Gha Ya Imuegberriotọ Ga Osanobua

1. De emwi ne Devid tae vbekpae imuegberriotọ ọghe Jehova?

MA GHA sẹtin kha wẹẹ, ọmwa nọ mu egbe rriotọ ẹre Jehova khin ra? Ẹẹn, ma gha wa sẹtin. E Devid khare wẹẹ: “Nọyaẹnmwa, wẹ ẹre ọ rhie mwẹ lẹre, miẹn mwẹ fan. Iyobọ [ra “imuegberriotọ,” NW] ruẹ, ẹre ọ ya mwẹ khian enọkpọlọ.” (2 Sam 22:36) Ọ gha kẹ, emwi nọ ya e Devid ta ẹmwẹ na, ọre emwi nọ sunu vbe ẹghẹ ne akhasẹ e Samuẹl na rrie owa erhae, nọ do zẹ ọmwa nọ khian gha re ọba ọghe Izrẹl. E Jehova keghi rhiẹre ma wẹẹ irẹn mwẹ imuegberriotọ, vbe ẹghẹ nọ na zẹ e Devid nọ gha re ọba nọ khian rhihe Sọl, agharhemiẹn wẹẹ, e Devid ẹre ọ ghi kherhe sẹ vbuwe emọ ikpia erẹnrẹn ne erhae ghaa mwẹ.—1 Sam 16:1, 10-13.

2. De emwi ne ima khian ziro yan vbe ako iruẹmwi na?

² Ẹi mwẹ e Devid ma kue ye ẹmwẹ ne ọsian ọkpa tae vbekpae Jehova, nọ na wẹẹ: “Ọ ghi vbẹrre ne ọ ghee ẹrinmwi kevbe agbọn ghee. Ọ tọn ovbiogue mu ke ebubẹ ladian, ọ tọn iran ne ẹi mwẹ mu, . . . ọ keghi ye iran gha gu ivbi ọba mu obọ.” (Psm 113:6-8) Vbe ako iruẹmwi na, ma gha ka guan kaẹn emwi kpataki ne ima khian miẹn ruẹ, vbe odẹ ughughan ne Jehova ya rhiẹre ma wẹẹ, ọmwa nọ mu egbe rriotọ ẹre irẹn khin. Vbe iyeke ọni, ma ghi do ziro yan emwi ne ima gha miẹn ruẹ vbe igiemwi ọghe Ọba e Sọl, akhasẹ e Daniẹl kevbe Jesu, vbe nọ dekaẹn imuegberriotọ.

DE EMWI NE IMA KHIAN MIẸN RUẸ VBE IGIEMWI ỌGHE JEHOVA?

3. De obọ ne Jehova ya mu ima? De emwi ne ọna ghi ya ima rẹn?

³ Obọ ne Jehova ya mu eguọmwadia ọghẹe ni ma gba, rhiẹre ma wẹẹ, ọmwa nọ mu egbe rriotọ ẹre irẹn khin. Gberra wẹẹ e Jehova miẹn ugamwẹ ọghe ima yi, ọ vbe ghee ima zẹvbe ọsiọre. (Psm 25:14) E Jehova tobọre, ẹre ọ kie ẹkpotọ yọ, ne ima sẹtin gha re ọsiọre. Odẹ nọ ya ru ọna, ọre nọ na gie Ovbi ẹre rre nọ do wu ye orukhọ ọghe ima. U miẹn itohan kevbe ẹnina ne Jehova mwẹ daa ima!

4. De asẹ ne Jehova rhie ne ima? Vbọzẹe?

⁴ Gia guan kaẹn odẹ ọvbehe ne Jehova ya rhiẹre ma wẹẹ, ọmwa nọ mu egbe rriotọ ẹre irẹn khin. Zẹvbe Ayi ọghomwa, te Jehova gha te sẹtin yi ima, ne ima ghẹ gha zẹ ne egbe ima. Sokpan ọ ma ru vberriọ. Irẹn keghi yi ima, ne ima gha yevbe irẹn, ọ na vbe rhie asẹ ne ima, ne ima sẹtin gha zẹ ne egbe ima. Irẹn keghi hoo ne ima ne emwa nagbọn gha ya ekhọe hia ga irẹn rhunmwuda ahoẹmwọmwa ne ima mwẹ nẹẹn, kevbe rhunmwuda ne ima na rẹn wẹẹ, ere rrọọ deghẹ ima na gha họn ẹmwẹ nẹẹn. (Diut 10:12; Aiz 48:17, 18) U miẹn ukpamuyọmọ ne ima mwẹ, ne ima na ga e Jehova nọ re Osa nọ mu egbe rriotọ!

