Emwi Ne Baibol Ma Ima Re Vbekpa Ọmwa Nọ Yan E Baibol

1. Vbọzẹ ne ima na kpọnmwẹ e Jehova ye Baibol nọ ya ru ima ẹse?

MA WA ya ekhọe hia kpọnmwẹ e Jehova ye Baibol nọ ya ru ima ẹse! E Jehova keghi ya e Baibol bu ima ude, avbe ibude na keghi ru iyobọ ne ima ya zin egbe ọlọghọmwa ne ima miẹn vbe ẹdẹnẹrẹ. Ọ vbe gi ima rẹn vbe uwu e Baibol wẹẹ, emwi hia gha maan vbe odaro. Sẹ ehia, e Baibol ẹre Jehova vbe loo ya gi ima rẹn aro ọmwa ne irẹn khin. Ọ keghi gbe ima otiti vbe ima ghaa muẹn roro aro ọmwa ne Jehova khin, ọna ẹre ọ zẹe ne ima na hoo ne ima sikẹ ọre sayọ.​—Psm 25:14.

2. De odẹ eso ne Jehova he ya gi emwa rẹn aro ọmwa ne irẹn khin?

² E Jehova hoo ne emwa do rẹn irẹn. Vbe ẹghẹ nẹdẹ, e Jehova keghi loo iminna, umian kevbe avbe odibosa ya gi emwa rẹn aro ọmwa ne irẹn khin. (Nọm 12:6; Iwinna 10:3, 4) Sokpan, ima i ghẹ te sẹtin rẹn emwi ne Jehova tama emwa vbe iminna kevbe umian, deba ẹmwẹ nọ loo avbe odibosa ya ta, akpawẹ a ma gbẹnnẹ ọnrẹn yotọ. Ọna ẹre ọ si ẹre ne Jehova na loo emwa ya “gbẹnnẹ ọnrẹn ye ebe” emwi nọ hoo ne ima rẹn. (Jer 30:2) Ugbẹnvbe a miẹn wẹẹ, Osa i ru emwi nọ ma gba, ma wa rẹn wẹẹ, odẹ nọ ghi loo ya gu ima guan wa deyọ kevbe wẹẹ, ma wa vbe miẹn ere vbọ.​—Psm 18:30.

3. De vbene Jehova ya ru ẹre hẹ ne Baibol ye gha rrọọ do sẹ ẹdẹnẹrẹ? (Aizaia 40:8)

³ Tie Aizaia 40:8. Ke ukpo arriaisẹn nibun gha dee, te ibude ni rre Baibol wa ru iyobọ ne eguọmwadia e Jehova, ke ikpia ke ikhuo. Sokpan, de vbene Baibol ya sẹtin ru iyobọ ne iran hẹ, ugbẹnvbe a miẹn wẹẹ, ebe nọ gha sẹtin rhia ẹre a ka wa gbẹnnẹ e Baibol yi, kevbe wẹẹ, avbe ebe nii ma sẹ ẹghẹ ne ima ye na? E Jehova keghi ru ẹre ne emwa gbẹnnẹ ẹmwẹ ni rre Baibol ladian ye ebe ọvbehe. Agharhemiẹn wẹẹ, emwa ni ma gba ẹre ọ ru iwinna na, te iran wa kakabọ gbarokotọ ru ẹre. Vbe igiemwi, vbe okpia ọkpa nọ rri egie ebe ghi guan kaẹn abọ ọghe Evbagbẹn Nọhuanrẹn Na Ya E Hibru Gbẹn, ọ na wẹẹ: “Ma gha sẹtin kha wẹẹ, vbene emwa ya gbarokotọ gbẹnnẹ ẹmwẹ ni rre Baibol ladian, ebe nẹdẹ ọvbehe i rrọọ na ru vberriọ.” Ọ kpẹẹ re na ghi gben e Baibol, ebe nọ gha sẹtin rhia ẹre a vbe gbẹnnẹ ọnrẹn yi, kevbe wẹẹ, emwa ni ma gba ẹre ọ gbẹn ọnrẹn, ọrheyerriọ, ma wa rẹn wẹẹ, emwi ne ima tie vbe Baibol vbe ẹdẹnẹrẹ keghi re Ẹmwẹ Osanobua.

