UYINMWẸ ỌGHE IMA NE IVBIOTU E KRISTI
Emwi Ne Ima Miẹn Ruẹ Vbe Okha Ọghe Samuẹl
E Samuẹl keghi ya ẹdagbọn rẹn hia ga e Jehova. Te Samuẹl wa gha mwẹ uyinmwẹ esi vbe ọ rre ọvbokhan, ọ ma gha yevbe ivbi Elai nikpia na tie ẹre Hofnai kevbe Finihaz. (1 Sam 2:22-26) E Jehova keghi mudia ne Samuẹl vbe ọ waan dee. (1 Sam 3:19) E Samuẹl kegha ya ẹkoata ga e Jehova vbe ọ khian enọwanrẹn nẹ, agharhemiẹn wẹẹ, ivbi ẹre ma gha ru vberriọ.—1 Sam 8:1-5.
De emwi ne ima miẹn ruẹ vbe igiemwi ọghe Samuẹl? Adeghẹ igbama ẹre u khin, gha mwẹ ilẹkẹtin wẹẹ, e Jehova rẹn ọlọghọmwa ne u la gberra, ọ vbe rẹn vbene emwi ye ruẹ hẹ. Ọ gha ru iyobọ nuẹn ya gha mwẹ udinmwẹ. (Aiz 41:10, 13) Adeghẹ ovbuẹ i ghi ga e Jehova, u gha wa miẹn emwi ruẹ vbe obọ e Samuẹl. E Samuẹl ma kpikpi ivbi ẹre nikpia ne iran ga e Jehova. Ọ keghi sẹ emwi hia rae ye obọ e Jehova, ọ na da imudiase ọghẹe yi, ọ na vbe gha ru emwi nọ ya ẹko rhiẹnrhiẹn e Jehova. Ughaghe, igiemwi esi ọghuẹ sẹtin ru iyobọ ne ovbuẹ ya dọlegbe do gha ga e Jehova.
GHEE VIDIO NỌ MWẸ UHUNMWUTA NỌ KHARE WẸẸ U GHA MIẸN EMWI RUẸ VBE OBỌ IRAN—E SAMUẸL, IYEKE ỌNI, A GHI ZẸ EWANNIẸN YE AVBE INỌTA NA:
De vbene Samuẹl ya rhie udinmwẹ ma vbe ọ rre ọvbokhan?
De vbene Danny ya rhie udinmwẹ ma?
De vbene Samuẹl ya rhie igiemwi esi yotọ hẹ vbe ọ khian enọwanrẹn nẹ?
E Jehova keghi ru iyobọ ne emwa ni mudia ẹse
De igiemwi esi ne evbibiẹ e Danny rhie yotọ?