Rui Almeida Fotografia/Moment via Getty Images
WA GHA BODẸ!
Emwa Ni Do Uza Rhunmwuda Ẹmwẹ Otu Azẹ—De Emwi ne Baibol Tae?
Ẹghẹ hia ẹre a ghi wa ya họn wẹẹ, emwa gu emwa ni rre ukpo arriọba khọn.
Vbọzẹ ne emwa na do uza ba mwẹ ẹmwẹ otu azẹ? Uza ne emwa do na gha fo ẹdẹ ra? De emwi ne Baibol tae?
E Baibol ka tae ye otọ wẹẹ, ẹmwẹ otu azẹ gha si ighaegbe
E Baibol keghi tie ẹghẹ ne ima ye na “ẹdẹ okiekie,” ọ na wẹẹ, emwa ni bun a gha yin uyinmwẹ ọkhọ.
“Ẹghẹ nọ wegbe ẹre ẹdẹ okiekie khian gha khin, te emwi hia khian gha lọghọ. Rhunmwuda, . . . emwa i ghi kpọnmwẹ ẹse, emwa i ghi mwẹ ẹkoata, . . . emwa i ghi hoo ne iran ru adọlọ, . . . aro emwa ghi gha kpannọ ugiọnmwẹ erhẹn, . . . emwa ghi gha ya emwa dẹ, emwa ghi ze vbe udu, uhiomwẹ ghi rhu iran aro.”—2 Timoti 3:1-4.
E Baibol vbe tae ye otọ wẹẹ, vbe ẹdẹ okiekie emwa ghi gha gbe ollighi, iran ghi gha sọtẹ daa arriọba. (Luk 21:9, futnot) Ọrheyerriọ, uza ne emwa do kevbe ọlọghọmwa ne ẹmwẹ otu azẹ si ye emwa egbe i khian wa gha rrọọ khian vbe ẹtẹbitẹ.
Uza ne emwa do ba mwẹ ẹmwẹ otu azẹ gha fo
E Baibol tama ima wẹẹ, Osanobua gha ya arriọba ọghẹe nọ rre ẹrinmwi rhie ihe arriọba emwa nagbọn.
“Osanobua ẹrinmwi gha mu arriọba nẹi khian fo vbe otọ gbọọ . . . irẹn gha fuẹn avbe arriọba [na hia] fẹẹrẹ, irẹn ghi gha rrọọ ẹdẹdẹmwẹdẹ.”—Daniẹl 2:44.
Arriọba Osanobua gha ru ẹre ne emwa hia gha mwẹ akugbe, kevbe ne ọfunmwẹgbe gha rre agbọn na.
Jesu Kristi ọre “Okoro Ọfunmwegbe,” irẹn ọre Ọba ọghe Arriọba Osanobua, ọ gha ru ẹre ne “ọfunmwegbe . . . gha rrọọ vbe ẹghẹ hia.”—Aizaia 9:6, 7.
Uhiẹn vbe ẹghẹ ne ima ye na, emwa hia ni rre ototọ ọdakha ọghe Jesu, keghi hia ne iran gha re emwa ọfunmwegbe. E Baibol khare wẹẹ: “Iran gha ya umozo iran dunmwu emwi nọ yevbe ẹguẹ kevbe asoro iran, iran gha ya dunmwu ikhu. Avbe uhunmwu ẹvbo i ghi khọn okuo ọvbehe, iran i ghi mu egbe okuo ọvbehe.”—Aizaia 2:3, 4.
Deghẹ u hoo ne u rẹn sayọ, ya tie uhunmwuta na “What Will God’s Kingdom Accomplish?” U ghi vbe ghee vidio nọ khare wẹẹ, De Emwi Ne Arriọba Osanobua Khin?