AKO IRUẸMWI 41
Vbene Ima Khian Ya Ru Iyobọ Ne Emwa Ne Ima Gu Ruẹ E Baibol Ne Iran Mieke Na Sẹtin Dinmwiamẹ—Abọ Nokaro
“Ọ dewarorua wẹẹ, uwa ọre elẹta ọghe Kristi ne ima gbẹn, zẹvbe emwa ni winna ne Osanobua.”—2 KỌR 3:3, NW.
IHUAN 78 Gia Gha Ya Ẹmwẹ Ọghe Osa Ma Emwa Emwi
OLIKA ẸMWẸ ỌGHE AKO IRUẸMWI NAa
U miẹn vbene ẹko gha rhiẹnrhiẹn etẹn hia ni rre uwu iko hẹ, vbe iran gha bẹghe ẹre wẹẹ, ọmwa na gu ruẹ e Baibol do dinmwiamẹ (Ghee okhuẹn 1)
1. De vbene ebe 2 Kọrinti 3:1-3, NW ya ru iyobọ ne ima ya rẹn wẹẹ, ukpamuyọmọ nọkhua nọ, ne ọmwa ne ima gu ruẹ e Baibol sẹtin do dinmwiamẹ? (Ghee efoto nọ rre odaro ebe na.)
DE VBENE ọ ye ruẹ hẹ vbe ekhọe, deghẹ ọmwa na gu ruẹ e Baibol vbe ẹdogbo ne iko ọghe uwa na kporhu, na do dinmwiamẹ? Ẹi mwẹ ọ ma gha ya ruẹ sọyẹnmwẹ! (Mat 28:19, NW) Adeghẹ uwẹ ẹre ọ wa gu ọmwa nii ruẹ e Baibol ghi vbo? Ọyẹnmwẹ nọ khian gha sẹ ruẹ i gia gie! (1 Tẹs 2:19, 20) Te emwa ni da dinmwiamẹ yevbe “elẹta na ya tian” emwa ni gu iran ruẹ e Baibol kevbe emwa hia ni rre uwu iko.—Tie 2 Kọrinti 3:1-3, NW.
2. (a) De inọta ne kpataki nọ khẹke ne ima mu roro? Vbọzẹe nọ na khẹke ne ima mu inọta na roro? (b) A gha wẹẹ a gu ọmwa ruẹ e Baibol, vbe a yae kha? (Ghee evba gbẹn ye ototọ kuẹi.)
2 Ke ukpo enẹ gha dee na, odẹ orhunmwu 10,000,000 ẹre Avbe Osẹe Jehova ni rre ehe hia vbe uhunmwu otagbọn gu ruẹ e Baibolb vbe uki uki. A ghi muẹn ye omwa ighẹ inu emwa ni dinmwiamẹ vbe ukpo ukpo zẹvbe Osẹe Jehova, a na do bẹghe ẹre wẹẹ, ọ gberra 280,000. Nọnaghiyerriọ, de vbene ima khian ghi ya ru iyobọ ne emwa nikẹre ne ima gu ruẹ e Baibol, ne iran vbe do sẹtin dinmwiamẹ? Ugbẹnvbe a miẹn wẹẹ, e Jehova ye kie ẹkpotọ ne emwa, ne iran do khian erhuanegbe Kristi, te ọ khẹke ne ima hia vbe odẹ ke odẹ ne ima ru iyobọ ne iran ya rherhe ru vberriọ, rhunmwuda, ovbi ẹghẹ kherhe ẹre ọ ghi kẹ!—1 Kọr 7:29a; 1 Pit 4:7.
