Emwamwa Ikporhu Ne Kpataki Na Khian Ya Wewe Arriọba Osanobua Vbe November

Jesu keghi kporhu ‘iyẹn nọ maan ọghe Arriọba Osanobua.’ (Luk 4:43) Ọ na vbe maa emwa re ne iran gha na erhunmwu ne Arriọba nii rre. (Mat 6:9, 10) Vbe uki e November, ma gha hia vbene ẹtin ima sẹ ne ima ya Arriọba Osanobua wewe ma emwa hia. (Mat 24:14) Mwamwa ẹghẹ ruẹ ẹse ne u mieke na sẹtin gha mwẹ ọghae vbe emwamwa ikporhu ne kpataki na. Etẹn ni rhie obọ ye arọndẹ ọghe ovbi ẹghẹ kherhe gha sẹtin rhie ughaẹdẹ 30 ra 50 ladian vbe uki na.

Hia ne u ya ako ọghe evbagbẹn nọhuanrẹn ni guan kaẹn Arriọba Osanobua kporhu ma emwa ni rre ẹdogbo ne u ye. U ghaa muegbe yotọ, u ghi gualọ ako ọghe evbagbẹn nọhuanrẹn nọ gha sẹ ekhọe ọghe dọmwadẹ emwa ne u rhirhi miẹn. Deghẹ u miẹn ọmwa nọ mwẹ ẹkorhiẹnrhiẹnmwẹ, u ghi rhie The Watchtower No. 2 2020 nẹẹn. Dọlegbe mu otuẹ gie ẹre vbobọvbobọ, ne u ya ọkpa vbe usun ebe ni rre Emadogua Ne A Ya Maa Emwa Emwi suẹn gha gu ẹre ruẹ emwi. Vbe nẹi khian ghi kpẹẹ gbe, Arriọba Osanobua gha do guọghọ arriọba emwa nagbọn hia fẹẹrẹ. (Dan 2:44; 1 Kọr 15:24, 25) Nọnaghiyerriọ, wa gi ima hia loo ẹkpotọ nọ kie re na, ya rhiẹre ma wẹẹ, e Jehova kevbe Arriọba ọghẹe ẹre ima ye ẹre ike!