Na Gha Muẹnmuẹn Ogiẹ Keghi Biẹ Ọmọ Esi!

VBE ivbialeke eva ghi khian vbe ako ne ẹvbo wa kakabọ bi la vbe Baguio City, vbe Philippines, iran keghi bẹghe uhanhan ọghomwa na waa ebe yi, sokpan iran ma mudia. Ọtẹn ima nokhuo na tie ẹre Helen nọ mudia ke uhanhan nii na wa muẹnmuẹn ogiẹ daa iran. Agharhemiẹn wẹẹ ivbialeke nii ma mudia, iran na wa gbọyẹmwẹ ye odẹ ne Helen ya muẹnmuẹn ogiẹ daa iran.

Vbe ivbialeke nii ghi die owa, iran keghi ke uwu imọto bẹghe jw.org na gbẹn gbodoo ye Ọgua Arriọba ọghe ima. Iran keghi yerre wẹẹ, egbe ọna ẹre iran ka vbe dẹghe vbe uhanhan ne iran ka miẹn sin. Iran keghi tuorre vbe imọto, iran na khian sikẹ ọkpẹn gate ọghe Ọgua Arriọba nii. Evba ẹre iran na ghi miẹn emwamwa ọghe ẹghẹ ne dọmwadẹ iko ni loo Ọgua Arriọba nii ya do iko.

Ọ ghi sẹ ẹghẹ ne ọkpa vbe avbe iko ni loo Ọgua Arriọba nii ya do iko, ivbialeke eva na, na gha khian. Iran ghi wa la uwu Ọgua Arriọba, iran na wa bẹghe Helen! Vbobọvbobọ nii, iran na wa yẹrẹro wẹẹ, irẹn ẹre ọ ghaa re ọmwa nọ muẹnmuẹn ogiẹ daa iran vbe ẹdẹrriọ. Ọtẹn Nokhuo Helen keghi kha wẹẹ, “Vbe iran ghi khian bu mwẹ dee, ohan na gha mu mwẹ. I na gha roro ẹre wẹẹ, I la ẹmwẹ nẹ.” Iran na ghi tama e Helen vbene emwi hia ya de hẹ.

Ivbialeke eva nii keghi wa sọyẹnmwẹ iko vbe ẹdẹrriọ; etẹn wa vbe ya obọ esi mu iran, iran ma ru iran vbe na ghee erhunmwuyẹn. Vbe etẹn ghi kpe Ọgua Arriọba huan vbe a do iko fo nẹ, ivbialeke na, na vbe wẹẹ iran hoo ne iran deba iran. Ọkpa vbe ivbialeke nii i ghi rre ẹvbo nii nia, sokpan nọkpa suẹn gha yo iko nẹ, a vbe gu ẹre ruẹ e Baibol nẹ. Ogiẹ ne Helen muẹnmuẹn daa iran ẹre ọ biẹ ọmọ esi na!