Ako Ọghe Baibol Na Tie—De Emwi Ne Baibol Gha Sẹtin Maa Ima Re?
UHUNMWU EBE 1
DE ARO ỌMWA NE OSANOBUA KHIN?
(Job 34:10-12) “Wa danmwehọ mwẹ, wa ni rẹn otọ emwi, Osanobua ne Udazi gha ru emwi ne ọ ma gba ra? 11 Te irẹn san emwa ẹse [ye] emwi ne iran ru, ọ ghi vbe gha ru iran emwi ne ọ maan iran. 12 Osanobua ne Udazi i ru emwi dan, ẹi vbe ru ọmwa rhọkpa emwi ne ọ ma ke.
(Psalm 37:9-11) Iran ni mu ẹtin yan e Nọyaẹnmwa, ẹre ọ ra yan otọe nii, sokpan a gha [wabọ emwa dan rua]. 10 Vbe ọ ma he kpẹe wan, a gha ho emwa dan bẹkun. U gha gualọ iran, u i ra miẹn iran. 11 Sokpan [emwa] ọmẹhẹ ẹre ọ ra yan otọe nii, iran ghi vbe gha ye ọfunmwegbe zọmọ vbe uwu ẹre.
(1 Pita 5:7) Ye enegbe ruẹ hia yan rẹn, rhunmwuda, irẹn ẹre ọ gbaroghe ruẹ.
(Iwinna 17:11) Emwa ni rre ẹvbo na, ọre ẹdẹ gbe vbe ẹko sẹ iran ni rre Tẹsalonaika. Iran keghi wa gbe ẹkun sẹ otọ gha danmwehọ ikporhu nii, iran kegha tie Ebe [Nọhuanrẹn] ẹsẹse gualọ otọ ẹre, ne iran miẹn ehe na rẹn adeghẹ ẹmwata ẹre ẹmwẹ ne Pọl tae khin.
UHUNMWU EBE 2
E BAIBOL—EBE NỌ KE OBỌ OSANOBUA RRE
(2 Timoti 3:16) Rhunmwuda, Osanobua ẹre ọ rhie ẹre ye iran ekhọe ighẹ emwa ni gbẹnnẹ avbe Ebe nii hia, ọ keghi vbe re emwi esiesi na ya maa emwa emwi ẹmwata nii, na ya gbe ọmwa hin ọkhọ rre, na ya rhie emwi na ma ru ẹse ye vbe nọ te ke yi, kevbe na ya bu ọmwa ude na gha yin ẹse.
(Aizaia 48:17) Osanobua Nọhuanrẹn ọghe Izrẹl, e Nọyaẹnmwa ne ọ miẹn uwa fan khare wẹẹ, “Mẹ ọrọre Nọyaẹnmwa ne Osanobua uwa, ọmwa nọ hoo nọ maa uwa emwi [ne agbọn maan uwa], Ọmwa nọ dia uwa ye odẹ ne uwa gha la.
(Aizaia 44:27–45:2) I ya ukpẹmwẹ ọkpa ne I tae si okun ka. 28 I tama Sairọs wẹẹ, ‘Wẹ ọrọre ọmwa nọ gha ya gha khaevbisẹ mẹ; u gha ru vbene I hoo ne u ru: U gha tae wẹẹ na dọlọ bọ e Jerusalẹm kevbe wẹẹ ne a gbe ẹyotọ Ọguosa.
45 E Nọyaẹnmwa zẹ Sairọs nẹ ne ọ rriọba. Ọ vbe zẹ ọre nẹ ne ọ gha khọn avbe uhunmwu ẹvbo miotọ; ọ gie ẹre ne ọ ya bannọ ẹtin hin obọ avbe ọba rre, e Nọyaẹnmwa gha kie urho avbe okpẹvbo nẹẹn. E Nọyaẹnmwa tama e Sairọs wẹẹ, 2 “Mẹ tobọ mwẹ ẹre ọ ra zẹ odẹ nuẹn, I ghi gha guọghọ avbe oke nekhua sotọ deba avbe oke negiẹrẹ. I gha guọghọ avbe ẹkhu ẹrọnmwọ sotọ, I ghi rẹnkhẹn avbe ogba ematọn ni rrọọ.
(Nọmbas 23:19) Osanobua i ye vbe emwa ne agbọn, ni ta ohoghe; irẹn i re ọmwa kẹkan nọ gbe yo gbe rre. Emwi nọ rhirhi ta, ẹre ọ ru; ọ gha guan, a ghi ru ẹre.
(Hibru 4:12) Rhunmwuda, ekpakpasusu ọre ẹmwẹ Osanobua khin. Ọ mu sẹ agbada ke agbada nọ mwẹ unu eva, te ọ fiaẹn la ehia fo, ya sẹ ehe ne orhiọn kevbe ekhọe na sikan mu egbe, kevbe ehe ne akhuẹn kevbe efun nọ rre uwu ugboloko na vba egbe. Irẹn ẹre ọ ta vbene iziro kevbe ahoo [ọghe] ekhọe emwa ne agbọn ye hẹ.
UHUNMWU EBE 3
VBỌZẸE NE OSANOBUA NA YI EMWA NAGBỌN?
