Okha Ọghe Emwi Nọ Gele Sunu

Gha Mwẹ Ẹnina Daa Emwa Hia

Vbe ẹdẹ ọkpa, ọtẹn nokhuo ọkpa vbe New Zealand keghi ghee vidio ọkpa nọ khare wẹẹ, “Have . . . Concern for One Another,” e vidio na guan kaẹn vbene Jehova ya mwẹ ẹnina daa emwa kevbe vbene ọ ya rhie ẹre ma hẹ. (Aiz 63:​7-9) Ọtẹn nokhuo na, na ghi wẹẹ, te irẹn khian wa rhie emwi ne irẹn ruẹ ẹre na ye uyinmwẹ. Vbe ọtẹn na ghi ya dẹ emwi evbare vbe ẹdẹrriọ, ọ na miẹn okhuo ọkpa nẹi mwẹ owa, ẹre ọ na nọ okhuo na, deghẹ irẹn gha sẹtin dẹ evbare nẹẹn. Okhuo nii na kue yọ. Ọtẹn na ghi ya dẹ evbare nii rre nẹ, ọ na rhie ẹghẹ kherhe ya kporhu ma okhuo na, ebe asobọrrie nọ khare wẹẹ, Usẹ Gha Fo Ẹdẹ Ra? ẹre ọ loo ro.

Okhuo nii na ghi gbe akhe eve rua. Ọ na tama ọtẹn nokhuo na wẹẹ, odẹ ẹmwata na ẹre a biẹ irẹn yi, sokpan ọ kpẹẹ re ne irẹn ghi ya kpa hin odẹ ẹmwata na rre. Sokpan vbọ ma he kpẹẹ gbe na, te irẹn wa gha na erhunmwu gie Jehova, nọ ru iyobọ ne irẹn ya werriegbe bu ẹre gha dee. Ọtẹn nokhuo na, na ghi mu e Baibol ne okhuo na, ọ na vbe ru emwamwa nọ ya suẹn gha ruẹ e Baibol.a

Vbe na ghee Jehova, ọ khẹke ne ima gha mwẹ ẹnina daa emwa ọvbehe, uhiẹn ya sẹ egbe emwa ima vbe uwu ẹgbẹe, kevbe etẹn ni rre uwu iko. Ma gha sẹtin vbe rhie ẹre ma wẹẹ, ima mwẹ ẹnina deghẹ ima na gha gualọ odẹ ke odẹ ne ima khian ya kporhu ma emwa ọvbehe.