Gha Mwẹ Ilẹkẹtin We Jehova Yabọ Ruẹ Nẹ

1-2. De vbe nọ ye emwa orukhọ hẹ vbe Jehova gha yabọ iran? (Vbe ya ghee efoto .)

ỌBA ighẹ e Devid wa rẹn vbene ọ ye hẹ vbe ekhọe ọmwa ghaa bu abe gbe ọmwa rhunmwuda orukhọ nọ ru vbe ẹghẹ nọ gberra. (Psm 40:12; 51:3; ifiẹmwẹ na gbẹnnẹ ye omuhẹn ọghe Psm 51) Ọ ru orukhọ nọ wegbe ni bun vbe ẹdagbọn ọnrẹn. Ọrheyerriọ, ọ ghi roro iro fi uyinmwẹ werriẹ, e Jehova na yabọe. (2 Sam 12:13) Rhunmwuda ọni, ma gha sẹtin kha wẹẹ, e Devid wa vbe rẹn vbene orhiọn ọmwa sẹ otọ hẹ vbe Jehova gha yabọe nẹ.​—Psm 32:1.

² Vbe na ghee Devid, orhiọn ima gha vbe sẹ otọ vbe Jehova gha yabọ ima nẹ. Te ọ wa fu ima ẹko rre ne ima na rẹn wẹẹ, e Jehova mu egbe nọ ya ya orukhọ ọghe ima bọ ima, uhiẹn ya sẹ egbe orukhọ ni wegbe, deghẹ ima na roro iro fi uyinmwẹ werriẹ, ma na miẹn orukhọ ọghe ima kue, ma na vbe hia vbe odẹ ke odẹ ne ima ghẹ dọlegbe ru orukhọ nii! (Itan 28:13; Iwinna 26:20; 1 Jọn 1:9) Te ọ wa vbe rhie igiọdu ne ima ne ima na rẹn wẹẹ, e Jehova gha yabọ ima nẹ, ọni ọre ọ yabọ ima nẹ, ọ ghi yevbe na miẹn wẹẹ, ma ma te zẹdẹ ru orukhọ!​—Ẹzik 33:16.

3-4. De iziro ne ọtẹn nokhuo ọkpa ghaa mwẹ vbe ọ ghi dinmwiamẹ nẹ, kevbe wẹẹ, vbe ima khian zẹ iro yan vbe ako iruẹmwi na?

³ Vbọrhirhighayehẹ, ugbẹnso, ọ keghi lọghọ emwa eso ne iran sẹtin yayi wẹẹ, e Jehova yabọ iran nẹ. Gi ima guan kaẹn Ọtẹn Nokhuo Jennifer, na koko vbe odẹ ẹmwata na. Vbe ọ ye rre ehọnrre, ọ kegha lẹre ru orukhọ, ọ na vbe gha muẹn lẹre ne evbibiẹ ọre. Ukpo eso ghi gberra nẹ, ọ na werriegbe bu e Jehova gha dee, ọ na ghi dinmwiamẹ. Ọ khare wẹẹ: “Emwi ewe ẹre I te wa gha khu khian vbe ẹdagbọn mwẹ, I na gha yin uyinmwẹ alama oghẹ, I na gha da ayọn gbe egbe, erriọ ẹre ohu ohu vbe ya gha mu mwẹ. I rẹnrẹn wẹẹ, vbe I rinmwian e Jehova nọ ya orukhọ mwẹ bọ mwẹ, izọese adẹwerriegbe ọghe Jesu kpe orukhọ mwẹ kua nẹ. Sokpan, ọ kegha lọghọ mwẹ ne I yayi wẹẹ, e Jehova gele yabọ mwẹ nẹ.”

⁴ Ọ lọghọ ruẹ ugbẹnso ne u sẹtin gele yayi wẹẹ, e Jehova yabọ ruẹ nẹ ra? Vbe na ghee Devid, te ọ khẹke ne ima gha mwẹ ilẹkẹtin wẹẹ, e Jehova yabọ ima nẹ rhunmwuda Osa nọ mwẹ itohan ẹre irẹn khin. Vbe ako iruẹmwi na, ma gha guan kaẹn evbọzẹe nọ na khẹke ne ima gha mwẹ ilẹkẹtin wẹẹ, e Jehova yabọ ima nẹ kevbe emwi nọ gha ru iyobọ ne ima ya ru vberriọ.

