“Nia Te Iwinna Ikporhu Ghi Yẹẹ Mwẹ!”

I MA GHI GHA GHỌGHỌ

Ọ wa da mwẹ wẹẹ vbe I ghi rre odẹ ukpo 13, I na suẹn gha khian rree ne Jehova. Emwa ne ima gba rre esuku wa gha ru emwi vbene iran rhirhi miẹn, I na vbe gha hoo ne I gha yevbe iran. I na vbe gha roro ẹre wẹẹ, uhi ne evbibiẹ mwẹ gbe mẹ kevbe ilele ni rre Baibol i gu mwẹ zẹ obọ zẹ owẹ. Agharhemiẹn wẹẹ I rẹn wẹẹ e Jehova rrọọ, I ma ghi sikẹ ọre.

Ọrheyerriọ I ma wa dobọ ikporhu yi, I ye gha yo kherhe kherhe. Ẹdẹ ne I gha yo, I i vbe mu egbe yotọ I ke gha khian, rhunmwuda ọni, na sẹtin mu ẹmwẹ so, ra na do sẹtin kporhu, na do gha lọghọ mwẹ. Iwinna ikporhu mwẹ ma ghi gha biẹ ọmọ esi, ikporhu na yo na do khan mwẹ. I na ghi gha nọ egbe mwẹ wẹẹ, ‘Erriọ I khian wa gha do ọna khian ra?’

Vbe I ghi rre ukpo 17, I na wa gha hoo ne I gha rre ọghe obọ mwẹ. Ẹre I na ghi rrọọ emwi kpa hin owa rre, I na gha rrie Australia. Evbibiẹ mwẹ ma zẹdẹ ghọghọ yọ. Iran kegha mu ẹmwẹ mwẹ roro, sokpan iran na ye gha mwẹ ilẹkẹtin wẹẹ, I gha ye gha ga e Jehova.

Vbe I ghi sẹ Australia, I na werriegbe de ghee iyeke sayọ, I na gha gbe ẹdẹ iko re. Etẹn ne ima gba re ihe egbe, ni gha yo iko vbe ẹrẹna, iran ghi gha rrie iku asọn vbe akhuẹ, ẹre I ghi gha gu mu obọ; iran wa vbe gha da ayọn. I ma zẹdẹ mudia ẹse vbe odẹ ọghe ẹmwata vbe ẹghẹ nii, I ghi rhie owẹ ọkpa ye otu e Jehova, I na rhie nọkpa ye uwu agbọn.

IRUẸMWI NE KPATAKI NE I MA TE YARO YI

Vbe ọ ghi rre odẹ ukpo eva vba, I keghi miẹn ọtẹn nokhuo ọkpa; agharhemiẹn wẹẹ, ma ma ka rẹn egbe, ovbiẹghẹ kherhe ne I ya rẹn ọnrẹn, ọ keghi ru iyobọ mẹ ya suẹn gha mu enegbe mwẹ roro, vbene ọ ma na rẹn. Mẹ vbe etẹn nikhuo enẹ ẹre ọ gba gha rre owa ọkpa. Ma na wẹẹ ne ọgbaroghe ọghe otako ọghe ima kevbe ọvbokhan rẹn ighẹ Tamara do dia owa ima ya vbe uzọla ọkpa. Ọdafẹn e Tamara ghaa winna iwinna iko, irẹn ghi gha gu ima gbogiẹ vbe owa. Emwi ne ọ ru na wa gha yẹẹ mwẹ. Ọmwa nọ soyaya mu ọmwa kevbe nọ gia sikẹ ẹre ọtẹn nokhuo na ghaa khin. Ọ na wa gha kpa mwẹ odin wẹẹ, ọmwa nọ deziẹn vbe odẹ ọghe orhiọn ẹre ọ wa gu ima gbogiẹ vbenian.

Tamara wa gha zọghae vbe ugamwẹ e Jehova, ẹi vbe ya iwinna ikporhu ku, I na gha hoo ne I ya egbe taa ẹre. Ekhọe hia ẹre ọ wa ya gha ga e Jehova, erriọ ẹre ọ vbe ya gha sọyẹnmwẹ; sokpan mẹ ma gha ghọghọ, rhunmwuda, I ma gha ya ekhọe hia ga e Jehova. Vbe I ghi miẹn ọyẹnmwẹ nọ sẹ ọre, I na gha hoo ne I ru afiwerriẹ nọ khẹke vbe arrọọ mwẹ. Igiemwi ọghẹe keghi rhie mwẹ ekhọe ghee ako ọghe Evbagbẹn Nọhuanrẹn ọkpa nọ khare wẹẹ, ne ima gha “ya oghọghọ ga” e Jehova.—Psm 100:2.