5. De vbene igiemwi ọghe Jehova ya ru iyobọ ne ima ya gha mu egbe rriotọ? (Ghee efoto nọ rre odaro ebe na.)

⁵ Ma gha bẹghe vbene Jehova tobọre ya mu egbe rriotọ, ma ghi vbe gha hoo ne ima ya egbe taa re. Orhunmwu ọkpa i rrọọ nọ mwẹ ẹwaẹn sẹ e Jehova, ẹi rre agbọn na, ẹi vbe ke ẹrinmwi dee. Ọrheyerriọ, te Jehova ye rhie ehọ ne emwa ọvbehe ta yi, ọ vbe kie ẹkpotọ ne emwa ọvbehe ya deba irẹn winna. Vbe igiemwi, e Jehova keghi kie ẹkpotọ ne Ovbi ẹre ya deba irẹn, vbe ẹghẹ nọ na gha yi emwi hia ni rre agbọn kevbe ẹrinmwi. (Itan 8:27-30; Kọl 1:15, 16) Agharhemiẹn wẹẹ e Jehova ọre Osa Ne Udazi, ọ keghi rhie asẹ ne emwa ọvbehe. Vbe igiemwi, ọ keghi zẹ Jesu nọ gha re Ọba ọghe Arriọba ọghe irẹn; e Jehova gha vbe rhie asẹ ne orhunmwu 144,000 ni khian deba e Jesu kha. (Luk 12:32) Vbene ẹmwata, e Jehova ẹre ọ maa e Jesu emwi, nọ mieke na sẹtin gbegba zẹvbe Ọba kevbe Ogie Ohẹn. (Hib 5:8, 9) Irẹn ẹre ọ vbe maa iran emwi ighẹ emwa ni khian deba e Jesu kha, ne iran mieke na sẹtin ru iwinna ọghe iran. Sokpan irẹn i ru iwinna na ye iran obọ, nọghayayerriọ, ọ keghi kie ẹkpotọ ne iran, ne iran tobọ iran gha ru ẹre, rhunmwuda, irẹn mwẹ ilẹkẹtin wẹẹ, iran gha sẹtin ru vberriọ.—Arhie 5:10.

6-7. De vbene ediọn kevbe evbibiẹ emọ khian ya yegbe tae Jehova hẹ vbe odẹ ne iran ya waa iwinna ne emwa ọvbehe?

⁶ Agharhemiẹn wẹẹ Erha mwa nọ rre ẹrinmwi i gualọ iyobọ ọghe ọmwa rhọkpa, ọ ye waa iwinna ne emwa ọvbehe. Inu ghi nọ ne ima ne emwa nagbọn kẹkan! Vbe igiemwi, deghẹ uhunmwuta ẹgbẹe ẹre u khin, ra ọdiọn vbuwe iko, de vbene u khian ya sẹtin ya egbe tae Jehova hẹ? Ọ khẹke ne u gha waa iwinna ne emwa ọvbehe. U gha vbe waa iwinna ne iran nẹ, ọ khẹke ne u sẹ iran rae, ne iran tobọ iran ru ẹre, ẹi re ne u gha ru ẹre ye iran obọ. U ghaa ya egbe tae Jehova vbe odẹ vbenian, iwinna ghi gha kẹ, ọna gha vbe ya emwa ne u waa iwinna na gha mwẹ ilẹkẹtin wẹẹ, iran vbe mwẹ ne iran ye vbọ. (Aiz 41:10) De emwi ọvbehe ne ediọn kevbe avbe uhunmwuta ẹgbẹe gha miẹn ruẹ vbe obọ e Jehova?