(Jems 1:13-15) [Ọmwa ghaa rre edanmwẹ,] we nẹ ghẹ gha kha wẹẹ, “Obọ Osanobua edanmwẹ na ke rre.” Rhunmwuda ai sẹtin ye ọkhọ danmwẹ Osanobua ghee, irẹn tobọ ẹre i vbe danmwẹ ọmwa rhọkpa ghee. 14 Emwi dan ne ọmwa hoo gha ghi bi ẹre uhunmwu fua nẹ, ighẹ ifi ẹre ghi muẹn nẹ, ẹghẹ nii, ọ ghi de fi uwu edanmwẹ. 15 Emwi dan nọ hoo gha ghi hanmwa nẹ, ọ ghi biẹ orukhọ, orukhọ gha ghi wan nẹ, ọ ghi biẹ uwu.
(Gẹnẹsis 3:1-5) Ẹyẹn ke gha re nọ ghi ru ero sẹ vbe uwu aranmwẹ ne Nọyaẹnmwa Osanobua yi hia. Ẹyẹn keghi nọ okhuo nii wẹẹ, “Te Osanobua gele wẹẹ ne uwa ghẹ rri ọmọ erhan ni rre uwu ogba na rhọkpa ra?” 2 Okhuo nii keghi wanniẹn, “Ma sẹtin rri ọmọ erhan ke erhan vbe uwu ogba na, 3 sokpan a ma wẹẹ erhan nọ rre adesẹneva ẹre. Osanobua wẹẹ ne ima ghẹ rri ọmọ erhan nii ra na ye obọ kan rẹn, ọ wẹẹ ima gha ru ẹre, ma gha wulo.” 4 Ẹyẹn keghi wanniẹn wẹẹ, “Ọnii i re ẹmwata; wa i wulo. 5 Te Osanobua tae vberriọ, rhunmwuda, ọ rẹnrẹn wẹẹ, wa gha rriọe, wa gha do gha ye vbe Osanobua, wa ghi do gha rẹn emwi nọ maan ke ne ẹi maan, zẹ vbene irẹn ye.”
(Rom 5:12) Obọ orhiọnkpa kẹkan ẹre orukhọ la la agbọn, orukhọ keghi rhie uwu mwẹ obọ gha dee. Emwi nọ ghi kẹrikian ọrọre wẹẹ, uwu keghi sẹ egbe emwa ni rre agbọn na hia, rhunmwuda ighẹ ima hia ẹre ọ ru orukhọ.
(Itan 27:11) Gha wan ovbi mwẹ, ne u gi ẹko gha rhiẹnrhiẹn mwẹ, [ne l sẹtin] gha ze ẹmwẹ wanniẹn ọmwa nọ . . . gbodan ghee mwẹ.
(Daniẹl 2:44) “Vbe ẹghẹ avbe nikhaevbisẹ na, Osanobua ẹrinmwi gha mu arriọba ne ẹi ra fo vbe otọ gbọ. Ai ra vbe sẹtin khọn rẹn ẹdẹ, sokpan, irẹn gha fuẹn avbe arriọba nii fẹẹrẹ, irẹn ghi gha rrọọ ẹdẹdẹmwẹdẹ,
(Jọn 3:16) Rhunmwuda Osanobua hoẹmwẹ agbọn na sẹrriọ zẹẹ, ọ na rhie Ovbi ẹre ukpọmọkpa ne ọmwa, ne ọmwakọmwa nọ rhirhi yaeyi ghẹ wirua, sokpan nọ gha mwẹ [arrọọ] ne ẹi mwẹ ọfo.
(Jọn 17:3) Ọna ọrọre nene arrọọ ne ẹi fo wẹẹ, ne emwa ne agbọn rẹn ruẹn zẹvbe Osanobua ọkpa nọ re ọghe ẹmwata, kevbe ne iran rẹn Jesu Kristi, ọmwa ne uwẹ gie.
(Aizaia 32:18) Emwa Osanobua gha fe vbe obọ ukpokpo, owa iran ghi gha re ne ọfunmwegbe ye kevbe ne ẹi mwẹ ẹbe.
(Maika 4:4) Edọmwadọghẹe gha rrọọ vbe ọfunmwegbe vbe ugbo azara kevbe oliv ẹre, ọmwa rhọkpa i ghi vbe [ya ohan muẹn]. E Nọyaẹnmwa ne Oghodua ru eyan na nẹ.
(Aizaia 65:21-24) Emwa gha bọlọ owa, iran ghi vbe yin [ẹnrẹn], ẹrrẹe i ra viọ iran gha loo. Iran gha mu ugbo azara, iran ghi vbe ya ayọn ẹnrẹn ru. 22 Ẹrrẹe i ra vbe rhie ẹre da. Emwa mwẹ gha wa tọ zẹvbe erhan. Iran gha miẹn emwi ne iran miẹn ẹsọn yi ya ru ẹsẹsẹmwẹse. 23 Emwi ne iran ru gha wa gha dinna odẹ, ọkhọ i ra vbe sunu vbe egbe ivbi iran, I gha fiangbe iran kevbe uniẹn ivbi iran ni dee ẹdẹdẹmwẹdẹ. 24 Iran te na erhunmwu fo, erhunmwu iran, mẹ họn nẹ.
(Arhie Maan 11:18) Okuosu keghi rri iran ni ma yayi, rhunmwuda ọ sẹ ẹghẹ ne ohu ruẹ gha ya rre, na do bu ohiẹn iran ni wulo nẹ. Ẹghẹ sẹ na gha ya san avbe akhasẹ ne eguọmwadia ruẹ ẹse, ke avbe emwa ruẹn, ni mu ohan ruẹn, ni kpọlọ kevbe ni kanmwa. Ẹghẹ sẹ na ya fuẹn iran an ighẹ iran ni fuẹn agbọn ruan.”
