E Pita vbe Jọn gha mwamwa ughugha nọ rre odukhunmwu ne iran khian na do Ugie Alagberra ọghe 33 C.E.
UYINMWẸ ỌGHE IMA NE IVBIOTU E KRISTI
Uwẹ Mu Egbe Khẹ Ugie Ayere Ra?
Te Ugie Alagberra nokiekie ne Jesu do wa ru ekpataki. Ugbẹnvbe a miẹn wẹẹ te ọ ghi bu ẹghẹ nọ khian ya wu, Jesu keghi ru emwamwa nọ gu erhuanegbe ẹre rri evbare Alagberra kevbe nọ vbe muẹn gbọọ, ugie ne erhuanegbe ẹre khian gha do ukpo ukpo, nọ re Ugie Evbare Ota Ọghe Enọyanmwa. Rhunmwuda ọni, ọ na tama e Pita vbe Jọn, ne iran ya mwamwa ughugha ọkpa yotọ. (Luk 22:7-13; ghee efoto nọ rre odaro ebe na.) Ọna keghi ye ima re rre, vbene ọ ru ekpataki sẹ hẹ ne ima mu egbe khẹ Ugie Ayere na khian do vbe March 27. A sẹtin miẹn wẹẹ ediọn ni rre iko ne u ye ru emwamwa ọghe ọmwa nọ khian ya ọta ọghe Ugie Ayere guan nẹ, eka kevbe ayọn na khian loo vbe ẹdẹrriọ kevbe emwi nibun ọvbehe. Vbọrhirhighayehẹ, de emwi ne dọmwadẹ ima gha ru ya mu egbe yotọ?
Mu egbe yotọ. Gha tie ako ọghe Evbagbẹn Nọhuanrẹn na tie vbe ẹghẹ Ugie Ayere, u vbe gha ru erria yan rẹn. Emwamwa ne u gha lele rre Ebe Ẹdẹ. Emwamwa vbenian vbe rre Appendix B12A kevbe B12B vbe New World Translation of the Holy Scriptures na dọlọ gbẹn. Ọ wa guan kaẹn emwi nibun ni sunu vbe ọ ghi bu ẹghẹ ne Jesu khian ya wu. (Vbe ya ghee Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima ọghe April 2020.) Dọmwadẹ ẹgbẹe gha miẹn ayahọmwaehọ nibun nọ dekaẹn vbene izọese adẹwerriegbe ru ekpataki sẹ hẹ vbe Watch Tower Publications Index ra Research Guide for Jehovah’s Witnesses ne iran gha sẹtin ziro yan vbe iruẹmwi ẹgbẹe ọghe iran.
Gie na tie emwa ọvbehe. Gha muẹn roro emwa ne u gha sẹtin gie na tie. U sẹtin gie na tie emwa ne u ka kporhu ma, emwa ne u ka gu ruẹ e Baibol, avbe ọse vbe irọnmwa kevbe emwa ruẹ vbe uwu ẹgbẹe. Ọ vbe khẹke ne ediọn hia ne iran gie na tie etẹn ni worua vbe odẹ ọghe orhiọn. Yerre wẹẹ, ọ gha khọnrẹn wẹẹ ọmwa i rre ẹdogbo ne u ye, u gha sẹtin gualọ ako nọ ghi sikẹ ọre sẹ, nọ gha na sẹtin yo Ugie Ayere na. U gha miẹn ẹghẹ kevbe ehe na khian na do Ugie Ayere vbe ẹdogbo ne ọmwa nii ye vbe jw.org. Gha rrie ako na ka sẹ vbe jw.org, klik NỌ DEKAAN IMA, iyeke ọni, u ghi klik “Ugie Ayere.”
De emwi ọvbehe ne u gha sẹtin ru ne u ya mu egbe yotọ khẹ Ugie Ayere?