Vbene Jehova Ya Ru Iyobọ Ne Ima, Ne Ima Ye Gha Sọyẹnmwẹ Vbe Ima Ghaa Zin Egbe Edanmwẹ

1-2. (a) De inọta eso ne ima khian rhie ewanniẹn yi? (b) De emwi nọ rhie ẹre ma wẹẹ, e Jehova mu egbe nọ khian ya ru iyobọ ne ima?

E JEHOVA gha sẹtin ru iyobọ ne ima, ne ima sẹtin zin egbe ọlọghọmwa ne ima werriẹ aro daa kevbe ne ima gha sọyẹnmwẹ vbe ugamwẹ ọghẹe. De odẹ eso ne Jehova ya ru iyobọ ne ima? De emwi ne ima khian ru, ne Jehova mieke na ru iyobọ ne ima? Ma gha rhie ewanniẹn ye avbe inọta na vbe ako iruẹmwi na. Sokpan, ma gha ka rhie ewanniẹn ye inọta na: E Jehova gele mu egbe nọ khian ya ru iyobọ ne ima ra?

² Ọ mwẹ ẹmwẹ ne uko e Pọl ta vbe elẹta nọ gbẹn gie etẹn ni re Ivbi e Hibru, nọ gha ya ima rẹn ewanniẹn ọghe inọta na. E Pọl khare wẹẹ: “E Jehova ọre nọ yọ mwẹ obọ, ohan i ghi mu mwẹ. De emwi ne ọmwa gha sẹtin ru mwẹ re?” (Hib 13:6) Ebe ọkpa nọ rhan otọ e Baibol khare wẹẹ, emwi na ya ẹmwẹ na ighẹ “nọ yọ mwẹ obọ” kha, ọre ọmwa nọ giẹgiẹ rhulẹ bu ọmwa nọ gualọ iyobọ, nọ ya ru iyobọ nẹẹn. Hia ne u ya ekhọe ruẹ zomwa rẹn wẹẹ, e Jehova gele rhulẹ bu ọmwa nọ gualọ iyobọ, nọ ya ru iyobọ nẹẹn. Ọna ya ima rẹn wẹẹ, e Jehova wa gele mu egbe nọ ya ru iyobọ ne ima. Ugbẹnvbe a miẹn wẹẹ, e Jehova rre ima iyeke, ma gha sẹtin ye gha sọyẹnmwẹ, vbe ima ghaa zin egbe edanmwẹ.

3. De odẹ eha ne Jehova ya ru iyobọ ne ima, ne ima mieke na ye gha sọyẹnmwẹ vbe ima ghaa zin egbe edanmwẹ?

³ De odẹ eso ne Jehova ya ru iyobọ ne ima, ne ima mieke na ye gha sọyẹnmwẹ vbe ima ghaa zin egbe ọlọghọmwa? Ne ima mieke na miẹn ewanniẹn ọghe inọta na, ma gha ziro yan emwi nọ rre ebe Aizaia. Vbọzẹ? Rhunmwuda ẹmwẹ akhasẹ nibun ni rre ebe Aizaia wa kaẹn ima ne eguọmwadia e Jehova vbe ẹdẹnẹrẹ. Yevbesọni, ẹmwẹ ne Aizaia ya gie Jehova wa khuẹrhẹ na rẹn otọ re. Vbe igiemwi, vbe ebe Aizaia uhunmwu ẹnrẹn 30, Aizaia keghi loo igiemwi nibun ya gie vbene Jehova ya ru iyobọ ne emwa rẹn hẹ. Ọ na wẹẹ, (1) e Jehova gbehọkotọ danmwehọ erhunmwu ima, erriọ vbe ya họn erhunmwu ima, (2) ọ ma ima emwi, (3) ọ vbe fiangbe ima vbe ẹghẹ na, ọ gha vbe ru vberriọ vbe odaro. Nian, gi ima guan kaẹn odẹ eha na, ne Jehova ya ru iyobọ ne ima.

