UYINMWẸ ỌGHE IMA NE IVBIOTU E KRISTI
U Gha Sẹtin Rhiegbe Ladian Ra?
Zẹ vbene Aizaia tae yotọ, ma wa bẹghe alaghodaro na ma he miẹn egbọre ẹdẹ nọ wa rhiegbe ma vbe otu ọghe Jehova vbe ẹdẹnẹrẹ. (Aiz 54:2) Rhunmwuda ọni, ọ khẹke na bọlọ avbe owa ugamwẹ ọgbọn, vbe na ghee Ọgua Arriọba, Ọgua Asikoko kevbe Bẹtẹl. Ma gha ghi bọ avbe owa ugamwẹ na nẹ, ọ khẹke ne ima gha gbaroghe ẹre, a ghi vbe gha dọlọe yi. De ẹkpotọ nọ kie ne ima ya ru iyobọ?
Ma sẹtin rhiegbe ladian vbe ẹghẹ ke ẹghẹ ne ẹbu ne ima lele yo ikporhu khian ya ru akpehuan vbe Ọgua Arriọba
Ma sẹtin rhiegbe ladian vbe a ghaa gualọ etẹn na khian maa re emwi vbe nọ dekaẹn vbene a ya gbaroghe Ọgua Arriọba hẹ
Ma sẹtin rhie obọ ye fọm na tie ẹre Local Design/Construction Volunteer Application (DC-50), ne ima mieke na sẹtin ru iyobọ vbe ẹghẹ ke ẹghẹ na ya gualọ etẹn ni khian ru iyobọ vbe owa ugamwẹ na bọlọ kevbe na dọlọ yi vbe ẹdogbo ne ima ye
Ma sẹtin rhie obọ ye fọm na tie ẹre Application for Volunteer Program (A-19), ne ima mieke na sẹtin rhiegbe ladian ya ru iyobọ vbe Bẹtẹl ra owa ugamwẹ ọvbehe vbe uzọla ọkpa ra ọ sẹtin vbe gberra vberriọ
GHEE ABỌ NE KUẸI ỌGHE VIDIO NỌ MWẸ UHUNMWUTA NỌ KHARE WẸẸ EMWAMWA ỌGHE EHE UGAMWẸ ỌGBỌN NA KHIAN BỌ, IYEKE ỌNI, A GHI ZẸ EWANNIẸN YE AVBE INỌTA NA:
De vbene ima ghi ya loo e vidio hẹ ke ukpo 2014 gha dee?
De emwamwa ne ima ghi ru nia, nọ gha ru iyobọ ne ima ya gha ru e vidio ughughan ne ima loo vbe ugamwẹ? De ẹghẹ na khian ya suẹn gha bọ owa ugamwẹ na kevbe wẹẹ, de ẹghẹ na khian ya bọe fo?
De vbene etẹn khian ya sẹtin ru iyobọ ye iwinna na?
Deghẹ ima hoo ne ima ru iyobọ ye iwinna na khian ru vbe Ramapo, vbọzẹe nọ na khẹke ne ima rhie obọ ye fọm na tie ẹre DC-50, ne ima vbe rhiegbe ye iwinna ne Local Design/Construction ru vbe ẹdogbo ọghe ima?
De osẹe ni rhiẹre ma wẹẹ, e Jehova ẹre ọ ye iwinna na ike?
De vbene ima gha ya sẹtin ru iyobọ ye iwinna na, ọ gha khọnrẹn wẹẹ ima ma sẹtin yo evba ya winna?