Gha Ya Aro Nọ Ghaan Ghee Dọmwadẹ Emwa Ni Rre Uwu Iko

1. De ukpamuyọmọ ne Jehova mu ne ima?

UKPAMUYỌMỌ nọkhua ẹre ima wa mwẹ, ne ima na rre uwu iko ọghe Jehova. Iwinna ughughan ẹre Jehova waa ne eguọmwadia ẹre ni rre uwu iko. Agharhemiẹn wẹẹ iwinna ughughan ẹre ima winna, ma hia fẹẹrẹ mwẹ esa ne ima ye, ma wa vbe gualọ iyobọ egbe. De vbene ẹmwẹ ne ukọ e Pọl tae ya so igiẹ ye ọna?

2. Zẹvbe nọ rre ebe Ẹfisọs 4:16, vbọzẹe nọ na khẹke ne ima gha ya aro nọ ghaan ghee etẹn ni rre uwu iko kevbe ne ima gha mwẹ akugbe?

² Zẹvbe ne ima bẹghe ẹre vbe ako evbagbẹn nọhuanrẹn ne ako iruẹmwi na hẹnhẹn egbe yan, ukọ e Pọl keghi gi ima rẹn wẹẹ, ma rhọkpa i khian sẹtin tama ọtẹn ọvbehe vbuwe iko wẹẹ, “I i mwẹ emwi ne I ya a ru.” (1 Kọr 12:21) Adeghẹ ima hoo ne ọfunmwegbe gha rre uwu iko, te ọ khẹke ne ima gha ya aro nọ ghaan ghee emwa ọvbehe vbuwe iko, ma ghi vbe gha mwẹ akugbe. (Tie Ẹfisọs 4:16.) Ẹghẹ nii, ahoẹmwọmwa nọ rre uwu iko ghi gha wegbe yọ, etẹn ni rre uwu iko ghi vbe deziẹn vbe odẹ ọghe orhiọn.

3. De emwi ne ima khian ziro yan vbe ako iruẹmwi na?

³ De odẹ eso ne ima khian ya rhiẹre ma wẹẹ, ma ya aro nọ ghaan ghee etẹn ni rre uwu iko? Vbe ako iruẹmwi na, ma gha ziro yan vbene ediọn khian ya rhiẹre ma wẹẹ iran rhie ọghọ ne egbe. Vbe iyeke ọni, ma ghi vbe ziro yan vbene ima hia khian ya rhiẹre ma wẹẹ, ma ya aro nọ ghaan ghee etẹn ima ni re okhiọnkpa. Ma gha vbe ziro yan vbene ima khian ya rhiẹre ma wẹẹ, ma ya aro nọ ghaan ghee etẹn ni rre uwu iko ọghe ima, nẹi gua zẹ urhuẹvbo ọghe ima ẹse.

EDIỌN, WA GHA RHIE ỌGHỌ NE EGBE

4. De adia nọ rre ebe Rom 12:10, nọ khẹke ne ediọn gha lele?

⁴ Orhiọn nọhuanrẹn ẹre Jehova ya zẹ ediọn hia ni rre uwu iko, sokpan dọmwadẹ iran mwẹ eke ne iran na hia. (1 Kọr 12:17, 18) Eso rrọọ ni da suẹn gha ga zẹvbe ediọn vbuwe iko, rhunmwuda ọni, iran ma wa he fuẹro vberriọ. Ediọn eso rrọọ nẹi ghi sẹtin ru emwi ne iran ka ru vbuwe iko rhunmwuda iran khian ọmaẹn nẹ, eso vbe rrọọ ni khuọnmwi. Ọrheyerriọ, ọ ma khẹke ne ọdiọn rhọkpa gha roro ẹre wẹẹ, ọdiọn ọvbehe vbuwe iko i mwẹ esa nọ ye, nẹ ghẹ do yevbe na miẹn wẹẹ te ọ tama rẹn wẹẹ, “I i mwẹ emwi ne I ya a ru.” Nọghayayerriọ, ọ khẹke ne dọmwadẹ ediọn lele adia ọghe ukọ e Pọl nọ rre ebe Rom 12:10.—Tie ẹre.

