Vbọzẹ Na Na Tie Jesu Ovbi Osanobua?
Ewanniẹn ne Baibol rhie ye inọta na
E Baibol wa mobọ tie Jesu “Ovbi Osanobua.” (Jọn 1:49) Ẹmwẹ na ighẹ “Ovbi Osanobua” ya ima rẹn wẹẹ, Osanobua ọre Ayi nọ yi emwi hia, irẹn ọre Ẹzi ọghe arrọọ hia, uhiẹn ya sẹ egbe arrọọ ọghe Jesu. (Psalm 36:9; Arhie Maan 4:11) E Baibol ma kha wẹẹ, te Jehova wa na ẹko ovbi ẹre zẹvbe ne erha na ẹko ọmọ.
E Baibol vbe tie avbe odibosa “ivbi Osanobua ọghe ẹmwata.” (Job 1:6) Ọmwa nagbọn ne Osanobua ka gha yi ọre Adam, a vbe gha tie ẹre “ovbi Osanobua.” (Luk 3:38) Vbọrhirhighayehẹ, rhunmwuda ne Jesu na re ọmwa nokaro ne Osanobua yi, kevbe wẹẹ, irẹn ọkpa ẹre Osanobua tobọre yi, e Baibol keghi gie Jesu zẹvbe Ovbi Osanobua nọdiọn.
Jesu ka gha rre ẹrinmwi, a ke biẹ ọre vbe agbọn na ra?
Ẹẹn. Ọmọ orhiọn ẹre Jesu ka gha khin, a te miẹn wẹẹ a biẹ ọre vbe agbọn na. Jesu tobọre khare wẹẹ: “Te I ke ẹrinmwi gha dee.”—Jọn 6:38; 8:23.
Jesu ẹre Osanobua ka gha yi, ọ ke yi emwi nikẹre hia. Vbe Baibol ghi guan kaẹn Jesu, ọ na kha wẹẹ:
“Irẹn ọre ọmọ ọdiọn vbe uwu emwi hia na yi.”—Kọlọsi 1:15.
Irẹn ọre “okaro vbe uwu emwi hia ne Osanobua yi.”—Arhie Maan 3:14.
Ẹmwẹ akhasẹ na keghi sẹ vbe egbe Jesu, nọ khare wẹẹ, irẹn “ka gha rrọọ nẹ, vbe ẹghẹ nọ kpẹẹ re.”—Maika 5:2; Matiu 2:4-6.
De emwi ne Jesu ghaa ru, ọ ke gha die agbọn na?
Ukpo nọ yo ẹre Jesu ghaa ye vbe ẹrinmwi. Jesu ya unu kaẹn ukpo nọ ghaa ye vbe ọ na erhunmwu, ọ na kha wẹẹ: “Evbavba, mu uyi yọ mwẹ egbe, egbe uyi ne I ka gha mwẹ vbe I gu ruẹ rrọọ, a te miẹn wẹẹ a yi agbọn na.”—Jọn 17:5.
Jesu ru iyobọ ne Erhae vbọ yi emwi hia. Jesu kegha gu Osanobua winna “zẹvbe ọka iwinna.” (Itan 8:30) Vbe Baibol ghi guan kaẹn Jesu, ọ na kha wẹẹ: “Obọ ẹre, ẹre a la yi emwi hia, irẹn ẹre a vbe yi ehia na.”—Kọlọsi 1:16.
Jesu ẹre Osanobua loo ro ya yi emwi hia nikẹre. Ya sẹ egbe avbe odibosa, uhunmwu otagbọn na, kevbe emwi hia ni rre orere iso. (Arhie Maan 5:11) A gha sẹtin ya odẹ ne Jehova vbe Jesu ya ku obọ kugbe ya yi emwi ughughan, ya gie vbene ọmwa nọ draw e plan ọghe owa kevbe ọmwa nọ bọ owa ya ku obọ kugbe hẹ. Ọmwa nọ draw e plan ọghe owa, gha ghi draw ẹre nẹ; ọmwa nọ bọ owa ghi loo e plan nii ya bọ nene owa.
Irẹn ọre Ẹmwẹ nii. Vbe Baibol ghi guan kaẹn Jesu vbene ọ te gha die agbọn na, ọ na tie ẹre “Ẹmwẹ nii.” (Jọn 1:1) Ọna rhie ma wẹẹ, Osanobua ghaa loo e Jesu ya gu avbe odibosa nikẹre guan, ọ vbe gha loo e Jesu ya rhie adia ne iran.
Ọ khọ wẹẹ, Osanobua vbe gha loo e Jesu zẹvbe Ọmunu ọghẹe, vbe ọ gha khian gu emwa nagbọn guan. Egbọre Jesu ẹre Osanobua loo ro ya gbe uhi ne Adam kevbe Ivi vbe ogba ọghe Idẹn. (Gẹnẹsis 2:16, 17) Ọ gha kẹ, Jesu ẹre ọ gha re odibosa nọ ghaa su Ivbi Izrẹl vbe uwu ato, irẹn ẹre ọ yan urhu nọ ghaa rhie adia ne Ivbi Izrẹl.—Ẹksodọs 23:20-23.a
a Ẹ i re Jesu ọkpa ọre odibosa ne Osanobua loo ro ya gu emwa nagbọn guan. Vbe igiemwi, ọ vbe loo avbe odibosa ọvbehe ya yi Uhi ne Ivbi Izrẹl.—Iwinna 7:53; Galetia 3:19; Hibru 2:2, 3.