Vbọzẹ Ne Avbe Osẹe Jehova I Na Do Ugie Ọghe Easter?
Iziro eso ni ma gba
Iyayi nọ ma gba: Avbe Osẹe Jehova i do ugie Easter rhunmwuda iran i re Ivbi Otu e Kristi.
Ẹmwata nọ rrọọ: Ma yayi wẹẹ, Jesu ọre ọmiọnmwafan ọghe ima, ma vbe hia ne ima gha “lele ukpowẹ” ọghẹe.—1 Pita 2:21; Luk 2:11.
Iyayi nọ ma gba: Wa ma yayi wẹẹ, e Jesu rhiọ kpaegbe.
Ẹmwata nọ rrọọ: Ma yayi wẹẹ, e Jesu gele rhiọ kpaegbe; ma vbe rẹn wẹẹ, arhiọkpaegbe keghi re ọkpa vbe usun imamwaemwi ne kpataki nọ khẹke ne Ivbi Otu e Kristi yayi, erriọ ima vbe ya guan kaẹn rẹn vbe ima ghaa kporhu.—1 Kọrint 15:3, 4, 12-15.
Iyayi nọ ma gba: Ọ ma zẹdẹ kaẹn uwa wẹẹ, ivbi uwa i sọyẹnmwẹ egbe iran, vbe ẹghẹ ne emwa ọvbehe ya do ugie Easter.
Ẹmwata nọ rrọọ: Ma hoẹmwẹ ivbi ima—ma wa hia vbe odẹ ke odẹ ne ima gha ma iran emwi, ma vbe ru iyobọ ne iran ya gha sọyẹnmwẹ.—Taitọs 2:4.
Vbọzẹ ne Avbe Osẹe Jehova i na do ugie Easter?
E Baibol ma we ne ima gha do ugie Easter.
Jesu we ne ima gha ye uwu ọghe irẹn rre, ẹ i re arhiọkpaegbe ọghe irẹn. Uhukpa vbe ukpo ẹre ima do Ugie Ayere na vbe ẹdẹ ne Jesu wu, zẹvbe nọ guaẹro ighẹ e kalẹnda ne emwa ghaa loo vbe ẹghẹ na ya gbẹn e Baibol.—Luk 22:19, 20.
Ọ mwẹ ilele eso nọ ginna igẹbọ ne emwa na gha mwẹ obọ vbe ẹghẹ nẹdẹ, rhunmwuda iran hoo ne iran miẹn ọmọ biẹ. Avbe ilele na ẹre ugie ọghe Easter ke zọ ladian. Rhunmwuda ọni, ugie na i yẹẹ Osanobua. Osanobua hoo ne ima gha rhie ugamwẹ na ma gua ne irẹn, Osanobua i vbe ghọghọ yọ deghẹ emwa ni wẹẹ iran ga irẹn na gha mwẹ obọ vbe ugie ne irẹn ma kpasẹ yi.—Ẹksodọs 20:5; 1 Ọba 18:21.
Ma yayi wẹẹ ne ima i na mwẹ obọ vbe ugie ọghe Easter, emwi nọ rre Baibol ẹre ima lele, rhunmwuda, e Baibol rhie igiọdu ne ima, ne ima gha loo ẹwaẹn kevbe ne ima gha roro emwi ẹse, ẹ i re ne ima gha ya ilele ọghe emwa nagbọn ru emwi. (Itan 3:21; Matiu 15:3) Ẹmwata nọ wẹẹ, emwa gha nọ ima ọta vbekpa Easter, ma keghi tama iran emwi ne ima yayi. Vbọrhirhighayehẹ, ma rẹnrẹn wẹẹ dọmwadẹ ọghẹe mwẹ asẹ nọ khian ya zẹ ne egbe ẹre deghẹ irẹn a gha mwẹ obọ vbe ugie Easter, ra irẹn i khian gha mwẹ obọ vbọ.—1 Pita 3:15.