5. De vbene ediọn khian ya rhiẹre ma wẹẹ, iran rhie ọghọ ne egbe? Vbọzẹe nọ na khẹke ne iran ru vberriọ?

⁵ Odẹ ọkpa ne ediọn khian ya rhiẹre ma wẹẹ, iran rhie ọghọ ne egbe, ọre ne iran gha rhie ehọ ne egbe ta yi. Ọ wa khẹke ne iran gha ru ọna vbe ẹghẹ hia, katekate vbe iran ghaa do iko. Vbe ima gu kha vberriọ? The Watchtower ọghe October 1, 1988, keghi kha wẹẹ: “Vbe ediọn ghaa do iko, ọ khẹke ne iran kọe ye orhiọn wẹẹ, e Kristi sẹtin loo orhiọn nọhuanrẹn ya rhie ekhọe ọghe ọkpa vbuwe iran ghee ilele nọ rre Evbagbẹn Nọhuanrẹn nọ gha ru iyobọ ne iran ya zuze ye ẹmwẹ nọ rre otọ. (Iwinna 15:6-15) Nọnaghiyerriọ, ọ ma khẹke ne ọdiọn rhọkpa wa gha mu idan mu ẹgogo vbe iran ghaa do iko.”

6. De vbene ediọn khian ya rhiẹre ma wẹẹ, iran mwẹ akugbe? De vbene ọna khian ya ru iyobọ ne iko hẹ?

⁶ Adeghẹ ọdiọn vbuwe iko hoo nọ rhiẹre ma wẹẹ, irẹn rhie ọghọ ne ediọn nikẹre, ọ ma khẹke nọ wa gha fian karo vbe ẹghẹ ke ẹghẹ ne iran ya do iko, ọ ma khẹke ne ẹmwẹ nọ ta wa gha de yan ọghe emwa ọvbehe, ra nọ gha roro ẹre wẹẹ, irẹn gha tae nẹ, ai ghi muan rẹn. Nọghayayerriọ, ọ ghaa mwẹ emwi nọ khian ta, ọ ghi ya imuegberriotọ tae, ọ ghi vbe gbehọ kotọ gha danmwehọ vbe emwa ọvbehe ghaa guan. Sẹ ehia, ọ ghi gha hoo nọ rhie ekhọe ọghe etẹn nikẹre ghee ilele ni rre Evbagbẹn Nọhuanrẹn, kevbe adia nọ ke obọ ọviẹn nọ gia mu ẹtin yan kevbe nọ fuẹro rre. (Mat 24:45-47) Adeghẹ ediọn na gha ya ahoẹmwọmwa kevbe ọghọ gu egbe guan vbe iran ghaa do iko, ẹre orhiọn nọhuanrẹn khian na sẹtin ru iyobọ ne iran. Ẹghẹ nii, iran ghi sẹtin ru atamuolọyan nọ gha ru iyobọ ne etẹn hia ni rre uwu iko.—Jems 3:17, 18.

GHA YA ARO NỌ GHAAN GHEE AVBE OKHIỌNKPA NI RRE UWU IKO

7. De aro ne Jesu ya gha ghee avbe okhiọnkpa?

⁷ Etẹn eso rrọọ vbuwe iko ni ru orọnmwẹ nẹ, eso kue vbe biẹ nẹ. Sokpan etẹn nikpia kevbe etẹn nikhuo nibun rrọọ ni ma he ru orọnmwẹ. De aro nọ khẹke ne ima ya gha ghee etẹn vbenian? Gia ziro yan aro ne Jesu Kristi ya gha ghee avbe okhiọnkpa. Vbe Jesu rre agbọn na, ọ ma rhie okhuo, ọ keghi rhie aro tua iwinna ne Erhae mu nẹẹn. Ọ ma mwẹ ẹghẹ ọkpa nọ ya kha wẹẹ, esalẹbẹ nọ ne Ivbiotu e Kristi ru orọnmwẹ ra ne iran gha re okhiọnkpa. Vbọrhirhighayehẹ, ọ keghi kha wẹẹ, Ivbiotu e Kristi eso rrọọ ni khian zẹ ne egbe iran wẹẹ, okhiọnkpa ẹre iran khian gha khin. (Mat 19:11, 12) Aro nọ ghaan ẹre Jesu ya gha ghee avbe okhiọnkpa, ọ ma gha ghee iran sila sila rhunmwuda wẹẹ iran ma ru orọnmwẹ.