E JEHOVA DANMWEHỌ IMA

4. (a) De vbene Jehova ya gie Ivbi e Ju ni ghaa rrọọ vbe ẹghẹ Aizaia, kevbe wẹẹ, de emwi ne Jehova kue nọ sunu daa iran? (b) De emwi ne Jehova ru ne Ivbi e Ju, ni ghaa ya ẹkoata gae? (Aizaia 30:18, 19)

⁴ Vbe omuhẹn ọghe ebe Aizaia uhunmwu ẹnrẹn 30, e Jehova keghi gie Ivbi e Ju zẹvbe emwa ni “yin ehọ,” kevbe ni “kun orukhọ yan orukhọ.” Ọ na vbe kha wẹẹ: “Ẹghẹ hia ẹre iran ya sọtẹ, . . . iran i hoo ne iran ya ehọ họn uhi e Jehova.” (Aiz 30:1, 9) Rhunmwuda ne iran ma na gha họn ẹmwẹ ne Jehova, Aizaia keghi kha wẹẹ, e Jehova gha kue ne iran rri oya ne udẹn oya ne ẹvbi. (Aiz 30:5, 17; Jer 25:8-11) Erriọ gele wa gha ye zẹẹ, a na viọ iran gha rri imu vbe Babilọn. Vbọrhirhighayehẹ, ọ mwẹ eso vbe uwu iran ni ya ẹkoata gha ga e Jehova, ọ mwẹ ẹmwẹ ne Aizaia tae, nọ wa ya iran ya aro yọ wẹẹ, emwi hia gha maan vbe odaro. Ọ na tama iran wẹẹ, e Jehova gha werriegbe viọ iran gha rrie Jerusalẹm vbe ẹdẹ ọkpa. (Tie Aizaia 30:18, 19.) Erriọ wa gele gha ye zẹẹ, e Jehova keghi fan iran vbe imu, sokpan ukpo nibun gberra nẹ, e Jehova ke do fan iran. Ẹmwẹ ne Aizaia tae nọ na wẹẹ, “E Jehova zin egbe khẹ ẹghẹ nọ khian ya tohan uwa,” rhie ẹre ma wẹẹ, ẹghẹ eso gha gberra, a ke do fan Ivbi e Ju ni ya ẹkoata ga e Jehova. Uhiẹn, ukpo 70 gbalaka ẹre iran gbe vbe imu vbe Babilọn, a te miẹn wẹẹ, a kue ne eso vbọ werriegbe gha rrie Jerusalẹm. (Aiz 10:21; Jer 29:10) Iran ghi sẹ ẹvbo iran, eve orriara ne iran te gha viẹ vbe iran rre imu, keghi khian eve oghọghọ.

5. De emwi ne ebe Aizaia 30:19 wẹẹ e Jehova gha ru ne ima?

⁵ Ẹmwẹ ne Aizaia tae wa fu ima ẹko rre vbe ẹdẹnẹrẹ, ọ wẹẹ: “Ọ gha tohan ruẹ vbe u gha tu bu ẹre ya nọ iyobọ.” (Aiz 30:19) Aizaia gi ima rẹn wẹẹ, e Jehova gha gbehọkotọ danmwehọ ima deghẹ ima na tu bu ẹre rre, ọ ghi wa vbe zẹgiẹ họn erhunmwu ima. Aizaia na vbe rhie tẹ wẹẹ: “Ọ gha zẹ yọ ruẹ re, vbe ọ gha wa họn emwi ne u nọ rẹn.” Ena hia ya ima rẹn wẹẹ, Erha ima nọ rre ẹrinmwi wa gele mu egbe nọ ya ru iyobọ ne ima, ẹghẹ ke ẹghẹ ne ima ya tu bu ẹre rre. Ne ima na rẹn ọna, ọ keghi ru iyobọ ne ima ya gha sọyẹnmwẹ, vbe ima ghaa zin egbe edanmwẹ.

6. De vbene ẹmwẹ ne Aizaia tae, ya rhie ẹre ma wẹẹ, e Jehova danmwehọ erhunmwu ọghe edọmwadẹ ima?

⁶ De emwi ọvbehe ne ima miẹn ruẹ vbe ako ọghe evbagbẹn nọhuanrẹn na, nọ dekaẹn erhunmwu ne ima na? E Jehova keghi gbehọkotọ danmwehọ erhunmwu edọmwadẹ ima. Vbe ima gu kha vberriọ? Agbẹnvbo ọghe Ivbi Izrẹl ẹre ẹmwẹ nọ rre ebe Aizaia uhunmwu ẹnrẹn 30 guan kaẹn, sokpan vbe uviẹn 19, e Jehova keghi loo ẹmwẹ na ighẹ “ruẹ,” nọ rhie ẹre ma wẹẹ, edọmwadẹ iran ẹre ọ ghaa gu guan. Aizaia keghi kha wẹẹ: “U i ghi dọlegbe viẹ”; “Ọ gha tohan ruẹ”; “Ọ gha zẹ yọ ruẹ re.” Zẹvbe Erha nọ hoẹmwẹ ima, e Jehova i tama ima wẹẹ, “u ma bẹghe ọtuẹn, ọ khẹke ne u wegbe vbe ọre.” Nọghayayerriọ, ọ rẹn edọmwadẹ ima, erriọ vbe ya gbehọkotọ danmwehọ erhunmwu ne dọmwadẹ ima na.​—Psm 116:1; Aiz 57:15.

