UYINMWẸ ỌGHE IMA NE IVBIOTU E KRISTI
Ọlọghọmwa Hia Gha Fo Vbe Ẹdẹ Ọkpa
Ọlọghọmwa ne ima ye sẹtin ya egbe wọọ ima, katekate deghẹ ọ na kpẹẹ gbe vbe otọ. E Devid rẹnrẹn wẹẹ, ọlọghọmwa ne irẹn werriẹ aro daa rhunmwuda ne Ọba e Sọl na gha kpokpo irẹn gha fo vbe ẹdẹ ọkpa, kevbe wẹẹ, irẹn gha gele khian ọba zẹvbe ne Jehova yan rẹn. (1 Sam 16:13) Amuẹtinyan ne Devid ghaa mwẹ ẹre ọ ru iyobọ nẹẹn ya sẹtin zin egbe sẹ ẹghẹ ne Jehova khian ya sọfurre ye ọlọghọmwa nọ ghaa ye.
Ma ghaa rre uwu ọlọghọmwa, ma sẹtin ya ẹwaẹn ru emwi eso nọ gha sọfurre ye ọlọghọmwa ne ima ye nii. (1 Sam 21:12-14; Itan 1:4) Sokpan, ọlọghọmwa eso rrọọ nẹi kue fo vbe otọ, ọ gha khọnrẹn wẹẹ ima ru emwi hia ne ima gha sẹtin ru zẹvbe nọ gua ilele ọghe Baibol ro. Ọ ghaa yerriọ, ọ khẹke ne ima fẹko zin egbe khẹ e Jehova. Vbe nẹi khian ghi kpẹẹ gbe, ọ gha sọfurre ye ọlọghọmwa hia ne ima werriẹ aro daa, ọ ghi vbe “khiẹn ameve hia” hin aro ima rre. (Arhie 21:4) Vbọrhirhighayehẹ, deghẹ e Jehova ẹre ọ ghi tobọre sọfurre ye ọlọghọmwa ne ima werriẹ aro daa ra emwi ọvbehe ẹre ọ ghi yae fo vbe otọ, ọ khẹke ne ima gha mwẹ ọnrẹn vbe orhiọn wẹẹ, ọlọghọmwa hia gha fo vbe ẹdẹ ọkpa. Ọna sẹ nọ gha mu ima orhiọn sotọ.
GHEE VIDIO NỌ MWẸ UHUNMWUTA NỌ KHARE WẸẸ, EMWA NI MWẸ AKUGBE VBE AGBỌN NE EMWA I NA MWẸ AKUGBE, IYEKE ỌNI, A GHI ZẸ EWANNIẸN YE AVBE INỌTA NA:
De ọlọghọmwa eso ne etẹn ni ghaa rre odẹ ahọ ọghe United States werriẹ aro daa?
De vbene iran ya rhie ẹre ma hẹ wẹẹ, iran mwẹ izinegbe kevbe ahoẹmwọmwa?
De vbene iran ya rhie ẹre ma hẹ wẹẹ, iran “zẹ emwi nọ maan sẹ”?—Fil 1:10