(Aizaia 11:6-9) Avbe oduma kevbe ohuan gha gba gha rrọọ kugbe vbe ọfunmwegbe, avbe ogioha gha gu avbe ivbi ẹwe lovbiẹ, ivbi ẹmila kevbe ivbi oduma ghi koko gha rri evbare, ibiẹka giẹrẹ ghi gha gbaroghe iran. 7 Avbe ẹmila kevbe avbe akpakomiza gha gba gha rri evbare, ivbi ẹmila kevbe ivbi akpakomiza ghi gba gha rrọọ vbe ọfunmwegbe. Avbe oduma ghi gha rri irunmwu vbe ẹmila. 8 Ovbi ọmọ obọ sẹtin gha ku vbe ehe ne ẹyẹn nọ mwẹ obi ye, vbe ne ẹi na ho ẹre ẹmwẹ. 9 Ai ra miẹn emwi dan ọkpa ra emwi nọ kuan ọmwa egbe vbe Zaiọn, ne oke nọhuanrẹn ọghe Osanobua. [Irẹnmwi] e Nọyaẹnmwa gha vuọn otọe nii zẹ vbene amẹ vuọn olokun.
(Aizaia 65:25) Avbe akpakomiza kevbe ivbi ohuan gha gba gha rri evbare kugbe, avbe oduma ghi gha rri irunmwu zẹvbe ẹmila, avbe ẹyẹn i ghi [si ikuan egbe]. Emwi ọkpa ne ọre ọghe ọkhọ ra emwi dan, ai ghi ra miẹn ọnrẹn vbe Zaiọn ne oke nọhuanrẹn mwẹ.”
(Jọn 5:28, 29) Wa ghẹ gi ọna yan uwa unu ruan, rhunmwuda ẹdẹ dee ne avbe orinmwi ni rre idin gha họn urhu ẹre, 29 iran ghi ke unu idin iran ladian, a gha huẹn iran ni ru ẹse kpaegbe ne iran gha rrọọ, a gha huẹn iran ni ru emwi dan kpaegbe, a ghi bu abe gbe iran.
UHUNMWU EBE 4
DE ARO ỌMWA NE JESU KRISTI KHIN?
(Jọn 3:13) Ọmwa nọ he hin odukhunmwu gha rrie ẹrinmwi ẹi rrọọ, gberra Ovbi Ọmwa nọ ke ẹrinmwi tuorre gha dee.”
(Jọn 6:38) Rhunmwuda, te imẹ ke ẹrinmwi gha dee do ru zẹ vbene ọmwa nọ gie mwẹ hoo, ighẹ ẹi re vbene imẹ hoo.
(Jọn 6:62) Adeghẹ wa ghi miẹn wẹẹ, Ovbi Ọmwa dọlegbe gha rrie odukhunmwu, vbe ehe nọ ka ye yi vbo?
(Jọn 17:4, 5) Mẹ rhie uyi ruẹ ma nẹ vbe agbọn: Iwinna ne u [mu] mẹ, I winnaẹn fo nẹ. 5 Evbavba ne Evbavba, rhie uyi mẹ . . . nian, egbe uyi ne I ka guẹ mwẹ vbe a ma he yi agbọn.”
(Jọn 14:28) Wa họẹn vbe I tama uwa wẹẹ, ‘I ra kpa sokpan I gha vbe dọlegbe bu uwa rre.’ Adeghẹ te uwa gele hoẹmwẹ mwẹ, te uwa [khian] gha ghọghọ wẹẹ mẹ bu Evbavba khian, rhunmwuda, irẹn kpọlọ sẹ mwẹ.
(Matiu 9:35, 36) Jesu keghi suẹn gha lele avbe ẹvbo nikhua kevbe ne giẹrẹ ni rre enii khian, ọ kegha maa iran emwi vbe dọmwadẹ [sinagọg], ọ keghi kporhu iyẹn nọ maan ọghe Arriọba Osanobua. Ọ keghi mu iran hia ni khuọnmwi kevbe ni huẹhuẹ egbe rran. 36 Ugbẹnvbe ọ ghi miẹn avbe emwa ni gbe ẹbu, ekhọe ẹre keghi vuọn ne agiẹngiẹn, rhunmwuda ehia wa khọn yo khọn rre zẹvbe ohuan ne ẹi mwẹ nọ suẹe.
(Filipai 2:8, NW) Yevbesọni, vbe ọ rre zẹvbe ọmwa nagbọn, ọ keghi mu egbe rriotọ, ọ na họn ẹmwẹ ya sẹ ẹdẹ nọ wu, uwu nọ wu vbe erhan irrioya.
UHUNMWU EBE 5
ADẸWERRIEGBE—ẸSE ỌHẸ NỌ GHI HIUNSI SẸ NỌ KE OBỌ OSANOBUA RRE
(Matiu 20:28) Zẹ vbene Ovbi Ọmwa ye, ọ ma rre na do gha gae, sokpan ne irẹn do ga emwa kevbe nọ ya [arrọọ ọghẹe] dẹ emwa ni bun werriegbe.”
(Rom 5:19) Zẹ vbene iyin ehọ orhiọnkpa ya emwa hia khian emwa orukhọ, erriọ zẹẹ ẹre ahọn ẹmwẹ ọghe orhiọnkpa gha vbe ya emwa hia khian emwa ata vbe odaro Osanobua.
