Vbene Jehova Ya Họn Erhunmwu Ima Hẹ

1-2. De emwi ne ima gha sẹtin gha mu roro vbe nọ dekaẹn erhunmwu ọghe ima?

U HE ka roro ẹre ẹdẹ deghẹ e Jehova gele họn erhunmwu ruẹ ra? Adeghẹ erriọ nọ, ẹi re uwẹ ọkpa, etẹn nibun ta ẹmwẹ vbenian nẹ, katekate vbe iran rre uwu ọlọghọmwa nọ wegbe. Deghẹ emwi na gha ba su ima, ọ sẹtin vbe gha lọghọ ne ima rẹn deghẹ e Jehova gele họn erhunmwu ima.

² Gi ima guan kaẹn evbọzẹe nọ na khẹke ne ima gha mwẹ ilẹkẹtin wẹẹ, e Jehova gele họn erhunmwu ọghe emwa ni gae. (1 Jọn 5:15) Ma gha vbe ziro yan avbe inọta na: Vbọzẹ na na miẹn wẹẹ, ugbẹnso ma sẹtin gha roro ẹre wẹẹ e Jehova i họn erhunmwu ima? De odẹ eso ne Jehova ya họn erhunmwu ima vbe ẹdẹnẹrẹ?

E JEHOVA SẸTIN HỌN ERHUNMWU IMA VBE ODẸ NE IMA MA YA ARO YI

3. Vbọzẹ ne Jehova na wẹẹ ne ima gha na erhunmwu gie irẹn?

³ E Baibol gi ima rẹn wẹẹ, e Jehova hoẹmwẹ ima ẹsẹsẹmwẹse kevbe wẹẹ, ẹi ya ẹmwẹ ima ku. (Hag 2:7; 1 Jọn 4:10) Ọni ẹre ọ si ẹre nọ na wẹẹ, ne ima gha na erhunmwu, ne irẹn ru iyobọ ne ima. (1 Pit 5:6, 7) Ọ hoo nọ ru iyobọ ne ima, ne ima mieke na sẹtin sikẹ irẹn kevbe ne ima vbe sẹtin zin egbe ọlọghọmwa ne ima ye.

4. De vbene ima ya rẹn hẹ wẹẹ, e Jehova họn erhunmwu emwa ni gae? (Ghee efoto nọ rre ipapa 9.)

⁴ Ma gha wa miẹn okha nibun ọghe emwa ne Jehova họn erhunmwu iran vbe uwu e Baibol. U ye erhọkpa rre ra? E Devid vbo? E Devid wa miẹn ọlọghọmwa nibun vbe obọ eghian vbe ẹdagbọn ọnrẹn, ẹghẹ hia ẹre ọ ya gha na erhunmwu ne Jehova ru iyobọ ne irẹn. Vbe asẹ ọkpa, ọ keghi rinmwian e Jehova wẹẹ: “Eo Jehova, họn erhunmwu mwẹ! Họn erinmwian mwẹ, rhunmwuda ẹmwata ruẹ!” (Psm 143:1) E Jehova wa họn erhunmwu e Devid, ọ na miẹn ọnrẹn fan. (1 Sam 19:10, 18-20; 2 Sam 5:17-25) Ẹi khabe ne Devid na sẹtin kha wẹẹ: “E Jehova sikẹ iran ni kpee tie ẹre.” Ma tobọ ima gha vbe sẹtin gha mwẹ ilẹkẹtin vbenian.​—Psm 145:18.

5. Ẹghẹ hia ẹre Jehova wa ya gha họn erhunmwu eguọmwadia ẹre vbe odẹ ne iran ya aro yi ra? Ru igiemwi yọ. (Ghee efoto nọ rre ipapa 9.)