4. De emwi ne ima khian ziro yan vbe ako iruẹmwi na?

⁴ Obọ e Jehova ẹre “ẹse ọhẹ hia kevbe emwi nọ maan hia” ke rre. (Jems 1:17) Ọkpa vbe ẹse nọ ghi maan sẹ ne Jehova he ru ne ima, ọre nọ na ya e Baibol ru ima ẹse. Ọmwa gha ru ẹse ne ima, ọ rhie ma wẹẹ, ọmwa nii gele rẹn ima kevbe wẹẹ, ọ rẹn emwi ne ima gualọ. Erriọ e Baibol wa vbe ye zẹẹ. Ma gha gele gbarokotọ gha tie ẹre, ọ gha ya ima rẹn emwi nibun vbekpa e Jehova. Ọ gha vbe ru iyobọ ne ima ya rẹn wẹẹ, e Jehova gele rẹn ima kevbe wẹẹ, ọ rẹn emwi ne ima gualọ. Vbe ako iruẹmwi na, ma gha guan kaẹn emwi ne Baibol ma ima re vbekpa ẹwaẹn ọghe Jehova, odẹ nọ ya bu ohiẹn kevbe ahoẹmwọmwa ọghẹe. Gia ka guan kaẹn emwi ne Baibol ma ima re vbekpa ẹwaẹn ọghe Osanobua.

E BAIBOL GI IMA RẸN WẸẸ, OSA NỌ MWẸ ẸWAẸN ẸRE JEHOVA KHIN

5. De odẹ ọkpa ne Baibol ya ya ima rẹn wẹẹ, Osa nọ mwẹ ẹwaẹn ẹre Jehova khin?

⁵ E Jehova rẹnrẹn wẹẹ, ma wa gualọ ibude ọghe irẹn. Ẹi khabe, ne ibude ni maan, nọ ke obọ ọre rre, na wa vuọn e Baibol. Te avbe ibude na wa ru iyobọ ne emwa. E Baibol keghi fi ẹdagbọn emwa werriẹ. Vbe ẹghẹ ne Mozis ya gha gbẹn avbe ebe nokaro ni rre Baibol, ọ na tama Ivbi Izrẹl wẹẹ: “Ena i re ẹmwẹ kẹkan, sokpan avbe ẹmwẹ na, ẹre ọ khian ya uwa gha mwẹ arrọọ.” (Diut 32:47) Te emwa ni lele emwi ne Baibol tae wa gha sọyẹnmwẹ, erriọ agbọn vbe ya maan iran. (Psm 1:2, 3) Agharhemiẹn wẹẹ, ọ kpẹẹ re na ghi gbẹn e Baibol, ẹmwẹ ni rrọọ wa ye fi emwa werriẹ. Vbe igiemwi, vbe jw.org, u gha miẹn uhunmwuta nọ khare wẹẹ, “E Baibol Fi Ọmwa Werriẹ.” Vbe uhunmwuta na, u gha miẹn okha ọghe emwa nibun ne Baibol he ru iyobọ na. Vbene ẹmwata, e Baibol wa ‘winna vbe ẹdagbọn emwa iyayi’ vbe ẹdẹnẹrẹ.​—1 Tẹs 2:13.

6. Vbe ima gu kha wẹẹ, ebe ọvbehe i rrọọ na gha ya sẹtin gie Baibol?

⁶ Ebe ọvbehe i rrọọ na gha ya sẹtin gie Baibol. Vbe ima gu kha vberriọ? Rhunmwuda, e Jehova ẹre ọ yan ẹmwẹ nọ rre Baibol; irẹn ọre Osa ne udazi, Osa ọghe etẹbitẹ, irẹn ẹre ọ vbe mwẹ ẹwaẹn sẹ vbe agbọn vbe ẹrinmwi. Emwa wa ye tie ebe eso, ọ gha khọnrẹn wẹẹ, ọmwa nọ gbẹn ọnrẹn wu nẹ. Vbọrhirhighayehẹ, zẹvbe ne ẹghẹ ya khian, avbe ẹmwẹ ibude ni rrọọ i khian ghi gha mwẹ esa nọ ye. Sokpan, ẹmwẹ ibude ni rre Baibol i gia rhie fua; ke ẹghẹ gha dee, ẹre ọ ke ru iyobọ ne emwa. Ma ghaa tie Baibol, ma na vbe gha muẹn roro emwi ne ima tie, e Jehova gha ya orhiọn nọhuanrẹn ọghẹe ru iyobọ ne ima, ne ima sẹtin rhie emwi ne ima tie ye uyinmwẹ. (Psm 119:27; Mal 3:16; Hib 4:12) E Jehova nọ re ọmwa nọ yan ẹmwẹ nọ rre Baibol i sẹtin wu, ọ wa mu egbe nọ ya ru iyobọ nuẹn. Ọna ma sẹ nọ gha ya ruẹ gha tie Baibol vbe ẹghẹ hia ra?