(Rom 3:23, 24) Rhunmwuda, emwa hia ru orukhọ nẹ, iran keghi vbe khian rree ne uyi imiẹnfan Osanobua. 24 Sokpan vbekpa ẹsọhẹ Osanobua na rhie ne emwa vbe ọhẹ, a keghi lekpae Jesu Kristi nọ fannọ iran ye otọ, ya ehia khian ọmwata vbe odaro ẹre.
(Luk 22:19, NW) Vbe iyeke ọni, ọ keghi mu ebrẹd, ọ na kpọnmwẹ Osanobua, ọ ghi giagiae nẹ, ọ na ghae re ne iran, ọ na kha wẹẹ: “Ọna mudia ye ihe egbe mwẹ ne I khian ya zọ ese ne uwa. Wa gha ru ọna ya ye mwẹ rre.”
UHUNMWU EBE 6
DE EHE NE IMA YO VBE IMA GHA WU NẸ?
(Asan-Ibo 9:5, 6) Erriọ nọ, emwa ni rre agbọn rẹnrẹn ighẹ iran gha wulo, sokpan, iran ni wulo nẹ ma rẹn emwi rhọkpa. Iran i ghi vbe mwẹ ere ọvbehe, a mianmian iran nẹ fẹẹrẹ. 6 Ahoẹmwọmwa iran, ẹko khọmwẹ iran, kevbe emwi nọ fifi iran egbe, ehia wulo lele iran. Iran i ghi sẹtin [gha] mwẹ obọ vbe emwi ke emwi na ru vbe agbọn na.
(Asan-Ibo 9:10) Mu aro ye iwinna ne u rhirhi gha winna rhunmwuda, a gha [wu] nẹ, a i ghi ru emwi rhọkpa, iro i ghi rrọọ, irẹnmwi i ghi rrọọ, ẹwaẹn i ghi rrọọ, ehe ne uwẹ rrie ẹre ọnii khin.
(Gẹnẹsis 3:19) Te ọfọ gha fọọ, ne u ya miẹn ẹsọn, ne otọ miẹn ehe na mọ ọmọ ladian, u te dọlegbe [khian] ekẹn na ya ma an, ekẹn nii u gha vbe dọlegbe khian.”
(1 Jọn 4:8) Ọmwaikọmwa ne ẹi mwẹ ahoẹmwọmwa, ọ ma rẹn Osanobua rhunmwuda, ahoẹmwọmwa ọre Osanobua khin.
UHUNMWU EBE 7
EMWA NI WULO GHA RHIỌ KPAEGBE!
(2 Kọrinti 1:3, 4) Wa gi ima kpọnmwẹ Osanobua kevbe Erha Nọyaẹnmwa Jesu Kristi, Erha nọ mwẹ itohan kevbe Osanobua ne iyobọ hia ke obọ ẹre rre. 4 Irẹn ẹre ọ ye ima obọ vbe uwu ọlọghọmwa mwa hia, ne ima sẹtin gha ye emwa hia ni ghi rre uwu ọlọghọmwa ughughan hia obọ, vbekpa ne a na loo egbe iyobọ nii ne ima vbe miẹn vbe obọ Osanobua.
(Jọn 11:41, 42) Iran keghi mu okuta nii hin rre. Jesu keghi tọn aro mu ghee odukhunmwu, ọ wẹẹ, “Evbavba, I kpọnmwọọn . . . ne u na damwehọ mwẹ. 42 I rẹnrẹn ighẹ u damwehọ mwẹ vbe ẹghẹ hia, sokpan, rhunmwuda iran ni rre emwa na nian, ẹre I gu kha vberriọ, ne iran miẹn ehe na rẹn ighẹ uwẹ ẹre ọ gie mwẹ.”
(Aizaia 40:26) Tọn aro mu ghee odukhunmwu! Gha ọ yi avbe orhọnmwẹ ne u dẹghe yi? Ọmwa nọ viọ iran ladian vbe [na ghee] ivbiyokuo? Ọ rẹn inu ne iran khin, te ọ he ọkpọkpa vbọ eni! Ẹtin ẹnrẹn kpọlọ sẹ vberriọ [wẹẹ], ọkpa vbe iran nọ gha wii ẹdẹ i rrọọ!
(Iwinna 24:15, NW) Emwi ne I yaro yi, ẹre ikpia na vbe yaro yi, ọni nọ wẹẹ, arhiọkpaegbe a gha rrọọ ne emwa ni mwẹ imudiase kevbe ne ẹi mwẹ imudiase.
(Aizaia 25:8) E Nọyaẹnmwa ne Udazi gha fuẹn uwu rua ẹdẹdẹmwẹdẹ. Ọ gha khiẹn ameve hin aro emwa hia rre, ọ ghi mu efa nọ te rre egbe emwa rẹn, vbe otọ agbọn hia, hin iran egbe rre. E Nọyaẹnmwa tobọ re ẹre ọ tae.
UHUNMWU EBE 8
DE EMWI NE ARRIỌBA OSANOBUA KHIN?