8. Zẹvbe nọ rre ebe 1 Kọrinti 7:7-9, de igiọdu ne Pọl rhie ne Ivbiotu e Kristi?

⁸ Okhiọnkpa ẹre ukọ e Pọl ghaa khin vbe ẹghẹ nọ ya gha winna iwinna ikporhu iyẹn nọ maan ọghẹe zẹvbe ne Jesu vbe gha ye. Ọ ma mwẹ ẹghẹ ọkpa ne Pọl ya kha wẹẹ, emwi dan nọ deghẹ Ovbiotu e Kristi na ru orọnmwẹ, rhunmwuda ọ rẹnrẹn wẹẹ, dọmwadẹ ọghẹe ẹre ọ khian zẹ ne egbe ẹre. Ọrheyerriọ, e Pọl keghi rhie igiọdu ne Ivbiotu e Kristi, ne iran mu ukpa mu uwerhẹn ghee ẹre, deghẹ iran gha sẹtin gha re okhiọnkpa, ne iran mieke na rhie aro tua iwinna ugamwẹ ọghe Jehova. (Tie 1 Kọrinti 7:7-9.) Vbene ẹmwata, e Pọl ma zẹdẹ ya aro gbe iran re, ighẹ Ivbiotu e Kristi ni ghaa re okhiọnkpa. Uhiẹn, te ukọ e Pọl wa waa iwinna nibun ne kpataki ne Timoti, agharhemiẹn wẹẹ okhiọnkpa ghaa nọ.b (Fil 2:19-22) Nọnaghiyerriọ, ọ ma khẹke ne ima gha roro ẹre wẹẹ, ọtẹn nokpia ghaa re okhiọnkpa, ẹre ọ khian na gbegba nọ khian ru iwinna ne kpataki eso vbuwe iko. Erriọ vbe ye, ọ ma vbe khẹke ne ima gha roro ẹre wẹẹ, ọtẹn nokpia gha ru orọnmwẹ nẹ, ẹre ọ khian na gbegba nọ khian ru egbe iwinna vberriọ.—1 Kọr 7:32-35, 38.

9. De aro nọ khẹke ne ima ya gha ghee emwa ni ru orọnmwẹ nẹ kevbe ni re okhiọnkpa?

⁹ Jesu kevbe Pọl ma kha wẹẹ, esalẹbẹ ẹre nọ ne Ivbiotu e Kristi gha ru orọnmwẹ ra ne iran gha re okhiọnkpa. Nọnaghiyerriọ, de aro nọ khẹke ne ima ya gha ghee emwa ni ru orọnmwẹ nẹ kevbe emwa ni re okhiọnkpa? The Watchtower ọghe October 1, 2012, keghi kha wẹẹ: “Vbene ẹmwata, [ọre te ima ru orọnmwẹ nẹ, ra okhiọnkpa ẹre ima ye khin], ẹse nọ ke obọ Osanobua rre ẹre ehia khin. . . . E Jehova i ghee ẹre wẹẹ, emwi ekhue nọ deghẹ ọmwa na gha re [okhiọnkpa].” Vbene ima na mwẹ ena hia vbe ekhọe, ọ khẹke ne ima gha ya aro nọ ghaan ghee etẹn ima nikpia kevbe etẹn ima nikhuo ni re okhiọnkpa, ni rre uwu iko.