VBỌZẸ NỌ NA KHẸKE NE IMA YAYI WẸẸ, E JEHOVA YABỌ IMA NẸ?

5. De emwi ne Setan hoo ne ima yayi? Ru igiemwi yọ.

⁵ Ma gha yayi wẹẹ, e Jehova yabọ ima nẹ, ọ gha ru iyobọ ne ima ya gban egbe ne ọkpa vbe usun ifi ne Esu khuẹn. Ghẹ mianmian wẹẹ, Esu keghi hia vbe odẹ ke odẹ nọ mu idobo ye ima egbe ne ima ghẹ ghi ga e Jehova. Odẹ ne Setan ya ru ọna ọre nọ na hoo nọ ya ima yayi wẹẹ, e Jehova i khian sẹtin ya orukhọ ne ima ru bọ ima. Gi ima guan kaẹn okha ọghe okpia ọkpa nọ ghaa rre Kọrint na rhie hin iko rre, rhunmwuda nọ na ru oghẹ. (1 Kọr 5:​1, 5, 13) Okpia na ghi fi werriẹ nẹ, Esu kegha hoo ne etẹn ni rre uwu iko ghẹ yabọe, uhiẹn, ne iran ghẹ kue gbe ọbokhian nẹẹn. Esu vbe gha hoo ne okpia na gha roro ẹre wẹẹ, e Jehova i khian sẹtin yabọe, sẹrriọ wẹẹ, egbe ghi “do wọọ ọre rhunmwuda akhiẹ nọ vuọn ọnrẹn ẹko.” E Setan ma he fi werriẹ. Sokpan, “ma rẹn odẹ ughughan nọ ya rẹrẹ emwa.”​—2 Kọr 2:​5-11.

6. Vbọ khian ru iyobọ ne ima, ne ekhọe ima ghẹ ghi gha bu abe gbe ima uhiẹn vbe Jehova gha yabọ ima nẹ?

⁶ Ma gha yayi wẹẹ, e Jehova yabọ ima nẹ, ekhọe ima i khian gha bu abe gbe ima. Ma gha ru orukhọ, ekhọe ima ghi gha bu abe gbe ima, erriọ ẹre Osanobua ya yi ima. (Psm 51:17) Ọna ma de emwi nọ rhiae. Ekhọe nọ bu abe gbe ima sẹtin ru iyobọ ne ima ya fi werriẹ. (2 Kọr 7:​10, 11) Vbọrhirhighayehẹ, adeghẹ ima na gi ekhọe ima ye gha bu abe gbe ima, uhiẹn vbe ima roro iro fi uyinmwẹ werriẹ nẹ, ọ sẹtin gbe orhiọn ima mu otọ. Ma gha yayi wẹẹ, e Jehova yabọ ima nẹ, ọ gha ru iyobọ ne ima, ne ekhọe ima ghẹ ghi gha bu abe gbe ima. Ẹghẹ nii, ma ghi sẹtin gha ga e Jehova vbene irẹn gualọ yi zẹẹ, ọni ọre vbe ima ghaa ya ekhọe nọ hianrẹn kevbe ọyẹnmwẹ nọ sẹ otọ ẹko gae. (Kọl 1:​10, 11; 2 Tim 1:3) De emwi nọ ghi khẹke ne ima ru ne ima mieke na gele yayi wẹẹ, e Jehova yabọ ima nẹ?

DE EMWI NỌ KHIAN RU IYOBỌ NE IMA YA YAYI WẸẸ, E JEHOVA YABỌ IMA NẸ?

