Avbe Aranmwẹ Yo Ẹrinmwi Vbe Iran Gha Wu Ra?

Ewanniẹn ne Baibol rhie ye inọta na

E Baibol ma ima re wẹẹ, vbe uwu emwi hia na yi ni rre uhunmwu otagbọn na, ibozẹghẹ emwa ẹre ọ khian gha rrie ẹrinmwi. (Arhie Maan 14:1, 3) Te iran khian ya gu e Jesu kha zẹvbe ọba kevbe ohẹn. (Luk 22:28-30; Arhie Maan 5:9, 10) Emwa ni bun sẹ gha rhiọ kpaegbe vbe uhunmwu otagbọn na, iran ghi gha sọyẹnmwẹ agbọn vbe paradais.—Psalm 37:11, 29.

Ako rhọkpa i rre Baibol nọ tama ima wẹẹ, ẹrinmwi rrọọ na yi ne avbe aranmwẹ owa, ra avbe ekita. Avbe aranmwẹ i khian sẹtin ru emwi nọ gha ya iran gha ‘rrie ẹrinmwi.’ (Hibru 3:1) Usun emwi nọ khẹke ne ọmwa ru, ọ ke gbegba nọ gha yo ẹrinmwi ọre wẹẹ, ọ ghi gha mwẹ irẹnmwi, ọ ghi gha mwẹ amuẹtinyan, ọ ghi vbe gha lele uhi ọghe Osanobua. (Matiu 19:17; Jọn 3:16; 17:3) Emwa nagbọn ọkpa ẹre Osanobua yi nọ gha rrọọ vbe etẹbitẹ.—Gẹnẹsis 2:16, 17; 3:22, 23.

Ne emwa nagbọn mieke na sẹtin yo ẹrinmwi, te iran gha ka wu nẹ, a ghi vbe huẹn iran kpaegbe. (1 Kọrint 15:42) E Baibol guan kaẹn emwa eso na huẹn kpaegbe vbe uwu. (1 Ọba 17:17-24; 2 Ọba 4:32-37; 13:20, 21; Luk 7:11-15; 8:41, 42, 49-56; Jọn 11:38-44; Iwinna 9:36-42; 20:7-12) Vbọrhirhighayehẹ, emwa nagbọn ẹre ehia wa gha khin, aranmwẹ ma gha rrọọ.

Avbe aranmwẹ mwẹ evbọ rrọọ (soul) ra?

Ẹo. E Baibol khare wẹẹ, evbọ rrọọ ẹre avbe aranmwẹ kevbe emwa nagbọn khin. (Nọmbas 31:28) Vbe ẹghẹ ne Osanobua ya yi okpia nokaro nọ re Adam, ọ ma rhie evbọ rrọọ nẹẹn, sokpan ọ keghi “khian ọmwa nọ rrọọ.” (Gẹnẹsis 2:7, futnot) Emwi eva ẹre a ya rẹn evbọ rrọọ: “ekẹn nọ rre otọ” kevbe “uhiọnrọnmwẹ arrọọ.”

Evbọ rrọọ gha sẹtin wu ra?

Ẹẹn, E Baibol ma ima re wẹẹ, evbọ rrọọ gha sẹtin wu. (Lẹvitikọs 21:11, futnot; Ẹzikiẹl 18:20) Avbe aranmwẹ kevbe emwa nagbọn gha wu, iran ghi dọlegbe khian ekẹn. (Asan Ibo 3:19, 20) Ọni nọ wẹẹ, iran i khian ghi gha rrọọ.a

Avbe aranmwẹ ru orukhọ ra?

