Gha Gualọ Adia Nọ Gha Ru Iyobọ Nuẹn Vbe JW.ORG

Ẹmwẹ Osanobua keghi ru iyobọ ne ima ya zin egbe edanmwẹ ughughan ne ima werriẹ aro daa, vbe ẹghẹ okiekie ẹdẹ ne ima ye na. (2 Tim 3:1, 16, 17) Sokpan ugbẹnso, ma sẹtin gha gualọ ẹmwẹ ibude eso vbe uwu e Baibol, nọ gha ru iyobọ ne ima vbe ima ghaa werriẹ aro daa ọlọghọmwa eso. Vbe igiemwi, evbibiẹ ọmọ nọ hoo ne irẹn rẹn odẹ nọ khẹke ne irẹn khian ya gbaroghe ivbi ẹre, ẹre u khin ra? Igbama nọ werriẹ aro daa ọlọghọmwa eso rhunmwuda emwi nọ yayi, ẹre u khin ra? Te u khiẹ, rhunmwuda ne ọvbokhan ruẹ ra ọdafẹn ruẹ na wu ra? Deghẹ u na gha werriẹ aro daa ọkpa vbe usun avbe ọlọghọmwa na sunu yi na, ra ọlọghọmwa ọvbehe nọ rhirhi gha khin, u gha miẹn emwi nibun vbe jw.org nọ gha ya ruẹ rẹn ilele eso ni rre Baibol, ni gha sẹtin ru iyobọ nuẹn.​—Itan 2:3-6.

U gha sẹ ako nokaro vbe jw.org, u ghi gha rrie abọ na tie ẹre IMAMWAEMWI NI RRE UWU E BAIBOL. (Ghee efoto 1.) U ghi zẹ ọkpa vbe usun avbe uhunmwuta nọ yẹẹ ruẹ ni rre ototọ abọ na. Ra u ghi gha rrie AZA > UHUNMWUTA NA GBA RE IKUN, u ghi vbe zẹ ọkpa vbe usun avbe uhunmwuta nọ yẹẹ ruẹ ni rre ototọ abọ na. (Ghee efoto 2.) U gha vbe miẹn avbe abọ ughughan na guan kaẹn na vbe JW Library^®.a U sẹtin vbe hia ne u rhie aro la edọmwadẹ uhunmwuta ni rre abọ eva na. Emwi ọvbehe ne u gha sẹtin ru, ọre ne u loo ako ne a na gualọ emwi vbe jw.org, ya gualọ uhunmwuta ne u hoo ne u miẹn.

Gbẹnnẹ avbe olika ẹmwẹ ni rre ototọ mwa ye ako ne a na gualọ emwi vbe jw.org, u gha ru vberriọ, ọ ghi mu uhunmwuta nibun ladian. Iyeke ọni, u ghi gbẹnnẹ avbe uhunmwuta ne u gha hoo ne u tie ladian.

• Vbene a ya koko emọ hẹ

• Emwi nọ gha ru iyobọ ne avbe igbama ne iro han rẹn

• Ọmwa ne ọdọ re, ra amwẹ ọnrẹn wu