Vbọ Re Orukhọ?

Ewanniẹn ne Baibol rhie ye inọta na

Orukhọ ọre emwi ne ọmwa rhirhi ru, ra iziro ne ọmwa mwẹ nọ ma gua ilele ọghe Osanobua ro. Ọ vbe dekaẹn na rra uhi Osanobua, ọni nọ wẹẹ, na ru emwi nẹi maan vbe aro Osanobua. (1 Jọn 3:4; 5:​17) E Baibol vbe gi ima rẹn wẹẹ, deghẹ ọmwa ma na ru emwi nọ khẹke nọ ru, orukhọ ẹre nọ.​—Jems 4:​17.

Vbe urhuẹvbo na ka ya gbẹn e Baibol, ẹmwẹ na ya gie orukhọ ọre “ne ọmwa ba emwi ku.” Vbe igiemwi, vbe otọ Izrẹl nẹdẹ, te avbe ivbiyokuo Izrẹl wa guẹ vbene a ya loo umọvọn ya fi okuta hẹ vbene iran i na “bae ku.” A gha we na zedu ẹmwẹ na zẹvbe nọ wa ye, evba yae kha ọre “iran i ru orukhọ” (Giọgis 20:16) Nọnaghiyerriọ, ọmwa gha ru orukhọ, abakuru ẹre ọ ru, te ọ rhie obọ gberra uhi ọghe Osanobua nọ gbae.

Zẹvbe Ayi ọghomwa, Osanobua mwẹ asẹ nọ khian ya gbe uhi ne ima. (Arhie Maan 4:​11) Ma hia gha na iyẹn egbe ima ma Osanobua.​—Rom 14:12.

Ọmwa gha sẹtin gha rrọọ vbe nẹi na zẹdẹ ru orukhọ ra?

Ẹo. E Baibol khare wẹẹ “emwa hia ru orukhọ nẹ, iran vbe khian rree ne uyi ọghe Osanobua nẹ.” (Rom 3:​23; 1 Ọba 8:​46; Asan-Ibo 7:​20; 1 Jọn 1:8) Vbọzẹ nọ na yerriọ?

Adam vbe Ivi ọre emwa na ka gha yi, vbe ẹghẹ omuhẹn, iran ma gha mwẹ orukhọ. Rhunmwuda, te Osanobua yi iran zẹvbe emwa ni gbae, ọ na vbe yi iran ne iran yevbe irẹn. (Gẹnẹsis 1:​27) Vbọrhirhighayehẹ, iran keghi he ẹmwẹ ye Osanobua obọ, erriọ ẹre iran ghi ya khian emwa orukhọ. (Gẹnẹsis 3:​5, 6, 17-​19) Emọ ne iran ghi biẹlẹ na ghi rri orukhọ kevbe amagba vbe ukhu. (Rom 5:​12) E Devid ne Ọba Izrẹl khare wẹẹ: “Ọmwa orukhọ ẹre I wa khin, ke na ya biẹ mwẹ gha dee.”​—Psalm 51:5.

Orukhọ sẹ egbe ra?

Ẹẹn. Vbe igiemwi, e Baibol khare wẹẹ, “emwa dan” ne orukhọ iran wa “kpọlọ” ẹre ọ ghaa rre Sọdọm vbe ẹghẹ nẹdẹ. (Gẹnẹsis 13:13; 18:20) Gi ima zẹ iro yan emwi eha ni gha sẹtin ya ima rẹn vbene orukhọ kpọlọ sẹ hẹ.

1. Vbe nọ wegbe sẹ hẹ. E Baibol ya obọ sekhae ne ima, ne ima gban egbe ne avbe orukhọ ni wegbe vbe na ghee, uyinmwẹ alama oghẹ, igẹbọ, oyi, ayọn na da gbe egbe, na khiẹn ọmwa obọ miẹn ọnrẹn emwi, na do ọmwa izigha kevbe orhiọn dan na gu mu obọ. (1 Kọrint 6:​9-​11; Arhie Maan 21:8) E Baibol vbe ya unu kaẹn orukhọ eso ne ima ru, ne ima i ka yọ; vbe igiemwi ẹmwẹ ne ima ta, ra uyinmwẹ ima sẹtin si obalọ ye emwa egbe. (Itan 12:18; Ẹfisọs 4:​31, 32) Ọrheyerriọ, e Baibol rhie igiọdu ne ima, ne ima ghẹ ya aro tila orukhọ rhọkpa, rhunmwuda, orukhọ ne ima ghee wẹẹ ọ ye kherhe, sẹtin si ima fi orukhọ nọ wegbe, ẹghẹ nii, ma ghi do rra uhi Osanobua.​—Matiu 5:​27, 28.

2. Emwi nọ ya ọmwa nii ru orukhọ. A ma rẹn sẹ, ẹre ọ ya ima ru orukhọ eso. (Iwinna 17:30; 1 Timoti 1:​13) Ẹ i re ta ya ọna kha wẹẹ, orukhọ vberriọ maan o, ọrheyerriọ, e Baibol gi ima rẹn wẹẹ, iran lughaẹn ne orukhọ na mema ru. (Nọmbas 15:30, 31) “Ekhọe dan” ẹre ọ ya ọmwa mema ru orukhọ.​—Jerimaia 16:12.

3. Vbe nọ kpẹkpẹ sẹ hẹ. E Baibol vbe guan kaẹn alughaẹn nọ rre orukhọ na ru vbe uhukpa kevbe na ru yan egbe yan egbe vbe ọwara ẹghẹ nọ taẹn. (1 Jọn 3:​4-8) Osanobua gha bu ohiẹn gbe emwa ni “rhan aro ru orukhọ” uhiẹn vbe iran gha rẹn wẹẹ, emwi ne iran ru i maan.​—Hibru 10:26, 27.

Emwa eso gha ru orukhọ nọ wegbe nẹ, ekhọe iran ghi do gha fi iran uwẹnrhiẹn. Vbe igiemwi, Ọba ighẹ e Devid keghi kha wẹẹ: “Orukhọ mwẹ gba mwẹ uhunmwu, ihẹ ọre khua gberra ne I gha sẹtin mu.” (Psalm 38:4) Sokpan, e Baibol rhie ifuẹko ne ima wẹẹ: “We ne ọmwa dan fi uyinmwẹ ọnrẹn werriẹ, nọ vbe fi iziro dan nọ rrọọ ọre ekhọe werriẹ, nọ bu e Jehova gha dee, ọ gha tohan rẹn. Ọ ghi bu Osanobua mwa gha dee, rhunmwuda, ọ ya ekhọe hia yabọ.”​—Aizaia 55:7.