Etẹn Nikpia Eva Na Da Zẹ Ni Gha Re Ọkpa Vbe Ẹbu Nọ Su

VBE October 5, 2024, a keghi ya iyẹn ne kpataki na wewe vbe iko ne otu ọghomwa do vbe ukpo ukpo: A zẹ Ọtẹn Nokpia Jody Jedele kevbe Jacob Rumph ne iran gha ga zẹvbe ọkpa vbe Ẹbu Nọ Su. Ẹ i re eban ẹre etẹn nikpia eva na ke ya ekhọe hia ga e Jehova.

Missouri vbe U.S.A. ẹre a na biẹ Ọtẹn Nokpia Jedele, odẹ ẹmwata na ẹre a na vbe koko ẹre waan. Ọkpẹn eke nai mobọ kporhu sẹ ẹre ẹgbẹe ọre ghaa ye. Rhunmwuda ọni, ọ wa gha miẹn etẹn ni bun ni ke ehe ughughan rre vbe iran gha do kporhu vbe ẹdogbo ọghe iran. Ahoẹmwọmwa kevbe akugbe ne etẹn na mwẹ wa kakabọ mu ẹre ekhọe. Ọ keghi dinmwiamẹ vbe ọ ye re ehọnrre, vbe October 15, 1983. Te iwinna ikporhu wa gha yẹẹ ọre, ọ ghi ladian nẹ vbe owebe, ọ na rhie obọ ye iwinna arọndẹ ọghe ẹghẹ hia vbe September 1989.

Vbe ẹghẹ nọ na gha re igbama, evbibiẹ ọre kegha viọ irẹn vbe ọtiẹnrẹn nokhuo yo e Bẹtẹl. Ọna ẹre ọ ghi ya iran gha hoo ne iran ya ga vbe Bẹtẹl​—iran eva gele ru vberriọ. September 1990 ẹre Ọtẹn Nokpia Jedele suẹn gha ga vbe Bẹtẹl nọ rre Wallkill. Cleaning Department ẹre ọ na ka winna, iyeke ọni, ọ na vbe ya winna vbe Medical Services.

Vbe asẹ nii, iko eso na na zẹ urhuẹvbo e Spanish ghaa rre ọkpẹn e Bẹtẹl, a wa gha gualọ iyobọ etẹn nikpia vbe avbe iko na. Rhunmwuda ọni, Ọtẹn Nokpia Jedele keghi ya deba ọkpa vbe uwu avbe iko na, ọ na suẹn gha ruẹ e Spanish. Vbọ ma he kpẹẹ vba, ọ keghi miẹn ọtẹn nokhuo ọkpa na tie ẹre Damaris, arọndẹ ghaa nọ vbe otako ne irẹn vbe gha ye. Vbene ẹghẹ ya khian, iran keghi ru orọnmwẹ, iran na vbe suẹn gha ga vbe Bẹtẹl.

Vbe ukpo 2005 iran keghi kpa hin e Bẹtẹl rre ne iran ya gbaroghe evbibiẹ iran. Vbe uwu ẹghẹ na, iran kegha ga zẹvbe arọndẹ ọghe ẹghẹ hia. Ọtẹn Nokpia Jedele vbe gha ma emwa emwi vbe Owebe Ọghe Avbe Arọndẹ, ọ vbe gha ga zẹvbe ọkpa vbe ediọn ni rre Hospital Liaison Committee kevbe Regional Building Committee vbe ẹvbo ẹre.

Vbe ukpo 2013, a keghi dọlegbe tie Ọtẹn Nokpia kevbe Ọtẹn Nokhuo Jedele gha die Bẹtẹl ne iran do deba etẹn ni bọ owa ugamwẹ vbe Warwick. Ke ẹghẹ nii gha dee, iran vbe ya ga nẹ vbe abotu nọ rre Patterson kevbe Wallkill. Ọtẹn Nokpia Jedele ka winna vbe Local Design/Construction Department kevbe Hospital Information Services. Vbọ ghi rre March 2023, a na we nọ gha ga zẹvbe ọtẹn nọ ru iyobọ ne Service Committee. Vbe ọ ghi muẹn roro iwinna ughughan nọ he ru vbe ugamwẹ e Jehova, ọ na kha wẹẹ: “A gha da mu iwinna ọgbọn nuẹn, u sẹtin gha roro ẹre wẹẹ, u i khian sẹtin ru ẹre. Sokpan, ẹghẹ nii ẹre ọ khẹke ne u ya mu ẹtin yan e Jehova rhunmwuda, vbene ọ we ne emwi gha ye erriọ ẹre ọ gele ye.”

