UYINMWẸ ỌGHE IMA NE IVBIOTU E KRISTI
De Aro Emwa Ni Re Ọse Ruẹ Vbe Intanẹt?
Ọse ọre “ọmwa nọ rhikhan mu ọmwa ọvbehe rhunmwuda ahoẹmwọmwa kevbe ọghọ nọ mwẹ ne ọmwa nii.” Vbe igiemwi, e Devid ghi gbe Golaiat rua nẹ, irẹn vbe Jonatan keghi khian ọse ne kankankan. (1 Sam 18:1) Te iran eva wa gha mwẹ uyinmwẹ esi, ọna ẹre ọ si ẹre ne iran na sẹtin guobọ egbe. Ọna rhie ma wẹẹ, deghẹ orhunmwu eva ma na gele rẹn egbe, iran i khian sẹtin gha re ọse ne ọse. Ne orhunmwu eva gele sẹtin do rẹn egbe i re iwinna ẹdẹ ọkpa. Sokpan ẹi re erriọ ye vbe ehe ne a na zẹ ọse vbe intanẹt, emwi ọkpa kẹkan ẹre u khian wa klik, uwẹ vbe ọmwa khian ọse nẹ. U ghaa gu ọmwa guan vbe intanẹt, ọ gha sẹtin kakabọ roro ẹmwẹ nẹ, ọ ke tae, ọ gha vbe sẹtin mu emwi nọ khin lẹre, rhunmwuda ọni, ọ gha lọghọ u ke sẹtin rẹn aro ọmwa nọ gele khin. Nọnaghiyerriọ, ọ khẹke ne u vin uwu ne egbuẹ vbe nọ dekaẹn aro emwa ne u khian gha gu ru ọse vbe intanẹt. Ọmwaikọmwa ghaa hoo nọ gu ruẹ ru ọse vbe intanẹt, ghẹ wa miẹn ọnrẹn yi rhunmwuda wẹẹ u ma hoo ne u ru emwi nọ gha sọnnọ ọnrẹn. Rhunmwuda ẹbe na miẹn vbe ehe ne a na zẹ ọse vbe intanẹt, emwa eso zọe vbe iro nẹ wẹẹ, iran i khian zẹdẹ gha loo ẹre. Sokpan deghẹ u hoo ne u gha loo ẹre, de emwi eso nọ khẹke ne u kọ ye orhiọn?
GHEE VIDIO NỌ MWẸ UHUNMWUTA NỌ KHARE WẸẸ, GHA YA ẸWAẸN LOO EHE NE A NA ZẸ ỌSE VBE INTANẸT, IYEKE ỌNI, A GHI ZẸ EWANNIẸN YE AVBE INỌTA NA:
De emwi nọ khẹke ne u ka mu roro, u ke gbẹn emwi rhọkpa ye intanẹt ra u ke mu efoto yọ?
Vbọzẹ nọ na khẹke ne u gha ya ẹwaẹn zẹ ọse vbe intanẹt?
Vbọzẹ nọ ma na khẹke ne u gha loo ẹghẹ nọ bun gbe vbe ehe ne a na zẹ ọse vbe intanẹt?—Ẹfis 5:15, 16