3. De emwi ne ima khian ziro yan vbe ako iruẹmwi na?
3 Na do ya emwa khian erhuanegbe Kristi keghi re iwinna nọ wa de ọghe ẹgiẹgiẹ kevbe nọ ru ekpataki. Vbene iwinna na ru ekpataki sẹ hẹ, Ẹbu Nọ Su keghi nọ agbaziro ni rre dọmwadẹ abotu, emwi na gha sẹtin ru, na mieke na ru iyobọ ne emwa na gu ruẹ e Baibol, ne iran do dinmwiamẹ. Vbe ako iruẹmwi na kevbe nọ lelẹe, ma gha ziro yan emwi nọ he ru iyobọ ne etẹn eso ni re arọndẹ ọghe ẹghẹ hia, arọndẹ ne kpataki, arọndẹ na gie yo isi kevbe avbe ọgbaroghe ọghe otako. Ma gha vbe ziro yan emwi ne ima gha miẹn ruẹ vbe obọ iran.c (Itan 11:14; 15:22) Vbe a ghi nọ iran ọta, iran keghi ta emwi eso ne ọtẹn nọ gu ọmwa ruẹ e Baibol gha ru, nọ gha ru iyobọ ne ọmwa nọ gu ruẹ e Baibol. Iran na vbe ya unu kaẹn emwi nọ khẹke ne ọmwa na gu ruẹ e Baibol ru, nọ mieke na gha mwẹ alaghodaro. Vbe ako iruẹmwi na, ma gha ziro yan emwi isẹn ne ọmwa na gu ruẹ e Baibol gha ru, nọ mieke na sẹtin do dinmwiamẹ.
WA GHA RUẸ EMWI VBE UZỌLA UZỌLA
Deghẹ imudia ẹre uwẹ vbe ọmwa ne u gu ruẹ e Baibol na mobọ ruẹ emwi, u ghi nọ rẹn deghẹ ọ gha kue ne uwa gha tota ruẹ emwi kugbe (Ghee okhuẹn 4-6)
4. Vbọ khẹke ne ima kọ ye orhiọn vbekpae Baibol na gu ọmwa ruẹ vbe imudia kevbe iruẹmwi nẹi kpẹẹ vbe otọ?
4 Etẹn ima nibun rrọọ ni gu ọ yan owa ruẹ e Baibol vbe imudia, iran gha vbe tota ruẹ emwi, iruẹmwi nii i kpẹẹ vbe otọ. Ugbẹnso, uzọla ọkpa ghi gberra, iran i sẹtin gu ọ yan owa ruẹ emwi. Obẹlẹ na sẹtin gha maan vbe a gha da suẹn gha gu ọmwa ruẹ e Baibol, sokpan ọ ma khẹke nọ wa gha yerriọ khian. Etẹn eso ghaa hoo ne ọ yan owa gha mwẹ alaghodaro, iran sẹtin rhie enọmba efoni ọghẹe, ne iran mieke na vbe zẹdia gha gu ẹre ziro vbuwe Baibol, ọ te sẹ ẹghẹ ne iran khian ya werriegbe mu otuẹ gie ẹre vbe owa. Etẹn eso wa gu emwa ruẹ e Baibol vbe odẹ vbenian, vbe ọwara uki nibun, vbene ọmwa ne iran gu ruẹ e Baibol i na tọn, ẹi worua. Nọnaghiyerriọ, de emwi ọvbehe nọ khẹke ne ima ru, ne ọmwa ne ima gu ruẹ e Baibol mieke na gha mwẹ alaghodaro sẹrriọ wẹẹ, ọ ghi do dinmwiamẹ?
5. De emwi nọ rre ebe Luk 14:27-33, NW ne ima gha sẹtin loo ya ru iyobọ ne emwa ne ima gu ruẹ e Baibol?
5 Vbe asẹ ọkpa, Jesu keghi gi emwa rẹn wẹẹ, iran ke suẹn gha lele irẹn, te ọ khẹke ne iran ka muẹn roro nẹ, emwi nọ lelẹe khian. Rhunmwuda ọni, ọ keghi zẹ erre ọghe ọmwa nọ hoo nọ bo owa. Ọ na wẹẹ, te ọ gha “ka tota roro ẹre nẹ, inu igho nọ gha gbe,” ọ ke mu uhunmwu daa re. Ọ na vbe kha wẹẹ, deghẹ ọba khian ya khọn okuo, te ọ gha ka roro ẹre nẹ, deghẹ ivbiyokuo ne irẹn viọ rrie okuo gha sẹtin khọn miotọ yan eghian ọghe iran. (Tie Luk 14:27-33, NW.) Erriọ vbe ye, te ọ khẹke ne ọmwa nọ hoo nọ khian ọrhuanegbe Kristi mu ukpa mu uwerhẹn ghee atamuolọyan nọ khian ru nii, nọ mieke na rẹn emwi nọ lelẹe khian. Ọni ẹre ọ si ẹre nọ na khẹke ne ima gu ọmwa vberriọ gha ruẹ emwi vbe uzọla uzọla. Sokpan de vbene ima khian ya gha maa re emwi hẹ?
