Vbene A Ya Zedu Asikoko Odin Ọghe 2020 Nọ Re “Wa Gha Sọyẹnmwẹ Vbe Ẹghẹ Hia”!

Vbe uki e July kevbe August 2020, etẹn ni rre ehe hia vbe uhunmwu otagbọn na gha ghee vidio ọghe asikoko odin vbe ẹghẹ ọkpa. Ọna ọre ẹghẹ okaro ne egbe emwi vbenian khian ya sunu. Ne emwamwa na mieke na sẹtin mwẹ uhunmwu, te a khian zedu avbe ọta kevbe vidio ọghe asikoko odin na ghee urhuẹvbo nọ gberra 500. Ukpo ọkpa, ẹre a te ya ru egbe iwinna vbenian, ugbẹnso ọ vbe gberra vberriọ. Sokpan rhunmwuda ẹmwẹ coronavirus nọ rre otọ, odẹ uki enẹ ẹre etẹn ni ru iwinna izedu khian ghi ya zedu emwi hia nọ ghi dekaẹn Asikoko Odin Ọghe 2020.

Etẹn ni winna vbe Translation Services kevbe Global Purchasing vbe Igiogbẹ Ọghe Avbe Osẹe Jehova, wa vbe ru iyobọ ye iwinna na. Etẹn ni winna vbe Translation Services keghi do bẹghe ẹre wẹẹ, etẹn nibun ni ru iwinna izedu i mobọ mwẹ avbe emadogua ne iran khian ya ru iwinna na, katekate avbe microphone na ya rrẹkọdi. Etẹn ni rre Global Purchasing keghi ru emwamwa na mieke na sẹtin dẹlẹ avbe microphone ni re 1,000. A gha ghi dọe nẹ, a ghi muẹn gha rrie ehe ughughan ni gha sẹ odẹ 200.

Na mieke na sẹtin tete igho, Global Purchasing keghi dẹlẹ avbe microphone na hia uhukpa, iran na vbe viọ re gha rrie ihe ọkpa, iyeke ọni, iran na ghi ke evba muẹn gie etẹn ni ru iwinna izedu. Rhunmwuda ne ima na dẹlẹ e microphone nibun uhukpa, igho ne ima ghi hae ye microphone ọkpọkpa, kevbe igho na vbe ya muẹn gie ima keghi do gha re $170 U.S. Ọna keghi ro sẹ igho ne ima gha te ya dẹlẹ ọkpọkpa.

Uki April kevbe May 2020, ẹre Global Purchasing ya gha ru emwamwa na, emwa ni do ẹki ma mobọ gha winna vbuwe ẹghẹ na kha na, rhunmwuda ẹmwẹ coronavirus nọ rre otọ. Vbọrhirhighayehẹ, vbene uki e May te fo, avbe emadogua na keghi sẹ obọ etẹn ni rre abotu nibun, etẹn ni rre ugha izedu ughughan na tie ẹre RTO, kevbe etẹn ni ru iwinna izedu vbe ihe ughughan.

Jay Swinney nọ siẹnro iwinna ọghe Global Purchasing keghi kha wẹẹ, “Etẹn ni rre ugha iwinna ughughan vbe Bẹtẹl kevbe avbe ọduẹki ni rre orere wa kakabọ ku obọ kugbe vbuwe ẹghẹ na ya gha ru avbe emwamwa na. . . . E Jehova ẹre ọ ru iyobọ ne ima, ne ima na sẹtin dẹlẹ avbe emadogua na vbe ẹgiẹgiẹ, kevbe ne ima na vbe sẹtin loo igho ne emwa ya ru izọhẹ, ya ru iyobọ ne etẹn ne ima gba ga vbe odẹ nọ ghi maan sẹ.”

Nicholas Ahladis, nọ winna vbe Translation Services keghi kha wẹẹ: “Emwa ni ru iwinna izedu, ni ma sẹtin gha kpa hin owa rre vbe ẹghẹ nii, wa kakabọ ghọghọ vbe a ghi mu avbe microphone na gie iran. Agharhemiẹn wẹẹ, ihe ughughan ẹre dọmwadẹ ọghẹe ghaa ye, iran na ye sẹtin ku uhunmwu kugbe, iran na zedu avbe ọta, ikueta, kevbe ihuan vbe urhuẹvbo nọ gberra 500, iran na vbe rrẹkọd ẹre.”

Ọna keghi re ọkpa vbe usun iwinna nibun na ru, na mieke na sẹtin ru emwamwa ọghe Asikoko Odin Ọghe 2020 nọ mwẹ uhunmwuta nọ khare wẹẹ, “Wa Gha Sọyẹnmwẹ Vbe Ẹghẹ Hia”!, ne etẹn ni rre ehe hia vbe uhunmwu otagbọn na mieke na sọyẹnmwẹ ọnrẹn. Izọhẹ ne uwa ye donate.jw.org kevbe obẹlẹ ọvbehe ya ru, ẹre ọ zẹe ighẹ a sẹtin dẹlẹ avbe emadogua na.