Igho Ọrhẹnrhẹn Ẹre A Loo Vbe A Ghaa Khọn Okuo​—De Ọlọghọmwa Ọvbehe Ne Okuo Si?

Igho na he zẹ ye okuo kevbe ọlọghọmwa ne okuo he si i re nekherhe.

• Ọna ọre igho nọ ghi kpọlọ sẹ igho na he loo ye okuo vbe ọwara ukpo ni bun.”

Vbọ gberra igho ọrhẹnrhẹn na loo ye okuo, emwi ni bun ọvbehe wa vbe sunu vbe a ghaa khọn okuo. Gi ima guan kaẹn okuo nọ sunu vbe Ukraine.

• Emwa khare wẹẹ, ke ukpo eva gha dee ne okuo ya suẹn vbe Ukraine, ivbiyokuo ni rrie odẹ 500,000 ẹre ọ he wu ra ẹre ọ he miẹn ikuanegbe.

• United Nations khare wẹẹ, ọ gberra orhunmwu 28,000 ni he wulo ra ni he miẹn ikuanegbe. Orhunmwu ọkpa nọ rre ukpo nọ yo vbe UN khare wẹẹ: “Ma i khian sẹtin ka inu emwa ni rri oya ba ẹmwẹ okuo na.”a

Ẹ i re ọlọghọmwa nekherhe ẹre okuo vbe okhọn he si ye emwa egbe.

• Ọna ọre olaba ọghe emwa ni he lẹẹ hin owa rre rhunmwuda okuo vbe okhọn, na ka vbe September 2023.

• Ọna ọre olaba ọghe emwa nẹi miẹn evbare re vbene ọ khẹke rhunmwuda okuo. World Food Programme keghi kha wẹẹ: “Okuo ẹre ọ wa re emwi nọ mobọ si ẹre ne emwa i na miẹn evbare re vbene ọ khẹke, rhunmwuda, a gha ghae emwa nẹi miẹn evbare re vbene ọ khẹke ye ihe igbe, obọ ihinrọn vbọ rre ẹvbo na na khọn okuo ra ne emwa na gu egbe khọn.”

Okuo gha fo ẹdẹ ra? Ọfunmwegbe gha sẹtin do gha rrọọ ra? Emwa nagbọn gha sẹtin ru ẹre ne emwa hia gha miẹn evbare re ra? Iran gha vbe sẹtin ru ẹre ne ogue ghẹ ghi gha rrọọ ra? De emwi ne Baibol khare?

Ẹghẹ na ya khọn okuo

E Baibol tae wẹẹ, okuo ra gha rre ehe hia, ọ keghi ya okuo gie ọmwa nọ hin ẹsin khian.

• A keghi rhie ẹtin ne ọmwa nọ tota yan rẹn nọ ya rhie ọfunmwegbe hin uhunmwu otagbọn rre, ne emwa miehe na gbele egbe iran rua; a na vbe mu umozo nọkhua nẹẹn.”​—Arhie Maan 6:4.

Ẹsin eva kegha lele ẹsin na dee vbe iyeke. Ọkpa vbọ keghi mudia ye ihe ukhunmwu nọ fi, nọkpa na mudia ye ihe emwi ughughan ni si uwu, vbe na ghee emianmwẹ. (Arhie Maan 6:5-8) Adeghẹ u hoo ne u rẹn sayọ vbekpa ẹmwẹ akhasẹ na, kevbe emwi nọ ya ima yayi wẹẹ ọ wa sẹ vbe ẹghẹ ne ima ye na, ya tie uhunmwuta na, “The Four Horsemen​—Who Are They?”

Ọfunmwegbe ra gha rrọọ

Vbe nẹi khian ghi kpẹẹ gbe, emwa i khian ghi gha khọn okuo. Sokpan, ẹ i re vbe ẹtin emwa nagbọn. E Baibol khare wẹẹ:

• “Ọ gha khiẹn ameve hia hin aro iran rre. Uwu i khian ghi gha rrọọ, ra akhiẹ ra eve ra obalọ. A ho emwi nẹdẹ hia bẹkun nẹ.”​—Arhie Maan 21:4.

• “Emwa mwẹ gha miẹn fan vbe obọ ukpokpo, owa ọghe iran ghi gha re ne ọfunmwegbe ye kevbe nẹi mwẹ ẹbe.”​—Aizaia 32:18.

Zẹvbe ne Baibol tae,avbe okuo kevbe emwi ughughan ni sunu vbe ẹdẹnẹrẹ ya ima rẹn wẹẹ, ẹghẹ ne ọfunmwegbe khian ya gha rre ehe hia sẹ otọ fo nẹ.

De vbene Osanobua khian ya ru ẹre ne ọfunmwegbe gha rre ehe hia? Arriọba ọghẹe nọ rre ẹrinmwi ẹre ọ khian ya ru ẹre. (Matiu 6:10) U ghaa hoo ne u rẹn sayọ vbekpa Arriọba na kevbe afiangbe ne u khian miẹn vbọ, ya ghee vidio ne kuẹi na De Emwi Ne Arriọba Osanobua Khin?