6. De emwi eso ne ima gha ru, nọ gha ru iyobọ ne emwa ne ima gu ruẹ e Baibol ya gha mwẹ alaghodaro?
6 Vbe okaro, fẹko gha rhie ba ẹghẹ ne u loo ya gu ẹre ruẹ emwi. Vbe igiemwi, deghẹ ako evbagbẹn nọhuanrẹn ọkpa ẹre u ka gu ẹre ziro yan vbe ẹghẹ ke ẹghẹ ne u ya sẹ evba, u sẹtin yae khian eva. U gha ghi bẹghe ẹre wẹẹ iruẹmwi ọghe uwa fẹko taan nẹ vbe otọ, kevbe wẹẹ ọ vbe fẹko gua ọ yan owa egbe ro nẹ, u ghi nọ rẹn deghẹ ọ gha kue ne uwa rhie ẹghẹ ba ẹghẹ ne uwa loo ya ruẹ emwi. Deghẹ imudia ẹre uwa na mobọ ruẹ emwi, u ghi nọ rẹn deghẹ ọ gha kue ne uwa gha tota ruẹ emwi kugbe. Ẹmwẹ nọ khian ghi ta, ẹre ọ khian ghi ya ruẹ rẹn deghẹ ọ gele mu egbe nọ ya ruẹ e Baibol. Vbene ẹghẹ ya khian, u sẹtin nọ rẹn deghẹ ọ gha hoo ne uwa gha ruẹ emwi igbava vbe uzọla, ne iruẹmwi nii mieke na gha mwẹ alaghodaro sayọ. Vbọrhirhighayehẹ, emwi ọvbehe ye rrọọ ne u gha ru, ne u ya ru iyobọ ne ọmwa ne u gu ruẹ e Baibol.
WA GHA MU EGBE DỌMWADẸ IRUẸMWI YOTỌ
Gha mu egbe dọmwadẹ iruẹmwi yotọ, u ghi vbe ru iyobọ ne ọmwa ne u maa re emwi ya rẹn vbene a ya mu egbe yotọ hẹ (Ghee okhuẹn 7-9)
7. De vbene u khian ya mu egbe yotọ hẹ, u ke gu ọmwa rhọkpa ruẹ emwi?
7 Ọ khẹke ne uwẹ nọ maa ọmwa emwi ka gha mu egbe yotọ, u ke gu ọmwaikọmwa ruẹ emwi. U ghi ka tie ako ne uwa khian koko ziro yan, u ghi vbe tie ako evbagbẹn nọhuanrẹn ni rrọọ. U ghi hia ne u rẹn avbe olika ẹmwẹ ni rre ako ne uwa khian ziro yan. Kọe ye ekhọe uhunmwuta ọghe ako ne uwa khian ziro yan, avbe abọ uhunmwuta hia ni rrọọ, avbe inọta ni rrọọ kevbe ako ọghe Baibol na wẹẹ na tie, vbe ya sẹ egbe efoto ughughan ni rrọọ. U ghi vbe ghee ẹre deghẹ e vidio rhọkpa rrọọ, ne u gha sẹtin loo ya ru iyobọ nẹẹn ya rẹn otọ ako ne uwa ziro yan sayọ. Zẹvbe ne u ya mu egbe iruẹmwi na yotọ, muẹn roro vbene u khian ya maa re emwi hẹ vbe odẹ ne khuẹrhẹ, nọ mieke na rẹn otọre kevbe nọ sẹtin rhie iruẹmwi ni rrọọ ye uyinmwẹ vbe arrọọ ọghẹe.—Neh 8:8; Itan 15:28a.
