Ọta Ne Emwa Nọ
Vbọzẹ ne ebe 2 Samuẹl 21:7-9 na wẹẹ, e Devid tohan e Mẹfibosiẹt, sokpan ọ na vbe kue yọ na gbe Mẹfibosiẹt rua?
Ọna ọre ọta ne emwa eso wa mobọ nọ, vbe iran gha tie okha na. Sokpan ẹmwata nọ rrọọ ọre wẹẹ, orhunmwu eva na tie ẹre Mẹfibosiẹt, ẹre ọ rre okha na, ma gha gbarokotọ tie okha na ẹse, ma gha wa miẹn emwi ruẹ vbọ.
Emọ ikpia ihinrọn kevbe emọ ikhuo eva ẹre Ọba ighẹ Sọl ghaa mwẹ. E Jonatan ẹre ọ ghaa re ọdiọn vbe emọ ikpia ọghe Sọl. Zẹvbe ne ẹghẹ ya khian, egbakhian ọghe Sọl na tie ẹre Rizpa na vbe biẹ ọmọ okpia ọkpa nẹẹn, e Mẹfibosiẹt ẹre a ghaa tie ẹre. Sokpan e Jonatan vbe gha mwẹ ọmọ okpia na tie ẹre Mẹfibosiẹt. Nọnaghiyerriọ, Ọba ighẹ Sọl ghaa mwẹ ọmọ okpia kevbe eyẹ na ghaa tie ẹre Mẹfibosiẹt.
Vbe asẹ ọkpa, Ọba ighẹ Sọl keghi werriẹ aro nọ khọọ daa Ivbi e Gibiọn ni ghaa rre otọ Izrẹl, ọ na gha hoo nọ wabọ iran rua fẹfẹfẹ. Ọ gha kẹ, ọ gbele nibun rua. Ai ghẹ ru, ẹre Ọba ighẹ Sọl ru na. Vbe ima gu kha vberriọ? Rhunmwuda, vbe ẹghẹ e Jọsua, ediọn ọghe Ivbi Izrẹl keghi gu Ivbi e Gibiọn ta ile ọghe ọfunmwegbe.—Jọs 9:3-27.
Te ile nii wa ye gha rre otọ, do sẹ ẹghẹ ne Sọl ya gha kha zẹvbe Ọba. Ọba ighẹ Sọl ma zẹdẹ lele ile na, ọ na gha hoo nọ wabọ Ivbi e Gibiọn rua. Emwi nọ sunu na, keghi ya “e Sọl kevbe ẹgbẹe ọre diyi izigha.” (2 Sam 21:1) Ẹdẹ ghi rrie ẹdẹ, e Devid na do gha re Ọba. Ivbi e Gibiọn ni miẹn uhunmwu keghi ya tama rẹn vbekpa ozere ne Sọl do. E Devid na ghi nọ iran, emwi ne iran hoo ne irẹn ru, ne irẹn ya rria ikhi ye uyinmwẹ atosi ne Sọl yin rin, ne Jehova mieke na fiangbe otọ Izrẹl. Ivbi e Gibiọn ma nọ igho, nọghayayerriọ, iran keghi tama e Devid nọ viọ emọ ikpia ihinrọn ọghe okpia nii nọ te hoo nọ ‘fuẹn iran an fẹẹrẹ’ ne iran, ne iran gbele iran hia rua. (Nọm 35:30, 31) E Devid na kue ye iran re.—2 Sam 21:2-6.
Vbe ẹghẹ na kha na, e Sọl vbe Jonatan wu nẹ, odaro okuo ẹre iran na wulo, sokpan ovbi e Jonatan nokpia na tie ẹre Mẹfibosiẹt ye gha rre agbọn. Te Mẹfibosiẹt ye kherhe vbọ khian uke, ọ ma vbe deba erhae nọkhua gu Ivbi e Gibiọn khọn. E Devid ka gu e Jonatan ta ile wẹẹ, iran i khian gie emwi rhọkpa ya iran wannọ egbe, ile na wa vbe kaẹn emọ ne Jonatan biẹlẹ ya sẹ egbe Mẹfibosiẹt. (1 Sam 18:1; 20:42) E Baibol khare wẹẹ: “Rhunmwuda ihẹn ne irẹn vbe Jonatan vẹn ne egbe, e Devid keghi sẹ Mẹfibosiẹt ne eyẹ e Sọl rae.”—2 Sam 21:7.
E Devid keghi kue ye emwi ne Ivbi e Gibiọn nọ rẹn. Ọ na viọ emọ ikpia eva ọghe Sọl ne iran, ọkpa vbe uwu iran ọre Mẹfibosiẹt, ọ na vbe viọ emọ ikpia isẹn ni re eyẹ ọghe Sọl ne iran. (2 Sam 21:8, 9) Emwi ne Devid ru na, ẹre ọ ghi zẹe ighẹ esagiẹn emwa ni ma rẹn ọkpa rẹn eva, ma ghi gha rre Ivbi Izrẹl urhu.
Ma gha wa miẹn emwi kpataki ruẹ vbe okha na. Uhi Osanobua khare wẹẹ: “A ghẹ vbe gbele emọ ye orukhọ ne evbibiẹ iran ru.” (Diut 24:16) Ọna rhie ma wẹẹ, e Jehova i ghẹ kue na gbe Ivbi e Sọl nikpia eva kevbe eyẹ ọre isẹn rua, deghẹ iran ma rẹn ọkpa rẹn eva. Uhi nii ye vbe kha wẹẹ: “orukhọ ne ọmwa ru ọkpa ọre a gha gbe ẹe yi.” Ọ khọ wẹẹ, Ivbi e Sọl kevbe eyẹ ọre na gbelua na, rhie obọ ba e Sọl vbọ khian te wabọ Ivbi e Gibiọn rua. Rhunmwuda ọni, iran ihinrọn keghi ya uhunmwu iran khiọ ọre.
Okha na ya ima rẹn wẹẹ, ọmwa gha ru emwi dan nẹ, ẹi khian sẹtin kha wẹẹ, irẹn ma rẹn ọkpa rẹn eva, rhunmwuda wẹẹ ọmwa ẹre ọ gie irẹn ne irẹn ya ru emwi nii. Itan ọkpa khare wẹẹ: “Kakabọ gha gbe ekhọe kotọ mwamwa emwi ne u khian ru, emwi ne u ru hia gha wa dunna.”—Itan 4:24-27; Ẹfis 5:15.