Psalm 37:4​—“Gha Gualọ Ọyẹnmwẹ Ruẹ Vbe Uwu E NỌYAẸNMWA”

“Gi e Jehova gha ya ruẹ sọyẹnmwẹ; ọ gha ru emwi nọ da ruẹ vbe orhiọn nuẹn.”​—Psalm 37:​4, New World Translation.

“Gha gualọ ọyẹnmwẹ ruẹ vbe uwu e Nọyaẹnmwa; irẹn gha vbe rhie iho ekhọe ruẹ nuẹn.”​—Psalm 37:4, E Baibol Ẹdo.

Emwi Ne Psalm 37:4 Demu

Ọsihuan na keghi rhie igiọdu ne eguọmwadia Osanobua ne iran gha sọyẹnmwẹ, rhunmwuda ne iran na re ọsie Osanobua. Emwa hia ni re ọsie Jehovaa gha sẹtin gha mwẹ ilẹkẹtin wẹẹ, Osanobua gha ru emwi nọ da iran vbe orhiọn deghẹ ọ na gua ahoo ọghẹe ro.

“Gi e Jehova gha ya ruẹ sọyẹnmwẹ.” A gha vbe sẹtin zedu ifiẹmwẹ na vbenian, “gi e Jehova gha re ọmwa nọ ghi ya ruẹ sọyẹnmwẹ sẹ,” “gi ugamwẹ ne u rhie ne NỌYAẸNMWA gha ya ruẹ sọyẹnmwẹ,” ra “gi eyan ne NỌYAẸNMWA ru gha ya ruẹ sọyẹnmwẹ.” Emwi na hoo na ta ọre wẹẹ, te ọ khẹke ne ugamwẹ ne ima rhie ne Jehova nọ re Osa ọghe ẹmwata gha re emwi nọ ghi ya ima “sọyẹnmwẹ sẹ.” (Psalm 37:​4, futnot) Vbọzẹ na na kha vberriọ?

Aro ne Jehova ya ghee emwi, ẹre emwa ni gae vbe ya ghee emwi zẹvbe ne iran ruẹ ọre vbe Baibol. Gberra wẹẹ iran rẹn Osanobua, iran vbe rẹn wẹẹ, emwi ẹwaẹn nọ deghẹ iran na gha họn ẹmwẹ nẹẹn. Rhunmwuda ọni, ekhọe iran i bu abe gbe iran, iran i vbe ya obọ iran si ọlọghọmwa gie egbe iran. (Itan 3:​5, 6) Vbe igiemwi, iran i mu ohu, ra ne iran gha gbọvo, adeghẹ ọ na yevbe na miẹn wẹẹ, agbọn wa maan emwa ni fi ibeleku. (Psalm 37:​1, 7-9) Emwa ọghe Osanobua keghi sọyẹnmwẹ rhunmwuda, iran rẹnrẹn wẹẹ, Osanobua gha rherhe wabọ uyinmwẹ agbọmwa ekueku, ọ ghi vbe san eguọmwadia ọghẹe ni yin uyinmwẹ esi ẹse. (Psalm 37:34) Ọyẹnmwẹ wa vbe sẹ iran rhunmwuda iran rẹn wẹẹ, iran ya ẹko rhiẹnrhiẹn Erha iran nọ rre ẹrinmwi.​—Psalm 5:12; Itan 27:11.

“Ọ gha ru emwi nọ da ruẹ vbe orhiọn nuẹn.” A gha vbe sẹtin zedu ifiẹmwẹ na vbenian, “ọ gha họn erhunmwu ruẹ” ra “ọ gha gele rhie emwi ne u gualọ nuẹn.” Ọghe ne ẹmwata, ma rẹnrẹn wẹẹ, ẹ i re emwi hia ne ima wa nọ e Jehova re, ẹre ọ khian ru ne ima. Vbe na ghee evbibiẹ emọ nọ mwẹ ekhọe esi, e Jehova rẹn emwi nọ khẹke ivbi ẹre. Deba ọni, emwi ne ima nọ vbe erhunmwu kevbe odẹ ne ima ya loo ẹdagbọn ima, te ọ khẹke nọ gua ilele kevbe ahoo ọghe Osanobua ro. (Itan 28:9; Jems 4:3; 1 Jọn 5:14) Ọ ghaa yerriọ, ma gha sẹtin na erhunmwu gie Jehova nọ re “Osa nọ họn erhunmwu,” ma ghi vbe gha mwẹ ilẹkẹtin wẹẹ, ọ gha họn erhunmwu ima.​—Psalm 65:2; Matiu 21:22.

Emwi Ughughan Ni Ginna Psalm 37:4

E Devid ne Ọba ọghe Izrẹl nẹdẹ, ẹre ọ gbẹn ebe Psalm 37. Ọkade ọkade ẹre ọ ya mwamwa ebe Psalm na.b

Ẹghẹ ni bun ẹre emwa ya gha ya obọ dan mu e Devid. Ọba ighẹ Sọl kevbe emwa ọvbehe na gha gualọ ẹre ne iran gbẹ ẹre rua. (2 Samuẹl 22:1) Ọrheyerriọ, e Devid na ye ya ekhọe hia mu ẹtin yan Osanobua. E Devid rẹnrẹn wẹẹ, ọ gha sẹ ẹghẹ, e Jehova gha rri emwa dan oya. (Psalm 37:​10, 11) Ọ gha khọnrẹn ne iran yevbe irunmwu ne ebe ẹre ye sọguọsọguọ, ẹghẹ gha sẹ, te a khian wabọ iran rua.​—Psalm 37:​2, 20, 35, 36.

Ebe Psalm 37 keghi guan kaẹn afiangbe ne emwa ni lele uhi Osanobua khian miẹn, kevbe emwi nọ khian sunu daa emwa nẹi lele uhi Osanobua. (Psalm 37:​16, 17, 21, 22, 27, 28) Ebe Psalm 37 gha ru iyobọ ne ima ya gha mwẹ ẹwaẹn, ọ ghi vbe ru iyobọ ne ima ya gha re emwa ni ya ẹko rhiẹnrhiẹn Osanobua.

Ghee vidio ne kuẹi na, ne u mieke na rẹn emwi ne ebe Psalm guan kaẹn.