Itan 17:17—“Ọse Ọghe Ẹmwata Keghi Rhie Ahoẹmwọmwa Ma Vbe Ẹghẹ Hia”

Emwi Ne Itan 17:17 Demu

Avbe ọse ọghe ẹmwata gia mu ẹtin yan. Te iran yevbe ọtẹn nọ kakabọ sikẹ ọmwa, iran i fi iyeke gbe ọmwa, katekate vbe emwi ghaa lọghọ ọmwa.

“Ọse ọghe ẹmwata keghi rhie ahoẹmwọmwa ma vbe ẹghẹ hia.” A gha sẹtin vbe zedu ẹmwẹ na vbenian, “ẹghẹ hia ẹre avbe ọse ya rhie ahoẹmwọmwa ne iran mwẹ ma.” Ẹmwẹ e Hibru na zedu ẹre zẹvbe “ahoẹmwọmwa” vbe ako na, gberra vbene emwi wa ye hẹ vbe ekhọe ọmwa. Sokpan, ọ keghi re egbe ahoẹmwọmwa ne ọmwa ya ekhọe hia rhie ma, ahoẹmwọmwa na ghi vbe rhiegbe ma vbe emwi ne ọmwa nii ru. (1 Kọrinti 13:4-7) Avbe ọse ni hoẹmwẹ egbe vbe odẹ vbenian, keghi rhikhan mu egbe, uhiẹn, vbe iran ghaa mwẹ egbe ẹzọ, ra iran ghaa rre uwu ọlọghọmwa. Ekhọe hia ẹre iran ya yabọ egbe. (Itan 10:12) Ọmwa ghaa mwẹ egbe ahoẹmwọmwa vbenian, ẹ i khian gha gbọvo ọsiọre vbe emwi ghaa dunna nẹẹn. Sokpan, ọ ghi gu ẹre gha ghọghọ.—Rom 12:15.

“Ọse ọghe ẹmwata . . . [keghi re] ọtẹn nọ gha sẹtin ru iyobọ ne ọmwa vbe ẹghẹ ne emwi ya lọghọ.” Itan na ya ima rẹn wẹẹ, etẹn gha wa sẹtin kakabọ gu obọ egbe. Nọnaghiyerriọ, ma ghaa hia ne ima ru iyobọ ne ọse ima, vbe emwi ghaa lọghọ ẹre, te ima ru emwi ne ovbi erha ra ovbi iye gha ru ne ọtiọnrẹn nọ rre uwu ọlọghọmwa. Yevbesọni, edanmwẹ rhọkpa i khian sẹtin si ighaegbe ne avbe ọse vbenian. Nọghayayerriọ, ahoẹmwọmwa ne iran mwẹ ne egbe ghi gha wegbe sayọ, iran ghi vbe gha rhie ọghọ ne egbe sayọ.

Emwi Ughughan Ni Ginna Itan 17:17

Ma ghaa tie ebe Itan, ọ gha ru iyobọ ne ima ya gha mwẹ ẹwaẹn. Te a gbẹnnẹ ẹmwẹ ni rre ebe Itan kuẹi kuẹi, ne ọmwa nọ tie ẹre mieke na sẹtin gha mu emwi nọ tie roro. Ọba ighẹ Sọlomọn ẹre ọ gbẹnnẹ abọ ni bun sẹ vbe ebe Itan. Odẹ nọ ya gbẹn ebe na, keghi re odẹ ne Ivbi e Hibru ya gbẹn ekharha, nọ gha te ya loo ẹmwẹ ọkpọkpa, ọ na loo ẹmwẹ ni khọ egbe kevbe ẹmwẹ ni vbe lughaẹn ne egbe ya nianian ẹmwẹ nọ hoo nọ ta. Ebe Itan 17:17 keghi re igiemwi ọghe ekharha ni khọ egbe, te abọ nogieva rhan otọ abọ nokaro sayọ. Ebe Itan 18:24 keghi re igiemwi ọghe ẹmwẹ ni lughaẹn ne egbe. “Ọ mwẹ avbe ọse eso ni mu egbe ni iran ya gbele egbe rua, sokpan avbe ọse eso rrọọ ni maan sẹ etẹn.”

Vbe ẹghẹ ne Sọlomọn ya gbẹn ebe Itan 17:17, ọ gha kẹ, emwi nọ ghaa mwẹ vbe ekhọe ọre vbene erhae ighẹ Devid kevbe Jonatan ne ovbi Ọba ighẹ Sọl ya gu obọ egbe hẹ zevbe ọse. (1 Samuẹl 13:16; 18:1; 19:1-3; 20:30-34, 41, 42; 23:16-18) Agharhemiẹn wẹẹ, ẹ i re erha ọkpa vbe iye ọkpa ẹre ọ biẹ e Devid vbe Jonatan, te iran wa gu obọ egbe zẹvbe etẹn. Te Jonatan kue rhie uhunmwu mwẹ atatabọ nọ mieke na gbogba ga ọsiọre ighẹ e Devid.a

Odẹ Ọvbehe Na Ya Zedu Ebe Itan 17:17

“Ọse keghi rhie ahoẹmwọmwa ma vbe ẹghẹ hia, ọ ghi do khian ọtẹn vbe ẹghẹ ibavbaro.”—The Bible in Basic English.

“Ọsiọmwa ẹre ọ gele re ọsiọmwa, ọtẹn nọ ru iyobọ ne ọmwa vbe ẹghẹ ọlọghọmwa ẹre nọ.”—The Moffatt Translation of the Bible.

“Ẹghẹ hia ẹre ọse ya rhie ẹre ma wẹẹ ọsiọmwa ẹre irẹn khin—ẹdẹ oseghe ẹre a biẹ ọre ba.”—The Complete Jewish Study Bible.

Ghee vidio ne kuẹi na, ne u ya rẹn emwi ne ebe Itan guan kaẹn.