(Matiu 6:9-13) “Vbenian ọre uwa [khian] ya gha na erhunmwu: ‘Erha mwa ne ọ rre ẹrinmwi: Gia ya ọghọ ne eni ruẹ nọhuanrẹn, 10 gi Arriọba ruẹ rre, gia gha ru iho ruẹ vbe agbọn vbe ne iran ru vbe ẹrinmwi. 11 Rhie evbare nọ sẹ ne ima ẹrẹna. 12 Ya orukhọ mwa hia bọ mwa, vbe ne ima ya bọ eni ru mwa khọ. 13 Ghẹ gia danmwẹ mwa ghe, rhie mwa lẹre hin obọ Ọkaẹrhia nii.
(Arhie Maan 14:1) Ugbẹnvbe I ghi tọn aro mu, I keghi ya bẹghe Oteghe Ohuan nii, ọ mudia yan uhunmwu Oke Zaiọn: Arhunmwu arriaisẹn enẹyan-ikiọkhọe (144,000) keghi mudia kẹe, a keghi gbẹn eni ẹnrẹn kevbe ọghe Erhae ye ehia uharo.
(Arhie Maan 14:4, NW) Iran na keghi re ikpia ni ma gu ikhuo ru emwi rhọkpa, vbene ẹmwata, te iran wa da egbe iran yi. Iran na, ẹre ọ lele Oteghe Ohuan la ehe nọ rhirhi la. A keghi dẹ iran vbuwe ẹbu emwa nagbọn zẹvbe ẹbu nokaro na viọ gie Osanobua kevbe Oteghe Ohuan nii,
(Arhie Maan 12:7-10) Ẹghẹ nii ẹre okuo na sa vbe ẹrinmwi. Maikẹl kẹ kevbe avbe odibosa kegha gu ugbogiorinmwi nii khọn, [ugbogiorinmwi nii] keghi viọ avbe odibo ẹre ba egbe, ọ na vbe gha gbinna. 8 Sokpan obọ ke ukhunmwu ne ugbogiorinmwi nii, a ma ghi vbe kue ne irẹn vbe avbe odibo ẹre di ẹrinmwi ya ọvbehe. 9 A keghi mu ugbogiorinmwi ne gẹdẹgbẹ nii fua. Irẹn ọrọre ẹyẹn nẹdẹ nii, na tie ẹre Setan, nọ mu otọ agbọn hia rẹrẹ. A keghi fi ẹre fi agbọn kẹ kevbe avbe odibo ẹre hia. 10 I keghi họn urhu nọ la ọkpa nọ khare vbe ẹrinmwi wẹẹ, “Banbanna nian, imiẹnfan Osanobua rre nẹ. Banbanna nian, Osanobua rhie ẹtin ẹnrẹn ma nẹ zẹvbe Ọba. Banbanna nian, Mẹzaia rhie asẹ ọre ma nẹ. Rhunmwuda, ọmwa nọ gu etẹn [ima] gui, nọ mudia vbe odaro Osanobua gha ba iran ifi ẹzọ, asọn kevbe avan, a muẹn fua hin ẹrinmwi rre nẹ.
(Psalm 37:10) Vbọ ma he kpẹe wan, a gha ho emwa dan bẹkun. U gha gualọ iran, sokpan u i ra miẹn iran.
UHUNMWU EBE 9
UFOMWẸ AGBỌN NA SIKẸ OTỌ NẸ RA?
(Hibru 10:24, 25) Wa gi ima gha zẹ ye ẹmwẹ egbe, ne ima gha ye egbe obọ, na gha mwẹ ahoẹmwọmwa, kevbe na gha ru emwi esi. 25 Wa ghẹ gia dobọ iko na do miẹn egbe yi, zẹ vbene emwa eso ru na, sokpan wa gia rhie igiọdu ne egbe, [katekate] ne a na wa miẹn nian wẹẹ, Ẹdẹ Nọyaẹnmwa sẹ otọ fo nẹ.
UHUNMWU EBE 10
ẸMWATA NỌ DEKAẸN AVBE ODIBO
(Gẹnẹsis 6:2, NW) ivbi Osanobua ni rre ẹrinmwi keghi bẹghe ẹre wẹẹ, ikhuo ni rre otagbọn wa mose ẹsẹsẹmwẹse. Ẹre iran na ghi gha viọ ni yẹẹ iran vbọ rọnmwẹ.
(2 Kọrinti 2:11) Na ghẹ miẹn ehe na rhie otọ ne obọ e Setan ya ke odukhunmwu ne ọghe ima, rhunmwuda ma rẹn ehe nọ ghae yi.
(Diuteronomi 18:10, 11) Wa ghẹ ya ivbi uwa zọ ese vbe erhẹn aka ọghe uwa, wa ghẹ vbe gi emwa uwa zẹ ọbo edunna ra ne iran gha fi iha ra ne iran gha fi emwa unu. 11 Ra [ne iran gha ru] ẹbo, ghẹ vbe gi iran ya gha gualọ otọ emwi vbe obọ emwa ni wulo nẹ.
(Itan 18:10) Te [eni] Enọyaẹnmwa ye vbe owa ọkhẹ nọ wegbe, ehe ne emwa esi gha lẹẹ fi, iran ghi vbe miẹn uhunmwu.
(Jems 4:7, 8) Rhunmwuda ọnii khekherriọ, wa gha zẹ egbe uwa obọ ne Osanobua. Wa mu aro igbinna daa Esu, ọ gha lẹ hin ehe ne uwa ye rre. 8 Wa sikẹ Osanobua, irẹn gha vbe sikẹ uwa. Wa kpe obọ uwa, wa ne emwa orukhọ. Wa kpe ekhọe uwa huan, wa ne emwa ẹkẹ vbe iwẹnwẹn.
