Gi E Baibol Gha Re Ughegbe Ruẹ

Ọrhuanegbe Jesu na tiẹre Jems keghi ya e Baibol gie ughegbe nọ ru iyobọ ne ọmwa ya bẹghe aro ọmwa nọ gele khin. (Jems 1:​22-25) Vbe ima khian ya sẹtin gele loo e Baibol vbe na ghee ughegbe hẹ?

Fẹko gha tie ẹre. Adeghẹ ima na wa ya okhirhikhirhi ghee egbe ima vbe ughegbe, a sẹtin miẹn wẹẹ, emwi te rrọọ nọ khẹke ne ima dọlọ yi ne ima i khian bẹghe. Ne ima mieke na rẹn aro ọmwa ne ima gele khin, te ọ khẹke ne ima gbarokotọ gha tie Ẹmwẹ Osanobua.

Ghẹ gha ghee abakuru ọghe emwa ọvbehe, sokpan u ghi rhie aro tua ako nọ khẹke ne u winna yan. Ọ mwẹ vbene u gha ya da ughegbe yi hẹ, u ghi gha bẹghe emwi nọ ma deyọ vbe egbe ọmwa ọvbehe. Erriọ ẹre ọ vbe ye, ma sẹtin gha tie Baibol, sokpan ma ghi gha bẹghe ako nọ khẹke ne emwa ọvbehe winna yan. Ọna i zẹdẹ mwẹ iyobọ nọ ye ne ima.

Gha roro emwi ẹse. Adeghẹ ima na gha loo ughegbe, sokpan emwi nọ ma deyọ ẹre ima wa bẹghe vbe ẹghẹ hia, ọ sẹtin ya egbe wọọ ima. Ma ghaa tie Baibol, ma na bẹghe avbe ako nọ khẹke ne ima winna yan, ọ ma khẹke ne ima ru gberra vbene ẹtin ima sẹ, rhunmwuda e Jehova rẹn vbene ẹtin ima sẹ.​—Jems 3:17.