwaehọ nọ dekaan emwa ọvbehe.
Uwa Gha Ru Emwi Kugbe (Ẹfis 4:16): Ọdiọn nọ siẹnro iwinna ikporhu vbe iko ruẹ gha rhie adia nuẹn, u ghi lelẹe. Adeghẹ u gu ọmwa ruẹ e Baibol, sokpan urhuẹvbo ọvbehe ẹre ọmwa ne u gu ruẹ emwi rẹn otọre sẹ, vbọ khẹke ne u ru? Egbọre emwi nọ khian yae mwẹ alaghodaro sẹ, ọre deghẹ u na wẹẹ ne etẹn ni rre iko nọ zẹ urhuẹvbo ọghẹe gha gu ẹre ruẹ emwi.
Mu Egbe Yotọ (Itan 15:28; 16:1): Adeghẹ ọmwa nọ zẹ urhuẹvbo ọvbehe ẹre u do vba vbe owa, hia vbe odẹ ke odẹ ne u ye kporhu ma rẹn. U ghi hia ne u rẹn urhuẹvbo ne emwa ni rre ẹdogbo ruẹ zẹ, ne u mieke na sẹtin mu egbe yotọ ẹse. U sẹtin vbe danlod e Baibol kevbe vidio ọghe urhuẹvbo ne iran zẹ ye efoni ruẹ. U sẹtin vbe loo e JW Language app ya ruẹ vbene a ya tuẹ emwa hẹ vbe urhuẹvbo eso.