8. De emwi ne ima miẹn ruẹ vbe ebe Kọlose 1:9, 10, vbe nọ dekaẹn na gha mu ẹmwẹ emwa ne ima gu ruẹ e Baibol ye erhunmwu?
8 Zẹvbe ne u ya mu egbe yotọ, u ghi mu ẹmwẹ ọmwa ne u khian maa re emwi ye erhunmwu. Rinmwian e Jehova nọ ru iyobọ nuẹn ya sẹtin maa re emwi vbe odẹ nọ gha sẹ ọre ekhọe. (Tie Kọlose 1:9, 10.) U ghi hia ne u ya ekhọe zomwa rẹn, emwi eso ni rre ako ne uwa khian ziro yan nọ gha sẹtin lọghọ ọmwa ne u gu ruẹ emwi na rẹn otọre, kevbe emwi eso vbe iruẹmwi nii nẹi khian rherhe yayi. Gha mwẹ ọnrẹn vbe ekhọe vbe ẹghẹ hia wẹẹ, emwi nọ ya ruẹ maa re emwi, ọre ne u ru iyobọ nẹẹn ya sẹtin do dinmwiamẹ.
9. De vbene u khian ya ru iyobọ ne ọmwa ne u gu ruẹ e Baibol, nọ gha mu egbe dọmwadẹ iruẹmwi yotọ? Rhan otọ re.
9 Ma mwẹ ilẹkẹtin wẹẹ, zẹvbe ne ima ya gu ọmwa ruẹ e Baibol vbe ẹghẹ hia, ọ ghi do gha gbọyẹmwẹ ye emwi ne Jehova kevbe Jesu he ru nẹẹn, ọ ghi vbe gha hoo nọ ruẹ sayọ. (Mat 5:3, 6) Ọmwa na gu ruẹ e Baibol ghaa hoo nọ miẹn ere vbe iruẹmwi nii, te ọ khẹke nọ gi ekhọe re gha rre evba, vbe ọ ghaa ruẹ emwi. Rhunmwuda ọni, ọ khẹke ne u gi ẹre rẹn wẹẹ, emwi nọ ru ekpataki nọ, nọ gha mu egbe yotọ khẹ dọmwadẹ iruẹmwi, ọ ghi vbe gha muẹn roro vbene ọ khian ya rhiẹre ye uyinmwẹ hẹ vbe arrọọ ọghẹe. De vbene u khian ya ru iyobọ nẹẹn hẹ, nọ gha mu egbe dọmwadẹ iruẹmwi yotọ? Uwa sẹtin koko mu egbe ako ọkpa yotọ, nọ mieke na rẹn vbene a ya ru ẹre hẹ.d U ghi ru iyobọ nẹẹn ya rẹn vbene ọ khian ya miẹn ewanniẹn ọghe inọta ni rre dọmwadẹ okhuẹn, u ghi vbe gi ẹre rẹn wẹẹ, ọ gha sẹtin vinnọ emwi ye dọmwadẹ ẹmwẹ ra ifiẹmwẹ ni rhie olika ẹmwẹ ni rre okhuẹn nii ladian. Ẹghẹ nii, a gha ghi nọ ọta, ọ ghi rẹn ewanniẹn nọ khẹke nọ rhie yọ. Vbọrhirhighayehẹ, u ghi gi ẹre rẹn wẹẹ, te ọ khẹke nọ gha ya ẹmwẹ obọ re zẹ ewanniẹn. Rhunmwuda, ọ ghaa ya ẹmwẹ obọ re zẹ ewanniẹn, ẹre u khian na rẹn vbene ọ rẹn otọ ako ne uwa ziro yan sẹ hẹ. Sokpan emwi ọvbehe ye rrọọ nọ gha ru iyobọ nẹẹn, nọ khẹke ne u maa re.
MAA RE VBENE Ọ KHIAN YA GHA GU E JEHOVA GUAN HẸ KEVBE VBENE Ọ KHIAN YA GHA DANMWEHỌ E JEHOVA HẸ VBE ẸDẸGBEGBE
Maa ọmwa ne u gu ruẹ e Baibol vbene ọ khian ya gha gu e Jehova guan kevbe vbene ọ khian ya gha danmwehọ e Jehova hẹ (Ghee okhuẹn 10-11)
10. Vbọzẹe nọ na khẹke ne ọmwa na gu ruẹ emwi gha tie Baibol ne egbe ẹre vbe ẹdẹgbegbe? Vbọ khẹke nọ ru deghẹ ọ hoo nọ miẹn ere vbe Baibol nọ tie?