7-8. De vbene Jehova ya gie egbe ẹre ma e Mozis kevbe wẹẹ, de vbene ọna ya rhie ilẹkẹtin ne ima? (Ẹksodọs 34:​6, 7)

⁷ Muẹn roro vbene Jehova ya gie egbe ẹre hẹ. Vbe igiemwi, gi ima ghee odẹ ne Jehova ya gie egbe ẹre ma Mozis vbe uhunmwu Oke Ọghe Sainai.a (Tie Ẹksodọs 34:​6, 7.) Emwi bun ne Jehova gha te ta ya gie aro ọmwa ne irẹn khin, sokpan, ọ na kha wẹẹ, “Osa nọ mwẹ itohan kevbe ẹnina” ẹre irẹn khin. Egbe Osa vbenian gha sẹtin kha wẹẹ, irẹn i yabọ eguọmwadia ẹre ni gele roro iro fi uyinmwẹ werriẹ ra? Hiehie! Adeghẹ e Jehova ma na yabọ, ọ ghi rhie ma wẹẹ, Osa nẹi mwẹ itohan kevbe nọ mwẹ ekhọe nọ wegbe ẹre irẹn khin, sokpan agbọn vbe ẹrinmwi rẹnrẹn wẹẹ, e Jehova i yerriọ.

⁸ Ma gha sẹtin gha mwẹ ilẹkẹtin wẹẹ, ẹmwata ẹre Jehova tae vbe ọ khare wẹẹ, Osa nọ mwẹ itohan ẹre irẹn khin. (Psm 31:5) Rhunmwuda ọni, ma gha sẹtin ya ẹmwẹ nọ tae yi. Adeghẹ ekhọe ruẹ na ye gha bu abe gbuẹ rhunmwuda orukhọ ne u ru vbe ẹghẹ nọ gberra, u sẹtin nọ egbuẹ wẹẹ: ‘Mẹ gele yayi wẹẹ, Osa nọ mwẹ itohan kevbe ẹnina, nọ vbe yabọ ọmwaikọmwa nọ roro iro fi uyinmwẹ werriẹ ẹre Jehova khin ra? Adeghẹ I gele ya ọni yi, ẹ i re te ọ khẹke ne I vbe yayi wẹẹ, ọ yabọ mwẹ nẹ ra?’

9. Vba yae kha vba gha wẹẹ, na ya orukhọ ọghe ima bọ ima? (Psalm 32:5)

⁹ Gha muẹn roro emwi ne Jehova ya emwa ni gbẹn e Baibol ta vbekpa odẹ ne irẹn ya yabọ. Vbe igiemwi, gi ima guan kaẹn vbene Devid ya gie odẹ ne Jehova ya yabọ. (Tie Psalm 32:5.) Ọ khare wẹẹ: “Uwẹ keghi vbe ya orukhọ mwẹ hia bọ mwẹ.” Ẹmwẹ ọvbehe na gha sẹtin loo ye ẹmwẹ Hibru na ke zedu “ya . . . bọ mwẹ” ọre “tọn mu,” ra “mu kpa.” Rhunmwuda ọni, vbe Jehova yabọ e Devid te ọ yevbe na miẹn wẹẹ, te ọ tọn orukhọ ọghẹe mu, ọ na muẹn kpa. Orhiọn e Devid na ghi sẹ otọ rhunmwuda, te ọ yevbe na miẹn wẹẹ, te Jehova kpa ihẹ nọkhua nọ te mu khian. (Psm 32:​2-4) Orhiọn ima gha vbe sẹtin sẹ otọ vbe Jehova gha yabọ ima nẹ. Ma gha gele roro iro fi uyinmwẹ werriẹ nẹ, ọ ma khẹke ne ekhọe ima ye gha bu abe gbe ima rhunmwuda e Jehova yabọ ima nẹ fo fẹẹrẹ.

10-11. De emwi ne ifiẹmwẹ na u “mu egbe ne u ya ya orukhọ ọghe ima bọ ima” ma ima re vbekpa e Jehova? (Psalm 86:5)