10. De vbene ima khian ya rhiẹre ma wẹẹ, ma rhie ọghọ ne etẹn ima nikpia kevbe etẹn ima nikhuo ni re okhiọnkpa?

¹⁰ De vbene ima khian ya rhiẹre ma wẹẹ, ma rhie ọghọ ne etẹn ima ni re okhiọnkpa? Ọ khẹke ne ima kọe ye orhiọn wẹẹ, etẹn ima eso ni re okhiọnkpa, ẹre ọ zẹ ne egbe iran wẹẹ, iran i khian ru orọnmwẹ iran ke ya wu. Eso vbe rrọọ ni te hoo ne iran ru orọnmwẹ, sokpan iran ma he miẹn ọmwa nọ yẹẹ iran. Eso vbe rrọọ ni te ru orọnmwẹ nẹ, sokpan ọmwa ne iran gba ru orọnmwẹ na wu sẹ iran rae. Nọnaghiyerriọ, ọ khẹke ne etẹn ni rre uwu iko gha nọ etẹn ni re okhiọnkpa, evbọzẹe ne iran ma na he ru orọnmwẹ ra? Ọ vbe khẹke ne iran gha gu avbe okhiọnkpa gualọ ọmwa ne iran khian rhie, ra ọmwa ne iran khian rọnmwẹ ra? Ẹmwata nọ wẹẹ, ọtẹn nọ re okhiọnkpa sẹtin tama etẹn eso ne iran gu irẹn gualọ ọmwa ne irẹn khian rhie ra ọmwa ne irẹn khian rọnmwẹ. Sokpan vbọ khian gha ye hẹ, deghẹ ọtẹn na gha hoo nọ ru egbe iyobọ vbenian, vbene ọtẹn nọ re okhiọnkpa ma na gie ẹre? (1 Tẹs 4:11; 1 Tim 5:13) Nia, gia ziro yan ẹmwẹ ne etẹn ima eso ni re okhiọnkpa tae vbe nọ dekaẹn ọna.

11-12. De emwi eso ne ima gha ru, nọ gha sẹtin gbe orhiọn ye avbe okhiọnkpa iwu?

¹¹ Ọgbaroghe ọghe otako ọkpa nọ re okhiọnkpa, nọ wa kakabọ fuẹro vbe iwinna ọghẹe keghi kha wẹẹ, ere wa rrọọ deghẹ ọmwa na gha re okhiọnkpa. Ọ na vbe kha wẹẹ, ọ keghi gbe orhiọn ye irẹn iwu, vbe etẹn ghaa nọ irẹn wẹẹ: “Vbua ye khẹ, ne u ma na he rhie okhuo?” Ọtẹn nokpia ọkpa nọ re okhiọnkpa nọ ga vbe abotu keghi kha wẹẹ: “Vbene etẹn eso ya ru vbe ugbẹnso, ọ ghi yevbe na miẹn wẹẹ, te iran tohan avbe okhiọnkpa. Iran ghi gha ya ọmwa roro ẹre wẹẹ, ọmwa nọ re okhiọnkpa, ẹi re agbọn ẹre ọ ye.”

¹² Ọtẹn nokhuo ọkpa nọ re okhiọnkpa nọ ga vbe Bẹtẹl keghi kha wẹẹ: “Etẹn eso gha wa miẹn avbe okhiọnkpa, iran ghi gha roro ẹre wẹẹ, te iran gualọ ọmwa ne iran khian rhie ra ọmwa ne iran khian rọnmwẹ. Avbe okhiọnkpa ghaa rre eke ne etẹn na gbẹbu, etẹn eso ghi gha roro ẹre wẹẹ, te iran rrie evba do gualọ ọmwa ne iran khian rọnmwẹ, ra ọmwa ne iran khian rhie. Ọ ghaa mwẹ asẹ ọkpa ne otu ya gie mwẹ gha rrie ẹvbo ọvbehe, ne I ya ru iwinna eso. Ẹdẹ ne I sẹ evba, ẹre ọ ghaa re iko ọghe iran. Ọtẹn nokhuo ne I dia owa re ya keghi tama mwẹ wẹẹ, etẹn nikpia eva rre iko ọghe iran, ne ima gba re ihe egbe. Ọ na khama mwẹ wẹẹ, ẹi re te irẹn hoo ne irẹn gualọ ọdọ mẹ. Sokpan ma ghi sẹ iko, ọ na wa rhie mwẹ bu etẹn nikpia eva na. Ma eha na do gha ghee egbe bale bale, ma ma ghi miẹn ẹmwẹ ta. Ekhue ghi mu ima vbe ẹdẹrriọ!”