California vbe U.S.A ẹre a na biẹ Ọtẹn Nokpia Rumph. Vbe ọ rre ọvbokhan, iyẹe ma gha yo iko kevbe ikporhu, sokpan, ọ na ye hia nọ ma ẹnrẹn ẹmwata nọ rre Baibol. Vbe deba ọni, ukpo ukpo ẹre ọ ya gha mu otuẹ gie iyẹe nọkhua, te iyẹe nọkhua wa gha ga e Jehova ẹse. Iyẹe nọkhua ẹre ọ ru iyobọ nẹẹn ya do rẹn ẹmwata nọ rre Baibol sayọ, vbe ọ ghi rre ukpo 13, ọ na we na do gha gu irẹn ruẹ e Baibol. Ọ ghi rre September 27, 1992, vbe ọ rre igbama, ọ na dinmwiamẹ. Ma ghọghọ wẹẹ, iyẹe keghi dọlegbe suẹn gha yo iko kevbe ikporhu, erriọ ẹre erhae kevbe etiọnrẹn vbe ya gha mwẹ alaghodaro vbe ugamwẹ e Jehova, iran na vbe dinmwiamẹ.

Vbe ọ rre igbama, Ọtẹn Nokpia Rumph ghi bẹghe vbene avbe arọndẹ ya mwẹ oghọghọ hẹ, ọ keghi rhie obọ ye iwinna arọndẹ vbe September 1995 vbe ọ ghi ladian nẹ vbe owebe. Vbọ ghi rre ukpo 2000, ọ na si gha rrie Ecuador ya ga vbe eke na na gualọ iyobọ etẹn. Evba ẹre ọ na miẹn ọtẹn nokhuo ọkpa na tie ẹre Inga nọ re arọndẹ nọ ke Canada rre, vbene ẹghẹ ya khian, iran eva na ru orọnmwẹ. Iran keghi suẹn agbọn vbe ovbi ẹvbo ọkpa nọ ma kpọlọ gbe vbe Ecuador, ibozẹghẹ etẹn ni ya iyẹn wewe, ẹre ọ ghaa rre ẹvbo na. Vbene a guan na, iko ọkpa nọ deziẹn wa rre ẹvbo na.

Vbene ẹghẹ ya khian, Ọtẹn Nokpia kevbe Ọtẹn Nokhuo Rumph keghi suẹn gha ga zẹvbe arọndẹ ne kpataki, ọ ghi sẹ ẹghẹ, iran na suẹn gha ga zẹvbe ọgbaroghe ọghe otako. Vbọ ghi rre ukpo 2011, a keghi gie na tie iran gha die eklasi nogie 132 ọghe Giliẹd. Vbe iran ghi ladian nẹ vbe owebe na, iran keghi ya ga vbe ehe ughughan, erriọ ẹre iran vbe ya ru iwinna ugamwẹ ughughan ne iran sọyẹnmwẹ ọnrẹn, vbe igiemwi, iran ga vbe Bẹtẹl, iran ru iwinna arọndẹ na gie yo isi, iran vbe ru iwinna ọgbaroghe ọghe otako. Ẹkpotọ vbe kie ne Ọtẹn Nokpia Rumph ya ma emwa emwi vbe Owebe Ọghe Etẹn Ni Kporhu Iyẹn Nọ Maan Ọghe Arriọba.

Rhunmwuda emianmwẹ COVID-19 nọ ghaa vẹwae, Ọtẹn Nokpia kevbe Ọtẹn Nokhuo Rumph keghi dọlegbe gha die United States. A keghi we ne iran do gha ga vbe Bẹtẹl nọ rre Wallkill, a na ma Ọtẹn Nokpia Rumph emwi nọ mieke na sẹtin gha ga vbe Service Department. Vbene ẹghẹ ya khian a keghi we ne iran ya ga vbe abotu nọ rre Ecuador, Ọtẹn Nokpia Rumph kegha ga zẹvbe ọkpa vbe Agbaziro Ọghe Abotu vbe ẹvbo nii. Vbe ukpo 2023, a na dọlegbe gie iran gha rrie Warwick. Vbọ ghi rre January 2024, a keghi zẹ Ọtẹn Nokpia Rumph nọ gha ga zẹvbe ọkpa vbe usun etẹn ni ru iyobọ ne Service Committee. Vbe ọ ghi guan kaẹn iwinna ugamwẹ ughughan nọ he ru, ọ na kha wẹẹ, “Emwa ne ima gba iwinna ẹre ọ ya iwinna ne ima ru hin usi ẹ i re ehe ne ima na ga.”

Ma wa gbọyẹmwẹ ye iwinna esiesi ne etẹn nikpia na ru, ma i vbe “ya ẹmwẹ ikpia vberriọ ku hiehie.”​—Fil 2:29.