7. De vbene Aizaia kevbe Jesu ya rhie ẹre ma wẹẹ, ọ khẹke ne ima rhiegba ye erhunmwu na na?

⁷ Ugbẹnso, ma gha tu bu e Jehova nọ ru iyobọ ne ima, emwi nọ ka ru ọre wẹẹ, ọ ghi rhie ẹtin ne ima, ne ima mieke na sẹtin zin egbe ọlọghọmwa ne ima ye. Deghẹ ọlọghọmwa ne ima ye ma fo vbene ima te ya aro yi, ọ khẹke ne ima ye gha na erhunmwu gie Jehova, nọ rhie ẹtin ne ima ya sẹtin zin egbe ẹre. E Jehova tobọre, ẹre ọ wẹẹ ne ima ru vberriọ. Ẹmwẹ ne Aizaia tae, ẹre ọ wa ya ima rẹn ọna. Ọ khare wẹẹ: “Ghẹ gi [e Jehova] hẹwẹ.” (Aiz 62:7) Vba ya ọna kha? Emwi na yae kha ọre wẹẹ, ọ khẹke ne ima gha na erhunmwu vbe ẹghẹ hia, sẹrriọ wẹẹ, ọ ghi yevbe ima ma gi e Jehova hẹwẹ. Ẹmwẹ ne Aizaia ta na ye ima ẹre rre, igiemwi ne Jesu loo ro nọ dekaẹn erhunmwu vbe ebe Luk 11:8-10, 13. Vbe ako nii, e Jesu keghi tama ima, ne ima “rhiegba” ye erhunmwu na na kevbe wẹẹ, ne ima “ye gha nọ” Osanobua nọ rhie orhiọn nọhuanrẹn ne ima. Ma gha sẹtin vbe nọ e Jehova nọ rhie ẹwaẹn ne ima, ne ima mieke na sẹtin ru azẹ nọ khẹke.

E JEHOVA MA IMA EMWI

8. De vbene emwi nọ rre ebe Aizaia 30:20, 21 ya sunu vbe ẹghẹ nẹdẹ?

⁸ Tie Aizaia 30:20, 21. Vbe ivbiyokuo e Babilọn gbe okin lẹga Jerusalẹm vbe ukpo ọkpa vbe ukhiọnmwẹ, oya ne iran re wegbe sẹrriọ wẹẹ, ọ na ghi do gu iran egbe ro vbe na ghee evbare kevbe amẹ. Sokpan zẹvbe ne uviẹn 20 kevbe 21 khare, e Jehova keghi tama Ivbi e Ju wẹẹ, irẹn gha ru iyobọ ne iran deghẹ iran na fi werriẹ. Ne Aizaia na gie Jehova zẹvbe “Ọmamwaemwi Nọ Sẹre,” te ọ ghaa kha wẹẹ, e Jehova gha ma Ivbi Izrẹl odẹ nọ khẹke ne iran ya gha ga irẹn. Ẹghẹ na ya fan Ivbi Izrẹl vbe imu ẹre emwi ne Aizaia tae na ya sunu. Ọmamwaemwi Nọ Sẹre ẹre Jehova gele wa gha khin ne iran, te ọ wa gele ru iyobọ ne iran ya sẹtin dọlegbe suẹn ugamwẹ ẹmwata. Egie nọkhua ẹre ima wa ye, ne ima na mwẹ e Jehova zẹvbe Ọmamwaemwi Nọ Sẹre.

