“Ọ Na Yevbe Na Miẹn Wẹẹ, I Mwẹ Emwi Hia Ne I Gualọ Nẹ”

VBENE I KA GHA YE HẸ

E Montreal vbe Canada ẹre a na biẹ mwẹ, ọ keghi re ẹvbo nọ ghi kpọlọ sẹ vbe Quebec. Ima enẹ ẹre evbibiẹ mwẹ biẹlẹ, te iran wa koko ima ẹse, erriọ iran vbe hoẹmwẹ ima. Idunmwu na tie ẹre Rosemont ẹre ima ghaa ye, te emwa hia wa gha rrọọ vbe ọfumwegbe. Ai vbe họn ẹmwẹ ẹzọ vbe idunmwu nii.

Te Baibol wa gha yẹẹ mwẹ na tie vbe I rre ọvbokhan. I yerre vbe I rre ukpo 12, okha ọghe Jesu ẹre I mobọ gha tie, te I wa gha sọyẹnmwẹ ọnrẹn. Ahoẹmwọmwa kevbe ẹnina ne Jesu ghaa mwẹ daa emwa, na wa mu mwẹ ekhọe, I na gha hoo ne I ya egbe taa re. Ọ keghi da mwẹ wẹẹ, I ma ghi gha mwẹ egbe ekhọe vberriọ, vbe I wan dee, emwa dan ne I ghaa gu mu obọ ẹre ọ ghi fi mwẹ werriẹ.

Ọmwa nọ wa gua kpe emadogua ọghe ihuan na tie ẹre saxophone ẹre erha mwẹ ghaa khin. Ọ vbe gha mu e saxophone ọghẹe mẹ ne I gha loo, irẹn ẹre ọ vbe ya mwẹ hoẹmwẹ ihuan na so. Ihuan yẹẹ mwẹ sẹrriọ wẹẹ, I na ya ghi ruẹ vbene a ya kpe guitar hẹ. Zẹvbe ne ẹghẹ ya khian, I na do gha mwẹ emwa ni viọ ba egbe ya so ihuan vbe iku. Emwa nibun wa gha mu ima vbe iku. Emwa eso na wa họn okhekhe ẹre, ni siẹnro ihuan na so, na ghi bu mwẹ gha dee wẹẹ, iran hoo ne I do gha winna ne iran. I na wẹẹ I gha winna ne iran. I te rẹn, a na ghi gha kpe ihuan mwẹ vbe ehe hia, uhiẹn ya sẹ egbe radio station nọ rre Quebec.

Ọ na yevbe na miẹn wẹẹ, I mwẹ emwi hia ne I gualọ nẹ. Te I wa gha titi vbe I rre igbama, erriọ I wa vbe gha miẹn igho vbe iwinna ne I ghaa ru. Ẹ i avbie emwi I ru vbe ẹdẹ gha gbe, vbe okaro, I ka gha rrie eke ne a na ku iku isasegbe, emwa ni winna vbe ugha iyẹn zẹdia rre do gha nọ mwẹ ọta eso, I mobọ sign ye ebe ne emwa viọ mẹ ne I sign yi vbe I gha ye orere, kevbe wẹẹ, a zẹdia vbe mu mwẹ ladian vbe tẹlivisiọn. Ọ gha ghi sẹ ẹghẹ ota, I ghi gha rrie iku. Rhunmwuda I hoo ne emwa gha kpe we, vbe I ghaa so ihuan, I na ghi suẹn gha da ayọn, vbene ẹghẹ ya khian, I na ghi vbe suẹn gha loo ikpẹ ukhunmwu ni wegbe. Te I wa gha yin vbene I rhirhi miẹn, agbọn ọrhiae ẹre I wa gha ye.