¹⁰ Tie Psalm 86:5. Vbe ako na, e Devid keghi kha wẹẹ, e Jehova “mu egbe [nọ] ya ya orukhọ ọghe ima bọ ima.” Ebe ọkpa ghi rhan otọ ako na, ọ na kha wẹẹ: “[E Jehova] keghi ‘yabọ’​—emwi na wa ‘rẹn ọnrẹn yi’ ẹre ni khin.” Vbọzẹ ne Jehova na yerriọ? Abọ nọkẹre vbe uviẹn nii khare wẹẹ: “U mwẹ ahoẹmwọmwa nẹi beghe daa emwa ni na erhunmwu guẹ.” Zẹvbe ne ima ruẹ ọre vbe ako iruẹmwi nọ lae, ahoẹmwọmwa nẹi beghe ne Jehova mwẹ daa eguọmwadia ẹre ni ya ekhọe hia gae, ẹre ọ si ẹre nẹi na sẹ iran rae. Ahoẹmwọmwa nẹi beghe ne Jehova mwẹ ẹre ọ si ẹre nọ na “ya ekhọe hia yabọ” emwa ni roro iro fi uyinmwẹ werriẹ. (Aiz 55:7) Adeghẹ ọ na gha lọghọ ruẹ ne u sẹtin yayi wẹẹ, e Jehova yabọ ruẹ nẹ, u sẹtin nọ egbuẹ wẹẹ: ‘I gele yayi wẹẹ, Osa nọ yabọ ẹre Jehova khin ra kevbe wẹẹ, ọ mu egbe nọ ya yabọ emwa hia ni gele roro iro fi uyinmwẹ werriẹ ra? Adeghẹ I ya ọna yi, ẹ i re te ọ khẹke ne I vbe yayi wẹẹ, I gha tu bu e Jehova, ọ gha yabọ mwẹ?’

¹¹ Ọ wa vbe fu ima ẹko rre ne ima na rẹn wẹẹ, e Jehova rẹnrẹn wẹẹ, emwa orukhọ ẹre ima khin. (Psm 139:​1, 2) Ihuan ọvbehe ne Devid gbẹn wa vbe so igiẹ ye ọna, ọ gha ru iyobọ ne ima ya yayi wẹẹ, e Jehova mu egbe nọ ya yabọ ima.

UWA GHẸ MIANMIAN EMWI NE JEHOVA YERRE

12-13. Zẹvbe nọ rre ebe Psalm 103:​14, de emwi ne Jehova yerre vbekpa ima, kevbe wẹẹ, de emwi nọ ghi gua ẹre kpa ya ru?

¹² Tie Psalm 103:14. E Devid khare wẹẹ, e Jehova “yerre wẹẹ, ekẹn ma khin.” Ẹmwẹ ne Devid ta na keghi ya ima rẹn ọkpa vbe usun emwi nọ si ẹre ne Jehova na mu egbe nọ ya yabọ eguọmwadia ẹre ni roro iro fi uyinmwẹ werriẹ, ọni ọre wẹẹ: Ọ rẹnrẹn wẹẹ, emwa orukhọ ẹre ima khin. Ne ima mieke na gele rẹn otọ ọre sayọ gi ima zẹ iro yan ẹmwẹ ne Devid ta na.

¹³ E Devid khare wẹẹ, e Jehova “rẹn vbene a ya yi ima” hẹ. “Ekẹn nọ rre otọ” ẹre Jehova ya ma Adam, ọ vbe rẹn wẹẹ, ọ mwẹ emwi eso nọ khẹke ne emwa nagbọn ni gbae gha ru ne iran mieke na ye gha rre agbọn, vbe na ghee, ne iran gha rri evbare, ne iran gha vbiẹ kevbe ne iran gha hiọnrọn. (Gẹn 2:7) Sokpan, Adam vbe Ivi ghi ru orukhọ, ma hia keghi rri orukhọ vbe ukhu, ọna ẹre ọ si ẹre ne ima na ru emwi nọ ma gba vbe ugbẹnso. Gberra wẹẹ, e Jehova rẹnrẹn wẹẹ, emwa orukhọ ẹre ima khin, e Devid khare wẹẹ, ọ vbe “yerre wẹẹ” emwa orukhọ ẹre ima khin. Emwi ne ẹmwẹ Hibru na loo ro mwa demu ọre ne ọmwa zẹ emwi ru, nọ mieke na mwẹ agiẹngiẹn daa ọmwa nọ ru orukhọ. Uhunmwu ẹmwẹ nọ rre ẹmwẹ ne Devid tae, ẹre na khin: E Jehova rẹnrẹn wẹẹ, ọ ma gba ne ima fo; rhunmwuda ọni, ma gha ru orukhọ, ma na roro iro fi uyinmwẹ werriẹ, ọ ghi tohan ima, ọ ghi vbe yabọ ima.​—Psm 78:​38, 39.