VBENE IWINNA IKPORHU YA WERRIEGBE SUẸN GHA YẸẸ MWẸ

I na gha hoo ne I gha sọyẹnmwẹ vbene Tamara ghaa ye, rhunmwuda ọni, I na ghi ru afiwerriẹ nọ khẹke. Sokpan ẹre uhukpa ẹre I wa ya ru ọna. I na ghi suẹn gha mu egbe ikporhu yotọ, I na vbe zẹdia gha rhie obọ ye iwinna arọndẹ ọghe ovbiẹghẹ kherhe. Ọna keghi ru iyobọ mẹ ya gha kporhu vbene ohan i na mu mwẹ. Rhunmwuda ne I na kakabọ gha loo e Baibol vbe ikporhu, I na do gha sọyẹnmwẹ iwinna ikporhu sayọ. Vbọ ma he kpẹẹ vba, I na do gha rhie obọ ye iwinna arọndẹ ọghe ovbiẹghẹ kherhe vbe uki uki.

I na suẹn gha gu etẹn ughughan ni deziẹn vbe odẹ ọghe orhiọn mu obọ, ke ọmaẹn ke ẹghele. Igiemwi esi ọghe iran, keghi ru iyobọ mẹ ya mu ukpa mu uwerhẹn ghee emwi nọ ru ekpataki sẹ vbe arrọọ mwẹ, I na ghi suẹn gha tie Baibol vbe ẹdẹgbegbe. I na do gha sọyẹnmwẹ ikporhu sayọ; vbọ ma he kpẹẹ vba, I na ghi rhie obọ ye iwinna arọndẹ ọghe ẹghẹ hia. Vbe okiekie, ẹkun na dọlegbe sẹ mwẹ otọ vbe uwu iko.

I KEGHI MIẸN ỌMWA NE IMA KHIAN GBA GHA RU IWINNA ARỌNDẸ

Vbọ ghi rre ukpo ọkpa vba, mẹ vbe Alex keghi rẹn egbe; ọmwa nọ mwẹ ekhọe esi kevbe nọ hoẹmwẹ e Jehova wa gha nọ; erriọ iwinna ikporhu vbe ya gha yẹẹ ọre. Ọguọmwadia iwinna ghaa nọ; vbe ẹghẹ na kha na, ukpo ehan ẹre ọ he ye ne ọ ke gha ru arọndẹ. Alex vbe ga vbe Malawi vbe ovbiẹghẹ kherhe vbe eke ne a na gualọ iyobọ. Evba nii ẹre ọ na rẹn etẹn eso ni ga vbe isi, ni rhie igiemwi esi yotọ nẹẹn, iran na vbe bu ẹre ude ne ọ ye gha mu ugamwẹ e Jehova ye okaro.

Vbe ọ ghi rre ukpo 2003, mẹ vbe Alex na ghi ru orọnmwẹ; ke ẹghẹ nii gha dee, iwinna ugamwẹ ẹghẹ hia ẹre ima ye. Ẹi re avbiẹ emwi ima he ruẹ, afiangbe nibun ẹre ima he vbe miẹn vbe obọ e Jehova.

E JEHOVA KEGHI TUE AFIANGBE ỌVBEHE YAN IMA

Vbọ ghi rre 2009, otu na wẹẹ ne ima suẹn gha ga zẹvbe arọndẹ na gie yo isi vbe Timor-Leste; ẹvbo ne amẹ gbodin ga vbe Indonesia ẹre ẹvbo na khin. Ma ma sẹtin ghọghọ vbe ima miẹn itie nii, sokpan ohan vbe gha mu ima kherhe kherhe. Vbọ ghi rre uki isẹn vba, ma na ghi si gha rrie igiogbẹ ọghe ẹvbo nii na tie ẹre Dili.

Vbene a ya ru emwi vbe ẹvbo na lughaẹn ne ẹvbo ne ima ke gha dee. Te ima khian ghi gha ru emwi vbene iran ya ru emwi vbe ẹvbo na, te ima khian vbe ruẹ urhuẹvbo ọghe iran, evbare ne iran re, ẹre ima khian vbe gha re. Ivbiogue, emwa ni ma yo esuku kevbe emwa na ya obọ yẹnyẹn mu otọ, ẹre ima mobọ miẹn vbe ikporhu. Erriọ ẹre ima vbe ya miẹn emwa ne ọlọghọmwa gba ẹre aro gba ẹre iyeke, ne orhiọn iran ma sotọ, rhunmwuda okuo nọ sunu vbe ẹvbo nii.a