9. Vbọ re odẹ ọkpa ne Jehova ya dia ima vbe ẹdẹnẹrẹ?

⁹ Vbe igiemwi ne Aizaia loo ro nii, ọ keghi ya ima gie ivbi esuku ne Jehova ya odẹ eva ma re emwi. Vbe okaro, Aizaia na kha wẹẹ: “U gha ya arọ ruẹ bẹghe Ọmamwaemwi Nọ Sẹre.” Vbe igiemwi na, te ọ yevbe na miẹn wẹẹ, ọmamwaemwi nii mudia ye odaro ivbi esuku nọ ma re emwi. Egie nọkhua ma wa ye, ne Jehova na ma ima emwi vbe ẹdẹnẹrẹ. Vbe ọ ya ru ẹre hẹ? Otu ọghẹe ẹre ọ ya ma ima emwi. Ma wa ya ekhọe hia kpọnmwẹ e Jehova, nọ na ya otu ọghẹe dia ima ye odẹ nọ khẹke! Ẹmwẹ ibude ne ima miẹn vbe iko, asikoko nọkhua, avbe ebe ọghomwa, JW Broadcasting® kevbe odẹ nibun ọvbehe, keghi ru iyobọ ne ima ya gha sọyẹnmwẹ vbe ima ghaa zin egbe edanmwẹ.

10. De odẹ ne ima ya “họn urhu [Osanobua] vbe odẹ iyeke”?

¹⁰ Aizaia vbe guan kaẹn odẹ ọvbehe ne Jehova ya ma ima emwi, ọ wẹẹ: “U gha họn urhu ẹre vbe odẹ iyeke.” Vbe ako na, Aizaia keghi gie Jehova zẹvbe ọmamwaemwi nọ lele ivbi esuku ọghẹe dee vbe odẹ iyẹke, nọ gie odẹ ma iran. Vbe ẹdẹnẹrẹ, ma wa họn urhu Osanobua vbe odẹ iyeke. Odẹ vbo? Ọ kpẹẹ re na ghi gbẹn Ẹmwẹ Osanobua, rhunmwuda ọni, ma ghaa tie Ẹmwẹ Ọghe Osanobua, ọ ghi yevbe na miẹn wẹẹ, te ima họn urhu Osanobua vbe odẹ iyeke ima.​—Aiz 51:4.

11. De emwi eso nọ khẹke ne ima ru, ne ima mieke na sẹtin gha sọyẹnmwẹ vbe ima ghaa zin egbe edanmwẹ, kevbe wẹẹ vbọzẹ?

¹¹ De vbene ima gha ya miẹn ere vbe emwi ne Jehova ya otu ọghẹe kevbe Ẹmwẹ ọghẹe ma ima re? Emwi eva ẹre Aizaia guan kaẹn vbe ako na. Nokaro, ọ na wẹẹ, “wa ghee odẹ.” Nogieva, “wa lelẹe.” (Aiz 30:21) Vbọ gberra na wa rẹn nene “odẹ,” ọ vbe khẹke na gha “lelẹe.” Ẹmwẹ Ọghe Osanobua kevbe odẹ ne otu e Jehova ya rran otọ ọre, wa ya ima rẹn emwi nọ khẹke ne ima gha ru. Erriọ ima vbe ruẹ vbekpa vbene ima khian ya gha rhie emwi ne ima ruẹ ye uyinmwẹ. Zẹvbe ne ima ya ga e Jehova, ọ khẹke ne ima gha ru emwi eva na, ne ima mieke na sẹtin ye gha sọyẹnmwẹ vbe ima ghaa zin egbe edanmwẹ. Ma gha ru vberriọ, ma gha wa miẹn afiangbe ọghe Jehova.

E JEHOVA KEGHI FIANGBE IMA

12. Zẹvbe nọ rre ebe Aizaia 30:23-26, de vbene Jehova ya fiangbe emwa rẹn hẹ?

¹² Tie Aizaia 30:23-26. De vbene ẹmwẹ akhasẹ na ya sẹ hẹ vbe egbe Ivbi e Ju, ni ke imu vbe Babilọn gha die otọ Izrẹl? E Jehova wa fiangbe iran vbe odẹ nibun. Ọ keghi kpemehe emwi na ya yin agbọn ne iran, ọ na vbe kpemehe emwi nọ gha ru iyobọ ne iran ya gha ga irẹn vbe odẹ nọ khẹke. Te Jehova wa gele fiangbe iran, te iran wa miẹn evbare re sẹ ọkẹn. Nọ ghi wa sẹ ehia, ọ keghi kpemehe emwi nọ gha ya iran sikẹ irẹn sayọ, ọ na vbe ru iyobọ ne iran ya dọlegbe mu ugamwẹ ẹmwata gbọọ. Emwi ne Jehova ru ne iran vbe iran ghi ke imu rre nẹ, ẹre ọ sẹ afiangbe ne iran ghaa mwẹ, vbene iran te gha rrie imu. Zẹvbe ne uviẹn 26 khare, e Jehova keghi ru iyobọ ne iran, ne ukpa ọghe iran mieke na baa sayọ, ọni rhie ma wẹẹ, ọ keghi ru iyobọ ne iran ya rẹn otọ Ẹmwẹ ọghẹe. (Aiz 60:2) Iyobọ ne Jehova ru ne iran keghi ya iran gha sọyẹnmwẹ, “rhunmwuda orhiọn iran sotọ.”​—Aiz 65:14.