13. De emwi nọ rhie igiọdu ne ọtẹn nokhuo ọkpa nọ re okhiọnkpa?

¹³ Ọtẹn nokhuo ọvbehe nọ re okhiọnkpa nọ ga vbe Bẹtẹl keghi kha wẹẹ: “I wa rẹn etẹn eso ni re arọndẹ, ni kpẹẹ nẹ vbe okhiọnkpa. Iran wa deziẹn vbe odẹ ọghe orhiọn, iran wa muegbe ne iran ya ru iyobọ ne etẹn ni rre uwu iko, erriọ iran vbe ya sọyẹnmwẹ iwinna ugamwẹ ọghe iran. Ọrheyerriọ, iran i ghee egbe iran gidi, iran i vbe gbe ọsumẹ segbe rhunmwuda wẹẹ iran ma he ru orọnmwẹ, ra iran ma he biẹ.” Erriọ khẹke ne ọ gha ye vbe iko ọghe Jehova. Te ọ khẹke na gha ya aro nọ ghaan ghee emwa hia, ọ ma khẹke na gha ya aro gbe ọmwa rhọkpa re, ra na gha ghee ọmwa rhọkpa gidi. Ọ ghaa ye vberriọ, emwa hia ni rre iko ghi wa rẹn wẹẹ, iran mwẹ esa ne iran ye.

14. De vbene ima khian ya rhiẹre ma wẹẹ, ma rhie ọghọ ne eten ni re okhiọnkpa?

¹⁴ Ọ ma khẹke ne ima gha ya aro gbe avbe okhiọnkpa re. Nọghayayerriọ, ọ khẹke ne ima gha rhie ọghọ ne iran rhunmwuda akpa esiesi ne iran mwẹ. Ne ima gha te ya gha gbe ọsọre ne iran, ọ khẹke ne ima gha ghọghọ wẹẹ iran da imudiase ọghe iran yi. Ma ghaa ru vberriọ, te ima rhie igiọdu ne etẹn ima ni re okhiọnkpa, ẹi ghi yevbe na miẹn wẹẹ, te ima tama iran wẹẹ, “I i mwẹ emwi ne I ya a ru.” (1 Kọr 12:21) Ẹghẹ nii, iran ghi la evba rẹn wẹẹ, aro nọ ghaan ẹre ima ya ghee iran kevbe wẹẹ, iran mwẹ esa ne iran ye vbuwe iko.

GHA YA ARO NỌ GHAAN GHEE ETẸN NẸI ZẸ URHUẸVBO RUẸ ẸSE

15. De afiwerriẹ ne etẹn eso he ru ne iran mieke na rhie egbe ye iwinna ikporhu iyẹn nọ maan sayọ?

¹⁵ Ke ukpo eso gha dee, etẹn eso keghi ruẹ urhuẹvbo ọgbọn, ne iran mieke na rhiegbe ye iwinna ikporhu iyẹn nọ maan sayọ. Sokpan ẹi re avbiẹ afiwerriẹ etẹn vbenian he ru, ne iran mieke na sẹtin ruẹ urhuẹvbo ọgbọn na. Vbe igiemwi, etẹn eso kpa hin iko ne a na zẹ urhuẹvbo ọghe iran rre, ne iran mieke na ya gha ga vbe eke ne a na gualọ iyobọ, agharhemiẹn wẹẹ urhuẹvbo ọvbehe ẹre a zẹ vba. (Iwinna 16:9) Ekhọe obọ iran, ẹre etẹn vbenian ya ru afiwerriẹ na, ne iran mieke na rhiegbe ye iwinna ikporhu iyẹn nọ maan sayọ. Agharhemiẹn wẹẹ ọ sẹtin rhie ẹghẹ iran ke sẹtin gha zẹ urhuẹvbo ọghe ọgbọn na ẹse, iran wa mwẹ iyobọ nọkhua ne iran ye vbuwe iko. Uyinmwẹ esi kevbe emwi ẹwaẹn ọghe iran keghi ru iyobọ ne etẹn ni rre uwu iko ya deziẹn vbe odẹ ọghe orhiọn. Aro nọ ghaan ẹre ima ya ghee etẹn vbenian ni rhie egbe iran ladian!