7. De vbene Baibol ya ru iyobọ ne emwa ọghe Osanobua vbe ẹghẹ nẹdẹ, ne iran mieke na gha mwẹ akugbe?

⁷ Odẹ ọvbehe ne Baibol ya ya ima rẹn wẹẹ, Osa nọ mwẹ ẹwaẹn ẹre Jehova khin, ọre vbene ẹmwẹ ni rre Baibol ya ya emwa ọghe Osanobua mwẹ akugbe. Vbe Ivbi Izrẹl ghi sẹ Otọ Na Ru Eyan Rẹn, iran keghi dia ehe ughughan ya vbe otọ nii. Eso na do suẹn iwinna ọgbehẹn, eso na gha koko ẹmila, eso na vbe gha gbe ugbo. Vbene emwi ghi ye na, Ivbi Izrẹl eso gha te sẹtin mianmian etẹn iran ni rre ehe nọ rree. Sokpan, e Jehova keghi ru emwamwa ne Ivbi Izrẹl gha si egbe koko ke ẹghẹ ya fi ẹghẹ, ne iran vbe gha danmwehọ vba ghaa tie Ẹmwẹ ọnrẹn, kevbe vba ghaa rhan otọ re ma iran. (Diut 31:10-13; Neh 8:2, 8, 18) Muẹn roro, vbene Ivbi Izrẹl ni hoẹmwẹ e Jehova khian gha ghọghọ hẹ, vbe iran gha sẹ e Jerusalẹm! Te ọyẹnmwẹ khian wa gha sẹ iran vbe iran gha bẹghe Ivbi Izrẹl ne ihua iran, ne iran gba ga e Jehova, ni ke ehe ughughan rre vbe otọ Izrẹl. Erriọ e Jehova ya ru iyobọ ne iran ya gha mwẹ akugbe. Ọ ghi zẹ kpẹẹ, a na mu iko ọghe Ivbiotu e Kristi gbọọ. Ikpia vbe ikhuo ni zẹ urhuẹvbo ughughan ẹre ọ ghaa rre avbe iko na. Eso wa fe, vbene eso na gha re ivbiogue. Ọrheyerriọ, rhunmwuda wẹẹ, aro nọ ghaan ẹre iran ya gha ghee Ẹmwẹ Osanobua, te iran hia wa gha ya akugbe ga e Jehova. Iran ni da khian Ivbiotu e Kristi rẹnrẹn wẹẹ, etẹn nikẹre ẹre ọ khian sẹtin ru iyobọ ne iran ya rẹn otọ Ẹmwẹ Osanobua, kevbe wẹẹ, ọ khẹke ne iran gha deba iran do iko.​—Iwinna 2:42; 8:30, 31.

8. De vbene Baibol ya ru iyobọ ne emwa ọghe Osanobua vbe ẹdẹnẹrẹ, ne iran mieke na gha mwẹ akugbe?

⁸ E Jehova wa ye loo e Baibol ya ma emwa rẹn emwi vbe ẹdẹnẹrẹ, ọ vbe yae ru iyobọ ne iran, ne iran mieke na gha mwẹ akugbe. Emwi hia fẹẹrẹ nọ khẹke ne ima rẹn vbekpa e Jehova wa rre uwu e Baibol. Ẹghẹ hia ẹre ima ya yo iko, asikoko nekherhe kevbe nọkhua; evba nii, ma na danmwehọ vba ghaa tie Baibol, kevbe vba gha rhan otọ ọre ma ima. E Baibol wa gele ru iyobọ ne ima ya gha ga e Jehova vbe uwu akugbe. Ọna ẹre Jehova wa gualọ zẹẹ.​—Zẹf 3:9.