Emwa eso na wa gha gbọvo mwẹ, rhunmwuda, iran ghaa roro ẹre wẹẹ, te agbọn wa gha rhiẹnrhiẹn mwẹ. Sokpan uwu orriara ẹre I ghaa ye, ẹghẹ hia ẹre ohioro ya gha mu mwẹ. Ena hia na wa ya iro han mwẹ, orhiọn mwẹ ma ghi gha sotọ. Ọ wa da mwẹ wẹẹ, ẹghẹ ne obọ mwẹ ghi ya suẹn gha vba igho, ẹre emianmwẹ AIDS ghi ya gbe ikpia eva ne I ghaa winna lele. Egbe emwi hia na wa wọọ mwẹ! Agharhemiẹn wẹẹ ihuan na so wa gha yẹẹ mwẹ, sokpan vbene iran ya gha loo arrọọ ọghe iran, na wa gha sọnnọ mwẹ.

VBENE BAIBOL YA FI MWẸ WERRIẸ

Agharhemiẹn wẹẹ I wa fe, I ye rẹn wẹẹ, ẹi re erriọ agbọn na khẹke nọ gha ye. Vbọzẹe ne emwa na ya obọ yin emwa ọvbehe mu otọ? I ma rẹn emwi nọ si ẹre ne Osanobua ma na ru emwi rhọkpa. Ẹre I na ghi suẹn gha na erhunmwu gie Osanobua, nọ rhie ewanniẹn ye avbe inọta na. Ma ghi ke iku rre vbe ẹghẹ okpa, I na ya werrigbe suẹn e Baibol na tie. Agharhemiẹn wẹẹ, I ma wa rẹn otọe emwi ne I ghaa tie, ekhọe mwẹ na tama mwẹ wẹẹ, ufomwẹ agbọn na sotọ nẹ.

I ghi tie Baibol vbe ẹdẹ ọkpa, I na tie kaan vbene Jesu ya mu awẹ vbe uwu ato vbe ikpẹdẹ 40. (Matiu 4:​1, 2) Ẹre I na tama egbe mwẹ wẹẹ, I gha mu awẹ vberriọ, ughaghe Osanobua gha rhie egbe ma mwẹ, ẹre I na ghi mu ẹdẹ yọ. Ọ ghi kẹ uzọla eva ne I suẹn, Osẹe Jehova eva, na do sobọ vbe urho mwẹ, ẹre I na wẹẹ ne iran la owa, ọ na yevbe te I wa khẹ iran sin. I keghi nọ ọkpa vbe uwu iran na tie ẹre Jacques ọta wẹẹ, “Vbe ima khian ya rẹn wẹẹ, okiekie ẹdẹ ọghe agbọn na ẹre ima ye?” Ọ keghi ya e Baibol rhie ewanniẹn ye inota nii, ako nọ tie ma mwẹ ọre ebe 2 Timoti 3:​1-5. Ẹre I na ghi suẹn gha nọ iran ọta nibun, iran na wa vbe gha ya e Baibol rhie ewanniẹn ye ehia, odẹ ne iran ya rhie ewanniẹn ye avbe inọta nii na wa yẹẹ mwẹ, erriọ wa vbe sẹ mwẹ ọkẹn. Vbe uwu ẹghẹ ne iran ya gha mu otuẹ sẹ ehe ne I ye, ẹre I ghi ya fi ekhọe wẹrriẹ wẹẹ, esa i rrọọ ne I khian ghi ya mu awẹ.

Avbe Osẹe Jehova na do gha ya e Baibol maa mwẹ emwi vbe ẹghẹ hia. Zẹvbe ne ẹghẹ ya khian, I na ghi ya gia eto mwẹ kua, iyeke ọni, ẹre I na suẹn iko na yo. Vbene iran ya se oyaya mu mwẹ vbe yo iko iran, na ghi ya mwẹ rẹn wẹẹ, ugamwẹ ẹmwata ẹre ọ gele na khin.

