Vbene A Ya Loo Asobọrrie Ya Mu Ẹmwẹ So Vbe Ikporhu

Ke January 2018 gha dee, a keghi gbẹnnẹ igiemwi ọghe vbene a ya kporhu hẹ ye odaro Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Otu keghi rhie igiọdu ne ima, ne ima gha gu emwa ziro, ẹi re ne a wa gha viọ ebe ne iran kẹkan. E vidio ọghe vbene a ya kporhu hẹ keghi ru iyobọ ne etẹn, ne iran mieke na sẹtin gha ya e Baibol mu ẹmwẹ so vbe ikporhu. Sokpan, te ọna ghi rhiema wẹẹ ima i khian ghi zẹdẹ gha loo ebe rhọkpa vbe ima ghaa kporhu ke owa ya sẹ owa ra? Hiehie! Vbe igiemwi, ma gha sẹtin loo asobọrrie ya mu ẹmwẹ so vbe ikporhu. Avbe obẹlẹ ne a gbẹnnẹ ye ototọ mwa gha ru iyobọ ne ima deghẹ ima hoo ne ima ya asobọrrie kporhu ma ọmwa:

1. Nọ ọta nọ rre odaro ọghe nene asobọrrie.

2. Rhie ọmwa nii gha rrie ipapa nogieva, ne u ma re ewanniẹn ne Baibol rhie ye inọta nii. Deghẹ ẹkpotọ na kie, u sẹtin tie emwi eso ne a gbẹnnẹ ye uwu nene asobọrrie, uwa ghi vbe ziro yan rẹn.

3. Rhie nene asobọrrie ne ọ yan owa, u ghi vbe tama rẹn ne ọ tie emwi nikẹre ne a gbẹnnẹ ye nene asobọrrie vbe ẹkpotọ gha kie nẹẹn.

4. Vbene u te kpa, u ghi nọ ọta nọ rre ototọ uhunmwuta nọ khare wẹẹ, “Emwi Nọ Khẹke Nu Mu Roro,” u ghi ru emwamwa ne u khian ya dọlegbe gha dee, ne u do ya e Baibol rhie ewanniẹn yọ.

U gha dọlegbe sẹ evba, uwa ghi ziro yan ewanniẹn ọghe inọta ne u ka nọ, u ghi vbe nọ ọta ọvbehe ne uwa gha ziro yan vbe u gha dọlegbe rre. U sẹtin loo ọkpa vbe usun avbe inọta ni rre wẹbsait ọghomwa ra ebe na sunu yi vbe iyeke nene asobọrrie. Ọ gha sẹ ẹghẹ, u sẹtin rhie ebe ẹmu na tiẹre Iyẹn Nọma Nọ Ke Obọ Osanobua Rre! ne ọ yan owa, ra ebe ọvbehe ne a ya maa ọmwa emwi nọ rre Emadogua Ne A Ya Maa Emwa Emwi.