9. De aro ọmwa nọ khẹke ne ima gha khin, adeghẹ ima hoo ne ima rẹn otọ ẹmwẹ ni rre Baibol? (Luk 10:21)

⁹ Gia guan kaẹn emwi ọvbehe nọ ya ima rẹn wẹẹ, e Jehova wa gele mwẹ ẹwaẹn. E Jehova loo emwa ya gbẹnnẹ ako nibun vbe Baibol vbe odẹ na miẹn wẹẹ, emwa ni mu egbe rriotọ ọkpa, ẹre ọ khian sẹtin rẹn otọ re. (Tie Luk 10:21.) Ai miẹn ehe ne emwa i na tie Baibol vbe agbọn na. Okpia ọkpa nọ rri egie ebe khare wẹẹ, “E Baibol ọre ebe na ghi tie sẹ vbe agbọn na, deba ọni, ebe ọvbehe i rrọọ ne emwa gbarokotọ tie vbe na ghee Baibol.” Ọrheyerriọ, emwa ni mu egbe rriotọ, ẹre ọ khian sẹtin rẹn otọ ẹmwẹ ni rre Baibol, iran ẹre ọ khian vbe sẹtin rhie emwi ne iran ruẹ ye uyinmwẹ.​—2 Kọr 3:15, 16.

10. De odẹ ọvbehe ne Baibol ya ya ima rẹn wẹẹ, Osa nọ mwẹ ẹwaẹn ẹre Jehova khin?

¹⁰ Odẹ ọvbehe ye rrọọ ne Baibol ya ya ima rẹn wẹẹ, Osa nọ mwẹ ẹwaẹn ẹre Jehova khin. Gberra wẹẹ, e Jehova loo Baibol ya ma ima hia emwi, ọ vbe loo ẹre ya ma dọmwadẹ ima emwi, ọ ghi vbe yae fu ima ẹko rre. Ma ghaa tie Baibol, ma keghi bẹghe ẹre wẹẹ, e Jehova wa mwẹ ẹmwẹ ima vbe orhiọn. (Aiz 30:21) U he ka tie ako rhọkpa vbe Baibol ẹdẹ, ọ na wa yevbe na miẹn wẹẹ, rhunmwuda ọlọghọmwa ne u ye ẹre a gu gbẹn ako nii ra? Te a gbẹn e Baibol nọ sẹtin gha ru iyobọ ne emwa hia. Sokpan, vbọ ghi zẹe na na miẹn wẹẹ, u gha tie ako eso vbe Baibol, ọ ghi yevbe na miẹn wẹẹ, rhunmwuda ruẹ ẹre a gu gbẹn ọnrẹn? Evbọzẹe ọre wẹẹ, ọmwa nọ ghi mwẹ ẹwaẹn sẹ vbe agbọn vbe ẹrinmwi, ẹre ọ yan ẹmwẹ nọ rre Baibol.​—2 Tim 3:16, 17.

E BAIBOL GI IMA RẸN WẸẸ, OSA NỌ BU OHIẸN ATA ẸRE JEHOVA KHIN

11. Vbe ẹghẹ na ya gha gbẹn e Baibol, de vbene Osanobua ya rhie ẹre ma hẹ wẹẹ, irẹn i gbe ewanmwẹ ghee obọ ọkpa?

¹¹ Osa nọ bu ohiẹn ata ẹre Jehova khin. (Diut 32:4) Ọmwa nọ bu ohiẹn ata i gbe ewanmwẹ ghee obọ ọkpa. Erriọ e Jehova wa ye zẹẹ. (Iwinna 10:34, 35; Rom 2:11) Urhuẹvbo na ya gbẹn e Baibol gele so igiẹ yọ wẹẹ, e Jehova i gbe ewanmwẹ ghee obọ ọkpa. Urhuẹvbo e Hibru ẹre a wa mobọ loo ya gbẹnnẹ ebe 39 na ka gbẹn vbe Baibol, rhunmwuda urhuẹvbo na, ẹre emwa ọghe Osanobua wa mobọ gha rẹn otọ ọre vbe ẹghẹ nii. Sokpan, vbe ẹghẹ e Jesu, e Grik ẹre emwa ghi mobọ gha zẹ. Rhunmwuda ọni, e Grik ẹre a mobọ loo ya gbẹn ebe 27 nikẹre vbe Baibol. E Jehova ma wa kha wẹẹ, urhuẹvbo ọkpa kẹkan ẹre a khian ya gbẹn e Baibol. Vbe ẹdẹnẹrẹ, emwa ni rrie uye (billion) erẹnrẹn ẹre ọ rre agbọn na, urhuẹvbo ughughan ẹre iran vbe zẹ. Nọnaghiyerriọ, de vbene iran khian ghi ya sẹtin do rẹn aro ọmwa ne Jehova khin?

