U Yerre ra?
Uwẹ gbarokotọ tie avbe ebe Owa Ọkhẹ ọghe ukpo na ra? Adeghẹ erriọ nọ, hia ne u rhie ewanniẹn ye avbe inọta na:
De afiangbe ne ima khian miẹn, deghẹ ima na gha rhie ẹghẹ ya gu e Jehova guan, ma na gha danmwehọ ẹre, ma na vbe gha mu ẹmwẹ ọnrẹn roro?
Ma ghi sẹtin gha ru azẹ nọ maan, ma ghi guẹ sayọ vbe odẹ ne ima ya ma emwa emwi, amuẹtinyan ọghe ima ghi do kakabọ wegbe, ahoẹmwọmwa ne ima mwẹ ne Jehova ghi vbe wegbe sayọ.—w22.01, ipapa 30-31.
Ma gha mu ẹtin yan e Jehova kevbe etẹn nọ ya zẹ ihe egbe, vbọ khian ya ru iyobọ ne ima hẹ?
Ẹghẹ na ẹre ọ khẹke ne ima ya mu ẹtin yan e Jehova, ma ghi vbe gha mwẹ ilẹkẹtin wẹẹ, ẹi ru emwi nọ ma gba. Ọ ma vbe khẹke ne ima gha ya aro tila adia nọ ke obọ ediọn rre. Orueghe nọkhua gha suẹn nẹ, ma ghi sẹtin gha lele adia na rhirhi rhie ne ima, ọ gha khọnrẹn wẹẹ, ima ma wa rẹn evbọzẹe na na rhie adia nii ne ima.—w22.02, Ipapa 4-6.
De emwi ne odibosa nii ghaa hoo nọ gi e Zẹkaraia rẹn, vbe ọ tama rẹn vbekpa ‘emwi na ya mwa egbekẹn nọ rre obọ [e gọvina] Zẹrubabẹl’? (Zẹk 4:8-10)
Te odibosa na ghaa rhie igiọdu ne emwa ọghe Osanobua wẹẹ, agharhemiẹn wẹẹ, ọgua Osa na ma mose vba na ka bọ, iran gha ye bọe fo, zẹvbe ne Jehova gualọe yi.—w22.03, ipapa 16-17.
Vbe ima khian ya sẹtin gha re “igiemwi esi . . . vbe ẹmwẹ” ne ima ta? (1 Tim 4:12)
Ma ghi gha ya urhu ne khuẹrhẹ kevbe ọghọ vbe utẹ guan vbe ikporhu, ma ghi gha ya ekhọe hia so ihuan vbe iko, ma ghi gha zẹ ewanniẹn, ma ghi gha ta ẹmwata, ma ghi vbe gha rhie igiọdu ne emwa ọvbehe, ọ ma vbe khẹke ne ima gha ta ẹmwẹ ekpọ.—w22.04, ipapa 6-9.
Vbọzẹ na na miẹn wẹẹ, aranmwẹ ọkpa kẹkan ne ebe Arhie Maan 13:1, 2 guan kaẹn, ẹre a ya gie aranmwẹ enẹ (avbe arriọba) ne ebe Daniẹl uhunmwu ẹnrẹn 7 guan kaẹn?
Aranmwẹ oha ne ebe Arhie Maan 13 guan kaẹn ma mudia ye ihe arriọba ọkpa, vbe na ghee Rom. Nọghayayerriọ, ọ mudia ye ihe arriọba hia ni he kha yan emwa nagbọn.—w22.05, ipapa 9.
De odẹ ọkpa ne ima gha ya rhie ẹre ma wẹẹ, ma mu ẹtin yan odẹ ne Jehova ya bu ohiẹn?
Deghẹ ọmwa na rhovbiẹ ima, ọ na ru emwi nọ sọnnọ ima ra ọ na ru ima khọọ, ọ khẹke ne ima hia ne ima mu ẹzọ fua, ne ima ghẹ rhie ẹmwẹ ye ẹko, ma ghi sẹ emwi hia rae ye obọ e Jehova. Ọ gha sọfurre ye ọlọghọmwa hia ne orukhọ he si.—w22.06, ipapa 10-11.
De emwi nọ khẹke ne ọtẹn na wẹẹ nọ na erhunmwu vbe iko kọ ye orhiọn?
Ẹi re erhunmwu ẹre a ya rhie adia ne etẹn vbe iko, ẹi re erhunmwu ẹre a vbe ya ya ẹmwẹ wewe ma iko. Ọ ma khẹke ne ọtẹn nọ khian na erhunmwu “talọ ẹmwẹ nọ bun” gbe, katekate deghẹ erhunmwu na khian ya suẹn iko ẹre ọ khian na. (Mat 6:7)—w22.07, Ipapa 24-25.
De emwi na yae kha na na wẹẹ, “arhiọkpaegbe ọghe ibuohiẹn” ẹre emwa “ni ma ru emwi esi” khian miẹn? (Jọn 5:29)
Ai khian ya emwi ne iran ru vbe ẹghẹ nọ gberra ya bu ohiẹn iran. Sokpan te a khian ghee uyinmwẹ iran ghee kevbe emwi ne iran khian ru vba gha huẹn iran kpaegbe nẹ.—w22.09, ipapa 18.
De igiọdu ne Ọtẹn Nokpia J. F. Rutherford rhie ne etẹn vbe asikoko nọkhua na do vbe September 1922?
Vbe asikoko nọkhua na do vbe Cedar Point, Ohio, U.S.A., Ọtẹn Nokpia Rutherford keghi kha wẹẹ: “Ma hoo ne ima gi uwa rẹn wẹẹ, Ọba suẹn gha kha nẹ! Uwa ẹre ọ khian na iyẹn na ma emwa ọvbehe. Rhunmwuda ọni, uwa yae wewe, uwa yae wewe, uwa yae wewe Ọba nii kevbe Arriọba ọghẹe!”—w22.10, ipapa 3-5.
De odẹ eha ne ebe Aizaia uhunmwu ẹnrẹn 30 wẹẹ, Osanobua ya ru iyobọ ne ima ya zin egbe ọlọghọmwa?
Ako na gi ima rẹn wẹẹ, (1) e Jehova gbehọkotọ danmwehọ erhunmwu ima, erriọ vbe ya họn erhunmwu ima, (2) ọ ma ima emwi, (3) ọ vbe fiangbe ima vbe ẹghẹ na, ọ gha vbe ru vberriọ vbe odaro.—w22.11, ipapa 9.
Vbọzẹ ne ima na kha wẹẹ, ẹmwẹ nọ rre ebe Psalm 37:10, 11 kevbe 29 sunu nẹ vbe ẹghẹ nẹdẹ kevbe wẹẹ, ọ gha sunu vbe odaro?
Ẹmwẹ ne Devid ta na, ya ima rẹn vbene emwi khian gha ye hẹ vbe ẹghẹ Solomọn. E Jesu vbe sunu yi ẹmwẹ nọ rre uviẹn 11, e paradais nọ dee vbe odaro ẹre ọ ghaa guan kaẹn. (Mat 5:5; Luk 23:43)—w22.12, ipapa 8-10, 14.