⁷ E Baibol ya ima rẹn wẹẹ, e Jehova vbe rhie ehọ ne avbe odibosa ta yi. (1 Ọba 22:19-22) Evbibiẹ emọ, de vbene uwa khian ya yegbe tae Jehova hẹ? Iwinna eso ghaa rre otọ na khian ru, u sẹtin vbe nọ ivbuẹ deghẹ iran mwẹ azẹvbiro eso vbe nọ dekaẹn vbene a khian ya ru iwinna nii hẹ. Azẹvbiro ọghe iran gha gbe ye uviẹn, u ghi vbe miẹn ọnrẹn yi.

8. De vbene Jehova ya rhiẹre ma wẹẹ irẹn mwẹ izinegbe vbe egbe Ebraham kevbe Sera?

⁸ Odẹ ọvbehe ne Jehova ya rhiẹre ma wẹẹ ọmwa nọ mu egbe rriotọ ẹre irẹn khin, ọre nọ na mwẹ izinegbe. E Jehova keghi mwẹ izinegbe, uhiẹn vbe eguọmwadia re ghaa gbawawẹ deghẹ azẹ ne irẹn ru gbe ye uviẹn. Vbe igiemwi, vbe ẹghẹ ne Jehova na wẹẹ irẹn khian guọghọ e Sodọm kevbe Gomorra rua, Ebraham ma wa ya ekhọe hia kue yọ. Vbe Ebraham ghi tama e Jehova vbene irẹn ghee ẹmwẹ na hẹ, e Jehova na fẹko rhie ehọ nẹẹn ta yi. (Gẹn 18:22-33) Muẹn roro, obọ ne Jehova vbe ya mu ọvbokhan Ebraham ighẹ e Sera. Vbe Jehova ghi kha wẹẹ e Sera gha ya egbe ọmaẹn biẹ, e Sera na giẹ kua, ọrheyerriọ, e Jehova ma gi ohu muẹn. (Gẹn 18:10-14) Nọghayayerriọ, ọ keghi ya obọ esi mu e Sera.

9. De emwi ne evbibiẹ emọ kevbe ediọn gha miẹn ruẹ vbe igiemwi ọghe Jehova?

⁹ Adeghẹ evbibiẹ emọ ẹre u khin, ra ọdiọn vbuwe iko, de vbene u khian ya yegbe tae Jehova hẹ? Gia kha wẹẹ ivbuẹ ra etẹn vbuwe iko ma kue ye azẹ ne u ru, vbọ khẹke ne u ru? Te u khian wa gha gu iran gui ra? Ra u gha rhie ehọ ne iran ta yi, ne u mieke na rẹn evbọzẹe ne iran ma na kue yọ? Emwa hia ni rre uwu ẹgbẹe kevbe iko ẹre ọ khian miẹn ere vbọ, deghẹ evbibiẹ emọ kevbe ediọn na gha ya egbe tae Jehova. Ma bẹghe ẹre nẹ, vbene ima khian ya yegbe tae Jehova hẹ vbe odẹ nọ ya mu egbe rriotọ. Nia, gi ima ziro yan emwi ne ima gha miẹn ruẹ, vbe igiemwi ọghe emwa eso ne okha ọghe iran rre uwu e Baibol, vbe nọ dekaẹn imuegberriotọ.

DE EMWI NE IMA GHA MIẸN RUẸ VBE IGIEMWI ỌGHE EMWA ỌVBEHE?

10. De vbene Jehova ya ya igiemwi ọghe emwa ọvbehe maa ima emwi?

¹⁰ Zẹvbe Ọmamwaemwi Nọ Sẹ Ehia, e Jehova keghi dia emwa ya gbẹnnẹ okha ọghe emwa ughughan ye uwu e Baibol, ne ima mieke na miẹn emwi ruẹ vbọ. (Aiz 30:20, 21) Ma ghaa muẹn roro, igiemwi ọghe emwa ni ghaa mwẹ imuegberriotọ kevbe avbe akpa esiesi ọvbehe, ma keghi miẹn emwi nibun ruẹ vbọ. Erriọ vbe ye, ma gha tie vbekpa emwi nọ sunu daa emwa ni ma gha mwẹ avbe akpa esiesi na, ma keghi ya igiemwi ọghe iran wan ne egbe.—Psm 37:37; 1 Kọr 10:11.