14. (a) De vbene Devid ya rhan otọ odẹ ne Jehova ya yabọ ima? (Psalm 103:12) (b) De vbene odẹ ne Jehova ya yabọ e Devid ya rhie ẹre ma wẹẹ, e Jehova gha yabọ ọmwa nẹ, ẹ i ghi ye orukhọ ọghẹe rre? (Ya ghee ẹkpẹti nọ khare wẹẹ, “E Jehova Gha Yabọ Ẹ I Ghi Ye Orukhọ Nii Rre.”)

¹⁴ De emwi ọvbehe nọ gha sẹtin ya ima yayi wẹẹ, e Jehova yabọ ima nẹ? (Tie Psalm 103:12.) E Devid khare wẹẹ, “Zẹvbe ne ekẹn rree ne orrie, erriọ [ẹre Jehova] vbe mu orukhọ ọghe ima khian rree ne ima.” Odẹ ekẹn ẹre ọ ghi rree ne orrie sẹ. Iran eva i sẹtin vba egbe. Vbe ọna ma ima re vbekpa odẹ ne Jehova ya yabọ? Ebe ọkpa ghi rhan otọ ako na, ọ na kha wẹẹ: “Osanobua mu orukhọ ọghe ima khian rree ne ima sẹrriọ wẹẹ, ọ ghi yevbe na ghee emwi nọ te winhin, nẹi khian ghi sẹtin winhin su ọmwa ẹdẹ, rhunmwuda ọni, ma gha sẹtin gha mwẹ ilẹkẹtin wẹẹ, e Jehova i khian ghi ye orukhọ ọghe ima rre, ẹ i khian vbe ru emwi nọ gha ya ima ye ẹre rre.” Gele muẹn roro, uwinhinmwẹ ọghe emwi gha sẹtin ya ima ye emwi nọ sunu vbe ẹghẹ nọ gberra rre. Sokpan, e Jehova gha yabọ ima nẹ, ọni ọre ọ yabọ ima nẹ, ẹ i khian ghi ye orukhọ nii rre, amaiwẹ te ọ khian rri ima oya yọ.​—Ẹzik 18:​21, 22; Iwinna 3:19.

15. Vbọ khẹke ne ima ru adeghẹ ekhọe ima na ye gha bu abe gbe ima rhunmwuda orukhọ ne ima ru vbe ẹghẹ nọ gberra?

¹⁵ De vbene ẹmwẹ ne Devid tae vbe ebe Psalm 103 gha ya ru iyobọ ne ima ya gele yayi wẹẹ, e Jehova yabọ ima nẹ? Adeghẹ ekhọe ima na gha bu abe gbe ima rhunmwuda orukhọ ne ima ru vbe ẹghẹ nọ gberra, ma sẹtin nọ egbe ima wẹẹ: ‘Te imẹ ghi mianmian emwi ne Jehova yerre ra​—ọni nọ wẹẹ, ọmwa orukhọ ẹre I khin kevbe wẹẹ, ọ mu egbe nọ ya yabọ ọmwa orukhọ vbene imẹ ye ra? I vbe ye ẹre rre ighẹ emwi ne Jehova mianmian nẹ ra​—ọni ọre orukhọ nọ ya bọ mwẹ nẹ, nẹi khian vbe rri mwẹ oya yi?’ E Jehova i rhie aro tua orukhọ ne ima ru vbe ẹghẹ nọ gberra. Ọ ma khẹke ne ima vbe rhie aro tua ẹre. (Psm 130:3) Ma gha gele yayi wẹẹ, e Jehova yabọ ima nẹ, ekhọe ima i khian ghi gha bu abe gbe ima, ma ghi sẹtin ye gha ya ọyẹnmwẹ ga e Jehova.

16. De igiemwi nọ rhie ẹre ma wẹẹ, ọ sẹtin zẹ ẹbe deghẹ ekhọe ọmwa na ye gha bu abe gbe ẹre rhunmwuda orukhọ nọ ru vbe ẹghẹ nọ gberra? (Vbe ya ghee efoto.)