13. De vbene ẹmwẹ akhasẹ nọ dekaẹn vbene a khian ya dọlegbe mu ugamwẹ ẹmwata gbọọ, ya sunu vbe ẹdẹnẹrẹ?

¹³ Ẹmwẹ akhasẹ nọ dekaẹn vbene a khian ya dọlegbe mu ugamwẹ ẹmwata gbọọ kaẹn ima vbe ẹdẹnẹrẹ ra? Ẹn, kakabọ! Odẹ vbo? Ke ukpo 1919 C.E. gha dee, ẹbo emwa nibun ọre he la hin imu ọghe Babilọn Nọkhua rre, nọ mudia ye ihe ugamwẹ ohoghe hia. Eke ne iran ghi ye maan sẹ Otọ Na Ru Eyan Rẹn ọghe Ivbi Izrẹl. E paradais ọghe orhiọn ẹre iran ghi ye. (Aiz 51:3; 66:8) Vbọ re paradais ọghe orhiọn na?

14. Vbọ re paradais ọghe orhiọn, de emwa ni rre evba vbe ẹdẹnẹrẹ? (Ya ghee Ẹmwẹ Na Rhan Otọ Re.)

¹⁴ Ke ukpo 1919 C.E. kpa, te etẹn na hannọ zẹ wa sọyẹnmwẹ paradais ọghe orhiọn.b Zẹvbe ne ẹghẹ ya khian, etẹn ni ya aro yọ wẹẹ, iran gha yin uhunmwu otagbọn na, nọ re “ohuan ọvbehe,” wa vbe sọyẹnmwẹ paradais ọghe orhiọn na, erriọ iran vbe ya miẹn afiangbe nibun vbe obọ e Jehova.​—Jọn 10:16; Aiz 25:6; 65:13.

15. De eke ne paradais ọghe orhiọn ye?

¹⁵ De eke ne otọ ọghe orhiọn ra e paradais na ye vbe ẹdẹnẹrẹ? Eguọmwadia e Jehova rre ehe hia vbe uhunmwu otagbọn hia. Nọnaghiyerriọ, e paradais ọghe orhiọn wa rre uhunmwu otagbọn hia. Rhunmwuda ọni, ehe ke ehe ne ima ye vbe uhunmwu otagbọn, ma gha ye sẹtin gha rre paradais ọghe orhiọn na, deghẹ ima na ye gha ga e Jehova.

16. De emwi nọ khẹke ne ima ru, ne ima mieke na ye gha bẹghe vbene paradais ọghe orhiọn mose hẹ?

¹⁶ Ne ima mieke na ye gha rre paradais ọghe orhiọn na, ọ khẹke ne ima gha ya aro nọ ghaan ghee etẹn ima vbe uhunmwu otagbọn hia. Vbe ima khian ya ru ọna hẹ? Ọ khẹke ne ima gha rhie aro tua uyinmwẹ esi ne iran mwẹ, ẹi re ako ne iran i na hia. (Jọn 17:20, 21) Vbọzẹ ne ọna na ru ekpataki? Vbe igiemwi, ma gha bẹghe erhan ughughan ni zọọ kugbe, ọ ghi wa ye mose mose. Erriọ vbe ye, emwa ughughan ẹre ọ rre iko ọghe Jehova vbe ẹdẹnẹrẹ. Te iran yevbe na ghee avbe erhan na. (Aiz 44:4; 61:3) Ọ khẹke ne ima rhie aro tua vbene “avbe erhan” ni hia mose hẹ, ẹi re ne ima rhie aro tua ako eso ni ma deyọ vbe egbe dọmwadẹ erhan ni sikẹ ima. Ma rẹnrẹn wẹẹ, ọ ma gba ne etẹn ima fo, erriọ ima tobọ ima vbe ye, sokpan, ọ ma khẹke ne ima gi ọna ya ima mianmian afiangbe ne ima miẹn vbe otu e Jehova vbe uhunmwu otagbọn hia.