16. De emwi nọ khẹke ne ediọn gha ghee vbe iran gha khian hannọ etẹn nikpia ni gha sẹtin gha ga zẹvbe ediọn ra eguọmwadia iwinna?

¹⁶ Ọ ma khẹke ne ẹbu ediọn gha roro ẹre wẹẹ, rhunmwuda wẹẹ ọtẹn nokpia i gua zẹ urhuẹvbo ọghe iran ẹse, ọ ma gbegba nọ gha ga zẹvbe ọdiọn ra ọguọmwadia iwinna vbuwe iko. Emwi nọ khẹke ne ẹbu ediọn ghee, ọre deghẹ ọtẹn nokpia na mwẹ avbe akpa ne Evbagbẹn Nọhuanrẹn wẹẹ ne ediọn kevbe eguọmwadia iwinna gha mwẹ.—1 Tim 3:1-10, 12, 13, NW; Tai 1:5-9, NW.

17. De inọta eso nọ khẹke ne ẹgbẹe mu roro, vbe iran gha khian kpa gha rrie ẹvbo ọvbehe?

¹⁷ Ẹgbẹe eso rrọọ ni re Ivbiotu e Kristi ni kpa hin ẹvbo iran rre, rhunmwuda ọlọghọmwa ne iran werriẹ aro daa ra rhunmwuda wẹẹ iran gualọ iwinna. Ọ ghaa yerriọ, a sẹtin miẹn wẹẹ, urhuẹvbo na zẹ vbe ẹvbo ọgbọn ne iran ghi ye na, ẹre a khian ghi ya gha maa ivbi iran emwi vbe esuku. A sẹtin vbe miẹn wẹẹ, deghẹ evbibiẹ iran hoo ne iran miẹn iwinna vbe ẹvbo nii, te ọ khẹke ne iran ka ruẹ urhuẹvbo na zẹ vbe ẹvbo nii nẹ. Sokpan, gia kha wẹẹ, ọ mwẹ iko ra ẹbu nọ zẹ urhuẹvbo ọghe ẹgbẹe na vbe ẹvbo nii, de iko nọ khẹke ne ẹgbẹe na gha ye? Iko ne a na zẹ urhuẹvbo ọghe iran nọ ra, ra iko ne a na zẹ urhuẹvbo na zẹ vbe ẹvbo nii?

18. Zẹvbe nọ rre ebe Galatia 6:5, de emwi nọ ma khẹke ne ima ru, vbe uhunmwuta ẹgbẹe gha ru atamuolọyan eso?

¹⁸ Dọmwadẹ uhunmwuta ẹgbẹe, ẹre ọ khian tae, iko ne ẹgbẹe ọghẹe khian gha ye, ẹi re ọmwa ẹre ọ khian zẹ ye iran obọ. Rhunmwuda ọni, te ọ khẹke nọ muẹn roro ẹsẹsẹmwẹse, iko nọ gha maan ne ẹgbẹe ọre sẹ. (Tie Galatia 6:5.) Uhunmwuta ẹgbẹe gha ghi ru egbe atamuolọyan vbenian nẹ, ọ ma khẹke ne etẹn ni rre uwu iko gha fi ukpẹ yọ. Adeghẹ a na miẹn wẹẹ, ẹgbẹe vbenian rre iko ọghe ima, ọ khẹke ne ima ya ekhọe hia miẹn iran yi.—Rom 15:7.