10 Vbọ gberra na wa gha gu ọmwa ruẹ emwi vbe uzọla uzọla, ọ mwẹ emwi eso nọ khẹke ne ọmwa nii tobọre gha ru vbe ẹdẹgbegbe, nọ gha ru iyobọ nẹẹn. Te ọ khẹke nọ gha gu e Jehova guan, ọ ghi vbe gha danmwehọ re. Vbọ khian ya ru ọna hẹ? Ọ ghaa hoo nọ danmwehọ Osanobua, ọ ghi gha tie Baibol vbe ẹdẹgbegbe. (Jọs 1:8; Psm 1:1-3) Maa re vbene a ya loo emwamwa nọ rre jw.org na tie ẹre “Bible Reading Schedule” nọ gha ru iyobọ nẹẹn ya gha tie Baibol vbe ẹdẹgbegbe.e Sokpan, ọ khẹke ne ima gi ẹre rẹn wẹẹ, deghẹ ọ hoo nọ miẹn ere vbe Baibol nọ tie, te ọ khẹke nọ gha ru erria yan emwi nọ tie. Ọ ghi gha muẹn roro emwi ne ako nọ tiere maa re vbekpae Jehova, kevbe vbene ọ khian ya rhie iruẹmwi ni rrọọ ye uyinmwẹ hẹ vbe arrọọ ọghẹe.—Iwinna 17:11; Jems 1:25.
11. De emwi nọ khian ru iyobọ ne ọmwa na gu ruẹ e Baibol ya rẹn vbene a ya na erhunmwu hẹ? Vbọzẹe nọ na ru ekpataki nọ gha na erhunmwu gie Jehova vbe ẹghẹ hia?
11 Ọ khẹke ne u rhie igiọdu ne ọmwa ne u gu ruẹ e Baibol nọ gha gu e Jehova guan, ọni ọre nọ gha na erhunmwu gie ẹre vbe ẹdẹgbegbe. Ọ khẹke ne u gha ya ekhọe hia na erhunmwu, u ke suẹn dọmwadẹ iruẹmwi, u ghi vbe ya erhunmwu khui ẹre, u ghi vbe hia ne u so eni ẹnrẹn vbe erhunmwu nii. Ọ gha bẹghe vbene u ya na erhunmwu hẹ, irẹn tobọ irẹn ghi vbe rẹn vbene a ya ya ekhọe hia na erhunmwu gie Jehova hẹ, vbe eni Jesu Kristi. (Mat 6:9; Jọn 15:16) Ọ ghaa tie Baibol ne egbe ẹre vbe ẹdẹgbegbe, ọ na vbe gha na erhunmwu gie Jehova vbe ẹghẹ hia, ẹi mwẹ ọna ma ru iyobọ nẹẹn ya sikẹ e Jehova sayọ! (Jems 4:8) Ọna gha ru iyobọ nẹẹn ya gha mwẹ alaghodaro sẹrriọ wẹẹ, ọ ghi gha hoo nọ ya egbe fiohan ne Osanobua kevbe nọ dinmwiamẹ. Sokpan, emwi ọvbehe ye rrọọ nọ gha ru iyobọ nẹẹn. De emwi ne ọni khin?