17. De emwi ne dọmwadẹ ima gha ru, ne akugbe nọ rre uwu iko mieke na gha wegbe sayọ?

¹⁷ De emwi ne dọmwadẹ ima gha ru, ne akugbe nọ rre uwu iko mieke na gha wegbe sayọ? Ọ khẹke ne ima gha re emwa ọfunmwegbe. (Mat 5:9; Rom 12:18) Ẹghẹ ke ẹghẹ ne ima ya ru emwi nọ gha ya ima vbe etẹn gha rrọọ vbe ọfunmwegbe vbe uwu iko, te ima ru emwi nọ gha ya e paradais ọghe orhiọn mose. Ọ khẹke ne ima kọe ye orhiọn wẹẹ, e Jehova ẹre ọ si edọmwadẹ emwa ni rre paradais ọghe orhiọn gha die ugamwẹ ẹmwata. (Jọn 6:44) Ma ghaa hia ne ima gha ru emwi nọ gha ya ọfunmwegbe kevbe akugbe gha rre uwu iko, ọ wa ya ẹko rhiẹnrhiẹn e Jehova, rhunmwuda, aro nọ ghaan ẹre Jehova ya ghee etẹn ima!​—Aiz 26:3; Hag 2:7

18. De emwi nọ khẹke ne ima gha mu roro vbe ẹghẹ hia kevbe wẹẹ vbọzẹ?

¹⁸ Emwi wa bun ne Jehova ya ru eguọmwadia ẹre ẹse. Vbe ima khian ru ne ima mieke na gha miẹn ere vbọ vbene ọ khẹke? Ọ khẹke ne ima gha mu emwi ne ima tie vbe Ẹmwẹ Osanobua kevbe avbe ebe ọghomwa roro. Ma ghaa ru vberriọ, ọ gha ru iyobọ ne ima ya gha mwẹ uyinmwẹ ni khẹke Ivbiotu e Kristi. Avbe uyinmwẹ na ghi gu ima kpa ya “hoẹmwẹ egbe zẹvbe etẹn,” ma ghi vbe gha “mwẹ ẹnina daa egbe” vbe uwu iko. (Rom 12:10) Ma ghaa muẹn roro afiangbe ne ima he miẹn vbe obọ e Jehova, ọ ghi ru iyobọ ne ima ya sikẹ ọre sayọ. Vbe deba ọni, deghẹ ima na gha muẹn roro, emwi ne Jehova wẹẹ irẹn khian ru ne ima vbe odaro, ọ ghi ya ima rẹn wẹẹ, ma gha gele sẹtin gae vbe etẹbitẹ. Ena hia keghi ya ima sọyẹnmwẹ zẹvbe ne ima ya ga e Jehova.

HIA NE U GHẸ GI EGBE WỌỌ RUẸ

19. (a) Zẹvbe nọ rre ebe Aizaia 30:18, de emwi ne Jehova khian ru ne ima? (b) De emwi nọ khian ru iyobọ ne ima, ne ima mieke na ye gha sọyẹnmwẹ, ọ gha khọnrẹn wẹẹ ima werriẹ aro daa ọlọghọmwa?

¹⁹ E Jehova gha “mudia” ne ima, ọ ghi vbe miẹn ima fan vbe ẹghẹ nọ khian ya guọghọ agbọn Esu na. (Aiz 30:18) Ma rẹnrẹn wẹẹ, Osa nọ ru “emwi nọ gbae” ẹre Jehova khin, rhunmwuda ọni, ma rẹnrẹn wẹẹ ẹi khian kue ne agbọn Esu na ya ikpẹdẹ ọkpa gberra ẹghẹ nọ khẹke nọ ya guọghọ ẹre rua. (Aiz 25:9) Te ima wa deba e Jehova zin egbe khẹ ẹghẹ nọ khian ya miẹn ima fan. Vbene ọ ghi te sẹ ẹghẹ nii, ọ khẹke ne ima gha loo ẹre ẹse, ẹkpotọ nọ kie ne ima ya gha na erhunmwu kevbe ne ima ya tie Baibol. Ma ghi gha rhie emwi ne ima ruẹ ye uyinmwẹ, ma ghi vbe gha muẹn roro avbe afiangbe ne ima miẹn. Ma gha ru vberriọ, e Jehova gha ru iyobọ ne ima, ne ima ye gha sọyẹnmwẹ vbe ugamwẹ ọghẹe, ọ gha khọnrẹn wẹẹ ima werriẹ aro daa ọlọghọmwa.