12. De odẹ ọkpa ne ẹmwẹ nọ rre ebe Daniẹl 12:4, he ya sẹ vbe ẹdẹ okiekie?

¹² E Jehova keghi loo akhasẹ ighẹ e Daniẹl ya tae yotọ wẹẹ, vbe ẹdẹ okiekie, “irẹnmwi ẹmwata” ni rre Baibol “ghi do vẹwae,” emwa nibun ghi vbe rẹn otọ ọre. (Tie Daniẹl 12:4) Emwi ọkpa nọ he ru iyobọ ne emwa ya do gha mwẹ irẹnmwi ẹmwata na, ọre rhunmwuda na na zedu e Baibol kevbe avbe ebe ni rhan otọ e Baibol, na na print ẹre kevbe na na vbe ghae ẹre ne emwa. E Baibol ọre ebe na ghi zedu ẹre sẹ vbe agbọn na, ẹre ọ vbe re ebe nọ ghi kpọọ sẹ. E Baibol ne kọmpini eso zedu ẹre wa kakabọ ghaan. Ọ gberra urhuẹvbo 240 ne otu e Jehova he zedu e Baibol ra abọ eso vbọ ghee, ọghe ọhẹ ẹre iran vbe ya rhie ẹre ne emwa. Ọna ẹre ọ ghi zẹe ighẹ emwa nibun do rẹn vbekpa “iyẹn nọ maan ọghe Arriọba,” a te miẹn wẹẹ, agbọn na sẹ ufomwẹ. (Mat 24:14) Osa nọ bu ohiẹn ata ẹre Jehova khin, rhunmwuda ọni, ọ hoo ne emwa hia gha tie Baibol ne iran mieke na do rẹn aro ọmwa ne irẹn khin. Ahoẹmwọmwa nọ mwẹ ne ima ẹre ọ si ẹre nọ na kie ẹkpotọ na ne ima.

E BAIBOL GI IMA RẸN WẸẸ, OSA NỌ MWẸ AHOẸMWỌMWA ẸRE JEHOVA KHIN

13. Vbọzẹ ne ima na kha wẹẹ, e Baibol gi ima rẹn wẹẹ e Jehova mwẹ ahoẹmwọmwa? (Jọn 21:25)

¹³ E Baibol gi ima rẹn wẹẹ, ahoẹmwọmwa ẹre a wa mobọ rẹn e Jehova yi. (1 Jọn 4:8) Muẹn roro, emwi eso ne Jehova tama ima vbe Baibol kevbe emwi nọ ma tama ima. Emwi nọ gha ya ima sikẹ Osanobua sayọ, nọ gha ya ima gha sọyẹnmwẹ kevbe nọ gha ya ima gha rrọọ vbe etẹbitẹ ẹre Jehova tama ima. Vbọrhirhighayehẹ, rhunmwuda wẹẹ e Jehova hoẹmwẹ ima, ọ ma tama ima emwi nibun nọ rẹn wẹẹ, ima i khian sẹtin rẹn otọ ọre.​—Tie Jọn 21:25.

14. De odẹ ọvbehe ne Baibol ya ya ima rẹn wẹẹ, Osanobua hoẹmwẹ ima?

¹⁴ Odẹ na ya gbẹn e Baibol rhie ẹre ma wẹẹ, te Jehova wa mu uyi ye ima egbe kevbe wẹẹ, ọ hoẹmwẹ ima. E Jehova ma wa gbe uhi ne ima vbe nọ dekaẹn emwi ne ima khian gha ru kevbe ne ima i khian ru vbe ẹdagbọn ima. Nọghayayerriọ, ọ keghi ya okha ọghe emwa, avbe ẹmwẹ akhasẹ kevbe ibude ni rre Baibol ru iyobọ ne ima, ne ima mieke na gha ru emwi nọ khẹke. Ena hia ẹre ọ zẹe ne ima na hoẹmwẹ e Jehova, ne ima na vbe ya ekhọe hia họn ẹmwẹ nẹẹn.

15. (a) De vbene Baibol ya ya ima rẹn wẹẹ, e Jehova mwẹ ẹmwẹ ima vbe orhiọn? (b) Zẹvbe nọ rre efoto nọ rre ipapa 6, de okha ọghe ọmwa ne ọmokhuo na, ọtẹn nokpia na, kevbe ọtẹn nokhuo na nọ khian enọwanrẹn nẹ, mu roro? (Gẹn 39:1, 10-12; 2 Ọba 5:1-3; Luk 2:25-38)

¹⁵ E Baibol gi ima rẹn wẹẹ, e Jehova mwẹ ẹmwẹ ima vbe orhiọn. Odẹ vbo? Okha ọghe emwa ni miẹn egbe ọlọghọmwa ne ima miẹn vbe ẹdẹnẹrẹ, ẹre ọ wa vuọn e Baibol. Ma wa rẹn vbene emwi ghaa ye iran hẹ, rhunmwuda, ‘emwa vbene ima ye’ ẹre iran vbe khin. (Jems 5:17) Yevbesọni, adeghẹ ima na gha muẹn roro obọ ne Jehova ya mu emwa vbenian, ọ ghi gele ya ima rẹn wẹẹ, “e Jehova vuọn ne itohan kevbe ẹnina.”​—Jems 5:11.

