UYINMWẸ ỌGHE IMA NE IVBIOTU E KRISTI
Hia Ne U Rẹn Vbene Osanobua Ghee Emwi Hẹ
Ma wa hoo ne emwi hia ne ima ru gha ya ẹko rhiẹnrhiẹn e Jehova. (Itan 27:11) Rhunmwuda ọni, ọ khẹke ne emwi ne ima ru gha rhie ẹre ma wẹẹ, ma ghee emwi vbene Jehova ghee ẹre, ọ gha khọnrẹn wẹẹ uhi rhọkpa i rrọọ nọ gha tama ima emwi nọ khẹke ne ima ru. Vbọ khian ru iyobọ ne ima ya ru ọna?
Gha ruẹ Baibol vbe ẹghẹ hia. Ẹghẹ ke ẹghẹ ne ima ya tie Baibol, ọ ghi yevbe na miẹn wẹẹ e Jehova gu ima guan. Deghẹ ima na hia ne ima rẹn obọ ne Jehova ya gha mu emwa rẹn vbe ẹghẹ nẹdẹ, ma na vbe gha tie okha ọghe emwa ni ghaa ru emwi nọ yẹẹ ọre ra emwi nẹi yẹẹ ọre, ọ gha ya ima rẹn vbene ọ ghee emwi hẹ. Ma gha khian ghi ru azẹ nọ rhirhi gha khin, orhiọn nọhuanrẹn gha ru iyobọ ne ima ya ye ẹre rre, emwi ughughan ne ima he ruẹ vbe Baibol nọ gha ru iyobọ ne ima.—Jọn 14:26.
Gha ru ezanzan. U ke ru azẹ rhọkpa, nọ egbuẹ wẹẹ, ‘De ako ọghe Baibol nọ gha ya mwẹ rẹn emwi ne Jehova hoo ne I ru?’ Na erhunmwu ne Jehova ru iyobọ nuẹn, u ghi vbe loo emwi ughughan ne otu e Jehova he kpemehe ẹre vbe urhuẹvbo ruẹ, ni gha ya ruẹ rẹn ilele ọghe Baibol eso, ni gha ru iyobọ nuẹn.—Psm 25:4.
GHEE VIDIO NỌ MWẸ UHUNMWUTA NỌ KHARE WẸẸ TE IMA GHA YA IZIENGBE RHULẸ—GHA RRI EVBARE ESI, IYEKE ỌNI, A GHI ZẸ EWANNIẸN YE AVBE INỌTA NA:
De ọlọghọmwa eso, ne ọtẹn nokhuo nọ rre vidio na miẹn?
Deghẹ u na miẹn ọlọghọmwa ni ye vbenian, de vbene avbe emadogua ughughan na ya ru ezanzan gha ya sẹtin ru iyobọ nuẹn hẹ?
De ere ne ima miẹn, deghẹ ima na gha tie Baibol, ma na vbe gha ru ezanzan, ne ima mieke na sẹtin ru azẹ nọ maan?—Hib 5:13, 14