11. De emwi ne igiemwi ọghe Sọl maa ima re?

¹¹ Gia ziro yan emwi nọ sunu daa Ọba e Sọl. Ọmwa nọ wa gha mwẹ imuegberriotọ ẹre ka gha nọ. Ọ ma gha mu egbe ẹre ye ukpo nọ ma khẹke ẹre, uhiẹn vbe ẹghẹ na khian ya ma re ọba, ọ na gha roro ẹre wẹẹ irẹn ma gbegba. (1 Sam 9:21; 10:20-22) Sokpan vbe a ghi ma re ọba nẹ, e Sọl na suẹn gha tọn egbe mu. Ọ ghaa mwẹ asẹ ọkpa ne Sọl ma na sẹtin zin egbe, ne akhasẹ e Samuẹl do zọ ese ne emwa ọghe Osanobua. Rhunmwuda ekhọe itengbemu ne Sọl ghaa mwẹ, ọ na fian karo ya ru izọese nii. Emwi ne Sọl ru nii rhiẹre ma wẹẹ, ọ ma mu ẹtin yan e Jehova. Rhunmwuda ọni, e Jehova keghi fi iyeke gbe ẹre, vbene ẹghẹ ya khian, ọ keghi miẹn ẹre ukpo ọba nọ te ye. (1 Sam 13:8-14) Ọ khẹke ne ima ya okha na wan ne egbe, ne ima ghẹ gha mu egbe ima ye ukpo nọ ma khẹke ima.

12. De vbene Daniẹl ya rhiẹre ma wẹẹ ọmwa nọ mu egbe rriotọ ẹre irẹn khin?

¹² Te igiemwi ọghe akhasẹ ighe Daniẹl wa lughaẹn ne ọghe Sọl. Ọ ma gha mwẹ ẹghẹ ọkpa ne Daniẹl ya tọn egbe mu, sokpan te irẹn wa gha mu egbe rriotọ, ọ na gha gualọ adia vbe obọ e Jehova. Vbe igiemwi, vbe ẹghẹ ne Jehova ya loo ẹre ya rhan otọ imina ọghe Nebukiadneza, e Daniẹl ma rhie etian gie egbe ẹre. Nọghayayerriọ, ọ keghi rhie etian hia gie Jehova. (Dan 2:26-28) De emwi ne ọna maa ima re? Adeghẹ etẹn na gha rhie etian ne ima, rhunmwuda ne ima na gua ya ọta guan ra rhunmwuda ne ima na fian emwi nibun gbua vbe iwinna ikporhu iyẹn nọ maan, ọ khẹke ne ima rhie etian nii gie Jehova. Ọ khẹke ne ima kọe ye orhiọn wẹẹ, ẹi re ẹtin obọ ima ẹre ima ya ru emwi ke emwi ne ima ru, e Jehova ẹre ọ rhie ẹtin ne ima. (Fil 4:13) Ma ghaa mwẹ egbe ekhọe vbenian, ọni rhiema wẹẹ, te ima ya egbe tae Jesu. Vbe ima gu kha vberriọ?

13. De vbene ẹmwẹ ne Jesu tae vbe ebe Jọn 5:19, 30 ya ya ima rẹn wẹẹ, ọmwa nọ mu egbe rriotọ ẹre Jesu khin?

¹³ Agharhemiẹn wẹẹ ọmwa nọ gbae ẹre Jesu khin, ẹghẹ hia ẹre ọ ya gha hẹnhẹn egbe yan e Jehova. (Tie Jọn 5:19, 30.) Ọ ma gha mwẹ ẹghẹ ọkpa ne Jesu ya gu Erhae gha sinmwi ukpo. Ebe Filipai 2:6 khare wẹẹ, e Jesu “ma kha wẹẹ ne irẹn ya ẹkiudu gu Osanobua gha mwa ẹrrẹe.” Nọghayayerriọ, Jesu kegha mu egbe rriotọ ne Erhae, ọ na vbe gha rhie ọghọ nọ khẹke nẹẹn, rhunmwuda, ọ rẹnrẹn wẹẹ, e Jehova sẹ irẹn.

