Uwẹ Ya Aro Ekhọe Ruẹ Bẹghe Avbe Akpa Ọghe Osanobua Ne Ai Zẹ Aro Miẹn Ra?

Vbe u gha bẹghe obobo nọ mwẹ ẹmu nọ mose, avbe orhọnmwẹ ni rre orere iso, kevbe amẹ nọ rhọọ, ọni ma ya ruẹ rẹn wẹẹ Ayi rrọọ nọ yi emwi hia ra? Emwi ughughan ne Osanobua yi keghi ya ima bẹghe avbe akpa ọghe Osanobua ne ai zẹ aro miẹn. (Rom 1:20) Adeghẹ ima na gbarokotọ ghee evbayi ni lẹga ima, ma gha bẹghe ẹre wẹẹ Osanobua mwẹ ẹtin, ahoẹmwọmwa, ẹwaẹn, ibuohiẹn ata, kevbe wẹẹ, ọ zẹ emwi obọ.—Psm 104:24.

De evbayi ọghe Jehova eso ne uwẹ miẹn vbe ẹdẹgbegbe? Uhiẹn deghẹ u na dobọ gha rre ako nọ kakabọ rhan aro, u gha ye miẹn avbe ahianmwẹ ra avbe erhan. Adeghẹ ima na gha gbarokotọ ghee emwi ughughan ne Jehova yi, ọ gha sẹtin ru iyobọ ne ima, ne ima ghẹ gha si osi gbe, ọ ghi vbe ru iyobọ ne ima ya gha rhie aro tua emwi nọ khẹke, ne ima gha te ya rhie aro tua ọlọghọmwa ọghe ima; deba ọni, ọ gha ya ima gha mwẹ amuẹtinyan nọ wegbe wẹẹ, e Jehova gha sẹtin gbaroghe ima uhiẹn ya sẹ etẹbitẹ. (Mat 6:25-32) Adeghẹ evbibiẹ emọ ẹre u khin, ru iyobọ ne ivbuẹ ne iran sẹtin gha ya aro ekhọe ọghe iran bẹghe avbe akpa ọghe Jehova ne ai miẹn egbọre. Zẹvbe ne ima ya ruẹ vbekpa evbayi ọghe Osanobua ni lẹga ima, erriọ ima ya sikẹ Ayi ọghomwa sayọ.—Psm 8:3, 4.

VBE A GHA GHI GHEE ẸRE FO NẸ IGHẸ NE VIDIO EVBAYI KEGHI RHIE UYI GIE OSANOBUA—UKPA KEVBE ẸMU, A GHI ZẸ EWANNIẸN YE AVBE INỌTA NA:

• De emwi nọ ya ima bẹghe ẹmu ughughan?

• Vbọzẹe ne emwi eso na mwẹ ẹmu ughughan vbe a gha la asefẹn ughughan ghee ẹre?

• Vbọzẹe ne ima na bẹghe ẹmu ughughan vbe orere iso?

• De ẹmu eso ni mose ne u he miẹn vbe evbayi ọghe Osanobua ni rre ẹdogbo ruẹ?

• Vbọzẹe nọ na khẹke ne ima gha loo ẹghẹ nọ somwa ya gbarokotọ ghee emwi ughughan ne Osanobua yi?