16. Ma ghaa tie okha ọghe emwa ni ru abakuru vbe Baibol, vbọ ma ima re vbekpa e Jehova? (Aizaia 55:7)

¹⁶ Ọ ye mwẹ odẹ ọvbehe ne Baibol ya ya ima rẹn wẹẹ, e Jehova hoẹmwẹ ima. E Baibol gi ima rẹn wẹẹ, Osanobua i khian fi iyeke gbe ima, vbe ima gha ru abakuru. Ẹi re avbiẹ inugba ẹre Ivbi Izrẹl ru khọọ ghee Jehova, ọrheyerriọ, te Jehova wa ye gha yabọ iran, vbe ọ gha bẹghe ẹre wẹẹ, iran gele fi werriẹ nẹ. (Tie Aizaia 55:7.) Ivbiotu e Kristi ni ghaa rrọọ vbe ẹghẹ ọghe avbe ukọ wa vbe rẹn wẹẹ, e Jehova hoẹmwẹ iran. E Jehova keghi loo orhiọn nọhuanrẹn ya dia e Pọl, nọ tama etẹn ni ghaa rrọọ vbe ẹghẹ nii wẹẹ, ọmwa ghaa ru orukhọ nọ wegbe, sokpan ọ na fi werriẹ, ọ khẹke ne iran ‘yabọe, iran ghi vbe fu ẹre ẹko rre.’ (2 Kọr 2:6, 7; 1 Kọr 5:1-5) Ọ wa fu ima ẹko rre, ne ima na rẹn wẹẹ, e Jehova i fi iyeke gbe emwa rẹn rhunmwuda wẹẹ, iran ru orukhọ! Nọghayayerriọ, rhunmwuda ahoẹmwọmwa nọ mwẹ, ọ ghi ru iyobọ nọ khẹke ne iran, ọ ghi dia iran ye odẹ, ọ ghi vbe dọlegbe si iran kẹ egbe. Ọ yan rẹn wẹẹ, obọ vbenian, ẹre irẹn khian vbe ya mu ọmwa orukhọ nọ roro iro fi uyinmwẹ werriẹ vbe ẹdẹnẹrẹ.​—Jems 4:8-10.

GHA YA ARO NỌ GHAAN GHEE BAIBOL NE JEHOVA YA RU IMA ẸSE

17. Vbọzẹ ne Baibol na kakabọ ru ekpataki?

¹⁷ E Baibol keghi re ẹse ọhẹ nai sẹtin ya igho dẹ. Vbọzẹ ne Baibol na kakabọ ru ekpataki? Zẹvbe ne ima he ruẹ ọre sin, e Baibol gi ima rẹn wẹẹ, Osa nọ mwẹ ẹwaẹn, nọ bu ohiẹn ata kevbe nọ mwẹ ahoẹmwọmwa ẹre Jehova khin. Ọ vbe ya ima rẹn wẹẹ, e Jehova hoo ne ima do rẹn irẹn, kevbe ne ima gha re ọse irẹn.

18. Vbe ima khian ya rhie ẹre ma wẹẹ, ma gbọyẹmwẹ ye Baibol ne Osa ya ru ima ẹse?

¹⁸ Ọ ma khẹke ne ima ya aro tila e Baibol rua, rhunmwuda, “ẹse ọhẹ” nọ ke obọ Osanobua rre ẹre nọ. (Jems 1:17) Nọnaghiyerriọ, wa gi ima gha hia vbe odẹ ke odẹ ne ima gha rhie ẹre ma wẹẹ, ma gbọyẹmwẹ ye Baibol ne Osa ya ru ima ẹse. Odẹ ne ima khian ya ru ọna, ọre deghẹ ima na gha tie Baibol, ma na vbe gha mu emwi ne ima tie roro. Ma rẹnrẹn wẹẹ, e Jehova nọ re Osa nọ yan ẹmwẹ nọ rre Baibol gha fiangbe ima. Deba ọni, ma ghi do gha mwẹ “irẹnmwi ọghe Osanobua.”​—Itan 2:5.