14. De emwi ne Jesu ru vbe ẹghẹ nọ ya werriẹ aro daa edanmwẹ ọghe na mu egbe ọmwa ye ukpo nọ ma khẹke ọmwa?

¹⁴ Gia ziro yan emwi ne Jesu ru vbe ẹghẹ ne iye Jems vbe Jọn na do rinmwiaẹn wẹẹ, nọ gi ivbi irẹn eva gha rre ọre oberhọmwa kevbe ọbiyọmwa vbe ọ gha rri ọba nẹ vbe ẹrinmwi. Jesu rẹnrẹn wẹẹ irẹn i mwẹ asẹ na ya ru egbe emwi vberriọ, rhunmwuda ọni, ọ na tama iran vbobọvbobọ wẹẹ, Erha irẹn ọkpa ẹre ọ mwẹ asẹ na ya ru vberriọ. (Mat 20:20-23) Jesu rẹn eke ne ẹtin irẹn sẹ, rhunmwuda ọni, ọ ma mu egbe ẹre ye ukpo nọ ma khẹke ẹre. Ọ ma gha mwẹ ẹghẹ ọkpa nọ ya rhie owẹ gberra emwi ne Erhae wẹẹ nọ ru. (Jọn 12:49) De vbene ima khian ya yegbe tae igiemwi esi ọghe Jesu hẹ?

15-16. De vbene ima khian ya lele adia nọ rre ebe 1 Kọrinti 4:6?

¹⁵ Ma ghaa lele adia nọ rre ebe 1 Kọrinti 4:6, te ima ya egbe tae Jesu. Ako nii khare wẹẹ: “Wa gha ru vbene a yi ẹre iyi.” Ọni rhiema wẹẹ, ne ima ghẹ rhie owẹ gberra iyi ni rre uwu e Baibol. Nọnaghiyerriọ, ọmwa gha do gualọ adia vbe obọ ima, ọ ma khẹke ne ima ya ẹmwẹ obọ ima rhie adia nẹẹn, ra ne ima tama rẹn emwi nọ rhirhi wa la ima ekhọe vbe ọwarọkpa nii. Nọghayayerriọ, ẹmwẹ nọ rre uwu e Baibol kevbe ebe ughughan ne otu gbẹnnẹ ladian, ẹre ọ khẹke ne ima ya rhie adia nẹẹn. Ma ghaa ru vberriọ, te ima rhiẹre ma wẹẹ, ima ma wa rẹn emwi hia. Te ima vbe rhiẹre ma wẹẹ, adia nọ ke obọ e Jehova rre, ẹre ọ maan sẹ.—Arhie 15:3, 4.

¹⁶ Ma ghaa mu egbe rriotọ, te ima rhie ọghọ ne Jehova. Deba ọni, ma tobọ ima gha vbe miẹn ere vbọ. Nia, gia ziro yan vbene imuegberriotọ khian ya ru iyobọ ne ima hẹ ya gha mwẹ oghọghọ kevbe vbene ọ khian ya ru iyobọ ne ima hẹ ya gha gu emwa ọvbehe rrọọ vbe ọfunmwegbe.

DE ERE NE IMA GHA MIẸN VBỌ DEGHẸ IMA NA GHA MU EGBE RRIOTỌ?

17. Vbọzẹe ne emwa ni mu egbe rriotọ na mwẹ oghọghọ?

¹⁷ Ma ghaa mu egbe rriotọ, ma ghi gha mwẹ oghọghọ. Vbọzẹe? Ma gha rẹn wẹẹ emwi eso rrọọ ne ima i sẹtin ru, ọ ghi ya ima gha gbọyẹmwẹ ye iyobọ ne emwa ọvbehe ru ne ima. Vbe igiemwi, gia ziro yan emwi nọ sunu vbe ẹghẹ ne Jesu ya mu ọkhọnmwọ oti igbe egbe rran. Ọkpa kẹkan ẹre ọ werriegbe gha dee do kpọnmwẹ e Jesu ye ẹse nọ ru nẹẹn, rhunmwuda ọ rẹnrẹn wẹẹ, vbe ẹi re ne Jesu na ru iyobọ ne irẹn, irẹn i ghẹ te sẹtin fe vbe emianmwẹ dan nii. Rhunmwuda ne okpia nii na gha re ọmwa imuegberriotọ, ẹre ọ si ẹre nọ na ya ekhọe hia kpọnmwẹ e Jesu ye ẹse nọ ru nẹẹn, ọ na vbe rhie uyi gie Osanobua.—Luk 17:11-19.