¹⁶ Gia ru igiemwi ọkpa. Te ọmwa ne ekhọe ọre ye bu abe gbe yevbe ọmwa nọ fi imọto khian, sokpan ọ wa ghee ughegbe na ya bẹghe emwi nọ rre iyeke, vbene ọ ma na rhie aro hin. Ẹ i re emwi dan na zẹdia gha ghee ughegbe na; rhunmwuda, ọ gha ru iyobọ nuẹn ya bẹghe emwi nọ gha sẹtin zẹ ẹbe. Sokpan, deghẹ u hoo ne u sẹ eke ne u rrie, te ọ khẹke ne u gha ghee odaro. Erriọ ẹre ọ vbe ye, ọ sẹtin ru iyobọ ne ima adeghẹ ima na zẹdia gha ye ẹre rre orukhọ eso ne ima ru vbe ẹghẹ nọ gberra, ma ghi yae wan ne egbe, ne ima ghẹ mieke na dọlegbe ru ẹre. Sokpan, adeghẹ ima na rhie aro tua avbe abakuru na, ekhọe ima sẹtin do gha bu abe gbe ima sẹrriọ wẹẹ, ma ghi do gha si egbe vbe ugamwẹ Osanobua. Nọghayayerriọ, te ọ khẹke ne ima rhie aro tua eke ne ima rrie. Odẹ nọ rrie arrọọ vbe agbọn ọgbọn ẹre ima ye, vbe agbọn ọgbọn nii, ma rẹnrẹn wẹẹ, ma “gha mianmian emwi ni sunu vbe ẹghẹ nọ gberra hia fẹfẹẹfẹ.”​—Aiz 65:17; Itan 4:25.

YE GHA HIA NE U GHA MWẸ ILẸKẸTIN WE JEHOVA YABỌ RUẸ NẸ

17. Vbọzẹ nọ na khẹke ne ima ye gha hia ne ima gha mwẹ ilẹkẹtin wẹẹ, e Jehova yabọ ima nẹ kevbe wẹẹ, ọ vbe hoẹmwẹ ima?

¹⁷ Te ọ khẹke ne ima ye gha hia ne ima gha mwẹ ilẹkẹtin wẹẹ, e Jehova yabọ ima nẹ kevbe wẹẹ, ọ vbe hoẹmwẹ ima. (1 Jọn 3:​19, ftn.) Vbọzẹ? Rhunmwuda te Setan wa ye hia nọ ya ima yayi wẹẹ, e Jehova ma hoẹmwẹ ima kevbe wẹẹ, ẹ i khian sẹtin yabọ ima. Vbe nọ rhirhi gha ye hẹ, emwi nọ gualọ ọre ne ima sẹ e Jehova rae. Te Setan khian ye gha hia vbe odẹ ke odẹ, katekate nọ na rẹn wẹẹ, ovbi ẹghẹ kherhe ẹre irẹn ghi mwẹ. (Arhie 12:12) Ma i khian gi obọ ọre ke ukhunmwu ne ima!

18. De emwi nọ gha ru iyobọ ne ima ya gha mwẹ ilẹkẹtin wẹẹ, e Jehova yabọ ima nẹ kevbe wẹẹ, ọ vbe hoẹmwẹ ima?

¹⁸ Ne u mieke na gele yayi wẹẹ, e Jehova hoẹmwẹ ruẹ, hia ne u ru avbe emwi na guan kaẹn vbe ako iruẹmwi nọ lae. Ne u mieke na gele yayi wẹẹ, e Jehova yabọ ruẹ nẹ, gha muẹn roro vbene Jehova ya gie egbe ẹre hẹ. Gha muẹn roro emwi ne Jehova ya emwa ni gbẹn e Baibol ya ta vbekpa odẹ ne irẹn ya yabọ. Ghẹ mianmian wẹẹ, ọ rẹnrẹn wẹẹ, ọmwa orukhọ ẹre u khin kevbe wẹẹ, ọ gha tohan ruẹ. U ghi yerre wẹẹ, ọ gha yabọ ruẹ nẹ, ẹ i ghi ye orukhọ ruẹ rre. Ẹghẹ nii, vbe na ghee Devid, ma ghi gha mwẹ ilẹkẹtin wẹẹ, e Jehova gha yabọ ima, ma ghi vbe sẹtin kha wẹẹ, “U ru ẹse Jehova ne u na ‘ya orukhọ mwẹ hia bọ mwẹ’!”​—Psm 32:5.