Ẹo. A gha wẹẹ ọmwa ru orukhọ ọ rhie ma wẹẹ, emwi ne ọmwa nii mu roro ra emwi nọ ru gbodan ghee uhi ọghe Osanobua. Ọmwa nọ mwẹ ẹwaẹn na ya ru emwi nọ khẹke, ẹre ọ sẹtin ru orukhọ, sokpan, avbe aranmwẹ i mwẹ ẹwaẹn vberriọ. Avbe aranmwẹ i roro emwi iran ke gha ru ẹre, vbe ovbi ẹghẹ kherhe ne iran ya vbe agbọn. (2 Pita 2:12) Ẹdagbọn iran gha fo, iran ghi wu, agharhemiẹn wẹẹ, iran ma ru orukhọ.

Osanobua kpasẹ yọ na gha ya obọ atosi mu avbe aranmwẹ ra?

Ẹo. Osanobua rhie asẹ ne emwa nagbọn, ne iran gha mwẹ ọdakha yan avbe aranmwẹ, sokpan, ọ ma kpasẹ yọ ne iran gha ya obọ atosi mu iran. (Gẹnẹsis 1:28; Psalm 8:6-8) Osanobua wa mwẹ ẹmwẹ dọmwadẹ aranmwẹ vbe ekhọe, uhiẹn ya sẹ egbe avbe ahianmwẹ ne giẹrẹ. (Jona 4:11; Matiu 10:29) Ọ keghi gbe uhi ne eguọmwadia ẹre, ne iran gha ya obọ esi mu avbe aranmwẹ.—Ẹksodọs 23:12; Diuteronomi 25:4; Itan 12:10.

Avbe ako ọghe Baibol ni guan kaẹn avbe aranmwẹ

Gẹnẹsis 1:28: “Ẹre Osanobua na ghi fiangbe [emwa nagbọn nokaro], ọ na tama iran wẹẹ, ‘Wa gha biẹlẹ ne uwa gha muan yọ, ne uwa gba ehe hia vbe agbọn, ne uwa gha khaevbisẹ yan avbe ehẹn ni rre okun, avbe ahianmwẹ ni tin vbe iso kevbe avbe aranmwẹ hia ni rre uhunmwu otagbọn.’”

Emwi na ya ẹmwẹ na kha: Osanobua rhie asẹ ne emwa nagbọn, ne iran gha mwẹ ọdakha yan avbe aranmwẹ.

Nọmbas 31:28: “U ghi rhie ọkpa vbe uwu oghunmwu iyisẹn isẹn ye otọ vbe avbe nọ sẹ avbe ivbiyokuo obọ, zẹvbe igho uhunmwu na zẹ gie Nọyaẹnmwa, erriọ u gha vbe ru avbe ẹmila, ekẹtẹkẹtẹ, ohuan kevbe ẹwe.”

Emwi na ya ẹmwẹ na kha: Evbọ rrọọ ẹre avbe aranmwẹ kevbe emwa nagbọn khin.

Itan 12:10: “Ọmwa esi ghi gha gbaroghe emwi irri ẹre.”

Emwi na ya ẹmwẹ na kha: Emwa esi keghi ya obọ esi mu avbe aranmwẹ, uhiẹn ya sẹ egbe aranmwẹ ne iran mwẹ vbe owa.

Matiu 10:29: “Agiẹghẹ ọkpa nọ ma sẹ emwi, ẹre a ya dẹ ahianmwẹ ne giẹrẹ eva na tie ẹre sparro, ra ẹ i re erriọ? Ọrheyerriọ, ọkpa i rrọọ vbe uwu iran nọ gha de fi otọ, vbene Erha uwa nọ rre ẹrinmwi i na rẹn.”

Emwi na ya ẹmwẹ na kha: Aro Osanobua wa sotọ vbe egbe avbe aranmwẹ, erriọ vbe ya gbaroghe iran, uhiẹn ya sẹ egbe avbe ahianmwẹ ne giẹrẹ.

a Deghẹ u hoo ne u rẹn sayọ, ya ghee uhunmwuta 6 ọghe ebe na De Emwi Ne Baibol Gha Sẹtin Maa Ima Re?