19. De emwi nọ khẹke ne uhunmwuta ẹgbẹe ru?

¹⁹ Evbibiẹ emọ eso rre iko ne a na zẹ urhuẹvbo ọghe iran, sokpan ivbi iran ni gu iran rre iko nii i gua zẹ urhuẹvbo nii ẹse. A sẹtin miẹn wẹẹ, urhuẹvbo na loo vbe iko nii lughaẹn ne urhuẹvbo na zẹ vbe ẹvbo nii. Ọ ghaa yerriọ, ọ ghi do gha lọghọ ne emọ na sẹtin họn emwi na ta vbe iko kevbe ne iran vbe gha mwẹ alaghodaro. Vbọsiẹ nọ na mobọ yerriọ? Rhunmwuda urhuẹvbo na ya maa emọ nii emwi vbe esuku, sẹtin lughaẹn ne urhuẹvbo ọghe evbibiẹ iran. Ọ ghaa yerriọ, ọ khẹke ne avbe uhunmwuta ẹgbẹe mu ukpa mu uwerhẹn ghee ẹre, iran ghi vbe muẹn ye erhunmwu, ne iran mieke na sẹtin ru atamuolọyan nọ gha ru iyobọ ne ivbi iran ya sikẹ e Jehova kevbe emwa rẹn sayọ. Iran sẹtin ru iyobọ ne ivbi iran ya gha zẹ urhuẹvbo ọghe iran ẹse, ra iran sẹtin gha rrie iko ọvbehe nọ zẹ urhuẹvbo ne ivbi iran họn. Vbe nọ rhirhi gha ye hẹ, ọ khẹke ne iko ne ẹgbẹe vbenian ye gha ya obọ esi mu iran, iran ghi vbe gha rhie ọghọ ne iran.

20. De vbene ima khian ya rhiẹre ma wẹẹ, ma ya aro nọ ghaan ghee etẹn ima ni ruẹ urhuẹvbo ọgbọn?

²⁰ Rhunmwuda emwi ne ima guan kaẹn sin, ẹi mwẹ a ma miẹn etẹn nikpia kevbe etẹn nikhuo ni ruẹ urhuẹvbo ọgbọn vbe iko nibun. Ẹi khian gha khuẹrhẹ ne etẹn vbenian ne iran sẹtin gha guan, zẹvbe nọ wa ya rre iran ekhọe, vbe iran gha da sẹ iko nọ zẹ urhuẹvbo ọvbehe. Ọ ma khẹke ne ima rhie aro tua vbene etẹn vbenian ya zẹ urhuẹvbo ọghe ima hẹ. Emwi nọ khẹke ne ima rhie aro tua, ọre ahoẹmwọmwa ne iran mwẹ ne Jehova kevbe ẹrhiọn ne iran loo ye ugamwẹ ọghẹe. Adeghẹ ima na rhie aro tua akpa esiesi ne iran mwẹ, ma ghi sẹtin gha ya aro nọ ghaan ghee iran. Ẹghẹ nii, ẹi khian ghi yevbe na miẹn wẹẹ te ima tama iran wẹẹ, “I i mwẹ emwi ne I ya a ru,” rhunmwuda iran i gua zẹ urhuẹvbo ọghe ima ẹse.

ARO NỌ GHAAN ẸRE JEHOVA YA GHEE IMA HIA

21-22. Vbọ ya ima ne eguọmwadia e Jehova ghọghọ?

²¹ Ma wa ghọghọ wẹẹ, ma hia fẹẹrẹ mwẹ esa ne ima ye vbe iko ọghe Jehova. Emwa hia ni rre iko ọghe Jehova, ke ikpia ke ikhuo, ke okhiọnkpa, ke emwa ni ru orọnmwẹ nẹ, ke ọmaẹn ke ẹghele, ya sẹ egbe emwa nẹi mobọ gua zẹ urhuẹvbo na loo vbe iko kevbe emwa ni gua zẹ ọre, aro nọ ghaan ẹre Jehova ya ghee ima hia, aro vberriọ ẹre ima vbe ya ghee egbe.—Rom 12:4, 5; Kọl 3:10, 11.

²² Gi ima hia vbe odẹ ke odẹ ne ima gha rhiẹre ye uyinmwẹ, emwi ne ima miẹn ruẹ vbe igiemwi ne ukọ e Pọl loo ro nọ dekaẹn egbe ọghe emwa nagbọn. Ma ghaa ru vberriọ, ọ gha ru iyobọ ne ima ya gha mwẹ ilẹkẹtin wẹẹ, ma mwẹ esa ne ima ye vbe iko ọghe Jehova, ma ghi vbe gha ya aro nọ ghaan ghee emwa ọvbehe ni rre uwu iko.