Ọ Khẹke Ne Ọdọ Vbe Amwẹ Rhikhan Mu Egbe Sẹ Ota

Deghẹ ọdọ vbe amwẹ na gele hoẹmwẹ egbe, iran na vbe gha mwẹ akugbe, orọnmwẹ ọghe iran ghi gha rhie uyi gie Jehova, iran eva ghi vbe gha ghọghọ. (Mak 10:9) Te ọ khẹke ne etẹn nikpia kevbe etẹn nikhuo gha lele ilele ni rre Baibol vbe iran ghaa gualọ ọmwa ne iran khian rọnmwẹ. Iran gha ru vberriọ, iran ghi gha sọyẹnmwẹ vbe iran gha ru orọnmwẹ nẹ, iran ghi vbe rọnmwẹ egbe sẹ ota.

Vbene uwẹ vbe ọmwa te suẹn gha si egbe obọ, ọ khẹke ne u gi ẹghẹ ne egbe ya fifi ọmwa nọ ya ru emwi ọdọ vbe amwẹ ka gberra nẹ, rhunmwuda ọ lọghọ na sẹtin ru azẹ nọ maan, vbe ẹghẹ vbenian. (1 Kọr 7:36) Ọ khẹke ne u loo ẹghẹ ne u ya re okhiọnkpa ya gha ru emwi ni gha ya ruẹ sikẹ Osanobua sayọ, u ghi vbe hia ne u gha mwẹ uyinmwẹ nọ khẹke ne Ivbiotu e Kristi gha mwẹ. Ẹghẹ nii, u gha ghi ru orọnmwẹ nẹ, u ghi sẹtin gha ru emwi nọ gha ya uwẹ vbe ọvbokhan ra ọdafọn gha mwẹ oghọghọ, uwa ghi vbe rọnmwẹ egbe sẹ ota.

Vbene uwẹ vbe ọmwa te ru orọnmwẹ, ọ khẹke ne u ka rẹn aro ọmwa nọ gele khin nẹ. (1 Pit 3:4) Deghẹ emwi eso rrọọ, nọ susu yọ ruẹ aro vbekpa ọmwa na, ọ khẹke ne uwẹ vbe ọre gba ziro yan rẹn. U gha khian ru orọnmwẹ, u ghi kọe ye orhiọn wẹẹ, emwi nọ khẹke ne u rhie aro tua ọre vbene u khian ya ru iyobọ ne ọdafọn ra ọvbokhan vbe u gha ru orọnmwẹ nẹ, ẹi re iyobọ ne u khian miẹn vbe obọ ọre. (Fil 2:3, 4) Deghẹ u na gha ya ilele ọghe Baibol ru emwi vbe ẹghẹ ne u ya re okhiọnkpa, ọ gha ru iyobọ nuẹn ya gha ru vberriọ vbe u gha ru orọnmwẹ nẹ, ẹghẹ nii, uwẹ vbe ọdafọn ra ọvbokhan ghi gha sọyẹnmwẹ.

GHEE VIDIO NỌ MWẸ UHUNMWUTA NỌ KHARE WẸẸ, U GHAA MU EGBE ORỌNMWẸ​—ABỌ 3: “RORO INU IGHO NỌ GHA GBE,” IYEKE ỌNI, A GHI ZẸ EWANNIẸN YE AVBE INỌTA NA:

• De vbene emwi ghaa ye hẹ, vbe ẹghẹ ne ọtẹn nokhuo na kevbe Shane na gha si egbe obọ?

• Zẹvbe ne ẹghẹ ya gha khian, de aro uyinmwẹ nọ ghi gha bẹghe?

• De vbene evbibiẹ ọre ya ru iyobọ nẹẹn hẹ, kevbe wẹẹ, de azẹ nọ maan nọ ghi ru?