⁵ E Jehova sẹtin họn erhunmwu ima vbe odẹ ne ima ma te ya aro yi. Ọna ọre emwi nọ wa sunu daa ukọ e Pọl zẹẹ. Ọ keghi rinmwian e Jehova nọ rhie “igban” nọ rre irẹn egbe hin. Igbaha ẹre Pọl na erhunmwu gie Jehova, nọ sọfurre ye ọlọghọmwa nọ wegbe na. E Jehova họn erhunmwu ẹnrẹn ra? Ẹn, sokpan ẹi re vbene Pọl te ya aro yi. Ne Jehova gha te ya sọfurre ye ọlọghọmwa nii, ọ na rhie ẹtin ne Pọl, nọ mieke na sẹtin ye gha ya ẹkoata ga irẹn.​—2 Kọr 12:7-10.

6. Ugbẹnso, vbọzẹ ne ima na roro ẹre wẹẹ, e Jehova i họn erhunmwu ima?

⁶ E Jehova sẹtin vbe họn erhunmwu ima vbe odẹ ne ima ma te ya aro yi. Ọ khẹke ne ima gha mwẹ ilẹkẹtin wẹẹ, e Jehova ẹre ọ rẹn odẹ nọ maan sẹ nọ gha ya sẹtin ru iyobọ ne ima. Ọ sẹtin kue “ru gberra vbene ima nọ rẹn, ra vbe na mu roro vbe ekhọe.” (Ẹfis 3:20) Nọnaghiyerriọ, e Jehova sẹtin họn erhunmwu ima vbe ẹghẹ ra odẹ ne ima ma te ya aro yi.

7. Ugbẹnso, vbọzẹ nọ na khẹke ne ima fi ẹre werriẹ emwi ne ima na erhunmwu yi? Ru igiemwi yọ.

⁷ Ugbẹnso, ma sẹtin fi ẹre werriẹ, emwi ne ima nọ vbe obọ e Jehova, vbe ima gha ghi rẹn emwi ne Jehova gualọ nẹ. Gia guan kaẹn igiemwi ọghe ọtẹn nokpia ọkpa na tie ẹre Martin Poetzinger. Vbọ ma he kpẹẹ gbe ne ọtẹn na ru orọnmwẹ, a keghi muẹn ye eghan, vbe agọ irrioya ọghe Nazi. Vbe okaro, ọ na ka gha rinmwian e Jehova nọ gi irẹn ladian vbe agọ nii, ne irẹn mieke na ya gbaroghe ọvbokhan irẹn kevbe ne irẹn dọlegbe suẹn iwinna ikporhu. Vbọrhirhighayehẹ, uzọla eva ghi gberra nẹ, ọ keghi bẹghe ẹre wẹẹ, ọ khọ wẹẹ e Jehova i khian fan irẹn vbe eghan nii. Ẹre ọ na ghi suẹn gha na erhunmwu wẹẹ: “E Jehova lahọ, gu mwẹ rẹn emwi ne u hoo ne I ru.” Ẹre ọ na suẹn gha muẹn roro emwi ne avbe etẹn ni rre agọ nii la gberra. Orhiọn iran nibun ma sotọ, rhunmwuda ne iran na gha mu ẹmwẹ ọvbokhan iran kevbe ivbi iran roro. Ẹre Ọtẹn Nokpia Poetzinger na ghi na erhunmwu gie Jehova wẹẹ: “E Jehova, u ru ẹse vbe iwinna ọgbọn ne u mu mẹ na. Ru iyobọ mẹ ne I sẹtin rhie igiọdu ne etẹn mwẹ.” Ọna ọre iwinna nọ wa gha ru vbe ukpo ihinrin nọ ghi lelẹe!