RU IYOBỌ NẸẸN NỌ MIEKE NA RẸN EMWI NỌ GHA RU, NỌ GHA YAE GUOBỌ E JEHOVA
12. De vbene u khian ya ru iyobọ ne ọmwa ne u gu ruẹ e Baibol ya rẹn emwi nọ gha ru, nọ mieke na guobọ e Jehova?
12 Ẹi re ne ọmwa wa gha mwẹ irẹnmwi ọkpa, ẹre ọ khian yae gha ruẹ e Baibol, sokpan te ọ khẹke ne emwi nọ ruẹ vbe gha mu ẹre ekhọe. Vbọzẹe? Rhunmwuda emwi nọ ruẹ gha mu ẹre ekhọe, ẹre ọ khian na sẹtin rhiẹre ye uyinmwẹ, ọ ghi vbe sẹtin fi iziro ọghẹe werriẹ. Ọmwa nọ gua maa ọmwa emwi, ẹre Jesu ghaa khin, ọni ẹre ọ si ẹre ne emwa na gha danmwehọ re. Sokpan rhunmwuda ne imamwaemwi ọghẹe na gha sẹ emwa ekhọe, ẹre ọ si ẹre ne emwa na gha lelẹe khian. (Luk 24:15, 27, 32) Ọ khẹke ne ọmwa ne u gu ruẹ e Baibol rẹn wẹẹ, irẹn gha sẹtin sikẹ e Jehova; ọ ghi vbe rẹn wẹẹ, irẹn gha sẹtin gha ghee ẹre zẹvbe Erha kevbe Ọse, ọ gha vbe sẹtin gha ghee ẹre zẹvbe Osa ọghẹe. (Psm 25:4, 5) Zẹvbe ne u ya gu ọmwa ruẹ emwi, u ghi gha rhie ọmwa nii ekhọe daa avbe akpa esiesi ne Osanobua mwẹ. (Ẹks 34:5, 6, NW; 1 Pit 5:6, 7) U ghaa gu ẹre ziro yan uhunmwuta nọ rhirhi gha khin, u ghi hia ne u rhiẹre ladian, emwi ne uhunmwuta nii maa ima re vbekpa aro ọmwa ne Jehova khin. U ghi ru iyobọ nẹẹn ya rẹn vbene Jehova mwẹ ahoẹmwọmwa hẹ, ekhọe itohan, ẹnina kevbe avbe akpa esiesi ọvbehe. Jesu khare wẹẹ, “uhi kpataki ne ọ kpọlọ sẹ” ọre na ya ekhọe hia hoẹmwẹ e Jehova ne Osanobua mwa. (Mat 22:37, 38) Nọnaghiyerriọ, u ghi hia ne u ru iyobọ ne ọmwa ne u gu ruẹ e Baibol, nọ ya ekhọe ẹre hia hoẹmwẹ e Jehova.
13. De vbene u khian ya ru iyobọ ne ọmwa ne u gu ruẹ e Baibol ya rẹn avbe akpa esiesi ne Jehova mwẹ? Ru igiemwi yọ.
13 Uwẹ vbe ọmwa ne u gu ruẹ e Baibol ghaa ziro, u ghi gi ẹre rẹn evbọzẹe ne uwẹ tobọ uwẹ na hoẹmwẹ e Jehova. Ọna sẹtin ru iyobọ nẹẹn ya rẹn wẹẹ, te ọ khẹke ne irẹn tobọ irẹn hoẹmwẹ e Jehova, kevbe nọ guobọ re. (Psm 73:28) Vbe igiemwi, u gha bẹghe ifiẹmwẹ ọkpa vbe ebe ne uwa koko ziro yan, ra ako evbagbẹn nọhuanrẹn ne uwa tiere, nọ ya ruẹ rẹn wẹẹ, Osa nọ mwẹ ahoẹmwọmwa, ẹwaẹn, ẹtin kevbe nọ ya obọ esi mu emwa, ẹre Jehova khin, u ghi gi ọmwa ne u gu ruẹ e Baibol rẹn vbekpa re. U ghi gi ẹre rẹn wẹẹ, ena hia rre usun emwi nọ ya ruẹ hoẹmwẹ e Jehova. Ena hia gha ru iyobọ nẹẹn, nọ ya gha hoo nọ dinmwiamẹ. Sokpan emwi ọvbehe ye rrọọ nọ khẹke ne emwa hia ne ima gu ruẹ e Baibol ru, nọ gha ru iyobọ ne iran ya dinmwiamẹ.
RHIE IGIỌDU NẸẸN NỌ GHA YO IKO
Rhie igiọdu ne ọmwa ne u gu ruẹ e Baibol nọ rherhe suẹn gha yo iko! (Ghee okhuẹn 14-15)