I rẹnrẹn wẹẹ, deghẹ I hoo ne I rhie emwi ne I ruẹ ye uyinmwẹ, te ọ khẹke ne I zobọ vbe uyinmwẹ eso nọ gua mwẹ obọ ro. Okaro, te I gha dobọ ukhunmwu ni wegbe na loo yi, kevbe uyinmwẹ ọrhiae ne I ghaa yin. Ẹi vbe ọni ọkpa, ọ ma vbe khẹke ne I gha re ọmwa nọ rẹn ọghe enegbe ẹre ọkpa, sokpan I ghi gha mwẹ ẹnina daa emwa ọvbehe. Ugbẹnvbe a miẹn wẹẹ, imẹ ọkpa ẹre ọ gbaroghe emọ eva ne I mwẹ, I kegha hia ne I gha mwẹ ẹghẹ ne iran, kevbe ne I vbe gha maa iran emwi vbekpa Osanobua. Rhunmwuda ọni, I na ghi dobọ iwinna ne I ru yi, ẹre I na ya gha winna vbe factory, agharhemiẹn wẹẹ igho ne kherhe ẹre iran ghaa ha mwẹ re.

Ọ ma zẹdẹ gha khuẹrhẹ ne I ban avbe uyinmwẹ dan na. Zẹvbe ne I ya gha hia ne I dobọ ikpẹ ukhunmwuni wegbe na loo yi, erriọ obọ ya gha da mwẹ. Ugbẹnso, ọ gha wa mu kọ mwẹ, wẹẹ I ma ghi ẹtin ziẹn ọnrẹn, I ghi wa vbe loo vbọ. (Rom 7:​19, 21-​24) Ọ ma gha khuẹrhẹ mẹ hiehie, ne I mu avbe uyinmwẹ na fua. Ẹi vbe ọni ọkpa, iwinna ne I vbe gha ru, na wa gha guọghọ mwẹ egbe, ẹi vbe igho agbọn iran ghaa ha mwẹ re, ena hia na wa ya iro han mwẹ. Igho ne I te gha ya ughaẹdẹ eva khuan vbe I so ihuan, uki eha ẹre I ghi ya khuan rẹn vbe factory ne I na gha winna.

Erhunmwu wa ru iyobọ mẹ ne I ya sẹtin ru fi werriẹ na. Emwi ọvbehe nọ vbe ru iyobọ mẹ, ọre Baibol ne I ghaa tie vbe ẹghẹ hia. Ọ mwẹ ako ọghe Baibol eso nọ gele rhie igiọdu mẹ. Ọkpa vbọ ọre ebe 2 Kọrinti 7:​1, ọ rhie igiọdu ne Ivbiotu e Kristi ne iran “khuẹ [egbe iran] huan hin emwi nọ sẹtin ye egbe ra orhiọn khian ne ọ ma huan.” Ako ọghe Baibol ọvbehe nọ rhie ilẹkẹtin mẹ wẹẹ, I gha sẹtin fi uyinmwẹ dan mwẹ werriẹ, ọre ebe Filipai 4:​13, ọ khare wẹẹ: “I mwẹ ẹtin ne I ya ye egbe miẹn emwi hia vbe ekpa ẹtin ne Kristi rhie mẹ.” E Jehovah gele wa họn erhunmwu mwẹ, ọ na ru iyobọ mẹ ya rẹn otọe ẹmwata ni rre Baibol, kevbe ne I rhie emwi ne I ruẹ ye uyinmwẹ. Ọna ẹre ọre si ẹre, ne I na ghi ya arrọọ mwẹ fi ohan ne Jehova. (1 Pita 4:​1, 2) Vbọ ghi rre ukpo 1997, I na ghi dinmwiamẹ zẹvbe ọkpa vbe Osẹe Jehova.

AFIANGBE NE I HE MIẸN

I wa rẹn wẹẹ, deghẹ ẹre ne I na fi werriẹ, I gha te wu fua nẹ. Nọ gha ya yerriọ, te ọyẹnmwẹ ghi sẹ mwẹ nian! Te Osanobua wa ya ọvbokhan mwẹ ne uwa ighẹ Elvie fiangbe mwẹ. Mẹ vbe ọre, ẹre ọ ghi gba sọyẹnmwẹ iwinna arọndẹ ọghe ẹghẹ hia. Ena hia keghi ya ima sọyẹnmwẹ, erriọ iwinna na, wa vbe sẹ ima ọkẹn. E Jehova ru ẹse, nọ na si mwẹ kẹ egbe.​—Jọn 6:​44.