8. De emwi kpataki nọ khẹke ne ima kọ ye orhiọn vbe ima ghaa na erhunmwu?

⁸ Ọ khẹke ne ima yerre wẹẹ, e Jehova mwẹ emwi nọ hoo nọ ru kevbe wẹẹ, ọ gha ru ẹre vbe ẹghẹ nọ mwamwa yọ gha sẹ. Usun emwi nọ hoo nọ ru, ọre nọ wabọ ọlọghọmwa hia nọ ya ima rri oya vbe ẹdẹnẹrẹ, vbe na ghee odekun ẹrhia, emianmwẹ, kevbe uwu. Arriọba ọghẹe ẹre Jehova khian ya ru ena hia. (Dan 2:44; Arhie 21:3, 4) Vbọrhirhighayehẹ, ọ ghi te sẹ ẹghẹ nii, e Jehova ye kie ẹkpotọ yọ ne Esu ye gha kha yan agbọn na.b (Jọn 12:31; Arhie 12:9) Adeghẹ e Jehova na sọfurre ye ọlọghọmwa ne emwa nagbọn werriẹ aro daa, ọ ghi do yevbe na miẹn wẹẹ, odẹ ne Esu ya kha yan agbọn na wa maan. Agharhemiẹn wẹẹ, te ima gha zin egbe vbene Jehova te ru emwi eso nọ wẹẹ irẹn gha ru, ọ ma rhie ma wẹẹ e Jehova i zẹdẹ gbaroghe ima hiehie. Gi ima guan kaẹn odẹ eso ne Jehova ya ru iyobọ ne ima.

ODẸ ESO NE JEHOVA YA HỌN ERHUNMWU IMA VBE ẸDẸNẸRẸ

9. De vbene Jehova gha ya sẹtin ru iyobọ ne ima hẹ vbe ima gha khian ru azẹ? Ru igiemwi yọ.

⁹ Ọ rhie ẹwaẹn ne ima. E Jehova yan rẹn wẹẹ, irẹn gha rhie ẹwaẹn ne ima, ne ima mieke na sẹtin rẹn emwi nọ khẹke ya ru. Ma wa gualọ ẹwaẹn nọ ke obọ e Jehova rre, katekate vbe ima gha khian ru azẹ nọ dekaẹn ẹdagbọn ima. Vbe igiemwi, vbe ima gha khian zẹ ne egbe ima deghẹ okhiọnkpa ma khian gha khin ra deghẹ ima gha ru orọnmwẹ. (Jems 1:5) Gia guan kaẹn ọtẹn nokhuo ọkpa na tie ẹre Maria nọ re okhiọnkpa.c Te ọtẹn nokhuo na wa gha sọyẹnmwẹ iwinna arọndẹ nọ ghaa ru, vbe ọ miẹn ọtẹn nokpia ọkpa. Ọtẹn na khare wẹẹ: “Zẹvbe ne iku ọghe ima ghi ya gha tọn, erriọ ima ya gha hoẹmwẹ egbe sayọ. I rẹnrẹn wẹẹ, te ọ khẹke ne I ru azẹ nọ khẹke, rhunmwuda ọni, I keghi mu erhunmwu kọe. I rẹnrẹn wẹẹ, I gualọ iyobọ e Jehova, sokpan I vbe rẹn wẹẹ, ẹi re Jehova ẹre ọ khian zẹ yọ mwẹ obọ.” Ọtẹn na keghi bẹghe ẹre wẹẹ, e Jehova gele rhie ẹwaẹn ne irẹn. Odẹ vbo? Zẹvbe nọ ya gha tie avbe ebe ọghomwa, ọ keghi do miẹn uhunmwuta eso ni rhie ewanniẹn ye inọta eso ni ghaa kpokpo ẹre vbe orhiọn. Ọ keghi vbe rhie ibude ne iyẹe rhie nẹẹn, Osẹe Jehova ẹre iyẹe khin. Ibude nii wa ru iyobọ ne Maria ya rẹn deghẹ irẹn gele hoẹmwẹ ọtẹn nii. Vbe okiekie, ọtẹn nokhuo na keghi rẹn emwi nọ khẹke ya ru.

10. Zẹvbe nọ rre ebe Filipai 4:13, de emwi ne Jehova gha ru ya ru iyobọ ne eguọmwadia ẹre? Ru igiemwi yọ. (Ghee efoto nọ rre ipapa 10.)