UHUNMWU EBE 11
VBỌSIẸ NE USẸ NA GBA EHE HIA?
(2 Pita 3:9, 10) Zẹ vbene emwa eso roro ẹre, ẹi re te Nọyaẹnmwa ghi si ẹre kpẹe vbe otọ ighẹ emwi nọ wẹẹ irẹn ra ru, sokpan te ọ zin egbe rhunmwuda uwa, rhunmwuda irẹn i hoo ne ọmwa rhọkpa fuan, sokpan ọ hoo ne emwa hia fiwerriẹ hin orukhọ iran rre. 10 Sokpan ẹdẹ Nọyaẹnmwa gha rre zẹvbe oyi. Vbe ẹdẹ ne ẹdẹnẹdẹrriọ, uwu owogho ne ọ khẹkhẹ ehọ, [ẹre a khian na ho ẹrinmwi] bẹkun, avbe emwi ni wie yo wie rre vbe ideghedeghe aro iso ghi giẹn ruan, ehia ghi la ọrhiae rrie, agbọn kẹ kevbe emwi ni rre uwu ẹre hia, ghi khian na ho bẹkun.
(1 Kọrinti 10:13) Edanmwẹ ne uwa he miẹn hia, egbe ne emwa ọvbehe hia vbe miẹn nọ. Rhunmwuda, Osanobua gha yan, te ọ muẹn sẹ, ẹi ra kue na danmwẹ uwa ghee gberra vbene ẹtin uwa sẹe, sokpan ẹghẹ ne a na danmwẹ uwa ghee nii, ọ gha rhie ẹtin ne uwa ya ya egbe miẹn ẹnrẹn, ne uwa miẹn ehe na sẹtin doẹ fe.
UHUNMWU EBE 12
VBUA KHIAN YA SẸTIN DO GHA RE ỌSIE OSANOBUA HẸ?
(Psalm 55:22) Zẹ ọlọghọmwa ruẹn obọ ne Nọyaẹnmwa, irẹn gha gbinna nuẹn, ẹi kue na mu ọmwa esi gbotọ.
(Psalm 15:1-5) Nọyaẹnmwa, de ọmwa nọ gha la uwu Ọgua Osa ruẹ? De ọmwa nọ gha ga, vbe Zaiọn ne oke nọ huanrẹn ruẹn? 2 Ọmwa nọ họn ẹmwẹ ne Osanobua vbe emwi hia. Nọ ru emwi nọ gbae ẹghẹ hia. Ne ẹmwẹ unu ẹnrẹn re ẹmwata kevbe nọ sẹ otọ ẹko. 3 Ọmwa ne ẹi zan emwa ọvbehe. Ọmwa ne ẹi fidọn ghe avbe esiọre, ne ẹi vbe ta ewẹwẹwẹ ye emwa ẹdogbo ẹre egbe. 4 Ọmwa ne emwa ne Osanobua kan fua sọnnọ, sokpan, ọ ghi gha ya ọghọ ne iran ni họn ẹmwẹ ne Nọyaẹnmwa. Ọmwa nọ ru zẹ vbene ọ yanrẹn vbe ẹghẹ hia, ehe nọ rhirhi khọn rẹn nọ degbe. 5 Ọ rhie ne emwa mọmọ vbene ẹi na vbe nọ igho isu. Ai vbe sẹtin ya igho dọẹ ne ọ sosẹ gbe nọ ma rukhọ. Ọmwa nọ ru emwi na hia, te ẹkun gha sẹ ọre otọ vbe ẹdẹ hia.
UHUNMWU EBE 13
GHA GBỌYẸMWẸ YE ẸSE ỌHẸ ỌGHE ARRỌỌ
(Psalm 36:9) Ehe ne u ye ẹre arrọọ hia ke rre, uwanmwẹ ruẹn ẹre ima ya bẹghe.
(1 Jọn 3:15) Ọmwa ke ọmwa nọ khuiwu ọtiọnrẹn, izigha nọ, wa rẹnrẹn wẹẹ izigha i mwẹ arrọọ ne ẹi fo . . .
(Ẹksodọs 21:22, 23, NW) “Adeghẹ ikpia na gha gbinna, iran na ya dekun ẹkpoliyẹkẹ, nọ ghi yae biẹ ọmọ nọ ma sẹ uki, sokpan ọmwa rhọkpa ma na wu, ọmwa nọ dekun ẹkpoliyẹkẹ nii ghi hae emwi hia ne ọdafẹn ẹkpoliyẹkẹ fian ẹre; ọ ghi hae re la obọ avbe ọbuohiẹn. 23 Sokpan deghẹ ọmwa rhọkpa na wu, a ghi ya arrọọ hae osa arrọọ,
(Iwinna 15:28, 29) Rhunmwuda, orhiọn nọhuanrẹn kevbe ima tae nẹ wẹẹ, na ghẹ vbe kun ihẹ ọvbehe ne uwa gberra avbe ilele nọ kere na: 29 wa ghẹ rri evbare na ya ru ẹbọ, wa ghẹ rri esagiẹn, wa ghẹ rri aranmwẹ na ya obobọ kuẹn gbua, wa ghi gha bi egbe hin alama oghẹ rre. [Ọ gha fu uwa egbe] adeghẹ uwa da egbe uwa yi, ne [uwa] ghẹ ru avbe emwi na. Wa khian ẹdẹ hia.”
