Evbibiẹ Emọ, Wa Gha Maa Ivbi Uwa Emwi

Vbe agbọn ne ima ghi sẹ fi, emwi dan ẹre emwa ghi tie ẹre emwi esi, emwi esi ẹre iran ghi tie ẹre emwi dan. (Aiz 5:20) Ọ keghi re emwi nọ da ọmwa wẹẹ, emwi ni sọnnọ e Jehova ẹre emwa ghi ru vbe ẹdẹnẹrẹ, vbe na ghee uyinmwẹ ọghe ikpia ikpia kevbe ikhuo ikhuo ni lovbiẹ ke egbe. Emwa ne ivbi ima gba rre owebe kevbe emwa ọvbehe sẹtin gha hoo ne iran mu ivbi ima rhia. Nọnaghiyerriọ, vbua khian ya mu ivbuẹ egbe yotọ khẹ edanmwẹ vbenian hẹ?

Gi ivbuẹ rẹn avbe ilele ọghe Jehova. (Lẹv 18:3) Maa iran emwi ne Baibol khare vbekpae emwi ọdọ vbe amwẹ zẹ vbene iran mwẹ ẹwaẹn sẹ ra vbene iran waan sẹ. (Diut 6:7) Nọ egbuẹ wẹẹ: ‘I gi ivbi mwẹ rẹn nẹ wẹẹ, ne iran ghẹ zẹdẹ gu emwa ọvbehe ku iku nọ ma khẹke ra? I vbe gi iran rẹn nẹ wẹẹ ọ khẹke na gha mu egbe ẹse kevbe wẹẹ ẹgẹn i re emwi na ya ku ra? Ivbi mwẹ rẹn emwi nọ khẹke ne iran ru, deghẹ ọmwa na gha hoo, nọ ma iran efoto ọghe emwa ni bannuan ra ne iran ru emwi nẹi yẹẹ Jehova ra?’ U gha mu iran egbe yotọ khẹ edanmwẹ, ọ gha ru iyobọ ne iran, ne iran ghẹ de ye ẹbe. (Itan 27:12; Asan 7:12) U gha maa ivbuẹ emwi, ọ ghi rhiema wẹẹ u ya aro nọ ghaan ghee avbe emọ ne Jehova ya ru ruẹ ẹse.—Psm 127:3.

GHEE VIDIO NỌ MWẸ UHUNMWUTA NỌ KHARE WẸẸ BỌ OWA NỌ GHA TỌ NUẸ—GBOGBA GA IVBUẸ VBE OBỌ “EMWI DAN,” IYEKE ỌNI, A GHI ZẸ EWANNIẸN YE AVBE INỌTA NA:

• 

  Vbọzẹe nọ na khua evbibiẹ emọ eso vbe unu vbe iran gha khian maa ivbi iran emwi vbekpae emwi ọdọ vbe amwẹ?

• 

  Vbọzẹe nọ na khẹke ne evbibiẹ emọ ya Ẹmwẹ Osanobua maa ivbi iran emwi?—Ẹfis 6:4

• 

  De emwi ne otu e Jehova he kpemehe ẹre nọ gha ru iyobọ ne evbibiẹ emọ ya maa ivbi iran emwi vbekpae emwi ọdọ vbe amwẹ?—w19.05 12, ẹkpẹti

• Vbọzẹe nọ na khẹke ne u si ivbuẹ kẹ egbe, ne u vbe kakabọ gha gu iran ziro vbene iran te werriẹ aro daa edanmwẹ?