18. De vbene imuegberriotọ ya ru iyobọ ne ima ya guobọ emwa ọvbehe hẹ? (Rom 12:10)

¹⁸ Emwa ni mu egbe rriotọ, ẹre ọ rherhe guobọ emwa ọvbehe, iran ẹre ọ vbe sẹtin gu emwa ọvbehe ru ọse. Vbọzẹe? Rhunmwuda, iran keghi rhie aro tua avbe akpa esiesi ne emwa ọvbehe mwẹ, ọna ẹre ọ si ẹre ne iran i na ya aro gbe emwa re. Ọmwa nọ mu egbe rriotọ gha bẹghe ẹre wẹẹ, ọmwa ọvbehe runagban vbe iwinna ọghẹe, ọ ghi gu ọmwa nii gha ghọghọ, ọ ghi gha tian rẹn ye iwinna esi nọ ru, ọ ghi vbe gha rhie ọghọ nẹẹn.—Tie Rom 12:10.

19. Vbọzẹe nọ ma na khẹke ne ima gha tọn egbe mu?

¹⁹ Nọ ne emwa ni tọn egbe mu, iran keghi hoo ne emwa ọvbehe gha tian iran, sokpan iran ke tian emwa ọvbehe, ọ ghi ba kua. Emwa ni tọn egbe mu keghi ya egbe iran gie emwa ọvbehe, rhunmwuda ọni, osuan i fo vbe eke ne iran ye. Egbe emwa vbenian ẹre ọ mobọ kha wẹẹ, “Esa i rrọọ ne I khian ya mu ẹghẹ rhia ya gha maa emwa ọvbehe iwinna, I wa tobọ mwẹ ru ẹre, ẹre ọ maan sẹ.” Ọmwa nọ tọn egbe mu ẹre ọ mobọ hoo ne emwa gha ghee irẹn wẹẹ, irẹn maan sẹ emwa ọvbehe, ọ gha miẹn ọmwa nọ maan sẹ ọre, ọ ghi gha gbọvo ẹre. (Gal 5:26) Egbe emwa vbenian ghaa mwẹ ọse, iku iran i tọ. Ma gha bẹghe ẹre wẹẹ, ima mwẹ ekhọe itengbemu, ọ khẹke ne ima ya ekhọe hia rinmwian e Jehova, nọ ru iyobọ ne ima ya fi ekhọe ima werriẹ, ne uyinmwẹ dan na ghẹ do gbọzinian vbe ekhọe ọghe ima.—Rom 12:2.

20. Vbọzẹe nọ na khẹke ne ima gha mu egbe rriotọ?

²⁰ Ma wa ghọghọ wẹẹ e Jehova rhie igiemwi esi yotọ ne ima! Ma gha bẹghe vbene ọ ya ya obọ esi mu eguọmwadia ẹre hẹ rhunmwuda imuegberriotọ ọghẹe, ma keghi hoo ne ima gha ya egbe taa re. Deba ọni, ma vbe hoo ne ima gha ya egbe taa eguọmwadia Osanobua nẹdẹ ne Baibol guan kaẹn, ni ghaa mwẹ imuegberriotọ. Nọnaghiyerriọ, gi ẹre gha re atamuolọyan ọghe ima wẹẹ, te ima khian gha rhie uyi kevbe ọghọ nọ khẹke gie Jehova vbe ẹghẹ hia. (Arhie 4:11) Ma gha ru vberriọ, ma ghi gha re ọsie Jehova vbe etẹbitẹ, rhunmwuda irẹn hoẹmwẹ emwa ni mu egbe rriotọ.