14. Zẹvbe nọ rre ebe Hibru 10:24, 25, de ere ne ọmwa ne ima gu ruẹ e Baibol khian miẹn deghẹ ọ na gha rrie iko?
14 Ma hia fẹẹrẹ hoo ne emwa ne ima gu ruẹ e Baibol gha mwẹ alaghodaro sẹrriọ wẹẹ, iran ghi do dinmwiamẹ. Odẹ ọkpa ne ima khian ya sẹtin ru iyobọ ne iran ya gha mwẹ alaghodaro, ọre ne ima rhie igiọdu ne iran, ne iran gha yo iko. Etẹn ima eso ni he sẹtin ru iyobọ ne emwa ne iran gu ruẹ e Baibol ya gha mwẹ alaghodaro khare wẹẹ, ọmwa na gu ruẹ e Baibol gha rherhe suẹn gha yo iko, ẹre ọ khian na rherhe gha mwẹ alaghodaro. (Psm 111:1) Etẹn eso keghi tama emwa ne iran gu ruẹ e Baibol wẹẹ, agharhemiẹn wẹẹ iran gha miẹn emwi nibun ruẹ vbe iruẹmwi ọghe iran, emwi nibun ọvbehe ye rrọọ ne iran gha miẹn ruẹ vbe iran gha rrie iko. Uwẹ vbe ọmwa ne u gu ruẹ e Baibol ghi koko ziro yan ẹmwẹ nọ rre ebe Hibru 10:24, 25, u ghi vbe gi ẹre rẹn ere nọ khian lae miẹn deghẹ ọ na gha rrie iko. (Tie ẹre.) U ghi kpee ẹre ma rẹn ighẹ e vidio nọ khare wẹẹ, De Emwi Na Ru Vbe Ọgua Arriọba?f U ghi ru iyobọ nẹẹn ya rẹn vbene ọ ru ekpataki hẹ na gha rrie iko vbe uzọla uzọla.
15. De vbene ima khian ya rhie igiọdu ne ọmwa ne ima gu ruẹ e Baibol, nọ suẹn gha yo iko?
15 Vbọ khẹke ne u ru deghẹ a na miẹn wẹẹ ọmwa ne u gu ruẹ e Baibol ma he fi owẹ la iko ẹdẹ, ra deghẹ a na miẹn wẹẹ ọ te rre, sokpan ẹi rre vbe ẹghẹ hia? Ẹghẹ ke ẹghẹ ne u ya gu ẹre guan, u ghi ya oyaya tama rẹn emwi ne u miẹn ruẹ vbe iko. Ọ gha miẹn vbene iko na yo ya gbuẹ otiti hẹ, ọni sẹtin gua ẹre kpa nọ gha die iko ọghomwa. U sẹtin rhie ebe Owa Ọkhẹ nẹ, ra Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima, u ghi maa re emwi eso na khian ziro yan vbe iko nọ ghi sọregbe; u ghi vbe nọ rẹn abọ nọ yẹẹ ọre sẹ vbọ. A sẹtin miẹn wẹẹ ọ ka yo owa ugamwẹ ọvbehe, sokpan ẹdẹ okaro nọ gha yo iko ọghomwa, ẹi mwẹ ọ ma bẹghe alughaẹn ne gẹdẹgbẹ nọ rre ugamwẹ ọghẹe kevbe ọghe ima, rhunmwuda emwi ne aro ọre khian sẹ kevbe emwi ne ehọ re khian họn. (1 Kọr 14:24, 25) Ọ gha suẹn gha yo iko nẹ, ẹi mwẹ ọ ma bẹghe etẹn ni mwẹ uyinmwẹ esi ne irẹn gha sẹtin ya egbe taa. Ọna ẹre ọ khian ghi yae gha mwẹ alaghodaro sẹrriọ wẹẹ, ọ ghi gha hoo nọ dinmwiamẹ.
16. De vbene ima khian ya ru iyobọ ne emwa ne ima gu ruẹ e Baibol ne iran mieke na sẹtin dinmwiamẹ? De emwi ne ima khian ziro yan vbe ako iruẹmwi nọ ghi lele ọna?