UHUNMWU EBE 14
ẸGBẸE RUẸ GHA SẸTIN GHA SỌYẸNMWẸ
(Ẹfisọs 5:25-29) Wa ne avbe ọdọ, wa gha hoẹmwẹ amwẹ uwa, zẹ vbene Kristi hoẹmwẹ [iko], nọ na ya ẹdẹ agbọn rẹn fi ohan nẹẹn. 26 Te irẹn ru ọna, nọ miẹn ehe na ya ẹmwẹ ọnrẹn ya [iko] fi ohan ne Osanobua, vbe iyeke vbe ọ ghi ya amẹ kpe ẹre huan nẹ. 27 Nọ miẹn ehe na rhie [iko] gie egbe irẹn, kẹ kevbe ose ẹre hia, nọ huanrẹn kevbe ne ẹi mwẹ okan, ne emwi ma sa, nọ ma bunnọ ikuẹnkuẹn, kevbe ne ẹi mwẹ ehe nọ kẹe yi hiehie. 28 Te ọ kere ne ikpia gha hoẹmwẹ amwẹ iran, zẹ vbene iran hoẹmwẹ ikinnegbe iran. Okpia nọ hoẹmwẹ amwẹ ọnrẹn, egbe ẹre ọre ọ hoẹmwẹ ọnrẹn. 29 (Ai miẹn ọmwa nọ khọ ẹko ikinnegbe ẹre, sokpan te ọ koko ẹre, ọ ghi gha gbaroghe ẹre zẹ vbene Kristi gbaroghe [iko].
(Taitọs 2:4, 5) Ne iran miẹn ehe na gha maa avbe ikhuo ni ma he khian ọmaẹn re, ne iran gha hoẹmwẹ ọdafẹn iran kevbe ivbi iran. 5 Ne iran ghẹ gha balọ egbe, ne iran gha re ne ẹi mwẹ awua, kevbe amwẹ ne iye owa esi, ni họn ẹmwẹ ne ọdafẹn iran, ne ọmwa ke ọmwa ghẹ ya ukpẹ sankan ẹmwẹ Osanobua.
UHUNMWU EBE 15
ODẸ NỌ KHẸKE NE IMA YA GHA GA OSANOBUA
(Jọn 17:17, NW) Ya ẹmwata kpe iran huan; ẹmwata ẹre ẹmwẹ ruẹ khin.
(Jọn 17:6) “Mẹ [maa iran eni ruẹ nẹ], iran ne uwẹ hannọ ke uwu agbọn ladian nẹ. Ọghuẹ iran khin, uwẹ keghi viọ iran mẹ, iran vbe ru nẹ zẹvbe ne u gie.
(Jọn 13:35) Adeghẹ uwa hoẹmwẹ egbe, ẹre emwa hia gha na rẹn wẹẹ, erhuanegbe mwẹ ọre uwa khin.”
(Jọn 3:36) Ọmwa ke ọmwa nọ ya Ọmọ yi mwẹ arrọọ ne ẹi fo, ọmwa nọ ma ya ẹmwẹ Ọmọ ru emwi, ẹi khian gha mwẹ arrọọ, sokpan izohu Osanobua gha rrọọ ẹre uhunmwu ẹdẹdẹmwẹdẹ.
(Jọn 18:36) Jesu wanniẹn wẹẹ, “Arriọba mwẹ i re ọghe [agbọn] na, akpawẹ ọghe [agbọn] na ọre arriọba mwẹ khin, avbe irogho mwẹ gha [te] gbinna, na ghẹ miẹn ehe na mu mwẹ bu avbe Ju. Ẹo, Arriọba mwẹ i re ọghe [agbọn] na.”
(Matiu 24:14) A gha kporhu iyẹn nọ maan ọghe Arriọba na la otọ agbọn hia nẹ, zẹvbe osẹe ghe emwa hia, iyeke ọnii, ufomwẹ ghi do rre.
UHUNMWU EBE 16
GHA GA OSANOBUA VBE ODẸ NE IRẸN KPASẸ YI
(Ẹksodọs 20:4, 5, NW) “Wa ghẹ ka amazẹ rhọkpa ne egbe uwa, ra ama ọghe emwi ke emwi nọ rre ẹrinmwi, ra uhunmwu otagbọn, ra nọ rre uwu okun. 5 Wa ghẹ ya uhunmwu rhanmwẹ otọ ne iran, wa ghẹ vbe gi ọmwa ke ọmwa rẹrẹ uwa gha ga iran, rhunmwuda, mẹ ne Jehova, Osa nọ gualọ ugamwẹ na ma gua ẹre I khin, I gha rri emwa ni khuiwu mwẹ oya, ke iran kevbe ivbi iran, uhiẹn ya sẹ egbe orre nogieha kevbe orre nogienẹ,
(Aizaia 52:11) Wa ghẹ mwẹ wa ma kpa vbe Babilọn, wa ni viọ emwi na ya ga vbe Ọguosa mwẹ, wa ghẹ ye obọ kan emwi awua, wa gi egbe uwa gha re nọhuanrẹn, ne uwa kpa.
(Matiu 7:12) “Ru ne emwa ọvbehe egbe emwi ne uwẹ hoo ne iran ru ne uwẹ. Emwi na ya Uhi e Mosis kevbe avbe akhasẹ kha ẹre ọni khin.