¹⁰ Ọ rhie ẹtin ne ima ya sẹtin zin egbe. Zẹvbe ne Jehova ru iyobọ ne Pọl, ọ gha vbe rhie ẹtin ne ima ya sẹtin zin egbe ọlọghọmwa ne ima ye. (Tie Filipai 4:13.) Gia guan kaẹn vbene Jehova ya ru iyobọ ne ọtẹn nokpia na tie ẹre Benjamin, nọ ya sẹtin zin egbe ọlọghọmwa nọ ghaa ye. Agọ ughughan na na gbaroghe emwa ni lẹẹ hin ẹvbo iran rre vbe Africa ẹre Benjamin vbe ẹgbẹe ọre ghaa dia. Iyobọ ẹghẹ igbama ẹre hia ẹre iran ya dia avbe agọ na ya. E Benjamin khare wẹẹ: “I na na erhunmwu gie Jehova nọ ru iyobọ mẹ ne I sẹtin gha ru emwi nọ yẹẹ ọre. E Jehova wa họn erhunmwu mwẹ, ọ na mu mwẹ orhiọn sotọ, ọ na vbe rhie udinmwẹ mẹ ne I sẹtin gha kporhu, ọ vbe ya avbe ebe ọghomwa ru iyobọ mẹ ya gha mwẹ amuẹtinyan nọ wegbe.” Ọtẹn na vbe kha wẹẹ: “Okha ọghe avbe etẹn ne I ghaa tie wa ru iyobọ mẹ, I keghi do rẹn vbene Jehova ya ru iyobọ ne iran ya sẹtin zin egbe edanmwẹ ne iran ye. Ọna wa rhie igiọdu mẹ, ya sẹtin mudia ẹse.”

11-12. De vbene Jehova ya loo etẹn ne ima gba ga ya họn erhunmwu ne ima na? (Ghee efoto nọ rre ipapa 11.)

¹¹ Ọ loo etẹn ne ima gba ga. Vbe asọn nọ gbe fi ẹdẹ ne Jesu wu, ọ keghi ya ekhọe hia na erhunmwu gie Jehova. Ọ na rinmwian e Jehova nẹ ghẹ gi emwa ọvbehe gha ghee irẹn zẹvbe ọmwa nọ fi unu gie Osanobua. Ne Jehova gha te ya ru emwi ne Jesu nọ rẹn, ọ na gie odibo ọkpa nọ do rhie igiọdu nẹẹn. (Luk 22:42, 43) E Jehova sẹtin vbe loo etẹn nikpia ra etẹn ima nikhuo ya rhie igiọdu ne ima, iran sẹtin tie ima vbe efoni, iran sẹtin vbe mu otuẹ gie ima vbe owa. Ma hia gha sẹtin hia vbe odẹ ke odẹ ne ima gha ya “ẹmwẹ itohan” rhie igiọdu ne etẹn ima.​—Itan 12:25.

¹² Gia ziro yan igiemwi ọghe ọtẹn nokhuo ọkpa na tie ẹre Miriam. Vbọ ghi rre uzọla eso ne ọdafẹn ọnrẹn wu, e Miriam ọkpa ẹre ọ ghi gha rre owa, iro na wa han rẹn. Ọ keghi viẹ egbe rua, ọ na gha gualọ ọmwa nọ khian fu ẹre ẹko rre. Ọ keghi kha wẹẹ: “Orhiọn ma zẹdẹ gha rrọọ mwẹ iwu ne I khian ya tie ọmwa rhọkpa, ẹre I na ghi na erhunmwu gie Jehova. Zẹvbe ne I ya gha viẹ vbe I na erhunmwu nii, efoni mwẹ na wa tu. Ọdiọn ọkpa ne I gu obọ ọre, ẹre ọ tie mwẹ.” Ọdiọn na vbe ọvbokhan rẹn keghi rhie ifuẹko ne ọtẹn nokhuo Miriam. Ọtẹn nokhuo na wa yayi wẹẹ, e Jehova ẹre ọ rhie ẹre ye ọtẹn nokpia na ekhọe nọ tie irẹn.