Iwinna ikporhu rhiẹnrhiẹn gbe vbe ẹvbo nii! Ọ ghaa mwẹ asẹ ọkpa vbe ikporhu, ne I miẹn ọvbokhan okhuo ọkpa nọ rre ukpo 13, na tie ẹre Maria.b Ọvbokhan na ma zẹdẹ gha ghọghọ. Vbe ẹghẹ na kha na, ukpo eso ẹre ọ ye ne iyẹe wu, erhae ma vbe mobọ gha dia owa ya. Vbene ihua re nibun ye, e Maria ma rẹn vbene ọ khian khian ẹmwẹ agbon rẹn hẹ. I ye yerre vbe asẹ ọkpa vbe ọ tama mwẹ vbene emwi ye irẹn hẹ, ọ na wa gha viẹ. Sokpan I ma họn ẹmwẹ ọkpa ne ọ tae, rhunmwuda I ma gha họn ẹvbo ne ọ zẹ. I na ghi tie ako eso ma rẹn vbe Baibol ya mu ẹre orhiọn sotọ. I na ghi na erhunmwu gie Jehova, nọ ru iyobọ mẹ ne I sẹtin rhie igiọdu nẹẹn. Vbene ẹghẹ ya khian, emwi ne Maria ruẹ vbe Baibol keghi fi emwi hia werriẹ vbe arrọọ ọghẹe, ke odẹ ne ọ ya mu egbe kevbe vbene ọ ya ru emwi. Vbe iyeke ọni, ọ na ghi dinmwiamẹ. Nia te irẹn ghi vbe mwẹ emwa ne irẹn gu ruẹ e Baibol. Te Maria ghi vbe mwẹ ẹgbẹe ne iran gba ga e Jehova kugbe, te iran wa vbe hoẹmwẹ ọnrẹn.

E Jehova wa fiangbe iwinna ikporhu na ru vbe Timor-Leste. Agharhemiẹn wẹẹ, ke ukpo igbe nọ gberra gha dee, ẹre etẹn nibun sẹ vbe ẹvbo nii dinmwiamẹ, iran nibun ru iwinna arọndẹ, eso ga nẹ zẹvbe eguọmwadia iwinna, vbene eso na re ediọn. Eso winna vbe eke ne a na zedu. I gha bẹghe vbene iran ya so ihuan hẹ vbe iko, vbene iran muẹnmuẹn ogiẹ hẹ kevbe vbene iran mwẹ alaghodaro hẹ vbe odẹ ọghe orhiọn, ọyẹnmwẹ ghi wa gha sẹ mwẹ.

OGHỌGHỌ NỌ SẸ ỌNA I RRỌỌ

Vbene emwi ghaa ye hẹ ne ima vbe Timor-Leste wa lughaẹn ne Australia, sokpan ma wa sọyẹnmwẹ iwinna ugamwẹ ọghe ima vba. Ugbẹnso, ma gha la imọto, emwa ghi wa kun egbe ye uwu ẹre, ke iran kevbe ehẹn na ka re, kẹ kevbe emwi evbare ne iran dẹlẹ vbe ẹki. Ẹghẹ eso, ma ghaa gu emwa ruẹ e Baibol vbe owa iran, ughugha ọghe iran ghi wa gha yọn, ọfọ ghi gha fọ ọmwa; a ma vbe ya e cement siẹn otọ owa ọghe iran, avbe ọkhọkhọ ghi wa gha lẹẹ yo lẹẹ rre vbe uwu owa. Vbe uwu ena hia, I ghi gha tama egbe mwẹ wẹẹ, ‘Agbọn na rhiẹnrhiẹn gbe oo!’

I gha ya yerre emwi hia nọ he sunu daa mwẹ, I wa gha ghọghọ wẹẹ, evbibiẹ mwẹ wa hia vbene ẹtin iran sẹ, ne iran koko mwẹ waan vbe odẹ ọghe ẹmwata, iran wa vbe ru iyobọ nọ khẹke mẹ vbe I waan dee. Ẹmwẹ nọ rre ebe Itan 22:6 wa sẹ vbe egbe mwẹ. Te evbibiẹ mwẹ wa ya imẹ vbe ọdafẹn mwẹ hio; iran wa ghọghọ wẹẹ, ma rhie egbe ye ugamwẹ e Jehova. Ke ukpo 2016 gha dee, iwinna ọghe ọgbaroghe ọghe otako ẹre ima ghi ru vbe ako ne abotu ọghe Australasia gbaroghe.

Ọ ma khọ wẹẹ, iwinna ikporhu te ka gha kọn mwẹ aro. Nia, te iwinna ikporhu ghi wa yẹẹ mwẹ! I do bẹghe ẹre wẹẹ, ọmwa ghaa ya ekhọe hia ga e Jehova, ẹre ọ khian na gha mwẹ oghọghọ nọ sẹ otọ ẹko, ọ gha khọnrẹn ne ọ gha werriẹ aro daa ọlọghọmwa ughughan. Ọyẹnmwẹ nọ sẹ mwẹ ke ukpo 18 gha dee, ne imẹ vbe Alex ke ga e Jehova kugbe, ẹi gia gie. Eban ẹre I ghi rẹn emwi ne Ọsian yae kha, vbe ọ tama e Jehova wẹẹ: “Iran hia ne uwẹ degue gha ghọghọ. Iran gha sẹtin gha so ihuan oghọghọ vbe ẹghẹ hia. . . . rhunmwuda ruẹ, ẹre iran na ghọghọ oghọghọ ẹmwata.”—Psm 5:11.