(Hibru 10:24, 25) Wa gi ima gha zẹ ye ẹmwẹ egbe, ne ima gha ye egbe obọ, na gha mwẹ ahoẹmwọmwa, kevbe na gha ru emwi esi. 25 Wa ghẹ gia dobọ iko na do miẹn egbe yi, zẹ vbene emwa eso ru na, sokpan wa gia rhie igiọdu ne egbe, [katekate] ne a na wa miẹn nian wẹẹ, Ẹdẹ Nọyaẹnmwa sẹ otọ fo nẹ.
UHUNMWU EBE 17
ERHUNMWU KEGHI RE ẸSE ỌHẸ NỌ KE OBỌ OSANOBUA RRE
(Filipai 4:6, 7) Ghẹ si osi ye emwi rhọkpa, sokpan gha ya erhunmwu ne a na, nọ emwi ne u hoo hia vbe obọ Osanobua, u ghi gha ye ekhọe ọkpọnmwẹ ẹse nọ rẹn vbe ẹghẹ hia. 7 Te ọfunmwegbe Osanobua, nọ gberra ne ọmwa nagbọn gha sẹtin rẹn otọ re gha rhie ekhọe kevbe orhiọn uwa mwẹ, vbe ne ai na mwẹ ẹbe vbuwe Kristi Jesu.
(Jems 2:26) Rhunmwuda, zẹ vbene egbe ne orhiọn i ye [ya] re orinmwi, erriọ [vbe nọ] zẹẹ, iyayi ne ẹi mwẹ iwinna, orinmwi nọ.
(Matiu 6:9-13) “Vbenian ọre uwa [khian] ya gha na erhunmwu: ‘Erha mwa ne ọ rre ẹrinmwi: Gia ya ọghọ ne eni ruẹ nọhuanrẹn, 10 gi Arriọba ruẹ rre, gia gha ru iho ruẹ vbe agbọn vbe ne iran ru vbe ẹrinmwi. 11 Rhie evbare nọ sẹ ne ima ẹrẹna. 12 Ya orukhọ mwa hia bọ mwa, vbe ne ima ya bọ eni ru mwa khọ. 13 Ghẹ gia danmwẹ mwa ghe, rhie mwa lẹre hin obọ Ọkaẹrhia nii.
(Arhie Maan 14:6) Ẹghẹ nii ẹre I na bẹghe odibosa ọkpa, ọ wa tin khian vbe odukhunmwu gbaan, [ọ mwẹ] iyẹn nọ maan ọghe ẹdẹdẹmwẹdẹ, nọ ra na ma emwa nagbọn, kevbe dọmwadẹ uhunmwu ẹvbo kevbe ẹwae, kevbe ẹvbo na zẹ kevbe emwa.
(Filipai 4:13) I mwẹ ẹtin ne I ya ya egbe miẹn emwi hia vbekpae ẹtin ne [Osanobua] rhie mẹ.
UHUNMWU EBE 18
Ọ KHẸKE NE I YA EGBE FIOHAN NE OSANOBUA KEVBE NE I DINMWIAMẸ RA?
(Jọn 17:3) Ọna ọrọre nene arrọọ ne ẹi fo wẹẹ, ne emwa nagbọn rẹn ruẹn zẹvbe Osanobua ọkpa nọ re ọghe ẹmwata kevbe ne iran rẹn Jesu Kristi, ọmwa ne uwẹ gie.
(1 Pita 4:2, NW) nọ mieke na gha loo ẹghẹ nọ ghi dekẹ vbe ẹdagbọn rẹn vbe odẹ nọ gua ahoo ọghe Osanobua ro, ẹi re ahoo ọghe emwa nagbọn.
(Matiu 28:19) “Wa bu emwa hia gha rrie ehe hia, ne uwa ya gha ya iran khian erhuanegbe mwẹ, wa gha [dinmwi iran ye amẹ] vbe eni ọghe Erha, kevbe Ọmọ kevbe ọghe orhiọn nọhuanrẹn.
UHUNMWU EBE 19
SIKẸ E JEHOVA
(Matiu 22:37) Jesu wanniẹn wẹẹ, ‘Ya ekhọe ruẹ hia, orhiọn ruẹ hia, otọ ẹko ruẹ hia, kevbe ẹtin ruẹ hia hoẹmwẹ Nọyan ruẹn Osanobua ruẹ.’
(1 Jọn 5:3) Rhunmwuda, emwi na ya ahoẹmwẹ Osanobua kha ọre ọna khin, [ne ima gha] ru vbene iyi ne irẹn yi khare. Iyi nọ yi, i vbe re nọ lọghọ ne ima gbe.
(1 Tẹsalonaika 5:17) Wa gha na erhunmwu vbe ẹghẹ hia.
(1 Kọrinti 15:58) Rhunmwuda ọnii nian, wa ne etẹn mwẹ, wa mudia gbain vbe ne ai na vbọ owẹ. Wa tua obọ ye iwinna ne uwa winna ne Nọyaẹnmwa, ugbẹnvbe uwa rẹn nẹ nian wẹẹ, iwinna ne uwa winna vbuwe ugamwẹ Nọyaẹnmwa, ọkpa ne ẹi mwẹ esa, ẹi rrọọ.
(Kọlose 3:13) Wa gha ye egbe obọ, wa gha ya bọ egbe, deghẹ ọmwa ke ọmwa kevbe ogieva ẹre gba muan egbe ẹmwẹ, wa ghi gha ya bọ egbe, zẹ vbene [Osanobua] vbe ya bọ uwa.
© 2018 Watch Tower Bible and Tract Society of Pennsylvania