13. De vbene Jehova gha ya sẹtin ya emwa nẹi gae họn erhunmwu ima? Ru igiemwi yọ.

¹³ Ọ sẹtin vbe loo emwa nẹi gae. (Itan 21:1) Ugbẹnso, e Jehova wa vbe loo emwa nẹi gae ya họn erhunmwu emwa rẹn. Vbe igiemwi, e Jehova ẹre ọ loo Ọba Atakzaziz ya kpasẹ yọ ne Nehimaia werriegbe ya bọ ogba ekẹn ọghe Jerusalẹm. (Neh 2:3-6) Vbe ẹdẹnẹrẹ, e Jehova wa vbe loo emwa nẹi gae ya ru iyobọ ne ima, vbe ima ghaa gualọ iyobọ.

14. Vbua miẹn ruẹ vbe okha ọghe Soo Hing? (Ghee efoto nọ rre ipapa 12.)

¹⁴ Ọtẹn nokhuo ọkpa na tie ẹre Soo Hing yayi wẹẹ, e Jehova ẹre ọ loo ọbo ebo ọkpa ya ru iyobọ ne irẹn. Ovbi ẹre nokpia kegha mwẹ emianmwẹ ẹrherhe nibun. Ovbi ẹre na keghi miẹn odekun, obọ wa dae ẹi re nekherhe. Rhunmwuda ọni, okhuo na vbe arowa ẹre na ghi dobọ iwinna ne iran ru yi, ne iran mieke na sẹtin gbaroghe ovbi iran. Rhunmwuda ọni, iran ma ghi gha miẹn igho loo sẹ omwa. E Soo Hing khare wẹẹ, ọ na yevbe na miẹn wẹẹ, ọlọghọmwa ne irẹn ye nii sẹ irẹn gbe, irẹn i khian ghi sẹtin zin egbe ẹre. Ọ keghi fannọ otọ ẹko ẹre ma e Jehova, ọ na rinmwiaẹn wẹẹ nọ ru iyobọ ne irẹn. Ọbo ebo nọ gbaroghe ovbi ẹre keghi gualọ odẹ nọ khian ya ru iyobọ ne iran. Rhunmwuda ọni, arriọba keghi ru iyobọ ne iran, a na vbe gualọ eke nọ maan, ne iran khian gha dia. E Soo Hing keghi kha wẹẹ: “Ma wa bẹghe obọ e Jehova vbe ena hia. ‘Osa nọ họn erhunmwu’ ẹre Jehova gele wa khin.”​—Psm 65:2.

AMUẸTINYAN ẸRE Ọ YA ỌMWA RẸN VBE JEHOVA GHA HỌN ERHUNMWU ẸNRẸN, Ọ GHI VBE SẸ ỌRE ỌKẸN

15. Vbọ ya ọtẹn nokhuo ọkpa rẹn wẹẹ, e Jehova họn erhunmwu ẹnrẹn?

¹⁵ E Jehova i mobọ họn erhunmwu ima vbe odẹ ọghe ọyunnuan. Sokpan odẹ ne Jehova rhirhi ya họn erhunmwu ima, ẹre ọ wa re emwi ne ima gualọ zẹẹ, nọ gha ru iyobọ ne ima ya gha mwẹ ẹkoata daa ẹre. Rhie aro sotọ ne u mieke na rẹn vbene Jehova ya họn erhunmwu ruẹ hẹ. Ọtẹn nokhuo ọkpa na tie ẹre Yoko kegha roro ẹre wẹẹ, e Jehova i họn erhunmwu irẹn, sokpan ọ na suẹn gha gbẹnnẹ ọnrẹn yotọ emwi ughughan nọ wẹẹ ne Jehova ru ne irẹn. Vbe ẹghẹ eso ghi gberra nẹ, ọ na werriegbe ya ghee ebe nọ gbẹnnẹ ọnrẹn yi, ọ na do bẹghe ẹre wẹẹ e Jehova ru enibun nẹ vbọ, uhiẹn ya sẹ egbe eso ne irẹn tobọ irẹn kue mianmian nẹ. Ke ẹghẹ ya fi ẹghẹ, ọ khẹke ne ima gha muẹn roro, vbene Jehova ya họn erhunmwu ima hẹ.​—Psm 66:19, 20.