16 De vbene ima khian ya ru iyobọ ne emwa ne ima gu ruẹ e Baibol ne iran mieke na sẹtin dinmwiamẹ? Ọ khẹke ne ima gi iran rẹn vbene iruẹmwi nii ru ekpataki sẹ hẹ. Odẹ ne ima khian ya ru ọna, ọre ne ima rhie igiọdu ne iran, ne iran gha ruẹ emwi vbe uzọla uzọla kevbe ne iran gha mu egbe yotọ khẹ dọmwadẹ iruẹmwi. Ọ khẹke ne ima vbe rhie igiọdu ne iran, ne iran gha danmwehọ e Jehova vbe ẹdẹgbegbe, iran ghi vbe gha gu ẹre guan vbe ẹghẹ hia. Ma ghi vbe ru iyobọ ne iran ya rẹn emwi ne iran gha ru, ne iran mieke na sẹtin guobọ e Jehova. Ọ khẹke ne ima vbe gha rhie igiọdu ne iran, ne iran gha yo iko ọghomwa vbe ẹghẹ hia. (Ya ghee ẹkpẹti nọ mwẹ uhunmwuta nọ khare wẹẹ, “Emwi Nọ Gha Ru Iyobọ Ne Ọmwa Na Gu Ruẹ E Baibol Ya Sẹtin Dinmwiamẹ.”) Emwi isẹn ọvbehe ye rrọọ ne ima gha ru, ne ima mieke na sẹtin ru iyobọ ne emwa ne ima gu ruẹ e Baibol ya sẹtin dinmwiamẹ. Emwi isẹn na ẹre ima khian ziro yan vbe ako iruẹmwi nọ ghi lele ọna.
IHUAN 76 Ma Keghi Sọyẹnmwẹ
a A gha wẹẹ na maa ọmwa emwi, ọ rhiema wẹẹ, na ru iyobọ ne ọmwa, nọ sẹtin gha roro emwi vbe odẹ nọ lughaẹn ne vbene ọ te ka ya roro emwi, kevbe nọ sẹtin gha ru emwi vbe odẹ nọ lughaẹn ne vbene ọ te ka ya ru emwi. Evbagbẹn Nọhuanrẹn ọghe ukpo 2020, nọ re ebe Matiu 28:19, NW, keghi ye ima re rre vbene ọ ru ekpataki sẹ hẹ na gha gu emwa ruẹ e Baibol, kevbe na gha maa iran emwi, ne iran mieke na sẹtin do dinmwiamẹ zẹvbe erhuanegbe ọghe Jesu Kristi. Ako iruẹmwi na kevbe nọ lelẹe, gha ru iyobọ ne ima ya rẹn vbene ima khian ya guẹ sayọ, vbe odẹ ne ima ya ru iwinna ne kpataki na.
b ẸMWẸ NA RHAN OTỌ RE: U na gha gu ọmwa guan vbekpae Baibol vbe ẹghẹ hia, ọ na vbe gha mwẹ ebe ne u ya gu ẹre ruẹ emwi, ra ọ mwẹ uhunmwuta eso ni hẹnhẹn egbe yan e Baibol ne uwa ziro yan, ọni rhiema wẹẹ u gu ọmwa nii ruẹ e Baibol. Adeghẹ u na gie ọ yan owa rẹn vbene ima ya gu ọmwa ruẹ e Baibol hẹ, u na dọlegbe rre do gu ọmwa nii ruẹ emwi igbava, u na vbe gha mwẹ ilẹkẹtin wẹẹ, u gha ye sẹtin gha gu ọmwa nii ruẹ emwi, u gha sẹtin kae ba inu emwa ne u gu ruẹ e Baibol.
c Azẹvbiro eso na guan kaẹn vbe uhunmwuta nọ khare wẹẹ, “Conducting Progressive Bible Studies” ni ladian vbe Our Kingdom Ministry ọghe July 2004 ya sẹ May 2005, vbe rre ako iruẹmwi na kevbe nọ lelẹe.
d Ya ghee vidio ọghe ifuanro enẹ, nọ mwẹ uhunmwuta nọ khare wẹẹ, Vbene A Ya Ru Iyobọ Ne Ọmwa Na Gu Ruẹ E Baibol Nọ Gha Muegbe Iruẹmwi Yotọ. Vbe jw.org®, gha rrie AZA > AVBE VIDIO > IKO KEVBE IWINNA IKPORHU IYẸN NỌ MAAN ỌGHOMWA > VBENE A YA GUẸ SAYỌ.
e Gha rrie BIBLE TEACHINGS > BIBLE STUDY TOOLS.
f Vbe jw.org®, gha rrie AZA > AVBE VIDIO > IKO KEVBE IWINNA IKPORHU IYẸN NỌ MAAN ỌGHOMWA > EMADOGUA NA LOO VBE IKPORHU IYẸN NỌMA.