16. Ọ gha de ọghe erhunmwu na na, vbe ima khian ya rhie ẹre ma wẹẹ, ma mwẹ amuẹtinyan? (Hibru 11:6)

¹⁶ Ẹmwata nọ wẹẹ, ọmwa nọ mwẹ amuẹtinyan ẹre ọ na erhunmwu gie Jehova, sokpan te ima vbe rhie ẹre ma wẹẹ, ma mwẹ amuẹtinyan vbe ima gha miẹn ọnrẹn yi odẹ ne Jehova rhirhi ya họn erhunmwu ima. (Tie Hibru 11:6.) Gi ima guan kaẹn ọtẹn nokpia ọkpa na tie ẹre Mike kevbe ọvbokhan rẹn na tie ẹre Chrissy. Iran wa gha hoo ne iran ya ga vbe Bẹtẹl. E Mike khare wẹẹ, “ukpo nibun ẹre ima wa ya gha fill e form ọghe Bẹtẹl, ma na vbe muẹn ye erhunmwu wẹẹ, ne iran tie ima, sokpan, a ma tie ima.” E Mike vbe ọvbokhan rẹn ighẹ Chrissy wa gha mwẹ ilẹkẹtin wẹẹ, e Jehova ẹre ọ rẹn odẹ nọ maan sẹ nọ khian ya loo iran vbe ugamwẹ ọghẹe. Iran na ye gha ru vbene ẹtin iran sẹ vbe ugamwẹ e Jehova, iran kegha ga zẹvbe arọndẹ ọghe ẹghẹ hia vbe eke na na gualọ iyobọ etẹn, iran na vbe gha mwẹ obọ vbe iwinna owa ugamwẹ na bọlọ. Vbe na guan na, ọgbaroghe ọghe otako ẹre iran ghi khin. E Mike khare wẹẹ, “Vbe ẹghẹ nibun, e Jehova ma họn erhunmwu ima vbe odẹ ne ima te ya aro yi, sokpan ọ họn erhunmwu ima nẹ vbe odẹ nọ maan sẹ vbene ima te ya aro yi.”

17-18. Zẹvbe nọ rre ebe Psalm 86:6, 7, de ilẹkẹtin ne ima mwẹ?

¹⁷ Tie Psalm 86:6, 7. Ọsian ighẹ e Devid wa yayi wẹẹ e Jehova họn erhunmwu irẹn. U gha vbe sẹtin gha mwẹ ilẹkẹtin vbenian. Igiemwi ughughan ne ima ziro yan vbe ako iruẹmwi na, ya ima mwẹ ilẹkẹtin wẹẹ, e Jehova gha rhie ẹwaẹn kevbe ẹrhiọn ne ima ya sẹtin zin egbe ọlọghọmwa ne ima ye. Ọ sẹtin loo etẹn ne ima gba ga ra emwa nẹi gae ya ru iyobọ ne ima.

¹⁸ A sẹtin miẹn wẹẹ, e Jehova i khian họn erhunmwu ima vbe odẹ ne ima te ya aro yi, sokpan ma rẹnrẹn wẹẹ, ọ gha họn erhunmwu ima. Ọ gha kpemehe emwi ne ima gualọ vbe ẹghẹ ne ima wa ya gualọe zẹẹ. Rhunmwuda ọni, gha mwẹ amuẹtinyan, ne u ye gha na erhunmwu, u ghi gha mwẹ ilẹkẹtin wẹẹ, e Jehova gha gbaroghe ruẹ vbe ẹghẹ na kevbe wẹẹ, ọ gha “gie ẹko vuọn emwi hia nọ yi” vbe agbọn ọgbọn.​—Psm 145:16.